UFFIĊĊJU GĦAĊ-ĊELEBRAZZJONIJIET
LITURĠIĊI TAL-PAPA
IL-ĠIMGĦA L-KBIRA, IL-PASSJONI
TA’ SIDNA ĠESÙ KRISTU
VIA CRUCIS
IMMEXXIJA MILL-Q.T. IL-PAPA
FRANĠISKU
IL-KOLOSSEW
RUMA, 14 TA’ APRIL 2017
Meditazzjonijiet
ta’ Anne-Marie Pelletier
Introduzzjoni
Is-siegħa issa
waslet. Ġesù terraq mat-toroq
kollha trab tal-Galilija u
tal-Lhudija, lejn il-bnedmin u
l-qlub muġugħa, imħeġġeġ
mill-urġenza biex ixandar
is-Saltna. Daqshekk terraq u se
jieqaf hawn, illum. Fuq l-għolja
tal-Golgota. Illum is-Salib qed
jagħlaq it-triq. Ġesù ma jistax
imur iktar ’il bogħod.
Impossibbli jmur
iktar ’il bogħod!
L-imħabba ta’
Alla hawn tidher fl-aqwa tagħha,
imħabba bla qies.
Illum l-imħabba
tal-Missier, li jrid li permezz
tal-Iben isalvaw il-bnedmin
kollha, tasal fil-milja, u
tħallina bla kliem,
diżorjentati. Il-pjan bla tarf
ta’ Alla jisboq kull idea ta’
reliġjon li jista’ qatt kellna.
Fuq il-Golgota,
fil-fatt, kontra l-apparenzi
kollha, hi kwistjoni ta’ ħajja.
U ta’ grazzja. U ta’ paċi. Mhux
qed nitkellmu dwar is-saltna
tal-ħażen, li aħna nafu tajjeb,
anki żżejjed, imma dwar ir-rebħa
tal-imħabba.
U, proprju taħt
l-istess salib, qed nitkellmu
dwar id-dinja tagħna,
bil-waqgħat kollha tagħha u
bl-uġigħ, bl-appelli u
l-karbiet, dak kollu li qed
isejjaħ lil Alla, illum,
mill-artijiet tal-miżerja jew
tal-gwerra, fil-familji
mkissrin, fil-ħabsijiet, fuq
id-dgħajjes mimlijin
bl-immigranti…
Ħafna dmugħ,
ħafna miżerja fil-kalċi li
l-Iben jixrob għalina.
Ħafna dmugħ,
ħafna miżerja li ma jistgħux
jintilfu fl-oċean taż-żmien,
iżda li hu jiġbor, biex jinbidlu
fil-misteru ta’ mħabba li jġib
il-ħażen fix-xejn.
Fuq il-Golgota
qed nitkellmu proprju dwar
il-fedeltà bla tarf ta’ Alla
lejn l-umanità tagħna.
Hemm seħħ dan
it-twelid!
Għandu jkollna
l-kuraġġ ngħidu li l-ferħ
tal-Evanġelju huwa l-verità ta’
dan il-mument!
Jekk għajnejna
ma jwassluniex għal din
il-verità, nibqgħu maqbudin
fix-xbieki tat-tbatija u
tal-mewt. U għalina l-Passjoni
ta’ Kristu tkun seħħet għalxejn.
Nitolbu
Mgħallem,
għajnejna mdallmin. Kif nistgħu
nimxu miegħek tant ’il bogħod?
Ismek huwa
“ħniena”. Imma dan l-isem
ġennata.
Ħa jinfaqgħu
d-damiġġani qodma ta’ qlubna!
Fejjaq il-ħarsa
tagħna sabiex tiddawwal
bil-bxara t-tajba tal-Evanġelju,
fil-ħin li fih nieqfu f’riġlejn
is-Salib ta’ Ibnek.
U nkunu nistgħu
niċċelebraw “il-wisa’, it-tul,
l-għoli u l-fond” (Efes 3:18)
tal-imħabba ta’ Kristu, li
tfarraġ u tgħammex bid-dija lil
qalbna.
VIA CRUCIS
L-Ewwel
Stazzjon: Ġesù kkundannat
għall-mewt
Mill-Evanġelju
skont San Luqa:
Meta sebaħ,
iltaqgħet il-ġemgħa tax-xjuħ
tal-poplu, il-qassisin il-kbar u
l-kittieba, u ħadu lil Ġesù
quddiem is-Sinedriju tagħhom.
(Lq 22:66)
Mill-Evanġelju
skont San Mark:
U kollha
qatgħuhielu li kien ħaqqu
l-mewt. Imbagħad xi wħud bdew
jobżqulu fuqu, jgħattulu wiċċu,
jagħtuh bil-ponn u jgħidulu:
“Aqta’ min!”. U l-qaddejja bdew
jagħtuh bil-ħarta. (Mk 14:64-65)
Meditazzjoni
Ma kellhomx
bżonn jiddiskutu wisq il-membri
tas-Sinedriju biex jiddeċiedu.
Kienu ilhom li ddeċidew. Ġesù
għandu jmut!
Diġà kienu
jaħsbuha hekk dawk li riedu
jitfgħuh ’l isfel mill-irdum,
dakinhar li fis-sinagoga ta’
Nazaret, Ġesù fetaħ il-ktieb u
tkellem fl-ewwel persuna waqt li
kien qed jaqra l-kliem tal-ktieb
ta’ Iżaija, “L-Ispirtu tal-Mulej
fuqi, għax hu kkonsagrani […] u
nxandar sena tal-grazzja
tal-Mulej”. (Lq 4:18-19)
Diġà meta fejjaq
lill-mifluġ f’Betzata, u s-Sibt
għamlu jum ta’ dak Alla li
jagħti l-ħelsien minn kull
skjavitù, beda jiżdied
id-diskors ta’ qtil kontrih (ara
Ġw 5:1-18).
Kif ukoll,
fl-aħħar biċċa tat-triq, hu u
dieħel Ġerusalemm għall-festa
tal-Għid, il-mażżra kienet diġà
mdendla ma’ għonqu: ma kienx se
jeħlisha minn idejn l-għedewwa
tiegħu (ara Ġw 11:45-57).
Imma jeħtieġ
immorru iktar lura bil-memorja.
Jekk nitilqu minn Betlehem, meta
twieled, Erodi kien qatagħha li
kellu jmut. Ix-xwabel tar-re
użurpatur għamlu massakru
mit-tfal ta’ Betlehem. Dik
id-darba Ġesù ħarab il-qilla
tagħhom. Imma kien biss għal
żmien qasir. Ħajtu diġà kienet
imdendla b’xagħra. Fil-biki ta’
Rakel għal uliedha li m’għadhomx
iżjed, bħal tinstema’
l-profezija tad-dulur li Xmun
kellu jħabbar lil Marija (ara
Mt 2:16-18; Lq 2:34-35).
Talba
Mulej Ġesù, Iben
l-iktar maħbub, li ġejt iżżurna,
imxejt fostna u għamilt il-ġid,
u li tajt lura l-ħajja lil min
għex fid-dell tal-mewt, inti
tafhom lil qlubna mħawda.
