SOLENNITÀ TAL-APPOSTLI PIETRU U PAWLU
OMELIJA TAL-QDUSIJA TIEGĦU ĠWANNI PAWLU II
Il-Ġimgħa, 29 ta’ Ġunju 1979
1. Il-liturġija tallum
teħodna, bħal kull sena, fir-reġġjun ta’ Ċesarea ta’ Filippu, fejn Xmun, bin
Ġona semà minn fomm Kristu dan il-kliem: “Imbierek int… għaliex ebda laħam u
linqas demm ma rrivelawlek dan, imma Missieri li huwa dis-smewwiet” (Mt 16,17).
Xmun semà dan il-kliem
minn fomm Kristu meta għall-mistoqsija: “In-nies min jgħidu li huwa Bin
il-bniedem? (Mt 16,13) hu kien wieġeb: “Int il-Messija “Christos”),l-iben
ta’ Alla l-ħaj” (Mt 16,16).
Din it-tweġiba tinsab
f’nofs l-istorja ta’ Xmun, li Kristu beda jsejjaħ Pietru.
Il-post, fejn hija ġiet
mistqarra, huwa post storiku. Meta l-Papa Pawlu VI, bħala pellegrin, żar l-Art
Imqaddsa, lil dak il-post iddedikalu attenzjoni speċjali. Kull suċċessur ta’
Pietru għandu jergà lura f’dak il-post bil-ħsieb u bil-qalb. Hekk kienet
ikkonfermata mill-ġdid il-fidi ta’ Pietru: “La l-laħam u linqas id-demm ma
rrivelawlet dan, imma Missieri li huwa fis-smewwiet” (Mt 16,17).
Kristu jismà l-istqarrija ta’ Pietru, li ftit qabel kienet ġiet
mistqarra. Kristu jħares fir-ruħ tal-Appostlu, li jistqarr. Ibierek l-opra
tal-Missier f’din ir-ruħ. L-opra tal-Missier tilħaq l-intellett, ir-rieda u l-qalb,
indipendentement mil-“laħam” u mid-“demm”; indipendentement min-natura u
mis-sensi. L-opra tal-Missier, permezz tal-Ispirtu Santu, tilħaq ir-ruħ
tas-sempliċi biedem, tas-sajjied tal-Galilea. Id-dawl intern ġej minn din l-opra
jsib l-espressjoni fil-kliem: “Inti l-Kristu, l-Iben ta’ Alla l-ħaj” (Mt 16,16).
Il-kliem huwa sempliċi.
Imma bih tesprimi ruħha l-verità sovraumana. Il-verità sovraumana, divina,
tesprimi ruħha bl-għajnuna ta’ kliem sempliċi. Hekk kien il-kliem ta’ Marija
fil-waqt tal-annunzjazzjoni. Hekk kien il-kliem ta’ Ġwanni l-Battista fil-Ġordan.
Hekk kien il-kliem ta’ Xmun fil-viċinanzi ta’ Ċesarea ta’ Filippu: Xmun li
Kristu sejjaħlu Pietru.
Kristu jħares fir-ruħ ta’
Xmun. Donnu li jammira l-opra mwettqa fiha mill-Missier, permezz tal-Ispirtu
Santu: Hekk hu, waqt li jistqarr il-verità rivelata dwar il-filjolanza divina
tal-Imgħallem tiegħu, Xmun isir parteċipi mill-Għarfien divin, ta dik ix-Xjenza
mpenetrabbli, li l-Missier għandu ta’ Ibnu, l-istess bħal ma l-Iben għandu
tal-Missier.
U Kristu jgħid: “Imbierek
int, Xmun bin Ġona” (Mt 16,17).
2. Dan il-kliem jinsab
fin-nofs stess tal-istorja ta’ Xmun Pietru. Qatt ma kienet irtirata din il-barka.
Hekk bħal ma qatt ma kienet mdennsa, fir-ruħ ta’ Pietru, dik l-istqarrija, li
allura kien għamel fil-viċinanzi ta’ Ċesarea ta’ Filippu. Biha għadda ħajtu
kollha sal-aħħar jum. Biha għadda dak il-lejl terribbli tal-arrest ta’ Ġesù
fil-ġnien tal-Ġetsemani; il-lejl tad-dgħufija tiegħu, tal-ikbar dgħufija tiegħu,
li wriet ruħha fiċ-ċaħda tar-raġel… imma li ma qerditx il-fidi fl-iben ta’ Alla.
Il-prova tas-salib kienet ikkompensata mix-xhieda tal-Qawmien mill-Imwiet. Din
ikkontribwiet għall-istqarrija, magħmula fir-reġġjun ta’ Ċesarea ta’ Filippu,
argument definittiv.
Pietru kien issa
jiffaċċja, b’din il-fidi fl-Iben ta’ Alla, għall-missjoni, li l-Mulej kien
għallmu.
