Inkompli naqdi bit-tbatija u t-talb.
Tnejn, 11 ta' Frar
2013:
“Naf tajjeb
li dan il-ministeru, minħabba n-natura essenzjalment spiritwali
tiegħu, irid ikun imwettaq mhux biss bil-ħidma u bil-kliem, imma
xejn anqas ukoll bit-tbatija u t-talb.”
Wara li
bdiet tgħaddi l-ħasda tal-aħbar tar-riżenja tal-Papa Benedittu, u
wara li wieħed jaqra u jifli għal aktar minn darba id-diskors qasir
ta’ madwar għoxrin linja kollox li għamel, forsi l-aktar Ii jolqot
huwa propju dan il-kliem, li wera kemm dan il-papa, fil-pontifikat
relattivament qasir tiegħu, fehem li fost il-modi kif ried jaqdi lil
Knisja kien hemm dak ukoll tat-tbatija u t-talb.
Għal min
f’dawn l-aħħar xhur segwa mill-qrib id-diskorsi tal-Papa, forsi l-għażla
ta’ ħajja moħbija u miġbura fil-komtemplazzjoni u t-talb li huwa
għamel biex fiha jgħaddi fl-aħħar żmien ta’ ħajtu, ma kinetx
daqshekk ta’ sorpriża għax huwa ilu żmien jitkellem dwar il-ħtieġa
kbira li l-Knisja għandha ta’ dan il-mod ta’ ħajja.
Fl-Udjenza
Ġenerali li ta fit-13 ta’ Ġunju tas-sena li għaddiet huwa qal li
aktar ma tikber l-għaqda tagħna ma’ Alla, u aktar ma t-talb tagħna
jsir intens, aħna wkoll nibdew niffukaw fuq dak li huwa essenzjali u
nifhmu li mhux bil-qawwa tal-mezzi tagħna li tikber is-Saltna ta’
Alla, imma huwa Alla li jwettaq mirakli permezz tad-dgħufija tagħna.
Ċert li
jekk isir studju serju tal-aħħar kitbiet u diskors tal-Papa
Benedittu, wieħed jintebah li din l-aħbar li biha llum ħasad
saħansitra lill-eqreb kollaboraturi tiegħu, ilu jirrifletti dwarha
għal bosta xhur.
|