Aħna nsostnu li
aħna ħbieb tas-sewwa u tal-valur
tal-ħajja. Iżda aħna midinbin u
msieħba mal-mewt.
Insejħu lilna
nfusna dixxipli, iżda nieħdu
toroq li jintilfu ’l bogħod
mill-ħsibijiet tiegħek, ’il
bogħod mill-ġustizzja u
mill-ħniena tiegħek.
Titlaqniex
għall-vjolenzi tagħna.
Agħmel li
l-paċenzja tiegħek magħna ma
tinħela qatt.
Eħlisna
mill-ħażen!
Missierna
Poplu tiegħi,
fiex inqastek? Fiex irrabjajtek?
Weġibni.
It-Tieni
Stazzjon: Ġesù miċħud minn
Pietru
Mill-Evanġelju
skont San Luqa:
Għaddiet xi
siegħa u reġa’ kien hemm ieħor
li beda jisħaq u jgħid: “Iva,
tassew, dan ukoll kien miegħu,
għax dan ukoll
mill-Galilija”. Iżda Pietru
qallu: “Ma nafx x’inti tgħid,
sieħeb”. U minnufih, kif kien
għadu jitkellem, is-serduk
idden. U l-Mulej dar u ħares
lejn Pietru; u Pietru ftakar
fil-kelma li l-Mulej kien qallu,
‘Illum, qabel ma jidden
is-serduk, inti tkun ġa ċħadtni
tliet darbiet’. U ħareġ ’il
barra jibki b’qalbu maqsuma. (Lq
22:59-62)
Meditazzjoni
F’dawk is-sigħat
kesħin tal-lejl, fil-bitħa
tas-Sinedriju, Pietru u xi
oħrajn kienu qegħdin għas-sħana
madwar in-nar, b’geġwiġija ta’
nies deħlin u ħerġin madwarhom.
Ġewwa, kienu qed
jiddeċiedu x’se jiġri minn Ġesù,
waqt li kien qed jaffaċċja lil
dawk li akkużawh. Se jitolbu li
jinqatel.
Bħalma jogħla
l-livell tal-ilma baħar, hekk
kienet qed tiżdied l-ostilità
lejh. Kif tinħaraq ftila,
il-mibegħda bdiet tixgħel u
toktor. Dalwaqt il-folla se
titlob bi ħġarha lil Pilatu
jeħles lil Barabba u jikkundanna
lil Ġesù.
Diffiċli tgħid
li int ħabib ta’ kkundannat
għall-mewt mingħajr ma tħoss
tkexkixa ta’ biża’. Il-fedeltà
ta’ Pietru ma żammitx soda xħin
sema’ l-kliem mimli suspetti
tal-qaddejja.
Li jammetti li
kien dixxiplu tar-rabbi
mill-Galilija kien ifisser li
jagħti iktar importanza
lill-fedeltà lejn Ġesù milli lil
ħajtu! X’kuraġġ trid biex
tagħmel hekk, il-verità diffiċli
li ssib min jixhed għaliha…
Il-bniedem hu magħmul b’tali mod
li ħafna drabi jippreferi gidba;
u Pietru bniedem bħalna. Jiċħad,
għal tliet darbiet. Imbagħad
għajnejh jiltaqgħu ma’ ta’ Ġesù.
U d-dmugħ jinżel, morr imma
fl-istess ħin ħelu, bħal ilma li
jnaddaf il-ħmieġ.
Dalwaqt, ftit
tal-jiem oħra, meta jerġa’ jkun
ħdejn in-nar, fuq xatt ix-xmara,
Pietru se jagħraf lill-Mulej
tiegħu li qam mill-mewt, u dan
se jgħidlu jirgħa l-merħla
tiegħu. Pietru jara l-maħfra bla
qies li l-Irxoxt jagħti lil kull
ċaħda min-naħa tagħna. U minn
dakinhar jibda jagħmel parti
minn fedeltà sħiħa li ’l quddiem
se tħallih jaċċetta l-mewt
tiegħu stess, bħala offerta
magħquda ma’ dik ta’ Kristu.
Talba
Mulej, Alla
tagħna, int ridt li jkun Pietru,
id-dixxiplu li ċaħad u li
nħafer, li jintgħażel biex
imexxi ’l-merħla tiegħek.
Immarka lil
qlubna bil-fiduċja u bil-ferħ
għax nafu li, fik, nistgħu
naqsmu l-widien tal-biża’ u
l-infedeltà tagħna.
Agħmel li,
bl-għajnuna ta’ Pietru,
id-dixxipli kollha tiegħek ikunu
xhieda tal-ħarsa li toffri
lill-waqgħat tagħna. Ma jkun
qatt li l-ebusija jew
id-disperazzjoni tagħna jġibu
fix-xejn il-Qawmien ta’ Ibnek!
Missierna
Kristu li mitt
għad-dnubiet tagħna,
Kristu li qomt
għall-ħajja tagħna,
nitolbuk, ħenn
għalina.
It-Tielet
Stazzjon: Ġesù u Pilatu
Mill-Evanġelju
skont San Mark:
Filgħodu kmieni
l-qassisin il-kbar iltaqgħu
malajr max-xjuħ u mal-kittieba u
mas-Sinedriju kollu biex
jiftiehmu bejniethom. Imbagħad
rabtu lil Ġesù, ħaduh u tawh
f’idejn Pilatu. Il-qassisin
il-kbar bdew jaqilgħu ħafna
akkużi kontra tiegħu. Pilatu
mbagħad, biex jogħġob lin-nies,
telqilhom lil Barabba, u lil
Ġesù, wara li tah is-swat,
tahulhom biex isallbuh. (Mk
15:1,3,15)
Mill-Evanġelju
skont San Mattew:
Meta mbagħad
Pilatu ra li kollox kien
għalxejn, anzi li aktarx kienet
se tinqala’ xi rewwixta, qabad,
ħasel idejh fl-ilma quddiem
il-poplu u qal: “Jien m’iniex
ħati ta’ dan id-demm: dan arawh
intom!”. (Mt 27:24)
Mill-ktieb
tal-Profeta Iżaija:
Aħna lkoll bħal
nagħaġ mitlufa, kull wieħed
minna qabad triq għal rasu. U
l-Mulej xeħet fuqu l-ħażen
tagħna lkoll. (Iż 53:6)
Meditazzjoni
Ruma ta’ Ċesri
Awgustu, in-nazzjon ċivilizzat,
li bil-leġjuni tiegħu għandu
l-missjoni li jaħkem lill-popli
biex jibbenefikaw mill-ordni
ġust li se jġibilhom.
Ruma, li permezz
tal-persuna ta’ Pilatu, insibuha
preżenti fil-Passjoni ta’ Ġesù.
Pilatu, ir-rappreżentant
tal-Imperatur, li jagħti
garanzija ta’ drittijiet u
ġustizzja fl-artijiet barranin.
Madankollu, hu
l-istess Pilatu li jgħid li ma
jsib ebda ħtija f’Ġesù, li
jikkundannah għall-mewt.
