Aktar mill-Papa Ġwanni Pawlu II
...
|
‘ĊELEBRAZZJONI EWKARISTIKA
FIL-BAZILIKA TA’ SAN PAOLO FUORI
LE MURA
OMELIJA TA’ ĠWANNI PAWLU II
Il-Ħadd, 17 ta’ Diċembru 1978
1. Wara t-teħid tal-pussess
tal-Bażilika ta’ San Ġwann fil-Lateran,
li huwa l-katedra tal-Isqof ta’
Ruma, wara ż-żjara mqanqla
fil-Bażilika ta’ Santa Marija
Maġġore fl-Esquilino, fejn stajt,
fil-bidu tal-pontifikat tiegħi,
nesprimi l-fiduċja u l-abbandun
totali tiegħi f’idejn Marija,
Omm il-Knisja, illum ingħatali
li niġi hawn.
Il-Bażilika ta’ San Pawl barra
l-Ħitan tal-Belt – wieħed mill-erbà
tempji mportanti tal-Belt Eterna
– tqanqal ħsibijiet u sentimenti
partikolari fil-qalb ta’ dak li,
bħala Isqof ta’ Ruma, sar is-Suċċessur
ta’ San Pietru. Il-vokazzjoni ta’
Pietru – unika bir- rieda
tal-istess Kristu – hija marbuta
b’rabta singolari mal-persuna ta’
Pawlu ta’ Tarsu. It-tnejn,
Pietru u Pawlu, sabu ruħhom Ruma
fi tmiem il-pellegrinaġġ terren
tagħhom; it-tnejn ġew hawn
għall-istess għan: li jagħtu
xhieda lil Kristu. It-tnejn
għall-istess kawża ġarrbu l-mewt
u, bħal ma tirrakkonta t-tradizzjoni,
dan seħħ fl-istess jum. It-tnejn
li huma jikkostitwixxu s-sisien
ta’ din il-Knisja li ssejħilhom,
waqt li flimkien tfakkarhom
bħala Patruni tagħha. U għalkemm
Ruma hija l-katedra ta’ Pietru,
ilkoll nafu kemm b’mod profond
fil-bidu ta’ din il-katedra,
fis-sisien tagħha, hemm miktub
Pawlu: il-konverżjoni tiegħu,
il-persuna tiegħu, il-missjoni
tiegħu.
Il-fatt li San Pietru sab ruħu
Ruma, li ġie hawn minn Ġerusalem
permezz ta’ Antijokja, li hawn
wettaq il-mandat tiegħu
pastorali, li hawn temm ħajtu,
kien espressjoni ta’ dik l-universalità
tal-Vanġelu, tal-kristjanità
tal-Knisja, li tagħha San-Pawl
kien sa mill-bidu nett, ħabbar
deċiż u qalbieni. Fil-waqt
tal-konverżjoni tiegħu minn
persekutur, aħna nisimghu jidwi
l-kliem: “huwa hu għalija
strument magħżul biex iwassal
ismi quddiem il-popli, quddiem
is-slaten u l-ulied ta’ Iżrael”
(At 9,15).
Ruma ma kinitx l-uniku skop
tal-ħajja apostolika u
tal-pellegrinaġġ ta’ Pawlu ta’
Tarsu. Pjuttost nistgħu ngħidu
li l-oġġettiv tiegħu kien
l-universum tal-imperu Ruman ta’
dak iż-żmien (bħal ma jixhdu
il-vjaġġi u l-ittri tiegħu), Ta’
dawn il-vjaġġi Ruma kienet
l-aħħar stadju. Pawlu wasal hawn
diġa bħala priġunier, mitfugħ
il-ħabs minħabba l-kawża li
għaliha kien iddedika lilu
nnifsu totalment: il-kawża
tal-universaliżmu, dik il-kawża
li kienet tolqot il-bażi stess
ta’ ċerta viżjoni rabbinika
tal-Poplu Magħżul u tal-Messija
tiegħu. Issuġġettat għal ħaqq
propju minħabba din l-attività
tiegħu, Pawlu kien appella bħala
ċittadin Ruman għal Ċesare. “Int
appellajt għal Ċesare, għand
Ċesare tmur” (At 25,12).
