Aktar mill-Papa Ġwanni Pawlu II
...
|
KONĊELEBRAZZJONI MAL-KARDINALI L-ĠODDA
OMELIJA TAL-QDUSIJA TIEGĦU ĠWANNI PAWLU II
Il-Ħadd, 1 ta’ Lulju 1979
Għeżież Ħuti!
1. Nixtieq illum, flimkien
magħkom, nikkontempla il-Knisja għal kollox “sottomessa għal Kristu” (cf. Ef 5,24)
bħala Għarusa fidila. L-aħħar jiem li għexna flimkien waqt li mmeditajna s-sagrifiċċju
tal-Qaddisin Appostli Pietru u Pawlu, impenjajna ruħna nfittxu l-manifestazzjoni
tal-misteru mwettaq fil-vokazzjoni tagħhom, permezz tax-xhieda ta’ fidi u ta’
mħabba, mwettqa sal-mewt. Manifestazzjoni li nsibu tul l-istorja kollha
tal-Knisja, tul is-sekli u l-ġenerazzjonijiet ta’ wliedha fidili, tal-qaddejja u
r-rgħajja, waqt li jmorru lura b’dan il-mod għal dik l-imħabba sublimi, li biha
l-Feddej u l-Mulej tagħna “ħabb lill-Knisja u ta lilu nnifsu għaliha, biex
jirrendiha qaddisa, waqt li ppurifikaha permezz tal-ħasil tal-ilma… bl-iskop li
jressaqha quddiemu, din il-Knisja, sabiħa, bla tebgħa, bla tikmix, bla għajb
imma qaddisa u immakulata” (Ef 5,25-27).
Ma’ dik l-imħabba, ma’ dik
il-qalb minfuda fuq is-Salib u miftuħa għall-Knisja, l-Għarusa tiegħu, nixtieq
illum, flimkien magħkom, immur f’pellegrinaġġ spiritwali, li minnu aħna nfusna
għandna niġu lura “ppurifikati”, imħeġġa u mqaddsa” skont il-qies ta’ dawn
il-jiem.
Hawn hi l-Knisja! Frott
tal-imħabba bla qies ta’ Alla fil-Qalb ta’ Ibnu!
Hawn hi l-Knisja! Li ġġorr
il-frott kollu tal-imħabba tal-qaddisin Appostli, tal-Martri, tal-Konfessuri u
tal-Verġni! Tal-imħabba ta’ ġenerazzjonijiet sħaħ!
Hawn hi l-Knisja; Ommna u
Għarusa fl-istess ħin! Skop tal-imħabba tagħna, tax-xhieda tagħna u
tas-sagrifiċċju tagħna. Skop tas-servizz tagħna u tax-xogħol instankabbli tagħna.
Knisja, li għaliha ngħixu sabiex ningħaqdu ma’ Kristu f’imħabba unika. Knisja,
li għaliha intom, Meqjumin u Għeżież Ħuti, maħturin Kardinali fil-Konċistorju
tal-bieraħ, għandkom minn issa ‘l hemm tgħixu b’mod iktar intens, waqt li
tingħaqdu ma’ Kristu fi mħabba unika lejha.
2. Il-Knisja hija fid-dinja.
Intom ilkoll tikkostitwixxu x-xhieda ħajja fid-dinja, waqt li taslu hawn minn
tant pajjiżi mbegħda fl-ispazju, imma fl-istess ħin, qrib b’mod spiritwali.
Il-Knisja hija fid-dinja
bħala sinjal tar-rieda feddejja ta’ Alla nnifsu. Mhijiex jewwilla hi il-Ġisem ta’
Dak li l-Missier ikkonsagra bid-dlik u bagħatu fid-dinja? “Bagħtni biex inġib l-aħbar
ferrieħa lill-foqra, biex ninfaxxa l-ġrieħi tal-qlub maqsuma, biex inxandar
il-ħelsien tal-iskjavi, il-ħelsin mill-kalzri lill-priġunieri… biex nikkonsla
lill-batuti kollha… biex nagħtihom kuruna minflok l-irmied… kant ta’ ferħ
minflok qalb imdejqa” (Iż 61,1-3).
Jewwilla l-Knisja
m’għandhiex tkun dan kollu? Jewwilla ma tridtx tgħix b’dan kollu, la darba trid
twieġeb għall-missjoni feddejja ta’ Dak, li huwa Għarus u Kap?
Intom tafu sewwa, Meqjumin
u Għeżież Ħuti, - u wkoll il-knejjes kollha li minnhom intom ġejjin dan jafuh –
b’liema lingwaġġ ta’ fatti, esperjenzi, aspirazzjonijiet, dwejjaq, tbatijiet,
persekuzzjonijiet u tamiet, jeħtieġ li nittraduċu dak it-test profetiku antik
ta’ Iżaija, sabiex jesprimi, fil-lingwaġġ ta’ żmienna, kif il-Knisja għandha
għeruqha fid-dinja, sinjal ħaj tar-rieda feddejja tal-Missier Etern fir-rigward
ta’ kull bniedem u tal-umanità kollha! U l-Knisja tal-epoka diffiċli tagħna –
mit-tieni millenju li riesaq lejn tmiemu – topera f’tensjonijiet u theddid
estremi jew ta’ biżghat u stenniji kbar!