Fil-Pretorju fejn jixlu lil
Ġesù, il-verità tixgħel:
il-ġustizzja tal-pagani mhix
aħjar minn dik tas-Sinedriju
tal-Lhud!
Ġesù, dak li hu verament ġust, u
li għal xi raġuni jiġbed fuqu
l-ħsibijiet qattiela tal-qalb
tal-bniedem, iġib flimkien
lil-Lhud u lill-pagani. Imma dan
iseħħ, għalissa, billi
jagħmilhom kompliċi ndaqs
fil-qtil tiegħu. Madankollu,
jasal il-mument, anzi huwa qrib,
li fih se jgħaqqadhom mill-ġdid
b’mod differenti, permezz
tas-Salib u ta’ maħfra li tasal
lil kulħadd, Lhud u pagani, u
tfejjaqhom kollha mit-tbeżżigħ u
teħlishom mill-vjolenza tagħhom.
Biex nirċievu dan ir-rigal,
għamlilna kundizzjoni waħda:
irridu nammettu l-innoċenza
tal-uniku Innoċenti, il-Ħaruf
ta’ Alla mogħti bħala tpattija
għad-dnubiet tad-dinja; irridu
niċħdu l-preżunzjoni li għandna
fina: “Jien m’iniex ħati ta’ dan
id-demm”; irridu nammettu li
għandna tort, b’fiduċja li
mħabba bla qies tħaddanna lkoll,
Lhud u pagani, u li Alla jsejjaħ
lill-bnedmin kollha biex ikunu
wliedu.
Talba
Mulej, Alla tagħna, quddiem Ġesù
mogħti u kkundannat, ma nafu
nagħmlu xejn għajr nitfgħu
l-ħtija fuq l-oħrajn. Għal ħafna
żmien aħna l-Insara tfajna l-piż
tal-kundanna għall-mewt tiegħek
fuq il-poplu tiegħek ta’ Iżrael.
Għal ħafna żmien ma ndunajniex
li għandna nagħrfu lilna nfusna
bħala lkoll imseħbin fid-dnub,
biex hekk inkunu lkoll mifdija
permezz tad-demm ta’ Ġesù
msallab.
Agħtina l-grazzja li f’Ibnek
nagħrfu li hu l-Innoċenti,
l-uniku wieħed fl-istorja
kollha. Hu li aċċetta li jsir
“dnub għalina” (ara 2 Kor
5:21), sabiex permezz tiegħu int
tkun tista’ terġa’ ssibna,
umanità mwielda mill-ġdid
fl-innoċenza li biha inti
ħlaqtna, u li fiha tagħmilna
wliedek.
Missierna
Alla tiegħi, Alla tiegħi,
għaliex tlaqtni?
Ir-Raba’ Stazzjon: Ġesù Sultan
tal-Glorja
Mill-Evanġelju skont San Mark:
Is-suldati ħaduh magħhom ġewwa
fil-palazz, jiġifieri
l-Pretorju, u sejħu r-riġment
kollu. Libbsuh ilbies aħmar
skur, u qegħdulu fuq rasu kuruna
minsuġa mix-xewk. U bdew
isellmulu: “Is-sliem għalik,
sultan tal-Lhud!”. (Mk 15:16-18)
Mill-ktieb
tal-Profeta Iżaija:
Ebda sura ma kellu, u ebda ġmiel
biex inħarsu lejh, jew xi sura
biex nitgħaxxqu bih. Kien
imżeblaħ u mwarrab mill-bnedmin,
bniedem li bata u kien jaf
x’inhu l-mard, bħal wieħed li
n-nies jaħbu wiċċhom minnu,
bniedem imżeblaħ, u aħna xejn ma
qisnieh. Iżda hu rafa’ fuqu
l-mard tagħna, tgħabba bin-niket
tagħna. Aħna ħsibnieh bħal
wieħed ikkastigat, mitluq minn
Alla u miġjub fix-xejn. (Iż
53:2-4)
Meditazzjoni
Kemm hu banali l-ħażen. Ma
jingħaddux l-irġiel, in-nisa u
saħansitra t-tfal abbużati,
umiljati, ittorturati, maqtula,
kullimkien u f’kull żmien
tal-istorja.
Ġesù ma jużax id-divinità tiegħu
biex jipproteġi lilu nnifsu,
imma jidħol minn jeddu fil-wied
tas-sofferenzi li l-bniedem
kapaċi jikkawża lill-bnedmin
l-oħra. Jaf xi jħossu l-umiljati
u l-imżebilħin abbandunati.
Imma x’ġid tista’ tagħmel
it-tbatija ta’ innoċenti ieħor?
Dak li huwa wieħed minna, qabel
kollox huwa l-Iben maħbub
tal-Missier, li ġie biex iwettaq
il-ġustizzja sħiħa permezz
tal-ubbidjenza tiegħu.
U f’waqt wieħed, is-sinjali
kollha jinqalbu. Il-kliem u
ż-żebliħ ta’ dawk li kienu qed
isawtuh – x’paradoss! – juruna
l-verità li ħadd ma jista’
jmeriha: dik li Ġesù huwa
l-uniku Sultan, u dan jidher
permezz ta’ mħabba li ma riedet
taf b’xejn iktar għajr bir-rieda
tal-Missier, u bix-xewqa tiegħu
li kull bniedem jiġi mifdi. “Int
ma titgħaxxaqx b’sagrifiċċji u
offerti. […] Imbagħad jien
għedt: ‘Hawn jien, ġej’.
Fil-bidu tal-ktieb hemm miktub
fuqi li nagħmel ir-rieda
tiegħek” (Salm 40:7-9).
Din is-siegħa tal-Ġimgħa l-Kbira
tgħidilna dan: glorja waħda hemm
f’din id-dinja jew fl-oħra, dik
li tagħraf u twettaq ir-rieda
tal-Missier. Ħadd minna ma
jista’ jkollu ambizzjoni ta’
dinjità iktar għolja minn dik li
jkun iben permezz ta’ dak li
għalina obda sal-mewt tas-Salib.
Talba
Mulej, Alla tagħna, nitolbuk:
f’dan il-jum qaddis li fih
ir-Rivelazzjoni tasal
għall-milja tagħha, farrak
l-idoli fina u fid-dinja tagħna.
Int taf tajjeb is-setgħa li
għandhom fuq moħħna u f’qalbna.
Farrak il-figuri foloz li hemm
fina tas-suċċess u tal-glorja.
Farrak ix-xbieha li dejjem
għandna ta’ Alla li jaħdem skont
l-ideat tagħna, Alla mbiegħed,
tant imbiegħed mill-wiċċ li
rrivelalna fil-Patt u li llum
jidher f’Ġesù, u jmur lil hinn
minn kull tbassir, hu ogħla minn
kull tama. Dak li ngħidu li hu
“d-dija tal-glorja [tiegħek]”
(Lhud 1:3).
Agħmel li nidħlu fil-glorja ta’
dejjem, li tħallina nifirħu
b’Ġesù mlibbes bl-aħmar u
nkurunat bix-xewk, is-Sultan
tal-glorja li jgħanni s-Salm:
“Intrefgħu, bibien, infetħu,
intom bibien ta’ dejjem, ħa
jidħol is-Sultan tal-glorja!”
