|
ORDINAZZJONI SAĊERDOTALI F’SAN PIETRU
OMELIJA TAL-QDUSIJA TIEGĦU ĠWANNI PAWLU II
Il-Ħadd, 24 ta’ Ġunju 1979
1. “Et tu puer propheta
Altissimi vocaberis”: “U int, tfajjel,tkun imsejjaħ profeta tal-Iktar Għoli” (Lq 1,76).
Dan il-kliem jitkellem
dwar il-Qaddis tallum. B’dan il-kliem is-saċerdot Żakkarija jsellem lil ibnu,
wara li kien kiseb lura l-ħila li jitkellem. B’dan il-kliem sellem lil ibnu, li
lilu, bir-rieda tiegħu u bis-sorpriża tal-familja kollha ta l-isem ta’ Ġwanni.
Illum il-Knisja tfakkarna dawn il-ġrajjiet, waqt li tiċcelebra s-sollennità tat-Twelid
ta’ San Ġwann Battista.
Wieħed jistà jsejħilha
wkoll il-ġurnata tas-sejħa ta’ Ġwanni, iben Żakkarija u Eliżabbetta minn Ain-Karim,
biex ikun l-aħħar profeta tal-patt il-qadim; biex ikun il-messaġġier u l-prekursur
immedjat tal-Messija: Ġesù Kristu.
Hawn hu dak, li jiġi fid-dinja
f’ċirkustanzi xejn tas-soltu, iġib diġa miegħu is-sejħa divina. Din is-sejħa
tiġi mill-pjan ta’ Alla nnifsu, mill-imħabba feddejja tiegħu, u hija miktuba fl-istorja
tal-bniedem sa mill-ewwel waqt tal-konċepiment tiegħu fil-ġuf matern.
Iċ-ċirkustanzi kollha ta’ dan il-konċepiment, kif imbagħad iċ-ċirkustanzi tat-twelid
ta’ Ġwanni f’Ain-Karim, jindikaw sejħa mhux tas-soltu: “Praeibis ante faciem
Domini parare vias eius”, “sabiex imur qabel il-Mulej biex iħejjilu triqatu” (Lq 1,76).
Nafu li għal din is-sejħa
Ġwanni Battista wieġeb b’ħajtu kollha. Nafu li għaliha huwa baqà fidil sal-aħħar
nifs. U dan in-nifs ingħata fil-ħabs fuq ordni ta’ Erodi, wara x-xewqa ta’
Salomè li aġixxiet fuq istigazzjoni tal-vendikattiva ommha Erodiade.
Iżda, dan kollu l-liturġija,
illum, ma ssemmihx, waqt li tirriservalna jum ieħor. Illum il-liturġija
tordnalna biex nifirħu biss bit-twelid tal-Prekursur tal-Mulej. Tordnalna niżżu
ħajr lil Alla għas-sejħa ta’ Ġwanni l-Battista.
2. Meta f’dan il-jum,
għeżież ħuti Djakni u kandidati għall-presbitarjat, tippreżentaw ruħkom
fil-Bażilka ta San Pietru f’Ruma, nixtiequ wkoll aħna lkoll nifirħu għas-sejħa
tagħkom għal sehem ieħor fis-saċerdozju ta’ Kristu.
Fil-qalb ta’ kull wieħed
minnkom Alla kiteb il-misteru ta’ din is-sejħa. Nistgħu nirripetu mal-profeta:
“Ħabbejtek b’imħabba eterna, għal dan inkompli nikkonservalek ħniena” (Ġer 31,3).