U hekk Pawlu sab ruħu Ruma bħala
priġunier jistenna s-sentenza
ta’ Ċesare. Sab ruħu hawn, meta
il-prinċipju tal-universalità
tal-Knisja, tal-Poplu ta’ Alla
tal-patt il-ġdid kien diġa
stabilixxa ruħu biżżejjed, u
anzi kien ikkonsolida ruħu b’mod
irriversibbli fil-ħajja
tal-Knisja stess. U allura Pawlu
li fil-bidu tal-missjoni tiegħu,
wara l-konverżjoni, kien qies
bħala dmir partikolari tiegħu
“videre Petrum” (jara lil
Pietru) setà jasal hawn Ruma
biex mill-ġdid jiltaqà ma’
Pietru: hawn, f’din il-belt, li
fiha l-iniversalità tal-Knisja
sabet fil-katedra ta’ Pietru
l-fortizza tagħha għal sekli u
millenji.
Ftit li xejn huwa dak li għidt
dwar Pawlu ta’ Tarsu, Appostlu
tal-ġnus u qabbis kbir. Wieħed
jistà u għandu jgħid ferm iktar,
imma bi bżonn ikolli nillimita
ruħi għal dawn l-aċċenni.
2. U issa jidhirli li huwa
xieraq li nitkellem dwar dak
il-Papa li għażel l-isem
tal-Appostlu tal-ġnus: dwar
Pawlu VI. Iċ-ċirkustanzi
taż-żmien u tal-post jimbuttawni
b’mod partikolari biex nitkellem
dwaru. Imma, b’mod speċjali, din
hija esiġenza tal-qalb, xewqa
infatti biex nitkellem dwar dak
li bi dritt tajjeb inqisu mhux
biss Predeċessur tiegħi, imma
propju bħala Missier. U
mill-ġdid inħoss li nistà u
għandi nitkellem fit-tul, imma
hawn ukoll, minħabba t-tiranija
tal-ħin, id-diskors tiegħi
jeħtieġ li jkun qasir. Nixtieq
niżżi ħajr lil dawk kollha li
jonoraw it-tifkira ta’ dan
il-Papa kbir. Nixtieq niżżi ħajr
lill-kocittadini tiegħu ta’
Brescia għall-att sollenni
riċenti ddedikat lit-tifkira
tiegħu u nixtieq niżżi ħajr
lill-Kardinal Pignedoli talli ħa
sehem. Mhux darba biss se
nerġgħu lura fuq dak li wettaq u
fuq dak li huwa kien.
Għaliex għażel l-isem ta’ Pawlu?
(wara bosta sekli dan l-isem
reġà daħal fl-annwarju
tal-Isqfijiet ta’ Ruma). Bla
ebda dubju għaliex iltaqà ma’
qlubija partikolari mal-Appostlu
tal-ġnus. Mill-bqija
il-pontifikat ta’ Pawlu VI ma
jixhidx forsi kemm huwa kien
konxju b’mod profond, b’xebħ ma’
San Pawl, tas-sejħa l-ġdida ta’
Kristu għall-universaliżmu
tal-Knisja u tal-kristjanità
skont il-qies ta’ żminijietna?
Ma kienx jewwilla jifli,
b’penetrazzjoni straordinarja
s-sinjali taż-żminijiet ta’ din
l-epoka diffiċli, bħal ma għamel
Pawlu ta’ Tarsu? Ma kienx iħoss
lilu nnifsu msejjaħ, bħal dan
l-Appostlu, biex iwassal
il-Vanġelu sa trufijiet
id-dinja? Ma kienx jewwilla
jżomm, bħal San Pawl, il-paċi
nterna wkoll meta “l-ġifen kien
miknus fit-tempesta u ma kienx
ikun jiflaħ iktar jirreżisti
għar-riħ” (cf.At 27,15)?