(24:9).
Missierna
Intrefgħu, bibien,
infetħu, intom bibien ta’
dejjem,
ħa jidħol is-Sultan tal-glorja.
Il-Ħames Stazzjon: Ġesù jġorr
is-Salib
Mill-ktieb
tal-Lamentazzjonijiet:
U intom ilkoll li għaddejjin
mit-triq, ħarsu sewwa u araw
jekk hawnx hemm bħal hemmi, li
waqa’ fuqi; li bih il-Mulej
għabbieni fil-jum ta’ saħnet
għadbu. (Lam 1:12)
Mis-Salm 146:
Hieni min f’Alla ta’ Ġakobb isib
l-għajnuna tiegħu, min għandu
t-tama fil-Mulej, Alla tiegħu,
[…] Il-Mulej li jeħles
lill-imjassrin; il-Mulej li
jiftaħ għajnejn l-għomja;
il-Mulej li jerfa’
lill-milwijin; […] il-Mulej li
jħares lill-barranin; hu li
jżomm lill-iltim u lill-armla.
(Salm 146:5,7-8,9)
Meditazzjoni
Tul it-triq iebsa lejn
il-Golgota, Ġesù ma tgħabbiex
bis-salib daqslikieku trofew! Hu
ma jixbah xejn lill-eroj li
fl-immaġinazzjoni tagħna jirbħu
fuq l-għedewwa kefrin tagħhom.
Hu mexa pass pass, bilmod,
b’ġismu dejjem aktar għajjien.
Ħass laħmu dejjem aktar
jitħaffer bl-injama
tas-sagrifiċċju, saqajh iċedu
taħt it-tagħbija.
Minn ġenerazzjoni għal oħra,
il-Knisja mmeditat din it-triq
miżgħuda bit-tfixkil u
bil-waqgħat.
Ġesù jaqa’, jerġa’ jqum, jerġa’
jaqa’, bla saħħa jkompli miexi,
aktarx taħt id-daqqiet
tas-suldati li għandu miegħu,
għaliex hu hekk li għandhom
jittrattaw, anzi, jimmaltrattaw,
lill-ikkundannati f’din
id-dinja.
Dak li qajjem fuq saqajhom
lill-mifluġin, li ddritta
lill-mara mgħawġa, qajjem
mill-mewt lil bint Ġajru, qajjem
fuq saqajhom ħafna morda, arah
illum mgħaddas fit-trab.
L-Ogħla wieħed jinsab mal-art.
Ejja nżommu ħarsitna fuq Ġesù.
Permezz tiegħu, l-Għoli
jgħallimna li fl-istess ħin –
ħaġa li ma titwemminx – huwa
l-aktar Umli, lest li jinżel sa
ħdejna, iktar ’l isfel jekk hemm
bżonn, biex b’hekk ħadd qatt ma
jintilef fl-iktar livell baxx
tal-miżerja tiegħu nnifsu.
Talba
Mulej, Alla tagħna, inti tinżel
fil-fond tal-lejl tagħna,
mingħajr ma qatt tgħid
“daqshekk” għall-umiljazzjoni,
għaliex huwa hekk li tasal
fil-qiegħ ta’ ħajjitna, fejn
spiss hemm l-ingratitudni, u
ħafna drabi t-tifrik.
Nitolbuk bil-ħniena: agħmel li
l-Knisja tiegħek tkun xhud li
l-Ogħla u l-Iktar Umli għandhom
fik l-istess wiċċ. Agħtiha
l-grazzja li lil dawk kollha li
jaqgħu, twasslilhom il-Bxara
t-tajba: m’hemmx waqgħa li
tista’ tbegħedna mill-ħniena
tiegħek; m’hemmx telfa, m’hemmx
abbiss tant fond li fih int ma
tistax issib lil min intilef.
Missierna
Hawn jien, Mulej, ġej nagħmel
ir-rieda tiegħek.
Is-Sitt Stazzjon: Ġesù u Xmun
minn Ċireni
Mill-Evanġelju skont San Luqa:
Huma u sejrin bih, qabdu wieħed,
jismu Xmun, minn Ċireni, li kien
ġej lura mir-raba’, u għabbewh
bis-salib biex iġorru wara
Ġesù. (Lq
23:26)
Mill-Evanġelju skont San Mattew:
“Meta rajniek bil-ġuħ u
tmajniek, jew bil-għatx u
sqejniek? Meta rajniek barrani
u lqajniek, jew għeri u
libbisniek? Meta rajniek marid
jew fil-ħabs u ġejna nżuruk?”.
(Mt 25:37-39)
Meditazzjoni
Ġesù jaqa’ tul it-triq, ġismu
mgħaffeġ taħt it-toqol
tas-salib. Imma jrid jibqa’
għaddej, jimxi, u jibqa’ miexi,
għaliex is-suldati jridu
jwassluh fuq il-Golgota, “post
il-qorriegħa”, mistkerrah tant,
’il barra mill-ħitan tal-belt.
F’dak il-ħin jgħaddi minn hemm
raġel b’saħħtu. Jidher li
m’għandux x’jaqsam ma’ dak li
qed jiġri hemm dakinhar. Sejjer
lura lejn id-dar, ma jaf b’xejn
dwar dak li qed jiġri lir-rabbi
Ġesù, xħin iwaqqfuh is-suldati
biex iġorr is-salib.
Tgħid x’kien jaf dwar dak
l-ikkundannat meħud mis-suldati
għall-mewt? X’seta’ kien jaf
dwar dak li “ma kellux iktar
sura ta’ bniedem”, bħall-qaddej
bla sura ta’ Iżaija?
Ma nafu xejn dwar jekk ħax
qatgħa, jew jekk forsi
għall-ewwel irrifjutax, jew jekk
Ġesù ġablux ħniena. L-Evanġelju
ried iħallilna biss ismu: Xmun,
minn Ċireni. Iżda l-Evanġelju
ried iwasslilna isem dan
il-Libjan u l-ġest tiegħu umli u
ħanin, biex jgħallimna li, billi
taffa mit-tbatija ta’ kkundannat
għall-mewt, Xmun taffa
mit-tbatija ta’ Ġesù, Bin Alla.
Li ltaqa’ miegħu taħt is-sura
ta’ skjav, sura li ħa għalina,
kif ukoll għalih, biex jifdi
lid-dinja. Mingħajr ma Xmun ikun
jaf b’xejn.
Talba
Mulej, Alla tagħna,
irrivelajtilna li f’kull fqir
għeri, ħabsi, bil-għatx, huwa
int li ġejt iżżurna, u huwa int
stess li aħna nkunu nilqgħu,
inżuru, inlibbsu u ngħinu jaqta’
l-għatx: “Kont barrani u
lqajtuni, kont għeri u
libbistuni, kont marid u ġejtu
tarawni, kont fil-ħabs u ġejtu
żżuruni” (Mt 25:35-36).
