Aktar mill-Papa Ġwanni Pawlu II
...
|
ŻJARA LILL-PARROĊĊA
RUMANA TA’ SAN RAFFAELE ARKANĠLU AL TRULLO
OMELIJA TAL-QDUSIJA
TIEGĦU ĠWANNI PAWLU
Il-Ħadd,
11 ta’ Novembru 1979
Ħuti għeżież.
1. Sliem għalikom!
Ippermettuli li nesprimilkom qabel xejn, il-ferħ kbir li qed inħoss li ninsab
illum f’nofskom, f’din il-parroċċa tagħkom ta’ San Rafiel Arkanġlu fi Trullo, li
tikkonkludi l-festeġġjamenti għall-25 sena tal-eżistenza tagħha. Ħamsa u għoxrin
sena huma perjodu konsiderevoli, fl-arkata taż-żmien li jħaddan normalment
eżistenza umana. Huwa ġust, għalhekk, li tenfasizza skadenza simili u li nieqfu
biex nagħtu ħarsa lejn il-mixja li wettaqna, biex nivvalutaw id-diffikultajiet
megħluba, biex infittxu pass tajjeb fil-konsiderazzjoni tar-riżultati milħuqa.
Jiena kuntent li jien
ukoll ninsab magħkom ta’ Ruma, li fiha Kristu qegħdni bħala Isqof u Ragħaj.
Flimkien magħkom nerġà naħseb dwar il-bidu tal-komunità tagħkom: tal-komunità
ċivili, li l-bidu tagħha jsib postu lejn it-tmiem tas-snin tletin, meta hawn
sabu posthom bosta Taljani li ġew lura minn barra, u li l-iżvilupp
suċċessivament ġie stabbilit mill-amalgazzjoni f’din iż-żona tal-abitanti f’xi
kwartieri periferiċi tal-Belt, kif ukoll ta’ mhux ftit immigrant minn reġġjuni
oħra tal-Italja. U nerġà naħseb dwar il-bidu tal-komunità nisranija bħala tali,
miġbura fil-bidu madwar ċentri ta’ servizz reliġjuż provviżorji u mibnijin
imbagħad b’mod uffiċċjali f’parroċċa fl-1953 taħt it-tmexxija pastorali
tal-Patrijiet Kapuċċini.
Kemm tifkiriet iwarrdu
fil-moħħ ta’ dawk fostkom li ilhom joqogħdu hawn ċertu numru ta’ snin jew li
hawn twieldu u kibru. Dawn huma tifkiriet ferrieħa u huma tifkiriet ta’ niket;
huma madankollu, tifkiriet li jeħdukom lura għall-fatti ewlenin, li mmarkaw
ħajjitkom bħala ndividwi, bħala familji, bħala komunità.
Dawn huma tifkiriet li
fihom hija miktuba u ndukrata l-istorja tas-subborg tagħkom, li f’dawn is-snin
kiber u wasal biex jassumi naqra naqra fiżjonomija propja, li lejha intom kull
ma jmur inġbidtu, bħal għal realtà li, b’xi mod, tagħmel parti minnkom u minn
ħajjitkom.
2. Uliedi għeżież,
il-Papa huwa hawn illum, magħkom biex jgħidilkom li huwa wkoll inġibed
mis-subborg tagħkom: dan għandu post f’qalbu. Insellem, għalhekk, lil dawk
kollha preżenti, nibda mis-Sinjur Kardinal Vigarju u mill-Isqof Awżiljarju
tas-settur, Monsinjur Remigio Ragonesi; insellem lill-Kappillan, Patri Celso
Serri li huwa wkoll iffesteġġja il-25 anniversarju tal-ministeru pastorali
fostkom; u miegħu insellem lill-Konfratelli li jassistuh, billi jirregalaw
l-enerġiji tagħhom biex jassikuraw is-servizz reliġjuż lill-komunità. U fost
il-Konfratelli kif nistà ma niftakarx b’mod speċjali lill-Patri Benedetto
Camellini preżenti fostkom sa mill-ewwel xhur tal-parroċċa? Imbagħad insellem
lir-Reliġjużi Nisa operanti fil-qasam tal-parroċċa: is-Sorijiet tal-Istitut
tal-Qalb ta’ Ġesù u s-Sorijiet Maestre Pie tal-Addolorata, involuti
għaż-żgħażagħ fil-qasam edukattiv-skolastiku; is-Sorijiet tal-Karità ta’ Ommna
tal-Ħniena, b’mod providenzjali preżenti fil-qasam karitattiv-assistenzjali;
il-franġiskani Awżiljarji Lajċi Missjunarji tal-Immakolata, li jaħdmu fil-qasam
tal-animazzjoni missjunarja .