F’ċertu waqt tal-ħajja
intom intbaħtu b’din is-sejħa divina. U bdejtu tħejju triqtkom, bdejtu timxu
lejn it-twettiq tagħha. It-triq għas-Sagrament tal-Ordni Sagri li llum se
tirċievu minn idejja tgħaddi minn serje ta’ stadji u ambjenti, li minnu jagħmlu
parti d-dar familjari, is-snin tal-iskola elementari u medja, kif ukoll l-istudji
superjuri, l-ambjent tal-ħbieb, il-ħajja parrokkjali. L-ewwelnett, iżda, f’din
it-triq jinsab is-seminarju ekkleżjastiku, li fih kull wieħed minna jmur biex
isib tweġiba definittiva għad-domanda li tirrigwarda s-sejħa tiegħu
għas-saċerdozju. Kull wieħed minna jmur hemm, sabiex, waqt li jsib b’mod dejjem
iktar matur tali tweġiba, ikun jistà jħejji lilu nnifsu fl-istess ħin,
għas-Sagrament tal-Oedni Sagri b’mod profond u sistematiku.
Illum diġa għandkom wara
spallejkom dawn l-esperjenzi kollha. La tistaqsux iktar bħal dak iż-żagħżagħ
mill-Vanġelu: “Mgħallem tajjeb, x’irrid nagħmel?” (Mk 10,17). L-Imgħallem
diġa għinkom biex issibu t-tweġiba. Intom qegħdin tippreżentaw ruħkom hawn
sabiex il-Knisja tkun tistà tistampa fuq din it-tweġiba is-siġill sagramentali
tagħha.
3. Dan is-siġill jistampa
ruħu permezz tal-liturġija kollha tas-Sagrament tal-Ordni Sagri. Jistampah l-Isqof,
li jaġixxi bil-qawwa tal-Ispirtu Santu u f’komunjoni mal-Presbiterju kollu
tiegħu.
Il-qawwa tal-Ispirtu Santu
tiġi ndikata u trażmessa mill-impożizzjoni tal-idejn, ikkumpanjata l-ewwel
bis-skiet u mbagħad bit-talb. Bħala sinjal tat-trasferiment ta’ din il-qawwa fl-idejn
żgħażagħ tagħkom, dawn jiġu midluka minn Kriżma mqaddsa biex tkunu denji li
tiċċelebraw l-Ewkaristija. L-idejn umani ma jistgħux jiċċelebraw b’mod ieħor
jekk mhux fil-qawwa tal-Ispirtu Santu.
Tiċċelebra l-Ewkaristija
jfisser tiġbor lill-Poplu ta’ Alla u tibni l-Knisja fl-identità sħiħa tagħha.
Il-waqt li qegħdin ngħixu
hawn flimkien huwa ta’ mportanza kbira kemm għal kull wieħed minnkom kif ukoll
għall-Knisja kollha.
Il-Knisja talbet għal kull
wieħed minn dawn l-imsejħa, li llum qegħdin jirċievu s-siġill sagramentali
tal-Presbiterju. Il-Knisja tixtieq li kull wieħed minnkom jibniha bis-saċerdozju
tiegħu, bis-servizz tiegħu, li minħabba l-qawwa miksuba minn Kristu “jiġbor u ma
jferrixx” (cf. Mt 12,30).
4. Il-Knisja llum titlob
ukoll. Jitolbu l-ġenituri tagħkom, il-familji, l-ambjenti li magħhom kienet
marbuta s’issa ħajjitkom, is-seminarji tagħkom, id-dijoċeżijiet tagħkom,
il-Kongregazzjonijiet Reliġjużi tagħkom.
Ejjew nitolbu lill-Mulej
tal-mergħa li sejjaħ lil kull wieħed minnkom bħala ħaddiema għall-mergħa tiegħu,
sabiex tipperseveraw f’din il-mergħa sal-aħħar.
Hekk bħal Ġwanni bin
Żakkarija u Eliżabbetta minn AIN-Karim, li missieru qal fil-jum tat-twelid
tiegħu: “Et tu puer propheta Altissimi vocaberis” (Lc 1,76).
Il-perseveranza ragħkom
tkun il-frott tat-talb li llum se ngħollu. Ipperseveraw bħala peofeti tal-Iktar
Għoli! Ipperseveraw bħala saċerdoti ta’ Ġesù Kristu!
Ġorru frott abbundanti.
Amen.
Miġjub
mit-Taljan għall-Malti minn Emanuel Zarb
|