Aħna nagħtuk, bħala offerta
qaddisa, l-għemejjel tajba, ta’
akkoljenza u ta’ għotja li
jseħħu kuljum f’din id-dinja.
Nitolbuk tagħrafhom bħala l-vera
umanità tagħna, li tgħajjat
iktar minn kull għemil ta’
rifjut u ta’ mibegħda. Nitolbuk
tbierek l-irġiel u n-nisa ta’
qalb tajba li jagħtuk glorja,
imqar jekk għadhom ma jafux
isejħulek.
Missierna
Kristu li mitt
għad-dnubiet tagħna,
Kristu li qomt
għall-ħajja tagħna,
nitolbuk, ħenn
għalina.
Is-Seba’ Stazzjon: Ġesù u n-Nisa
ta’ Ġerusalemm
Mill-Evanġelju skont San Luqa:
Kotra kbira ta’ nies kienet
miexja warajh; fosthom kien hemm
xi nisa li bdew iħabbtu fuq
sidirhom u jibkuh. Imma Ġesù dar
lejhom u qalilhom: “Nisa ta’
Ġerusalemm, mhux lili ibku, iżda
ibku lilkom infuskom u lil
uliedkom. […] Għax jekk dan
kollu qegħdin jagħmluh liz-zokk
meta għadu aħdar, mela xi jsir
minnu meta jinxef?” (Lq
23:27-28,31)
Meditazzjoni
Il-biki li Ġesù ħalla għan-nisa
ta’ Ġerusalemm, bħala wirja ta’
kompassjoni, huwa biki li ma
jonqos qatt f’din id-dinja.
Dan jinżel, fis-skiet, ma’
ħaddejn in-nisa. Ħafna drabi,
mingħajr lanqas biss jidher,
f’qalbhom, bħad-dmugħ tad-demm
li fuqu titkellem Katerina ta’
Siena.
Ma jfissirx li d-dmugħ għandu
jkun biss għan-nisa, daqslikieku
x-xorti tagħhom hi li jibku
b’mod passiv u impotenti, fi
storja li fiha l-irġiel,
waħidhom, imsejħin jiktbu.
Fil-fatt il-biki tagħhom jilqa’
fih ukoll, anzi fuq kollox,
il-biki moħbi u mhux imsemmi,
f’dinja li fiha hemm ħafna għal
xiex tibki. Il-biki tat-tfal
imwerwrin, tal-midrubin fuq
il-kampijiet tal-battalja li
jsejħu għal omm, il-biki
solitarju tal-morda u
tal-agonizzanti li ma jafux
x’ġej għalihom. Biki ta’
telfien, li jġelben fuq wiċċ din
id-dinja li nħolqot, fil-bidu
nett, għall-biki ta’ ferħ, ferħ
tal-irġiel u n-nisa, flimkien.
U anki Etty Hillesum, Iżraeljana
b’karattru sod, li baqgħet
wieqfa fit-tempesta
tal-persekuzzjoni Nażista, li
ddefendiet sal-aħħar is-sbuħija
tal-ħajja, issefsfilna
f’widnejna dan is-sigriet li hi
skopriet lejn l-aħħar tal-mixja
tagħha: fuq wiċċ Alla nnifsu
hemm dmugħ li għandu bżonn
il-faraġ, meta dan jibki
għall-miżerja li fiha jinsabu
wliedu. Filwaqt li l-infern
joħnoq id-dinja, hi tasal titlob
lil Alla u tgħidlu: “Nipprova
ngħinek”. Kuraġġ tant femminili
daqskemm hu divin!
Talba
Mulej, Alla tagħna, Alla
tal-ħlewwa u tal-pjetà, Alla
mimli mħabba u fedeltà,
għallimna, fil-ġranet ta’ ferħ,
ma ninsewx id-dmugħ tal-foqra li
jsejħulek u li jitolbuna
l-għajnuna. Għallimna ma
nibqgħux għaddejjin b’mod
indifferenti minn ħdejhom.
Għallimna l-kuraġġ biex nibku
magħhom. Għallimna wkoll,
fil-lejl tas-sofferenza,
tas-solitudni u tad-delużjoni
tagħna, nisimgħu l-kelma ta’
grazzja li int tarraftilna fuq
il-muntanja: “Henjin l-imnikkta,
għax huma jkunu mfarrġa” (Mt
5:4).
Missierna
Kristu li mitt
għad-dnubiet tagħna,
Kristu li qomt
għall-ħajja tagħna,
nitolbuk, ħenn
għalina.
It-Tmien Stazzjon: Ġesù mneżża’
minn Ħwejġu
Mill-Evanġelju skont San Ġwann:
Is-suldati ħadu l-ilbies tiegħu
u qasmuh f’erbgħa, sehem lil
kull wieħed minnhom. U ħadu
wkoll it-tunika. (Ġw 19:23)
Mill-ktieb ta’ Ġob:
“Għeri ħriġt minn ġuf ommi,
għeri nerġa’ mmur hemm”. (Ġob
1:21)
Meditazzjoni
Il-ġisem umiljat ta’ Ġesù jiġi
mneżża’. Espost għall-ħars ta’
żebliħ u ta’ disprezz. Il-ġisem
ta’ Ġesù miżgħud pjagi u
ddestinat għas-sagrifiċċju
estrem tal-mewt fuq is-salib.
Bħala bniedem, x’tista’ tagħmel
aktar milli tbaxxi għajnejk biex
ma żżidlux mal-umiljazzjoni?
Iżda l-Ispirtu jgħinna biex ma
nħossuniex mitlufin. Jgħallimna
nifhmu l-lingwa ta’ Alla,
il-lingwa tal-kenosi,
Alla li jinżel biex ikun qribna,
aħna fejn aħna. It-teologu
Ortodoss Christos Yannaras fuq
din il-lingwa ta’ Alla
jgħidilna: “Il-lingwa tal-kenosi:
Ġesù tarbija għeri fil-maxtura;
għeri fix-xmara meta jitgħammed,
bħal qaddej; imdendel mas-siġra
tas-salib, għeri, daqslikieku
kriminal. B’dan kollu hu wera
biċ-ċar imħabbtu għalina”.
Xħin nidħlu f’dan il-misteru ta’
grazzja, inkunu nistgħu nħarsu
mill-ġdid lejn il-ġisem kollu
ġrieħi ta’ Ġesù. U nkunu nistgħu
nibdew nintebħu b’dak li
għajnejna waħidhom ma jistgħux
jaraw: l-għera tiegħu tiddi
bl-istess dija li ħarġet minn
ħwejġu fil-mument
tat-Trasfigurazzjoni.
Dawl li jirbaħ kull dlam.
Dawl irreżistibbli tal-imħabba
li tibqa’ sal-aħħar.
Talba
Mulej, Alla tagħna, inpoġġulek
quddiem għajnejk il-folla
immensa ta’ bnedmin ittorturati,
ir-ringiela twaħħxek ta’ iġsma
mmaltrattati, jitriegħdu
bil-biża xħin jafu li resqin
id-daqqiet, u li jinsabu
agonizzanti fi nħawi mill-iktar
baxxi u maħmuġin.
