Aktar mill-Papa Ġwanni Pawlu II
...
|
QUDDIESA MQADDSA GĦAĊ-ĊENTRU TALJAN GĦAS-SOLIDARJETÀ
OMELIJA TAL-QDUSIJA TIEGĦU ĠWANNI PAWLU II
Castel Gandolfo
Il-Ħadd, 5 ta’ Awissu 1979
Għeżież.
Ninsabu hawn miġbura madwar l-altar tal-Mulej, li hu biss jistà
jilluminana dwar il-misteru ta’ ħajjitna, dramm ta’ mħabba u fidwa, u li hu biss
jistà jagħtina l-qawwa biex ma naqgħux jew biex jgħinna nqumu, u, b’mod speċjali,
biex ngħixu b’mod konformi għall-esiġenzi u għall-ideali tal-kristjaneżmu.
Din hija appuntu, jidhirli, it-tema ċentrali tal-liturġija ta’ dan
il-Ħadd, li fih Ġesù, ħobż tal-ħajja, jippreżenta ruħu lilna bħala sinifikat
uniku u veru tal-eżistenza umana.
1. Fi żminijietna, sfortunatament, ir-razzjonaliżmu xjentifiku u l-istruttura
tas-soċjetà ndustrijali, ikkaraterizzata mil-liġi iebsa tal-produzzjoni u
tal-konsum, ħolqu mentalità magħluqa ġo orizzont ta’ valuri temporali u terreni,
li jieħdu lill-ħajja tal-bniedem kull sinifikat traxxendenti.
L-ateiżmu tejoriku u prattiku mifrux bil-kbir, l-aċċettazzjoni ta’
morali evoluzzjonistika, mhux iktar marbuta mal-prinċipji solidi u universali
tal-liġi morali naturali u rrivelata, imma mad-drawwa dejjem tinbidel
tal-istorja; l-eżaltazzjoni nsistita tal-bniedem, bħala awtur awtonomu tad-destin
propju u, għall-estrem oppost, l-umiljazzjoni miżerabbli għal linja ta’ passjoni
inutli, ta’ żball kożmiku, ta’ pellegrin assurd tax-xejn f’univers mhux magħruf
u mimli stmerrija, wasslu biex tellfu lil ħafna s-sinifikat tal-ħajja u mbuttaw
lil dawk l-iktar dgħajfin u l-iktar sensibbli għal ħarbien fatali u traġiku.
Il-bniedem għandu bżonn estrem ta’ għarfien jekk jixraqlux
jitwieled, jgħix, jissielet, isofri u jmut, jekk għandux valur li jimpenja ruħu
għal xi ideal superjuri għall-interessi materjali u kontinġenti, jekk, f’kelma
waħda, hemmx xi “għaliex” li jiġġustifika l-eżistenza terrena tiegħu.
Din mela tibqà l-kustjoni essenzjali: tagħti sens lill-bniedem,
għall-għażliet tiegħu, għal ħajtu, għall-istorja tiegħu.
2. Ġesù jippossiedi t-tweġiba għall-mistoqsijiet tagħna; hu jistà
jsolvi l-“kustjoni tas-sens” tal-ħajja u tal-istorja tal-bniedem. Hawn hi l-lezzjoni
fundamentali tal-liturġija tallum. Lill-folla li segwietu, sfortunatament
minħabba motivi biss ta’ nteress materjali, billi kienet qatgħet b’xejn il-ġuħ
permezz tal-multiplikazzjoni mirakoluża tal-ħobż u tal-ħut, Ġesù jgħid b’serjetà
u awtorità: “Iksbu mhux l-ikel li jgħaddi, imma dak li jibqà għall-ħajja ta’
dejjem, u li Bin il-bniedem se jagħtikom” (Ġw 6,28-29).
Alla sar bniedem biex idawwal, anzi biex ikun is-sinifikat
tal-ħajja tal-bniedem. Dan huwa dan li għandu jitwemmen b’konvinzjoni profonda u
ferrieħa; dan huwa dak li għandna ngħixu b’kostanza u koerenza; dan huwa dak li
għandna nxandru u nixhdu, minkejja t-tribulazzjonijiet taż-żminijiet u l-idejoloġiji
kuntrarji, kważi dejjem insidjużi u xokkanti.
U b’liema mod Ġesù huwa s-sinifikat tal-eżistenza tal-bniedem? Huwa
stess jispjega b’ċarezza konsolanti: “Missieri jagħtikom il-ħobż mis-sema, dak
veru; il-ħobż ta’ Alla huwa dak li jinżel mis-sema u jagħti l-ħajja lid-dinja…
Jiena hu l-ħobż tal-ħajja; min jiġi għandi ma jaqbdux iktar ġuħ u min jemmen
fija ma jkollux iktar għatx” (Ġw 6,32-35). Ġesù jitkellem b’mod
simboliku, waqt li jingħaqad mal-miraklu kbir tal-manna mogħtija minn Alla
lill-poplu Lhudi fil-qsim tad-deżert tiegħu. Hija ħaġa ċara li Ġesù ma jeliminax
il-preokkupazzjoni normali u t-tiftix tal-ikel ta’ kuljum u ta’ dak kollu li
jistà jirrendi l-ħajja umana iktar avanzata, iktar evoluta, iktar sodisfaċenti.