3. F’kull żmien din
il-Knisja hija sempliċi bl-istess sempliċità li jispiraha il-Mulej u Mgħallem
tagħna bil-kelma tal-Vanġelu. Kemm ftit jinħtieġ sabiex il-Knisja tibda teżisti”
fost il-bnedmin! “Fejn hemm tnejn jrw tlieta miġburin f’ismi, jien ninsab
f’nofshom” (Mt 18,20); u “jekk tnejn minnkom fuq l-art jaqblu li jitolbu
kwalunkwè ħaġa, Missieri li jinsab fis-smewwiet jagħtihielhom” (Mt 18,19).
Kemm ftit jinħtieġ sabiex
din il-Knisja teżisti, tummultiplika u tinfirex! Dwar dan jiddeċiedu dawk
it-tnejn jew tlieta miġburin f’isem Kristu u permezz tiegħu magħqudin, fit-talb,
mal-Missier. Kemm ftit huwa meħtieġ sabiex din il-Knisja teżisti kullimkien,
saħansitra hemm fejn, skont il-“liġijiet” umani, la hemm u linqas jistà jkun
hemm u fejn tiġi kkundannata għall-mewt! Kemm ftit huwa meħtieġ sabiex teżisti u
twettaq is-sustanza l-iktar profonda tagħha!
U sabiex tgħix iż-żgħożija
perpetwa tagħha! L-istess, li għexu l-ewwel insara, li “kienu regolari fis-smigħ
tat-tagħlim tal-Appostli u fl-għaqda fraterna, fil-qsim tal-ħobż u fit-talb…
Kienu jaqsmu l-ħobż fid-dar waqt li jieħdu l-ikliet bil-ferħ u bis-sempliċità
tal-qalb, waqt li jfaħħru lil Alla u waqt li jgawdu l-istima tal-poplu kollu” (At 2,42),
kif naqraw illum fit-tieni qari tal-Atti tal-Appostli, qari li minnu jitqanqlu
mhux biss it-tifkiriet, imma x-xewqat ta’ sempliċità tal-Għarusa, li għadha kemm
sperimentat is-sagrifiċċju tal-imħabba tal-Għarus imsallab tagħha u tifraħ
bil-fertilità ġenitriċi tagħha fl-Ispirtu Santu, meta – kif naqraw – “il-Mulej
kuljum kien jgħaqqad mal-komunità lil dawk li kienu mifdija” (At 2,48).
Din il-Knisja hija
sempliċi bis-sempliċità li hija tagħha.
U hija qawwija b’dik
il-qawwa unika, li rċeviet mingħand il-Mulej: b’dik unika! Bl-ebda waħda oħra!
“Dak kollu li torbtu fuq l-art ikun marbut fis-sema u dak kollu li tħollu fuq
l-art ikun maħlul fis-sema” (Mt 18,18).
Hawn hi l-kwalità ta’ din
il-qawwa tal-Knisja. Qawwa simili ma jafha la l- bniedem u linqas l-umanità, fl-ebda
dimensjoni oħra tal-eżistenza tiegħu individwali jew soċjali. Hija ma tikseb din
il-qawwa mill-ebda kamp tat-temporanjetà tagħha u mill ebda riserva tan-natura…
Tali qawwa tiġi biss minn Alla. Direttament minn Alla. Tali qawwa hija mifdija
mid-Demm tal-Feddej u Għarus tagħha. Din hija qawwa tal-Ispirtu Santu.
U din tidħol f’allejanza
ma dak li fil-bniedem hemm f’iktar profond: permezz tal-fidi, it-tama u l-karità
tfittex – tfittex b’mod li ma jaqtà qatt – is-soluzzjonijiet fis-sema ta’ dak li
qatt ma jistà jkun għal kollox solvut fuq l-art.
4. Meqjumin u Għeżież Ħuti!
Kemm nifirħu bil-fatt li intom, Kardinali ġodda, illum tiżżewġu din il-Knisja
fuq l-eżempju ta’ Kristu! Sinjal ta’ dan iż-żwieġ huwa ċ-ċurkett, li minn hawn u
ftit ieħor inlibbiskom f’subgħajkom.
Kemm nifirħu b’dawn
iż-żwiġijiet tagħkom, li jqegħdukom fil-ħajja tal-Poplu ta’ Alla, fuq l-art
kollha, influss ġdid ta’ mħabba u sikurezza ġdida ta’ mħabba! Effikaċja ġdida –
nittamaw – ta’ mħabba. Minn dik l-imħabba li biha ġejna maħbubin u li biha
għandna nħobbu lil xulxin. Imħabba li tiġi minn l-Għarus u hija għall-Għarus.
Imħabba, li permezz tagħha
l-Knisja għandha tkun maħbuba b’fervur imġedded minn kull wieħed minnkom.
Imħabba, li permezz tagħha
hija għandha terġà tesprimi ruħha fis-sempliċità u l-qawwa kollha tagħha, li
rċeviet mingħand il-Mulej.
Imħabba, li permezz tagħha
l-Knisja għandha mill-ġdid issir Għarusa “sine ruga et macula” għall-Għaqrus.
Din l-imħabba nawguralkom
flimkien mal-Poplu ta’ Alla kollu, li jinsab f’Ruma u fid-dinja. Inqiegħed dan
l-awgurju tiegħi f’idejn Omm il-Knisja, Għarusa tal-Iospirtu Santu.
Amen!
Miġjub mit-Taljan għall-Malti minn Emanuel Zarb
|