Nitolbuk bil-ħniena, isma’
l-karba tagħhom.
Il-ħażen iħallina bla kliem u
bla għajnuna.
Imma inti taf dak li aħna ma
nafuhx. Taf issib mogħdija
fil-konfużjoni u d-dlam
tal-ħażen. Taf iġġib id-dija,
kif għamilt diġà fil-Passjoni
ta’ Ibnek il-maħbub, permezz
tal-qawmien li jġib il-ħajja.
Kattar fina l-fidi!
Itfa’ ħarstek ukoll fuq il-furja
ta’ min jittortura u ta’ dawk li
jikkmandawhom.
Din ukoll tħallina bla kliem…
Ħlief dak li nużaw biex
nitolbuk, bi ħrara kbira,
bid-dmugħ f’għajnejna, permezz
tal-kliem tat-talba li int stess
għallimtna: “Eħlisna mid-deni!”.
Missierna
Kristu li mitt
għad-dnubiet tagħna,
Kristu li qomt
għall-ħajja tagħna,
nitolbuk, ħenn
għalina.
Id-Disa’ Stazzjon: Ġesù Msallab
Mill-Evanġelju skont San Luqa:
Meta waslu fil-post jgħidulu
l-Qorriegħa, sallbuhom hemm,
lilu u lill-ħatja, wieħed
fuq il-lemin tiegħu u l-ieħor
fuq ix-xellug. U Ġesù qal:
“Missier, aħfrilhom, għax ma
jafux x’inhuma jagħmlu”. (Lq
23:33-34)
Mill-ktieb tal-Profeta Iżaija:
Għas-saħħa tagħna waqa’ l-kastig
fuqu, u bis-swat tiegħu sibna
l-fejqan tagħna. (Is 53:5)
Meditazzjoni
Alla verament jinsab hemm fejn
suppost mhux!
L-Iben maħbub, il-Qaddis ta’
Alla, huwa dak il-ġisem espost
fuq is-salib tal-mistħija,
abbandunat fid-diżunur, bejn
żewġ ħallelin. Bniedem mimli
uġigħ, li ta’ min jitbiegħed
minnu; ngħidu l-verità, bħalma
nitbiegħdu minn ħafna bnedmin
bla sura li niltaqgħu magħhom
fit-toroq tagħna.
Il-Verb ta’ Alla, li fih kollox
inħoloq, issa mhu xejn għajr
ġisem silenzjuż u sofferenti.
Il-krudeltà tagħna l-bnedmin
infexxet fih, u rebħet.
Iva, Alla jinsab hemm fejn
suppost mhux u fejn, xorta
waħda, aħna tant għandna bżonn
li jkun!
Ġie biex jaqsam ħajtu magħna.
“Ħudu!”, qal bla waqfien, waqt
li offra l-fejqan lill-morda,
il-maħfra lill-qlub
itturmentati, ġismu waqt l-ikla
tal-Għid.
Iżda sab ruħu f’idejna,
f’territorju ta’ mewt u
vjolenza: dik li tħallina bla
kliem meta naraw dak li qed
jiġri attwalment fid-dinja; u
dik li tinsab f’kull wieħed u
waħda minna. Dan kienu jafuh
sewwa l-monaċi maqtulin
f’Tibhirine, li mat-talba:
“Neħħilhom l-armi”, żiedu
s-supplika: “u neħħihom lilna!”.
Kien hemm bżonn li l-ħlewwa ta’
Alla żżur l-infern tagħna. Dan
kien l-uniku mod biex jeħlisna
mill-ħażen.
Kien hemm bżonn li Ġesù Kristu
jwassal it-tjubija bla qies ta’
Alla fil-qalba tad-dnub
tad-dinja.
Kien hemm bżonn li jseħħ dan
biex, meta mqabbla mal-ħajja ta’
Alla, il-mewt taqa’ lura u
ċċedi, bħal għadu li sab lil min
hu aqwa minnu u għeb fix-xejn.
Talba
Mulej, Alla tagħna, ilqa’
t-tifħir silenzjuż tagħna.
Bħalma r-rejiet jagħlqu ħalqhom
quddiem l-għemil tal-Qaddej
irrivelat fil-profezija ta’
Iżaija (ara Iż 52:15),
nibqgħu bla kliem quddiem
il-Ħaruf offrut sagrifiċċju
għall-ħajja tagħna u tad-dinja;
u nammettu li permezz tal-pjagi
tiegħu, aħna lkoll fiqna. “Xi
nrodd lill-Mulej għall-ġid kollu
li għamel miegħi? […] Lilek
noffri sagrifiċċju ta’ radd
il-ħajr, u isem il-Mulej
insejjaħ” (Salm 116:12,17).
Missierna
Kristu li mitt
għad-dnubiet tagħna,
Kristu li qomt
għall-ħajja tagħna,
nitolbuk, ħenn
għalina.
L-Għaxar Stazzjon: Ġesù mgħoddi
biż-żmien fuq is-Salib
Mill-Evanġelju skont San Luqa:
Il-kapijiet bdew jiddieħku
b’Ġesù u jgħidu: “Salva lil
oħrajn; ħa jsalva lilu nnifsu
jekk dan hu l-Messija, il-Maħtur
ta’ Alla!”. Is-suldati wkoll
bdew jgħadduh biż-żmien; u resqu
lejh, newlulu nbid qares u
qalulu: “Jekk inti s-sultan
tal-Lhud, salva lilek
innifsek!”. Fuq rasu kien hemm
ukoll kitba li kienet tgħid:
‘Dan huwa s-sultan tal-Lhud’.
Wieħed mill-ħatjin li kienu
msallbin miegħu beda jgħajru u
jgħidlu: “Int m’intix
il-Messija? Salva lilek innifsek
u lilna”. (Lq 23:35-39)
U x-Xitan qallu: “Jekk inti Bin
Alla, għid lil din il-ġebla ssir
ħobż.” […] “Jekk inti Bin Alla,
inxteħet minn hawn għal
isfel. Għax hemm miktub li […]
[l-anġli] fuq idejhom jerfgħuk”.
(Lq 4:3,9-11)
Meditazzjoni
Ġesù, kieku ried, ma setax
jinżel minn fuq is-salib?
Bilkemm nissugraw nistaqsuha
lilna nfusna din il-mistoqsija:
l-Evanġelju ma jpoġġihiex fuq
xufftejn dawk li ma jemmnux?
Madankollu tibqa’ hemm f’moħħna,
għaliex għadna nagħmlu parti
mid-dinja tat-tentazzjonijiet,
dawk li Ġesù ltaqa’ magħhom
fl-erbgħin jum fid-deżert,
preludju u bidu tal-ministeru
tiegħu: “Jekk inti Bin Alla,
għid lil din il-ġebla ssir ħobż,
inxteħet minn hawn għal isfel,
għax Alla jħares lill-maħbubin
tiegħu”. Iżda sakemm, mgħammdin
bil-mewt u l-qawmien ta’ Ġesù
Kristu, nimxu warajh fit-triq
it-tajba, it-tiġrib tax-Xitan
m’għandux iktar setgħa fuqna,
jisfa fix-xejn, il-qerq tiegħu
mikxuf.