Imma l-ħajja fl-aħħar minn l-aħħar tgħaddi. Ġesù jfakkar li l-veru sinifikat
tal-eżistenza terrena tagħna huwa fl-eternità, u li l-istorja kollha umana
bid-drammi kollha tagħha u l-ferħ kollu tagħha għandhom ikunu meqjusa
fil-prospettiva eterna.
Aħna wkoll, bħall-poplu ta’ Iżrael, ngħixu fuq l-art l-esperjenza
tal-Esodu: “l-art imwegħda “ hija s-sema. Alla, li ma abbandunax lill-poplu
tiegħu fid-deżert, linqas ma jabbanduna lill-bniedem fil-pellegrinaġġ terren
tiegħu. Tah “ħobż” li kapaċi jsostnih tul it-triq: il-“ħobż” huwa Kristu. Huwa
hu qabel kollox l-ikel tar-ruħ bil-verità rivelata u mbagħad bl-istess Persuna
tiegħu preżenti fis-Sagrament tal-Ewkaristija.
Il-bniedem għandu bżonn it-traxxendenza! Il-bniedem għandu bżonn
il-preżenza ta’ Alla fl-istorja tiegħu ta’ kuljum! Hekk biss jistà jsib is-sens
tal-ħajja! Għalhekk, Ġesù jkompli jgħid lilna lkoll: “Jiena t-triq, il-verità u
l-ħajja” (Ġw 14,6); “Jiena d-dawl tad-dinja; min jimxi warajja ma jimxix
fid-dlam, imma jkollu d-dawl tal-ħajja” (Ġw 8,12); “Ejjew għandi, intom
ilkoll li intom għajjenin u mgħobbijin, u jiena nserraħkom!” (Mt 11,28).
3. Ir-riflessjoni issa twassalna fuq kull wieħed u waħda minna.
Infatti, jiddependi minna li nilqgħu is-sinifikat li Kristu ġie biex joffri
lill-eżistenza umana u “jinkarnah” f’ħajjitna. Jiddependi mill-impenn li lkoll
“ninkarnaw” tali sinifikat fl-istorja umana. Responsabiltà kbira u dinjità
sublimi! Hija meħtieġa, għal dan l-iskop, xhieda koerenti u qalbiena tal-fidi
tagħna. San Pawl, waqt li jikteb lill-Efesin, ifassal, f’dan is-sens, programm
konkret ta’ ħajja: hemm bżonn, qabel kollox, li nabbandunaw il-mentalità mondana
u pagana: “Nitlobkom fil-Mulej: la ġgibux ruħkom iktar bħall-pagani fil-vanità
ta’ moħħhom” imbagħad, hemm bżonn nibdlu l-mentalità mondana u terrena
fil-mentalità ta’ Kristu: “Hemm bżonn inġeddukom fl-Isprtu ta’ moħħkom u
nlibbsukom il-bniedem il-ġdid, maħluq minn Alla fil-ġustizzja u fil-qdusija vera”
(Ef 4,17.20-24).
Għeżież, bħal ma qegħdin taraw, dan huwa programm tassew
impenjattiv, taħt ċerti aspetti nistgħu ngħidulu saħansitra erojku; bdanakollu
jeħtieġ nippreżentawh lilna nfusna u lill-oħrajn kollu kemm hu, waqt li nserrhu
fuq l-azzjoni tal-grazzja, li tistà tagħti lil kull wieħed u waħda l-ġenerożità
li naċcettaw ir-responsabiltà tal-azzjonijiet tagħna fil-prospettiva eterna u
għall-ġid tas-soċjetà.
Morru, mela, morru b’fiduċja u b’impenn ġeneruż, waqt li tfittxu
kuljum moviment u ferħ gdid fid-devozzjoni lejn Ġesù Ewkaristiku u
fil-kunfidenza f’Marija Santissma.
Nieħu gost nikkonkludi billi nikkwota ħsieb tal-predeċessur tiegħi
Pawlu VI (Diskors lill-Kardinali, 21 ta’ Ġunju 1976), li tiegħu jaħbat għada l-ewwel
annivrsarju tal-mewt tiegħu: “Fid-dagħdigħa ta’ interessi kontrastanti, ta’
ħsara għall-veru ġid tal-bniedem, hemm bżonn nipproklamaw mill-ġdid il-kliem
kbir tal-Vanġelu, li, waħdu, ta dawl u paċi lill-bnedmin f’taqlibiet analogi
oħra tal-istorja” (Pawlu VI, Allocutio Eminentissimis Sacri Collegi Patribus,
felicia ac fausta ominantibus Summo Pontifici, die Eius nominali proxime
occurrente: Insegnamenti di Paolo VI, XIV [1976] 502).
Hawn aħna, għeżież uliedi, bid-dawl u bil-paċi li jiġuna minn dan
il-kliem etern, inkomplu b’mod seren il-mixja tagħna.
Miġjub mit-Taljan għall-Malti minn Emanuel Zarb
|