Aktar mill-Papa Ġwanni Pawlu II
...
|
VJAĠĠ APOSTOLIKU FL-ISTATI
UNITI TAL-AMERIKA
QUDDIESA
GĦAS-SAĊERDOTI AMERIKANI
OMELIJA TAL-QDUSIJA
TIEGĦU ĠWANNI PAWLU II
Filadelfia – Il-Ħamis,
4 ta’ Ottubru 1979
Għeżież konfratelli
saċerdoti.
1. Waqt li niċċelebra
din il-quddiesa, li tiġbor flimkien il-presidenti tal-organiżmi presbiterjali,
jew Kunsilli, tad-dojoċesijiet kollha tal-Istati Uniti, it-tema vitali li
timponi ruħha għar-riflessjoni tagħna hija waħda biss: is-saċerdozju u l-importanza
ċentrali tiegħu fil-missjoni tal-Knisja. Fl-enċiklika
Redemptor Hominis iddeskrivejt tali
dmir bil-kliem li ġej: “Id-dmir fundamentali tal-Knisja tal-epoki kollha u,
b’mod partikolari ta’ dik tagħna, huwa dak li nidderieġu l-ħarsa tal-bniedem, li
nindirizzaw il-kuxjenza u l-esperjenza tal-umanità kollha lejn il-misteru ta’
Kristu, li ngħinu l-bnedmin kollha biex ikollhom familjarità mal-profondità tar-Redenzjoni,
li sseħħ fi Kristu Ġesù” (Ġwanni Pawlu II, Redemptor
Hominis, 10).
Il-Kunsilli
presbiterjali jikkostitwixxu struttura ġdida fil-Knisja, mixtieqa mill-Konċilju
Vatikan II u mil-leġislazzjoni riċenti tal-Knisja. Din l-istruttura ġdida tagħti
espressjoni konkreta lill-għaqda tal-Isqfijiet u tal-presbiteri fis-servizz
pastorali tal-merħla ta’ Kristu, u tassisti lill-Isqof fid-dmir speċifiku tiegħu
li jmexxi d-dijoċesi, billi jipprovdilhom il-kunsill tal-kollaboraturi
rappreżentattivi magħżula fost il-presbiterju. Il-konċelebrazzjoni tallum
tal-Ewkaristija trid tkun sinjal ta’ konferma tal-ġid imwettaq mill-Kunsilli
presbiterjali tagħkom matul is-snin li għaddew, u fl-istess ħin inkuraġġiment
biex ikomplu b’entużjażmu u deċiżjoni dan it-tragward important kif inhu dak li
“jippromwovu l-konformità tal-ħajja u tal-azzjoni tal-poplu ta’ Alla mal-Vanġelu”
(Ecclesiae sanctae, 16 § 1). Imma ‘l fuq minn kollox ix-xewqa li din
il-quddiesa tikkostitwixxi okkażjoni speċjali biex inkellmu, permezz tagħkom,
lil ħuti saċerdoti kollha ta’ dan in- nazzjon dwar is-saċerdozju tagħna. Bi
mħabba kbira ntenni l-kliem li ktibtilkom nhar Ħamis ix-Xirka: “Għalikom jiena
Isqof, magħkom jiena saċerdot”.
Il-vokazzjoni
saċerdotali tagħna ingħatatilna minn Kristu nnifsu. Din hija sejħa personali u
ndividwali: konna msejħa b’isimna, bħal Ġeremija. Din hija sejħa għas-servizz;
aħna mibgħuta biex nippridkaw il-Bxara t-Tajba ta’ Alla, biex niddedikaw
“il-ħsieb tar-ragħaj għall-merħla tal-Mulej”. Din hija sejħa għal komunjoni ta’
intenzjonijiet u ta’ azzjoni: biex nibnu saċerdozju uniku ma’ Ġesù u bejnietna,
propju bħal ma Ġesù u l-Missier huma ħaġa waħda: Għaqda simboleġġjata hekk
tajjeb f’din il-quddiesa kkonċelebrata.