Pawlu VI, Qaddej tal-Qaddejja
ta’Alla, Suċċessur ta’ Pietru,
li kien għażel l-isem
tal-Appostlu tal-ġnus, mal-isem
kien wiret il-kariżma.
3. Bil-miġja tiegħi fil-Bażilika
ta’ San Pawl nixtieq ningħaqad
b’rabta ġdida ta’ mħabba u ta’
għaqda ekkleżjali mal-komunità
tal-Patrijiet Benedittini, li
ilhom sekli sħaħ jgħassu dan
il-post fit-talb u fix-xogħol.
Barra minn dan nixtieq bħala
l-Isqof il-ġdid ta’ Ruma nżur
il-parroċċa li tagħha l-Bażilika
ta’ San Pawl hija s-sede.
Din il-Bażilika antika u
venerabbli, li tul is-sekli
kienet dejjem destinazzjoni ta’
pellegrinaġġi u li barra l-ħitan
ta’ Ruma, f’dawn l-aħħar
għaxriet ta’ snin – minħabba l-iżvilupp
urbanistiku tal-belt – saret
parroċċa, b’dan il-mod saret
iċ-ċentru tal-ħajja reliġjuża
tal-abitanti ta’ dan is-settur.
U hekk hawn għandna tliet
aspetti li, għalkemm distinti
bejniethom, jikkostitwixxu
daqstant uċuh tal-istess realtà:
Abbazija, Bażilika, parroċċa,
tliet entitajiet li b’mod
reċipriku jitimgħu, waqt li
jagħtu lill-fidili frott
spiritwali abbundanti.
Waqt li mbagħad nestendi t-tislima
tiegħi lill-assoċajazzjonijiet
differenti li jikkollaboraw fuq
il-pjan pastorali mal-parroċċa,
insellem lill-katekisti,
insellem b’imħabba paterna
lir-reliġjużi, irġiel u nisa, li
jiżvolġu l-attività tagħhom
fil-qasam tal-parroċċa,
b’intenzjoni partikolari għal
dawk li joffru l-opra tagħhom
lill-Oratorju Pontifiċju San
Pawl, li jippromwovi azzjoni
interparrokkjali favur
iż-żgħażagħ. Lill-fidili kollha
t-tislima kordjalissima tiegħi,
il-barka tiegħi, l-inkoraġġiment
tiegħi biex iħobbuha
lill-parroċċa tagħhom. Fl-aħħarnett
nindirizza ħsieb speċjali lil
dawk li qegħdin ibatu, kemm
minħabba li milquta mill-mard,
kemm li jinsabu mħabbtin
minħabba n-nuqqas ta’ xogħol,
waqt li nassikurahom tifkira
partikolari fit-talb tiegħi.
4. “Gaudete in Domino semper:
iterum dico vobis, gaudete...”:
“Ifirħu dejjem fil-Mulej:
nirrepetilkom, ifirħu”. Dan
il-kliem tal-liturġija tallum,
jiġifieri tat-tielet Ħadd
tal-Avvent, huwa meħud minn San
Pawl. L-istess kliem kien
imtenni minn Pawlu VI fl-eżortazzjoni
ppublikata minnu dwar il-ferħ
nisrani (cf. Pawlu VI, Gaudete
in Domino:
AAS 67 [1975] 289-322).
Jien magħkom ningħaqad illum
b’qalbi kollha u ngħidilkom,
għeżież ħuti, irġiel u nisa:
“iterum dico vobis, gaudete”:
“nirrepetilkom, ifirħu”!
“Dominus... prope est”:
“Il-Mulej huwa fil-qrib”!
Miġjub mit-Taljan għall-Malti
minn Emanuel Zarb
|