B’dan il-mod naraw il-bżonn ta’
dik il-“Ma kellux il-Messija
jbati?” (Lq 24:26) li Ġesù
qagħad jispjega, b’tant paċenzja
u ħrara, lil dawk li kienu
mexjin fit-triq lejn Għemmaws.
“Ma kellux” Kristu jidħol f’din
is-sitwazzjoni ta’ ubbidjenza u
impotenza, biex jilħaqna
fis-sitwazzjoni ta’ impotenza li
fiha qegħdin, minħabba
d-diżubbidjenza tagħna?
B’dan il-mod nibdew nifhmu li
“huwa biss Alla li jbati li
jista’ jsalva”, kif kiteb
Dietrich Bonhoeffer ftit xhur
qabel ma nqatel. Hu li ra
b’għajnejh sa fejn setgħet tasal
il-qawwa tal-ħażen, seta’
jiġbor, f’din il-verità sempliċi
u tant qawwija, dak li tistqarr
il-fidi Nisranija.
Talba
Mulej, Alla tagħna, min se
jeħlisna mill-perikli tal-poter
kif tarah id-dinja? Min se
jeħlisna mill-oppressjoni
tal-gideb, li jġegħluna ntellgħu
fuq pedestall lil min għandu
l-poter u niġru, aħna wkoll,
wara glorja li hi biss falza?
Int biss tista’ ddawwar lil
qlubna.
Int biss tista’ turina kif
inħobbu l-mogħdijiet tal-umiltà.
Int biss…, li turina li ma
teżistix rebħa jekk mhux
fl-imħabba, u li l-bqija mhux
ħlief tiben li jtir mar-riħ,
illużjoni li tgħib quddiem
il-verità tiegħek.
Nitolbuk, Mulej, ġib fix-xejn
il-gideb li qed jipprova jsaltan
f’qalbna u fid-dinja.
Għinna ngħixu skont it-triqat
tiegħek, biex b’hekk id-dinja
tagħraf il-qawwa tas-Salib.
Missierna
Alla tiegħi, Alla tiegħi,
għaliex tlaqtni?
Il-Ħdax-il Stazzjon: Ġesù u Ommu
Marija
Mill-Evanġelju skont San Ġwann:
Kien hemm wieqfa ħdejn is-salib
ta’ Ġesù ommu, oħt ommu, Marija
ta’ Kleofa, u Marija ta’
Magdala. Mela kif Ġesù lemaħ lil
ommu u lid-dixxiplu li kien
iħobb wieqaf ħdejha, qal lil
ommu: “Mara, hawn hu ibnek”.
Imbagħad qal lid-dixxiplu: “Hawn
hi ommok”. U minn dak il-ħin
id-dixxiplu ħadha għandu. (Ġw
19:25-27)
Meditazzjoni
Anki Marija waslet fi tmiem
il-mixja tagħha. Wasal dak
il-jum li dwaru kellimha
x-xwejjaħ Xmun. Meta kien
għolla, b’idejh jitriegħdu,
lit-tfajjel, u meta
r-ringrazzjament tiegħu beda
jitwal u żied kliem misterjuż,
li kien jinseġ flimkien niket u
tama, uġigħ u fidwa.
“Ara”, qal, “dan se jġib
il-waqgħa u l-qawmien ta’ ħafna
f’Iżrael; se jkun sinjal li
jmeruh, – u inti wkoll, sejf
jinfidlek ruħek! – biex jinkixfu
l-ħsibijiet moħbija fil-qlub ta’
ħafna” (Lq 2:34-35).
Kienet diġà l-laqgħa mal-anġlu
li wasslet biex tibqa’ tinstema’
f’qalbha t-tħabbira tal-għaġeb:
Alla kien għażel lilha biex
jingħata bidu għal dak li kien
wiegħed lil Iżrael, “dak li
għajn qatt ma rat u widna qatt
ma semgħet” (1 Kor 2:9; ara Iż
64:3). U hi kienet aċċettat li
tieħu sehem f’dan il-pjan divin,
li kien se jibda minn ġisimha
stess u li mbagħad se timxi
miegħu fit-toroq mhux mistennija
li minnhom kellu jgħaddi l-iben
imwieled mill-ġuf tagħha.
Tul il-jiem hekk ordinarji ta’
Nazaret, imbagħad fi żmien
il-ħajja pubblika, meta kien
hemm bżonn li tħalli l-post
għall-familja l-oħra, dik
tad-dixxipli, dawk il-barranin
li Ġesù kien isejjaħ aħwa u
ommijiet. Hi kienet għożżot dan
kollu f’qalbha. Kienet fdat
kollox fil-paċenzja li ġġib
magħha l-fidi.
Illum jingħalaq kollox. Il-lanza
li tinfed il-kustat ta’ Binha,
tinfed lil qalbha wkoll. Marija
wkoll tgħix il-fidi b’mod sħiħ,
l-istess fidi li Ġesù jgħix
sal-aħħar billi jobdi
lill-Missier.
Wieqfa, hi ma titbegħidx.
Stabat Mater. Fid-dlam, imma
ċerta, taf li Alla jżomm
il-wegħdiet tiegħu. Fid-dlam,
imma ċerta, taf li Ġesù hu
l-wegħda u t-twettiq tagħha.
Talba
Marija, Omm Alla u mara
mill-istess razza tagħna, int
l-omm li tagħtina l-ħajja
permezz ta’ dak li int tajtu
l-ħajja, żomm sħiħa l-fidi
tagħna fis-sigħat tad-dlamijiet,
għallimna nittamaw kontra kull
tama.
Ħu ħsieb il-Knisja kollha u
għasses fuqha b’fedeltà. Dik
il-fedeltà tiegħek, umli u doċli
għall-ħsibijiet ta’ Alla, li
jwassluna hemm fejn qatt ma
nobsru li se mmorru; li
jseħbuna, b’modi li qatt ma
konna nistennew, mat-twettiq
tal-fidwa.
Missierna
Salve, Regina, mater
misericordiae;
vita, dulcedo et spes nostra,
salve.
It-Tnax-il Stazzjon: Ġesù jmut
fuq is-Salib
Mill-Evanġelju skont San Ġwann:
[Ġesù] qal: “Għandi
l-għatx!”. Kien hemm bieqja
mimlija bil-ħall; huma xarrbu
sponża bil-ħall, waħħluha ma’
qasba tal-issopu, u ressquhielu
lejn ħalqu. Kif Ġesù ħa l-ħall,
qal: “Kollox hu mitmum!”.
Imbagħad mejjel rasu u radd
ruħu. […] Meta waslu għal Ġesù,
billi raw li kien ġa mejjet, ma
kisrulux riġlejh. Madankollu,
wieħed mis-suldati nifidlu ġenbu
b’lanza, u minnufih ħareġ demm u
ilma. Dan qiegħed jixhdu min ra
b’għajnejh, u x-xhieda tiegħu
hija minnha. Hu jaf li qiegħed
jgħid il-verità, biex intom
ukoll temmnu. (Ġw
19:28-30,33-35)
Meditazzjoni
Kollox hu mitmum. Ġesù għamel
dak li kellu jagħmel. Hu ġie
mingħand il-Missier biex
iwasslilna l-ħniena. Dan wettqu
b’fedeltà li waslet sal-aktar
punt għoli tal-imħabba. Kollox
mitmum. Ġesù jrodd lura ruħu
lill-Missier.