Is-saċerdozju mhuwiex
biss dmir mogħti lilna: huwa vokazzjoni, sejħa li rridu nagħtuha widen b’mod
kontinwu. Li nisimgħu din is-sejħa u nwieġbu b’mod ġeneruż għal dak li hija
tinvolvi huwa dmir ta’ kull saċerdot, imma huwa wkoll responsabiltà tal-Kunsill
Presbiterjali. Din ir-responsabiltà tfisser approfondiment u għarfien
tas-saċerdozju hekk kif Kristu waqqfu, hekk kif hu ried li jkun u li jibqà, hekk
kif il-Knisja b’mod fidil tispjegah u tittrażmettih. Fedeltà għas-sejħa
għas-saċerdozju tfisser tibni dan is-saċerdozju flimkien mal-poplu ta’ Alla
permezz ta’ ħajja ta’ servizz skont il-prijoritajiet apostoliċi: tikkonċentra
kollox “fit-talb u fil-ministeru tal-Kelma” (At 6,4).
Fil-Vanġelu ta’ San
Mark il-vokazzjoni saċerdotali tat-Tnax-il Appostlu hija bħal blanzun, li
l-fjuritura tiegħu tifrex tejoloġija sħiħa tas-saċerdozju. F’nofs il-ministeru
ta’ Ġesù, naqraw li hu “telà fuq il-muntanja, sejjaħ ħdejh lil dawk li ried u
huma marru ħdejh. Ħatar Tnax li baqgħu miegħu u biex ukoll jibgħathom
jippridkaw”: imbagħad s-silta evanġelika telenka isem it-Tnax-il Appostlu (Mk 3,13-14).
Hawn aħna naraw tliet aspetti sinifikattivi tas-sejħa ta’ Ġesù; l-ewwel ħaġa
huwa sejjaħ l-ewwel saċerdoti tiegħu ndividwalment u b’isimhom; sejħilhom
għas-servizz tal-Kelma tiegħu, sabiex jippridkaw il-Vanġelu; u għamilhom
kumpanji tiegħu, billi assoċjahom mal-għaqda ta’ ħajja u ta’ azzjoni li huwa
jaqsam flimkien mal-Missier fil-profond tal-ħajja trinitarja.
2. Ejjew nesploraw din
id-dimensjoni tripla tas-saċerdozju tagħna billi nirriflettu fuq il-qari
bibbliku tallum. Infatti l-Vanġelu jqiegħed fit-tradizzjoni tal-vokazzjoni
profetika s-sejħa tat-Tnax-il Appostlu min-naħa ta’ Ġesù. Meta saċerdot
jirrifletti dwar il-vokazzjoni ta’ Ġeremija għall-uffiċċju profetiku, jibqà
fl-istess ħin rassikurat u maħsud: “La tibżax…għaliex jien ninsab miegħek biex
nipproteġik”, jgħid il-Mulej lil dawk kollha li jsejjaħ, “hekk hu, jiena
nqiegħed kliemi fuq fommok”. Min ma jħossux imsabbar meta jismà dan il-kliem
divin rassikuranti? Meta nqisu għaliex huwa meħtieġ dan il-kliem rassikuranti,
ma narawx jewwilla fina stess din l-istess riluttanza li nerġgħu nsibu
fit-tweġiba ta’ Ġeremija? Bħalu, kultant, il-kunċett tagħna ta’ dan il-ministeru
huwa marbut wisq mal-art: nonqsu mill-fiduċja f’Dak li jsejħilna, Nistgħu wkoll
nibqgħu marbutin mal-viżjoni tagħna tal-ministeru billi naħsbu li dan jiddependi
wisq mit-talenti u l-ħiliet tagħna, u kultant billi ninsew li huwa Alla li
jsejħilna, kif sejjaħ lil Ġeremija minn ġuf ommu. Il-ħaġa ewlenija la hi
x-xogħol tagħna linqas il-ħila tagħna; aħna msejħin bien nippronunzjaw kliem
Alla, mhux tagħna; biex namministraw is-sagramenti li huwa afda lill-Knisja;
biex insejħu lill-poplu għal imħabba li huwa l-ewwel wieħed li rrenda possibbli.
Għalhekk iċ-ċediment
għas-sejħa ta’ Alla għandu jitwettaq b’fiduċja estrema u bla riservi.