Tislima kordjali
imbagħad tmur għal dawk li jixhdu b’mod attiv il-fidi tagħhom fil-gruppi
tal-Azzjoni Kattolika, fil-Grupp Volontarjat Dami ta’ San Vinċenz, fil-komunità
ta’ Sant’Eġidju, fil-komunità terepewtika Sant’Andrea, billi juru bl-eżempju
tagħhom kif l-impenn għax-xandir tal-Vanġelu ma jmurx maqtugħ mit-tħassib attiv
għall-promozzjoni umana tal-abitanti tal-kwartier. F’dan is-sens, jimmeritaw li
jissemmew u li nsellmu wkoll lil dawk kollha li jikkollaboraw fl-organizzazzjoni
tal-attivitajiet rikrejattivi-kulturali, li jiżvolġu fl-Oratorju, billi joffru
lil tant tfal u żgħażagħ il-possuibiltà ta’ żvog san u formattiv u billi jagħtu,
fl-istess ħin, prova konkreta tal-preżenza inċiżiva tal-parroċċa fil-ħajja
soċjo-kulturali tal-kwartier. Nixtieq insellem u ninkuraġġixxi wkoll lill-Grupp
tal-Katekisti lajċi, li b’dedikazzjoni ġeneruża jiżvolġu opra preżżjuża, maġemb
is-Saċerdoti u lir-Reliġjużi, fl-għajnuna tat-tfal, li qegħdin iwettqu l-ewwel
passi sinifikattivi fl-itinerarju tagħhom tal-fidi.
It-tislima tiegħi
tinfirex, fl-aħħarnett, lil dawk il-miżżewġin insara, impenjati biex jgħixu u
jixhdu quddiem id-dinja l-għana inerenti fis-sagrament taż-żwieġ; liż-żgħażagħ,
li joħorġu b’kuraġġ intraprendenti u b’tama intatta lejn l-għada; lit-tfal, li
f’għajnejhom innoċenti jirriflettu l-aħjar xewqat moħbija fir-ruħ ta’ kull
adult; il-morda, li bit-tbatijiet tagħhom iġorru kontribut insostitwibbli
għad-dinamiżmu ntern u għat-tkabbir spiritwali tal-komunità kollha; f’kelma
waħda, lil dawk kollha li jiffurmaw parti minn din il-parroċċa b’mod speċjali
lil dawk, fiha, li jħossuhom ifqar, iktar weħedhom, iktar emarġinati.
Hawn aħna, ilkoll
flimkien miġburin madwar l-altar, aħna, illum, nagħtu ħajr lill-Missier,
lill-Iben u lill-Ispirtu Santu għal dawn il-ħamsa u għoxrin sena ta’ eżistenza
tal-parroċċa. Niżżu ħajr għal din il-partiċella tal-Knisja, għal dan il-porzjon
tal-Poplu ta’ Alla, li jġib l-isem tal-“Parroċċa ta’ San Rafiel fi Trullo”. Dan
huwa framment tal-istorja tas-salvazzjoni, delimitat fiż-żmien u fl-ispazju,.
Imma kontemporanjament inkalkulabbli f’dak li jirrigwarda l-preżenza tal-Alla
l-ħaj, tal-opra feddejja ta’ Kristu, tat-tiswib tal-Ispirtu Santu fil-qlub u
fil-kuxjenzi umani.
Għal dan kollu aħna
lkoll illum, flimkien, irridu niżżu ħajr. Din tiegħi trid tkun żjara ta’
ringrazzjament. Waqt li nilqgħu l-istedina biex “ngħollu qlubna ‘l fuq”, ejjew
nippronunzjaw b’konvinzjoni speċjali l-kliem tal-prefazju: “Huwa tassew ħaġa
tajba u ġusta d-dmir tagħna u s-sors tal-fidwa li niżżu ħajr!”.
3. Forsi, fuq l-isfond
ta’ dan il-ħamsa u għoxrin, takkwista prominenza aħjar fil-kuxjenza tagħna
l-verità li San Pawl esprima fis-silta meraviljuża tal-ittra lil-Lhud, li smajna
fil-liturġija tallum il-Ħadd. Hawn hu, Kristu, saċerdot tal-patt il-ġdid u
etern, jidħol fis-santwarju etern “biex issa jidher fil-preżenza ta’ Alla favur
tagħna” (Lh 9,24). Jidħol biex joffri kontinwament għall-umanità kollha
l-uniku Sagrifiċċju, li darba biss offra “biex iħassar id-dnub permezz
tas-sagrifiċċju tiegħu nnifsu” (Lh 9,26).
