|
VJAĠĠ
APOSTOLIKU Fl-ISTATI UNITI TAL-AMERIKA
OMELIJA TAL-QDUSIJA TIEGĦU
ĠWANNI PAWLU II
FIL-KATIDRAL TA’ SAN
MATTEW F’ WASHINGTON
Is-Sibt, 6 ta’ Ottubru 1979
Illum il-Madonna tgħidilna: “Jien
il-qaddejja tal-Mulej. Ħa jsir minni skont dak li għidtli” (Lq 1,38).
B’dan il-kliem hija tesprimi dak
li kien l-atteġġjament fundamentali ta’ ħajjitha: il-fidi tagħha! Marija emmnet!
Hija afdat fil-wegħdiet ta’ Alla u kienet fidila għar-rieda tiegħu. Meta l-Anġlu
Gabriel ħabbar li hija kienet intgħażlet biex tkun l-Omm tal-Iktar Għoli, hija
qalet il-“fiat” tagħha b’umiltà u b’libertà sħiħa: “Isir minni dak li għidtli”.
Forsi l-iktar deskrizzjoni sabiħa
ta’ Marija u, fl-stess ħin l-ikbar ġieħ lilha, kienet it-tislima ta’ kuġinitha
Eliżabetta: “Imbierka dik li emmnet fit-twettiq ta’ kliem il-Mulej” (Lq 1,45).
Infatti dak li l-iktar ikkaratterizza l-fidi tagħha kienet din il-fiduċja
kontinwa fil-providenza ta’ Alla.
Ħajjitha kollha fuq din l-art
kienet “pellegrinaġġ ta’ fidi” (cf. Lumen
Gentium, 58). Hija wkoll bħalna imxiet fid-dell waqt li ttamat
fil-ħwejjeġ li ma jidhrux. Hija kienet taf il-kontradizzjonijiert ta’ din
il-ħajja terrena. Kienet irċeviet il-wegħda li Binha kellu jkollu t-tron ta’
David, imma t-twelid tiegħu linqas ġo lukanda ma sar. Minkejja dan, Marija
emmnet. L-Anġlu kien qalilha li binha kellu jissejjaħ Bin Alla; imma hi kient
ratu kkalunjat, ittradut, ikkundannat, mitluq waħdu biex imut bħal ħalliel fuq
is-salib. Ukoll f’dak il-waqt Marija “emmnet fit-twettiq ta’ kliem il-Mulej” (Lq 1,45)
u li “xejn mhu mpossibbli għal Alla” (Lq 1,37).
Din il-mara ta’ fidi, Marija ta’
Nazzaret, l-Omm ta’ Alla, ingħatatilna bħala mudell fil-pellegrinaġġ ta’ fidi
tagħna. Minn Marija nitgħallmu biex nintelqu għar-rieda ta’ Alla fil-ħwejjeġ
kollha. Minn Marija nitgħallmu li jkollna fiduċja wkoll meta kull tama tidher li
għabet. Minn Marija nitgħallmu nħobbu lil Kristu, Binha u Bin Alla. Għaliex
Marija mhijiex biss Omm Alla, hija hi wkoll Omm il-Knisja. F’kull stadju
tal-mixja twila tul il-kors tal-istorja il-Knisja kienet sostnuta mit-talb u l-protezzjoni
tal-Verġni Marija. L-Iskrittura Mqaddsa u l-esperjenza tal-fidili jaraw f’Omm
Alla lil dik li hija magħquda mal-Knisja b’mod speċjali fil-waqtiet l-iktar
diffiċli tal-istorja meta l-attakki fuq il-Knisja jsiru iktar minaċċużi.
Preċiżament fil-perijodi li fihom
Kristu, u allura l-Knisja tiegħu, ipprovokaw kontradizzjoni internazzjonali,
Marija tidher b’mod partikolari qrib il-Knisja, għaliex għaliha l-Knisja hija
dejjem il-favorita ta’ Kristu.
Mela inħeġġiġkom fi Kristui Ġesù,
biex tkomplu tħarsu lejn Marija bħala l-mudell tal-Knisja, bħala l-aqwa eżempju
tad-dixxipulat ta’ Kristu. Tgħallmu minnha biex tkunu dejjem fidili, biex temmnu
fit-twettiq tal-kelma ta’ Alla għalikom, u li xejn mhu mpossibbli għal Alla.
Duru dspiss lejn Marija fit-talb tagħkom għaliex “qatt ma nstamà fid-dinja li xi
ħadd inxteħet taħt il-patroċinju tagħha, talab l-għajnuna tagħha, talab
il-protezzjoni tagħha, u sab ruħu abbandunat”.
Bħal sinjal kbir li deher fis-sema,
Marija tiggwidana u ssostnina fil-pellegrinaġġ tagħna, waqt li tistimolana lejn
“ir-rebħa li tirbaħ id-dinja, il-fidi tagħna” (1Ġw 5,5).
Miġjuba mit-Taljan għall-Malti minn Emanuel Zarb.
|