Iċ-ċediment tagħna għar-rieda ta’ Alla għandu jkun totali: l-iva migħuda darba
għal dejjem immudellata fuq l-iva migħuda minn Ġesù nnifsu. Bħal ma jgħidilna
San Pawl: “Bħal ma Alla jżomm kelmtu, jiena niddikjara li kelmti lejkom mhix
issa iva u issa le, imma fih kien hemm l-iva” (2Kor 1,18-19).
Din is-sejħa ta’ Alla
hija grazzja, hija rigal, teżor “li aħna għandna f’vażuni tal-fuħħar, għaliex
jidher li l-qawwa straordinarja tiġi mingħand Alla u mhux minn għandna” (2Kor 4,7).
Imma dan ir-rigal mhux mogħti lis-saċerdot qabel kollox għalih innifsu, huwa
anzi rigal ta’ Alla lill-Knisja kollha u għall-missjoni tiegħu fid-dinja.
Is-saċerdozju huwa sinjal sagramentali stabbli li juri li l-imħabba tar-Ragħaj
it-Tajjeb għall-merħla tiegħu ma tiġi nieqsa qatt. Fl-ittra tiegħi
lis-saċerdoti, f’Ħamis ix-Xirka li għadda, żviluppajt dan l-aspett
tas-saċerdozju bħala rigal ta’ Alla: is-saċerdozju tagħna – għidt –
“jikkostitwixxi “ministerium” partikolari, jiġifieri “servizz” fir-rigward
tal-komunità ta’ dawk li jemmnu. Però ma jiġbidx l-oriġni minn din il-komunità,
bħallikieku hija kienet li “sejħet” jew “iddelegat”. Is-saċerdozju sagramentali
huwa, fis-sewwa, rigal għal din il-komunità u jiġi mingħand Kristu nnifsu,
mill-milja tas-saċerdozju tiegħu” (Ġwanni Pawlu II, Epistula
ad universos Ecclesiae Sacerdotes adveniente Feria V in Cena Domini anno
MCMLXXIX, 8 aprile 1979, 4).
F’din l-offertà
tar-rigali lill-poplu tiegħu huwa r-regalatur divin li jieħu l-inizjattiva: huwa
hu li jsejjaħ “li min hu stess stabilixxa”.
Min hawn, meta
nirriflettu dwar l-intimità bejn il-Mulej u l-profeta tiegħu, is-saċerdot tiegħu
– intimità li tgelgel bħala riżultat tas-sejħa li biha hu ħa l-inizjattiva –
aħna nistgħu nifhmu aħjar ċerti karatteristiċi tas-saċerdozju u nirrejalizzaw
il-konformità tagħhom mal-missjoni tal-Knisja tallum bħal ma dik tal-imgħoddi:
a) Is-saċerdozju huwa
għal dejjem – “Tu es sacerdos in aeternum” – aħna ma nerġgħux nieħdu r-rigal la
darba offrut. Mhuwiex possibbli li Alla, li ta l-impuls biex ngħid iva, issa
jrid jisma le!
b) Linqas ma jrid
jissorprendi lid-dinja li s-sejħa ta’ Alla permezz tal-Knisja tkompli
tipproponilna ministeru ċelibatrorju ta’ mħabba u ta’ servizz, fuq l-eżempju ta’
Sidna Ġesù Kristu. L-imħabba ta’ Alla, infatti, messitna fil-profondità
tal-eżistenza tagħna. U wara sekli ta’ esperjenza, il-Knisja taf kemm b’mod
profond jaqbel li s-saċerdoti jistgħu jagħtu din it-tweġiba konkreta f’ħajjithom
biex jesprimu il-milja tal-iva li taw lill-Mulej meta dan sejħilhom b’isimhom,
għas-servizz tiegħu.
c) Il-fatt li sejħa
personali, individwali għas-saċerdozju hija mogħtija mill-Mulej lill-“irġiel
minnu magħżula” u bi qbil mat-tradizzjoni profetika. Dan għandu jgħinna biex
nifhmu li d-deċiżjoni tradizzjonali tal-Knisja li ssejjaħ għas-saċerdozju xi
rġiel, u ma ssejjaħx xi nisa, ma tinvolvi ebda dikjarazzjoni ta’ drittijiet
umani linqas esklużjoni tan-nisa mill-qdusija u mill-missjoni tal-Knisja.