Aħna lkoll nieħdu
sehem f’dan l-uniku Sagrifiċċju Qaddis. Aħna lkoll għandna sehem fl-uniku u
etern saċerdozju ta’ Kristu, Bin Alla. Propju dan it-Tempju. Li nbena f’din
iż-żona ta’ Ruma ftit żmien wara t-twaqqif tal-parroċċa huwa l-post ta’ tali
partiċipazzjoni. Infatti l-parroċċa tinbena u teżisti sabiex aħna lkoll ikollna
sehem fil-missjoni saċerdotali, profetika u rjali (pastorali) ta’ Kristu, kif
jgħallimna l-Konċilju Vatikan II: sabiex, waqt li flimkien noffru miegħu u
għalih id-doni spiritwali tagħna, inkunu nistgħu nidħlu miegħu u għalih
fis-santwarju etern tal-Majjestà Divina, is-santwarju li hu ħejja għalina bħala
“dar tal-Missier” (Ġw 14,2).
4. Biex naslu fid-dar
tal-Missier hemm bżonn li nħallu lilna nfusna niġu ggwidati mill-verità li Ġesù
esprima f’ħajtu u f’tagħlimu. Din hija verità għanja u universali. Din tiżvela
quddiem l-għajnejn ta’ ruħna l-orizzonti vasti tal-opra l-kbira ta’ Alla. U,
b’mod kontemporanju, hija tinżel hekk fil-profondità fil-misteri tal-qalb umana,
hekk kif biss il-Kelma divina tistà tagħmel. Wieħed mill-elementi ta’ din
il-verità huwa dak li, b’aċċent partikolari, donnha tfakkarna l-liturġija
tallum: “Imberkin il-foqra tal-ispirtu għaliex tagħhom hija s-saltna
tas-smewwiet” (Mt 5,3).
Wieħed jistà jgħid li
l-liturġija ta’ dan il-Ħadd tispjega b’mod partikolarment suġġestiv din l-ewwel
bejatitudni tad-diskors tal-muntanja, waqt li tippermettilna nippenetraw
fil-fond il-verità fiha miġbura. Hawn, nisimgħu fl-ewwel Qari dwar l-armla fqira
taż-żminijiet ta’ Elija, li kienet toqgħod f’Sarepta ta’ Sidon. Imbagħad wara
nisimgħu dwar armla fqira oħra taż-żminijiet ta’ Kristu, li daħlet fil-bitħa
tat-tempju ta’ Ġerusalem. Il-waħda u l-oħra taw dak kollu li setgħu. Tal-ewwel
tat lil Elija l-aħħar ponn dqiq biex jagħmel ftira żgħira. Dik l-oħra tefghet
fit-teżor tat-tempju żewġ muniti żgħar, u dawk iż-żewġ muniti kienu dak “kollu
li kellha” (Mk 12,44). Tal-ewwel ma ddiżappuntatx ruħha għaliex skont
il-profezija ta’ Elija, “Id-dqiq tal-ġarra qatt ma ġie nieqes, sakemm il-Mulej
ma għamilx xita fuq l-art” (cf. 1Sl 17,14). It-tieni waħda setgħet tisma
l-ikbar tifħir minn fomm Kristu nnifsu.
Permezz ta’ dawn
iż-żewġ figuri jiżvela ruħu l-veru sinifikat ta’ dak il-faqar fl-ispirtu, li
jikkostitwixxi l-kontenut tal-ewwel bejatitudni fid-diskors tal-muntanja. Dan
jistà jinħass bħala paradoss, imma dan il-faqar jaħbi fih għana speċjali.
Infatti, għani mhuwiex dak li għandu, imma dak li jagħti. U jagħti mhux tant dak
li jippossiedi, daqskemm lilu nnifsu. Allura huwa jistà jagħti wkoll meta ma
jippossedix. Ukoll meta ma jippossedix, huwa hu mela għani.
Il-bniedem huwa fqir,
imma, mhux għaliex ma jippossedix, imma għaliex huwa marbut – u b’mod
partikolari meta huwa marbut spasmodikament u totalment – ma’ dak li
jippossiedi. La darba jkun marbut b’tali mod li ma jkun jistà jagħti xejn minnu.
Meta ma jkunx kapaċi jinfetaħ lejn l-oħrajn u jagħtihom lilu nnifsu. Fil-qalb
tal-għani il-ġid kollu ta’ din id-dinja jsir mejjet. Fil-qalb tal-fqir, fis-sens
li dwaru qed nitkellem jien, ukoll l-iżgħar ġid jerġà jieħu l-ħajja u jsir kbir.