Meta fuq ordni ta’ Erodi,
sab ruħu fil-ħabs ta’ Ġerusalem, marbut bil-ktajjen u kkundannat għall-mewt,
donnu li din il-missjoni kienet se ddum ftit. Minflok Pietru ġie meħlus
mill-istess qawwa, li minnha kien imsejjaħ. Kienet iddestinatha għalih triq
iktar twila. Fl-aħħar ta’ din it-triq, sab ruħu bħal ma tindika t-tradizzjoni
mwettqa mill-banda l-oħra minn riċerki rigorużi, waħdu fid-29 ta’ Ġunju
tas-sena 68, ta’ din l-era, li b’mod konvenzjonali bdiet tingħad mit-twelid ta’
Kristu.
Fi tmiem din it-triq l-Asppostlu
Pietru, diġa Xmun bin Ġona, sab tuħu Ruma, hawn, f’dan il-post, li fuqu ninsabu
bħalissa, taħt l-altar, fejn niċċelebraw l-Ewkaristija.
“Il-ġisem u d-demm” ġew
meqruda sal-aħħar; ġew sottomessi għall-mewt. Imma dak li darba kien irrivelalu
l-Missier (cf. Mt 16,17), irnexxielu jirbaħ il-mewt tal-ġisem; sar
il-bidu tal-laqgħa eterna mal-Imgħallem, li għalih ta xhieda sal-aħħar. Il-bidu
tal-Viżjoni beata tal-Iben tal-Missier.
U sar ukoll is-sies li ma
jaqax tal-fidi tal-Knisja. Il-ġebla tagħha, il-blata.
“Imbierek int, Xmun bin
Ġona” (Mt 16,17).
3. Fil-liturġija tallum,
li tgħaqqad it-tifkira tal-mewt u tal-glorja tal-qaddisin Appostli Pietru u
Pawlu, naqraw il-kliem li ġej mill-ittra lil Timotju: “Għażiż, min-naħa tiegħi,
demmi sejjer jixxerred bħala offerta u wasal il-waqt li niftaħ ul-qlugħ.
Iġġelidt il-battalja t-tajba, temmejt il-ġirja, żammejt il-fidi. Issa jonqosni
biss il-kuruna tal-ġustizzja li l-Mulej, imħallef ġust, se jagħtini f’dak il-jum;
u mhux biss lili imma lil dawk kollha li jistennew b’imħabba il-manifestazzjoni
tiegħu” (2Tm 4,6-8).
Bla dubju fost dawk kollha
li ħabbru il-manifestazzjoni tal-Mulej, Pawlu ta’ Tarsu kien il-maħbub singulari,
il-ġellied bla biżà, ix-xhud inflessibbli.
“Il-Mulej… kien qrib
tiegħi” niftakru sewwa kif u fejn dan seħħ; niftakru dak li seħħ qrib il-ħitan
ta’ Damasku? “Il-Mulej iżda, kien qribi u tani l-qawwa sabiex permezz tiegħi
jwettaq ix-xandir tal-messaġġ u jkunu jistgħu jisimgħuh il-ġentili kollha” (2Tm 4,17).
Pawlu, f’dehra grandjuża,
ifassal l-opra kollha ta’ ħajtu. Jitkellem minn hawn, minn Ruma, mad-dixxiplu
għażiż tiegħu, meta jkun qorob lejn tmiem ħajtu iddedikata għal kollox
għall-Vanġelu.
Penetranti huwa – mill-ġdid
f’dan l-istadju – dan l-għarfien tad-dnub u tal-grazzja; tal-grazzja li tegħleb
id-dnub, u tiftaħ it-triq tal-glorja: “Il-Mulej jeħlisni minn kull ħażen u
jsalvani għas-saltna eterna tiegħu” (2Tm 4,18).
Il-Knisja Rumana
tikkommemora llum, b’mod speċjali, fit-tifkira tagħha liż-żewġ ħarsiet aħħarin
fl-istess direzzjoni; fid-direzzjoni ta’ Kristu msallab u irxoxt. Il-ħarsa ta’
Pietru agonizzanti fuq is-salib u ta’ Pawlu qiegħed imut taħt ix-xabla.
Dawn iż-żewġ ħarsiet ta’
fidi – ta’ dik il-fidi li mliet ħajjithom sal-aħħar nifs u li qiegħdet is-sisien
tad-dawl divin fl-istorja tal-bniedem fid-dinja – u jibqgħu fit-tifkira tagħna.
U f’dan il-jum jistimulaw il-fidi tagħna fi Kristu b’qawwa speċjali.
F’din il-prospettiva jien
bil-qalb insellem lid-delegazzjoni mibgħuta mill-maħbub ħija, il-Patrijarka
ekumeniku Dimitrios I, biex jassoċja ruħu ma’ din iċ-ċelebrazzjoni tal-mexxejja
tal-Appostli, il-Qaddisin Pietru u Pawlu, biex hekk jixhed kif ir-relazzjonijiet
bejn iż-żewġ Knejjes tagħna qegħdin jintensifikaw ruħhom dejjem iktar fi sforz
komuni lejn l-għaqda sħiħa.
Miġjub mit-Taljan għall-Malti minn Emanuel Zarb
|