L-ewwel jum tal-ġimgħa.
… Tmint ijiem wara, id-dixxipli reġgħu kienu ġewwa.
Għall-insara tal-bidu,
l-ewwel jum tal-ġimgħa kien jum il-Mulej u jum il-komunità.
Ma kienx biss jum li fih iridu jmorru jwettqu dover tagħhom
bħas-soltu. Iċ-celebrazzjoni Ewkaristika ma kienx drawwa li
wirtu minn għand ta’ qabilhom. Għalihom kien jum speċjali,
"IL-JUM" li fih mhux biss jiċċelebraw il-qawmien ta’ Kristu
mill-mewt, imma wkoll jum il-komunità. Għaliex kien fil-komunità
li huma kienu jsibu lill-Mulej Ġesù. Fi klien San Pawl
stess, il-komunità (il-Knisja) kienet l-istess ġisem ħaj li
tiegħu Kristu kien ir-ras. (1 Kor 12 :12) Għall-ewwel insara,
dak il-jum kien il-jum tagħhom, li jiddistingwihom mill-Lhud
u mill-pagani.
□
U jiena? U aħna?
Ieqaf aħseb ftit x’inhi l-attitudni tiegħek għall-jum tal-Ħadd.
□
Jum il-Ħadd għadu
jiddistingwi lilna l-insara mill-oħrajn jew forsi aħna wkoll,
ħadna għalina id-drawwiet tal-pagani li ma jemmnux fi Kristu?
□
Fil-jum tal-Ħadd,
għadni jiena wkoll insib lill-Mulej fil-komunità?
□
Meta tħares lejn id-drawwiet
ta’ madwarna, tintebaħ li l-kultura, illum serqitilna jum
il-Mulej? Jum il-komunità? U x’serqitilna aktar? Jew
forsi ċedejna għalih?
Meta d-dixxipli
kienu flimkien imbeżżgħa mil-Lhud.
Flimkien, imma
mbeżżgħa! Tgħid min jaf għaliex hux? Forsi għax Kristu ma
kienx magħhom? Ħasbuh mejjet? Forsi wkoll għax għadhom ma
tbattlux għal kollox mill-ispirtu tagħhom biex jirċievu l-Ispirtu
Tiegħu?
□
U lili? U lilna?
X’inhu dak li jbeżżgħana, anke meta bħala Knisja nkunu
flimkien?
□
Tgħid għaliex?
Forsi għax bħad-dixxipli naħsbu li Ġesù ħalliena waħedna?
□
Jew forsi għax
mimlijin wisq bl-ispirtu u l-pjanijiet tagħna u għalhekk
għadna ma nistgħux nimtlew bl-Ispirtu Tiegħu?
Bil-bibien magħluqa.
□
Liema bibien kellhom
magħluqa? Ta’ darhom? Ta’ kamrithom? Jew ta’ qalbhom?
□
Kemm drabi Ġesù
jgħidilna, "Morru", imma aħna ninqaflu fina nfusna, wara l-bieb
ta’ darna, tal-għaqdiet tagħna, fis-sagristiji?
□
Illum, minkejja l-bibien
tad-dar magħluqin, hemm minn xorta waħda qed jidħol fi
djarna u fil-kmamar tagħna u jagħmlilna l-ħsara? Ma jidħolx
mit-tieqa bħall-ħalliel izda minn dik il-kaxxa li aħna
ngħidulha TV. Jidħol minn dak il-mezz modern li aħna
nsejħulu l-internet.
Ġie Ġesù u qagħad
f'nofshom.
□
Kuraġġ! Għal Ġesù
l-ebda bieb ma jista’ jżommu barra. Ġesù kapaċi jidħol
xorta waħda, anke jekk il-bibien huma maqfula.
□
Imma il-bieb ta’
qalbi, dak le, dak irrid niftaħulu jien.
Lid-dixxipli …
Uriehom idejh u ġenbu. …… U lil Tumas, "Ġib sebgħek hawn
u ara idejja…"
□
Huwa mis-sinjal
tal-pjagi li d-xxipli għarfu lil Ġesù.
□
Jekk infittex Ġesù
bla marki tal-imsiemer (bla salib) allura qed infiitex
fil-vojt.
□
Fil-ġisem ta’ Ġesù
rxoxt, il-marki tal-pjagi m’humiex feriti li għadhom ma
jistgħux jagħlqu, imma sinjali ta’ rebħa fuq il-mewt u fuq
id-dnub.
Id-dixxipli ferħu
meta raw lill-Mulej.
"Ferħu" żgur mhix
traduzzjoni eżatta li turi dak li ħassew.. Normalment
il-bniedem jifraħ jekk jirbaħ il-lottu. Jekk jiltaqa’ ma’
ħabib li kien ilu ma jarah. Jekk jgħaddi minn xi eżami jew
isib impieg għal qalbu. Imma meta d-dixxipli raw lil Ġesù,
li għalihom kien mejjet, allura jekk ngħidu li ferħu, żgur
ma nkunux qed nuru biżżejjed ir-reazzjoni tagħhom. (New
American Standard Version – Rejoiced.)
□
U jiena qatt
għaddejt żmien f’ħajtni meta kont ħsibt li tlift lil Ġesù?
Li kien mejjet?
□
Illum, erġajt
sibtu?
□
Kif niddeskrivi din
l-esperjenza tiegħi? Dak li ħassejt dakinhar?
"Is-sliem għalikom!"