Bla dubju fid-dinja
ħafna nbidel minn meta fid-diskors tal-muntanja, kienet ippronunzjata minn
Kristu l-bejatitudni tal-fqar tal-ispirtu. Iż-zminijiet li fihom qegħdin ngħixu
aħna, huma differenti mhux ħażin minn dawk ta’ Kristu. Aħna qegħdin ngħixu
f’epoka oħra tal-istorja, taċ-ċiviltà, tat-teknika, tal-ekonomija. Bdanakollu
l-kliem ta’ Kristu ma tilef xejn mill-eżattezza tiegħu, mill-profondità tiegħu,
mill-verità tiegħu. Anzi dan akkwista skala ġdida.
Illum hemm bżonn li
niġġudikaw bil-verità ta’ dan il-kliem ta’ Kristu mhux biss l-imġieba ta’ armla
fqira u tal-kontemporanji tagħha, imma hemm bżonn niġġudikaw b’din il-verità
s-sistemi kollha u r-reġimi kollha ekonomiċi-soċjali, il-konkwisti tekniċi,
iċ-ċiviltà tal-konsumi u fl-istess ħin l-ġografija kollha tal-miżerja u tal-ġuħ,
miktuba fl-istruttura tad-dinja tagħna .
U herkk, bħal
fiż-żminijiet tad-diskors tal-muntanja, ukoll illum kull wieħed u waħda minna
għandhom jiġġudikaw bil-verità tal-kliem ta’ Kristu l-opri tagħna u ta’ qlubna.
Xi stituzzjoni
stupenda hija din il-parroċċa, li tippermettilna li nisimgħu b’mod kostanti l-kliem
ta’ Kristu u bil-verità tagħhom niġġudikaw qlubna!
5. Nixtieq li llum
jieħdu b’idejn xulxin il-miżżewġin kollha li, skont is-Sagrament, ikkostitwew
f’din il-parroċċa daqstant komunitajiet familjari. Iġeddu, llum f’qalbhom, dawk
il-wegħdiet sagri li, quddiem Alla u l-Knisja, għamlu minnhom darba miżżewġin –
raġel u mara – u wara ġenituri: missier u omm. Jitolbu l-grazzja
tal-perseveranza fil-fedeltà matrimonjali u f’dik ta’ ġenituri. Jitolbu biex
jiksbu l-imħabba meħtieġa għat-twettiq tal-vokazzjoni, li rċivew mingħand Alla.
It-tfal isibu f’din
il-parroċċa dar familjari wiesgħa; jixorbu fil-katekeżi l-verità tal-Kelma ta’
Alla; jieklu il-Ġisem tas-Salvatur.
Iż-żgħażagħ ifittxu
f’din il-parroċċa l-appoġġ għall-ideali tagħhom u jimpenjaw ruħhom biex
janimawha bil-ħajja ġdida tagħhom, bix-xhieda tagħhom, bil-prontezza li jaqdu
lil Alla u lill-bnedmin.
Il-morda u l-batuti
jsibu hawn il-konsolazzjoni u s-serħan. Iżurhom Kristu, permezz tas-servizz
tas-Saċerdoti, u jispjegalhom bil-kelma nterna tal-Ispirtu Santu id-dinjità
kbira u s-sinifikat tat-tbatijiet tagħhom.
Jalla kulħadd, f’din
il-parroċċa, jagħraf li huwa membru tal-Ġisem ta’ Kristu u jinduna li lejh
riesqa s-Saltna ta’ Alla, li, anzi, hija diġa preżenti fih.
Għal dan kollu jiena
nitlob illum, flimkien magħkom, waqt li nafda qabel xejn fl-interċessjoni ta’
Marija, li hija Omm il-Knisja u kawża tal-ferħ tagħna, u mbagħad ukoll f’dik ta’
San Rafiel Arkanġlu, li għażiltu bħala gwida tal-mixja tagħkom. Bl-għajnuna
tagħhom u bil-protezzjoni tagħhom il-komunità tagħkom tistà tkompli mixja,
b’ħidma mġedda, fit-triq ta’ xhieda nisranija konsistenti u operuża, waqt li
toffru lil dawk li huma maħqura mid-dubji, perplessità u disperazzjoni l-messaġġ
etern ta’ ferħ u tama li Kristu ħallielna fil-Vanġelu tiegħu. Hekk ikun!
Miġjub
mit-Taljan għall-Malti minn Emanuel Zarb.
|