Pjuttost din id-deċiżjoni tesprimi l-konvinċiment tal-Knisja dwar din
id-dimensjoni speċjali tar-rigal tas-saċerdozju, li permezz tiegħu Alla għażel
li jirgħa l-merħla tiegħu.
3. Għeżież ħuti:
“Il-merħla ta’ Alla tinsab f’nofskom: iddedikaw għalih l-attenzjoni tar-ragħaj”.
Kemm hu marbut b’mod strett mal-essenza tal-fehim tagħna tas-saċerdozju d-dmir
tar-ragħaj; fl-istorja tas-salvazzjoni din hija xbiha rikorrenti tal-attenzjoni
ta’ Alla għall-poplu tiegħu. U biss fl-uffiċċju ta’ Ġesù, ir-Ragħaj it-Tajjeb,
jistà jkun mifhum il-ministeru pastorali tagħna bħala saċerdoti. Ftakru kif,
fis-sejħa tat-Tnax, Ġesù sejħilhom biex ikunu preċiżament sħabu “biex jibgħathom
jippridkaw l-Bxara t-Tajba”. Is-saċerdozju huwa missjoni u servizz, huwa hu
mibgħut minn Ġesù biex “jipprovdi attenzjoni ta’ ragħaj lill-merħla tiegħu”. Din
il-laratteristika tas-saċerdot – biex infakkar espressjoni sabiħa dwar Ġesù
bħala “bniedem-għall-oħrajn” – turina s-sens ġenwin tal-“jipprovdi attenzjoni
ta’ ragħaj”. Huwa qiegħed hemm biex jindika l-għarfien tal-umanità għall misteru
ta’ Alla, tal-profondità tal-fidwa li titwettaq fi Kristu Ġesù. Il-ministeru
saċerdotali huwa essenzjalment missjunarju: dan ifisser li nkunu mibgħuta
għall-oħrajn, bħalma Kristu kien mibgħut mill-Missier tiegħu, għall-kawża
tal-Vanġelu, biex jevanġelizza. Skont il-kliem ta’ Pswlu VI, “tevanġelizza
tfisser twassal il-Bxara t-Tajba lill-istrati kollha tal-umanità… u ġġeddidhom”
(Pawlu VI, Evangelii
Nuntiandi, 18). Fil-bażi u fiċ-ċentru tad-dinamiżmu tiegħu,
l-evanġelizzazzjoni tinkludi stqarrija ċara li l-fidwa tinsab f’Ġesù Kristu, Bin
Alla. Ismu, it-tagħlim tiegħu, ħajtu, il-wegħdiet tiegħu, saltnatu u l-misteru
tiegħu aħna nħabbruh lid-dinja. U l-effett ta’ dan it-tħabbir tagħna u allura
l-veru success tas-saċerdozju tagħna jiddependu mill-fedeltà tagħna
għall-Maġisteru li permezz tiegħu l-Knisja tgħasses “id-depożitu tajjeb
bl-għajnuna tal-Ispirtu Santu li jgħammar fina” (2Tm 1,14).
Bħala mudell ta’ kull
ministeru u apostolat fil-Knisja, il-ministeru saċerdotali m’għandu qatt ikun
ikkonċeput f’termini ta’ x’se nakkwista: bħala rigal, dan huwa rigal li għandu
jkun ipproklamat u maqsum mal-oħrajn. Ma narawhx b’mod ċar fit-tagħlim ta’ Ġesù
meta omm Ġakbu u Ġwanni talbet li ż-żewġ uliedha joqogħdu bilqiegħda wieħed fuq
il-lemin u l-ieħor fuq ix-xellug fis-saltna tiegħu? “Il-kapijiet
tan-nazzjonijiet jiddominaw fuqhom u l-kbar jeżerċitaw il-poter fuqhom.
M’għandux ikun hekk fostkom; imma dak li jrid isir kbir fostkom għandu jkun
qaddej tagħkom, u dak li jrid ikun l-ewwel fostkom, għandu jagħmel lilu nnifsu
skjav tagħkom; appuntu bħal bin il-bniedem, li ma ġiex biex ikun moqdi, imma
biex jaqdi u jagħti ħajtu b’riskatt għall-kotra” (Mt 20,25-28).