Is-sliem jew il-paċi
tal-bniedem ma’ Alla, miegħu nnifsu u mal-oħrajn kienu l-missjoni
ewlenija li għaliha l-Iben ta’ Alla sar bniedem. Fit-twelid
ta’ Ġesù, l-anġli ħabbru l-paċi. Fil-qawmien tiegħu mill-mewt,
Huwa stess ta l-paċi lill-ħbiebu. Għaddew elfejn sena u
llum donnu li l-bniedem għandu kollox ħlief il-paċi.
□
Forsi l-bniedem m’għandux
paċi għaliex għadu ma kellux il-laqgħa ma’ Kristu Rxoxt kif
kellhom id-dixxipli.
□
L-ewwel paċi ma’
Alla >> Imbagħad paċi miegħi nnifsi >> Fl-aħħar paċi ma’ l-oħrajn.
"Kif il-Missier
bagħat lili, hekk jien nibgħat lilkom."
□
Kull min huwa
mgħammed huwa mibgħut minn Kristu nnifsu. Anke jien!
□
Il-missjoni mhi ta’
ħadd ħlief ta’ Kristu nnifsu. L-istess waħda li Ġesù
rċieva minn għand il-Missier.
□
Nifhem ir-responsabbiltà
u d-dinjità kbira li għandi f’din is-sejħa?
□
Naf li meta nfixkel
lil oħrajn milli jwettqu l-missjoni fdata lilhom, inkun qed
infixkel lil Kristu stess?
Nefaħ fuqhom u
qalilhom: "Ħudu l-Ispirtu s-Santu."
□
Forsi mhux l-istess
kien għamel Alla fil-ġnien tal-Eden biex ta l-ħajja lill-ewwel
bniedem? Nefaħ fiħ l-istess nifs Tiegħu – l-Ispirtu Tiegħu.
Anke miegħi, għamel l-istess.
□
Għad-dixxipli ta’
Kristu dan kien Ħolqien ġdid. Kif Ġesù nnifsu qal lil
Nikodemu, huma wkoll twieldu mill-ġdid mill-Ispirtu s-Santu.
(Ġw 3 :3) Jiena dixxiplu ta’ Kristu? Twelidt mill-Ispirtu?
□
Kif kiteb
l-Evanġelista fil-prologu tal-istess evanġelju, "lil dawk li
laqgħuh tahom is-setgħa li jsiru wlied Alla, dawk li jemmnu
f'ismu, li twieldu mhux bid-demm, anqas mill-ġibda
tal-ġisem, u anqas mir-rieda tal-bniedem, iżda minn Alla."
(Ġw 1 :12-13) Jiena lqgħajtu f’ħajti? Emmint f’ismu?
"Dawk li taħfrulhom
dnubiethom ikunu maħfura, u dawk li żżommuhomlhom ikunu
miżmuma."
Din hi l-missjoni
tal-Knisja… Missjoni li ta Kristu nnifsu. Għaliex din
ukoll kienet il-missjoni tiegħu. "U
Ġesù ġie fl-inħawi kollha ta' madwar il-Ġordan, ixandar
magħmudija ta' ndiema għall-maħfra
tad-dnubiet.”
(Lq 3:3)
Tumas, wieħed
mit-Tnax, ma kienx magħhom. … Tmint ijiem wara, id-dixxipli
reġgħu kienu ġewwa, u Tumas magħhom.
□
Tgħid ma kienx jaf
Ġesù li Tumas ma kienx hemm? Forsi kultant naħseb li Ġesù
mar u lil Tumas ma nzertahx hemm, u allura kellu jerġa’ jmur
darb’ oħra. Jew forsi Ġesù għamel dan bi skop? X’kien il-messaġġ
li ried jgħaddi lilhom?
□
U llum x’inhu l-messaġġ
li jrid jgħaddi lilna?
□
U għalija, tgħid
għandu xi messaġġ?
□
Ġieli ħsibt li nista’
nsib lill-Ġesù ‘l bogħod mill-Knisja tiegħu?
"Rajna l-Mulej."
□
Mhux qalulna li rawh.
Mhux qalulna li qam. Mhux qalulna li hu ħaj. Imma rajnih
aħna stess. Jiena rajtu? Wassaltha l-aħbar ta’ din id-dehra?
□
Din hi xhieda tassew
ħajja! Mhux li nirrakonta dak li qrajt jew li qaluli, imma
li nwassal esperjenza li kelli jiena stess.
"Jekk ma narax … …
ma nemminx."
□
Jiena wieħed minn
dawk li dejjem infittex is-sinjali biex nemmen?
□
Is-sinjali juruni t-Triq.
X’inhu l-aktar importanti għalija, is-sinjal jew it-Triq?
Hemm ħafna sinjali
oħra li Ġesù għamel.
L-Evanġelista kien
konxju li kien hemm bosta sinjali oħra li għamel Ġesù. Imma
għalfejn jiktibhom kollha? Forsi min ma jemminx f’Ġesù
b’dawn is-sinjali, ħa jemmen b’oħrajn?
Min mhux fidil fil-ftit,
lanqas huwa fidil fil-wisq. (Lq 16 :10)
□
U jiena se nkompli
nfittex is-sinjali u d-dehriet bit-tama li xi darba nibda
nemmen?
Dawn inkitbu sabiex
intom temmnu
U jiena
għalfejn naqra u nisma l-kelma ta’ Alla; biex ikun naf il-ġrajja,
biex insir aktar bravu; biex inħossni tajjeb għax qdejt
dover? Jew biex nemmen?
Nemmen
x’hiex?
Jwieġeb
l-Evanġelista: " Sabiex intom temmnu li Ġesù hu l-Messija l-Iben
ta' Alla u biex bit-twemmin tagħkom ikollkom il-ħajja f'ismu."
□
U jiena f’isem min
qed nibniha ħajti?
|