Propju kif Ġesù kien
perfettament bniedem-għall-oħrajn, billi ta lilu nnifsu kompletament fuq
is-salib, hekk is-saċerdot huwa fuq kollox qaddej u bniedem-għall-oħrajn meta
jaġixxi in persona Christi fl-Ewkaristija, billi jiggwida l-Knisja f’dik
iċ-ċelebrazzjoni li fiha jġedded is-Sagrifiċċju tas-Salib. Għalhekk
fis-sagrifiċċju ewkaristiku ta’ kuljum tal-Knisja il-Bxara t-Tajba, li
l-Appostli kienu mistiedna biex ixandru, tiġi ppridkata fil-milja tagħha; l-opra
tar-redenzjonoi tagħna tiġi mġedda.
Kemm b’mod perfett
is-Santi Padri tal-Konċilju Vatikan II ħatfu din il-verità fundamentali
fid-digriet tagħhom dwar il-ħajja u l-ministeru saċerdotali: Is-sagramenti
l-oħra, kif ukoll il-ministeri ekkleżjastiċi kollha u l-opri tal-apostolat, huma
b’mod strett magħqudin mal-Ewkaristija Mqaddsa u huma ordnati għaliha… Għalhekk
l-Ewkaristija tippreżenta ruħha bħala sors u quċċata tal-evanġelizzazzjoni
kollha” (Presbyterorum
Ordinis, 5). Fiċ-ċelebrazzjoni tal-Ewkaristija aħna s-saċerdoti,
aħna propju fil-qalb tal-ministeru tas-servizz tagħna, fil-“provediment ta’
attenzjoni ta’ ragħaj għall-merħla ta’ Alla”. L-isforzi pastorali kollha tagħna
ma jkunux kompluti sakemm il-poplu tagħna ma jkunx iggwidat
għall-parteċipazzjoni sħiħa u attiva fis-Sagrifiċċju Ewkaristiku.
4. Ejjew niftakru kif
Ġesù sejjaħ lit-Tnax bħala sħabu. Is-sejħa għas-servizz saċerdotali tinkludi
l-istedina għal intimità partikolari ma’ Kristu. L-esperjenza migħuxa
tas-saċerdoti f’kull ġenerazzjoni wasslithom biex jiskopru f’ħajjithom u
fil-ministeru tagħhom iċ-ċentralità assoluta tal-għaqda personali tagħhom ma’
Ġesù, ta’ li jkunu sħabu. Hadd ma’ jistà fil-fatt, iwassal l-Bxara t-Tajba ta’
Ġesù jekk hu nnifsu l-ewwel wieħed ma jkunx għamel lilu nnifsu sieħeb kostanti
permezz tat-talb personali, jekk ma jkunx tgħallem mingħand Ġesù l-misteru li
jrid ixandar.”
Din l-għaqda ma’ Ġesù,
immudellata fuq l-għaqda tiegħu mal-Missier, terġà tilbes dimensjoni ntrinsika
ulterjuri, kif turi t-talba tiegħu matul l-Aħħar Ċena: “Sabiex ikunu ħaġa waħda,
Missier, bħalna” (Ġw 17,11). Is-saċerdozju tiegħu huwa wieħed, u din
l-għaqda trid tkun attwali u effettiva fost is-sħab li huwa għażel. Minn hawn
l-għaqda fost is-saċerdoti, migħuxa fi fraternità u ħbiberija, issir esiġenza u
parti integranti tal-ħajja ta’ saċerdot.
L-għaqda fost is-saċerdoti
mhijiex unità jew fraternità skop għaiha nfisha. Din hija għall-imħabba
tal-Vanġelu biex tissimboleġġja, fl-attwazzjoni tas-saċerdozju, id-direzzjoni
essenzjali li għaliha jsejjaħ lilna lkoll il-Vanġelu: l-għaqda tal-imħabba
miegħu u b’mod mutwu mal-oħrajn. U din l-għaqda biss tistà tiggarantixxi paċi,
ġustizzja u dinjità lil kull esseri uman. Bla ebda dubju huwa dan is-sinifikat
li hemm taħt it-talba ta’ Ġesù meta hu jkompli: “Nitlob ukoll għal dawk li
għall-kelma tagħhom jemmnu fija; sabiex ilkoll ikunu ħaġa waħda bħal ma int,
Missier, inti fija u jiena fik” (Ġw 17,20-22). Għalhekk kif tistà d-dinja
temmen li l-Missier bagħat lil Ġesù jekk ma tarax b’mod tanġibli li dawk li
jemmnu fi Kristu semgħu l-kmandament tiegħu li “jħobbu lil xulxin”? U kif
jistgħu dawk li jemmnu jkunu assikurati li din l-imħabba hija konkretament
possibli, jekk ma jkollhomx l-eżempju tal-unità tas-saċerdoti tagħhom, ta’ dawk
li Ġesù nnifsu jifforma ruħu fis-saċerdozju bħala sħabu?
Ħuti saċerdoti: ma
ħassejniex forsi il-qalba tal-argument: iż-żelu tagħna għas-saċerdozju stess?
Dan huwa inseparabbli minn dan għas-servizz tal-poplu. Din il-Quddiesa
kkonċelebrata – li tissimboleġġja tant tajjeb l-unità tas-saċerdozju tagħna –
toffri lid-dinja kollha x-xhieda ta’ dik l-unità li għaliha Ġesù talab lil
Missieru b’vantaġġ għalina. Imma m’għandhiex issir manifestazzjoni pura
passiġġiera li tirrendi sterili l-kelma ta’ Ġesù. Kull Ewkaristija ġġedded din
it-talba għall-unità: Ftakar, Mulej, fil-Knisja tiegħek mxerrda fuq l-art kollha,
irrendiha perfetta fl-imħabba f’għaqda mal-Papa tagħna Ġwanni Pawlu, l-Isqof
tagħna u l-ordni kollha saċerdotali”.
Il-Kunsilli
Presbiterjali tagħkom, bħala strutturi ġodda fil-Knisja, jfornu opportunità
meraviljuża li tixhed b’mod viżibbli l-uniku saċerdozju li fih tippartiċipaw
flimkien mal-Isqfijiet tagħkom u ma’ xulxin, u biex turu x’għandu jkun iċ-ċentru
tat-tiġdid ta’ kull struttura ekkleżjali: l-unità li għaliha talab Kristu.
5. Fil-bidu ta’ din l-omelija
jiena nkarigajtkom bid-dmir li tassumu r-responsabiltà tas-saċerdozju tagħkom,
dmir għal kull wieħed minnkom personalment, dmir li għandu jinqasam bejn is-saċerdoti
kollha u li jirrigwarda b’mod partikulari il-Kunsilli Presbiterjali tagħkom. Il-fidi
tal-Knisja kollha tesiġi li jkollha il-fehim eżatt ċar ħafna tas-saċerdozju u ta’
postu fil-missjoni tal-Knisja. Hekk il-Knisja tiddependi minnkom fl-approfondiment
dejjem iktar ta’ dan il-fehim, u biex jitqiegħed fil-prattika f’ħajjitkom u fil
ministeru tagħkom. Fi kliem ieħor: biex tipparteċipaw d-don tas-saċerdozju
tagħkom lill-Knisja billi ġġeddu it-tweġiba li diġa tajtu għall-istedina ta’
Kristu: “Ejja warajja”, billi toffru lilkom infuskom kompletament, bħal ma
għamel hu.
Kultant nisimgħu min
jgħid: “Itolbu għas-saċerdoti”. U illum jien nindirizza dan il-kliem bħala
appell, bħala nvokazzjoni lill-fidili kollha tal-Knisja fl-Istati Uniti. Itolbu
għas-saċerdoti, sabiex kull wieħed minnhom ikun irid kostantament jirripeti l-iva
tiegħu għall-vokazzjoni li rċieva, jibqà sod fil-predikazzjoni tal-messaġġ
evanġeliku, u fidil għal dejjem bħala sieħeb ta’ Sidna Ġesù Kristu.
Għeżież ħuti
saċerdoti, ladarba inġeddu l-misteru paskwali u aħna bħala dixxipli f’riġlejn
is-Salib flimkien ma’ Marija, Omm Ġesù, ippermettuli li nafdakom lilha.
F’imħabbitha nsibu l-qawwa għad-dgħufija tagħna, il-ferħ għal qlubna.
Miġjub
mit-Taljan għall-Malti minn Emanuel Zarb
|