Minn barra, veru, kollox jidher
jintemm fis-silenzju tal-mewt li
jaqa’ fuq il-Golgota u fuq
it-tlitt islaleb weqfin. F’dan
il-jum li fih il-Passjoni
tintemm, min għadda minn hemm,
x’seta’ jaħseb, jekk mhux li
Ġesù safa tellief? Il-waqgħa
tat-tama li għamlet il-qalb lil
ħafna, għamlet kuraġġ
lill-foqra, tat dinjità
lill-umiljati, u li kkonvinċiet
lid-dixxipli li kien wasal
iż-żmien li fih Alla kien se
jżomm il-wegħdiet li kienu
tkellmu fuqhom il-profeti.
Kollox kien jidher mitluf,
imġarraf, spiċċut.
Madankollu, f’nofs dan il-qtigħ
il-qalb kollu, Ġwanni
l-evanġelista jwassalna biex
nitfgħu ħarsitna fuq dettall
żgħir u jieqaf fuqu b’mod
solenni. Demm u ilma jgelglu
mill-kustat tal-Imsallab. Ħaġa
tal-għaġeb! Il-ferita miftuħa
mil-lanza tas-suldat tħalli
joħorġu ilma u demm, li
jfakkruna fil-ħajja u
fit-twelid.
Il-messaġġ hu wieħed moħbi, imma
li jfisser ħafna għall-qlub li
kapaċi jiftakru. Mill-ġisem ta’
Ġesù tgelgel in-nixxiegħa li
l-profeta ra ħierġa mit-Tempju.
In-nixxiegħa li tikber u ssir
xmara mdaqqsa, li bl-ilma tagħha
tagħti l-ħajja lil dak kollu li
ssib fi triqitha. Forsi mhux
minnu li Ġesù darba qal li ġismu
huwa t-tempju l-ġdid? U d-“demm
tal-patt” jingħaqad mal-ilma.
Forsi mhux minnu li Ġesù
ddeskriva lil ġismu u demmu
bħala ikel għall-ħajja ta’
dejjem?
Talba
Mulej Ġesù, f’dawn il-jiem
qaddisa tal-misteru tal-Għid,
ġedded fina l-ferħ
tal-magħmudija.
Meta nimmeditaw fuq l-ilma u
d-demm li jċarċru minn ġenbek,
għallimna nagħrfu liema hi
l-fonti ta’ ħajjitna, fuq liema
mħabba hija msejsa l-Knisja
tiegħek, liema tama aħna
magħżulin u mibgħuta nxandru
mad-dinja.
Hawn insibu l-fonti tal-ħajja li
tnaddaf l-univers, hi u tgelgel
mill-pjaga ta’ Kristu.
Il-magħmudija tagħna għandha
tkun l-unika glorja, waqt li,
mistgħaġba, inroddu ħajr.
Missierna
Il-Ħaruf li kien maqtul
jistħoqqlu jirċievi l-qawwa,
l-għana,
l-għerf u s-saħħa,
ġieħ, glorja u tifħir,
għal dejjem ta’ dejjem.
It-Tlettax-il Stazzjon: Ġesù
jitniżżel mis-Salib
Mill-Evanġelju skont San Luqa:
[Ġużeppi minn Arimatija] niżżlu
mis-salib, keffnu f’liżar, u
qiegħdu f’qabar maqtugħ
fil-blat, li fih kien għadu ma
tqiegħed ħadd. (Lq 23:53)
Meditazzjoni
Ġesti mimlija għożża u ġieħ
għall-ġisem imżeblaħ u umiljat
ta’ Ġesù. Xi rġiel u nisa jsibu
ruħhom f’riġlejn is-salib.
Ġużeppi, minn Arimatija, raġel
“tajjeb u ġust” (Lq 23:50), li
jitlob il-ġisem lil Pilatu, kif
jgħid San Luqa; Nikodemu, dak li
kien mar għand Ġesù billejl,
iżid San Ġwann; u xi nisa li,
fidili sal-aħħar, qed jaraw dak
li qed jiġri.
Il-meditazzjoni tal-Knisja
żiedet magħhom lill-Verġni
Marija, li ma setgħetx ma kinitx
preżenti wkoll f’dan il-mument.
Marija, Omm tal-ħniena, li
tilqa’ f’dirgħajha l-ġisem li
twieled minnha u li miegħu
mxiet, bil-ħlewwa u
fis-silenzju, tul is-snin,
bħalma kull omm tieħu ħsieb lil
binha.
Issa, qed jagħtuha lura ġisem li
sar bla qies, bla qies daqs
id-dulur tagħha, bla qies daqs
il-ħolqien ġdid, li ġej
mill-passjoni u mill-imħabba li
nifdu l-qlub tal-iben u tal-omm.
Fis-skiet kbir li waqa’ wara li
waqaf l-għajat tas-suldati,
iż-żebliħ tan-nies, u l-ħsejjes
tat-tislib, il-ġesti issa juru
biss ħlewwa u rispett. Ġużeppi
jniżżel il-ġisem li jintelaq
f’idejh. Igeżwru f’liżar,
iqiegħdu f’qabar ġdid, f’post
fil-qrib, bħal donnu lest
apposta għalih.
Ġesù jittieħed minn idejn dawk
li qatluh. Issa, fil-mewt, isib
ruħu f’idejn mimlija ħlewwa u
kompassjoni.
Il-vjolenza tal-qattiela issa
tinsab ’il bogħod. Fejn seħħ
il-qtil, issa reġgħet sabet
postha l-ħlewwa.
Il-ħlewwa ta’ Alla u ta’ dawk li
huma tiegħu, dawk il-qlub umli
li Ġesù kien wegħedhom li
tagħhom kienet se tkun l-art
kollha. Ħlewwa li ssib il-bidu
tagħha fil-ħolqien, speċjalment
dak tal-bniedem xbieha ta’ Alla.
Ħlewwa sat-tmiem, meta ħadd ma
jxerred dmugħ iktar, meta l-lupu
jibda jgħix mal-ħaruf, għaliex
kulħadd ikun għaraf lill-Mulej
(ara Iż 11:6,9).
Għanja lil Marija
O Marija, tibkix iktar: ibnek,
il-Mulej tagħna, raqad
fis-sliem. U Missieru,
fil-glorja, jiftaħ il-bieb
tal-ħajja!
O Marija, ifraħ: Ġesù rxoxt
rebaħ il-mewt!
Missierna
Fis-sliem tiegħek, Mulej,
nimtedd u norqod;
u nqum: għax int tieqaf miegħi.
L-Erbatax-il Stazzjon: Ġesù
fil-Qabar u n-Nisa
Mill-Evanġelju skont San Luqa:
In-nisa, li kienu ġew
mill-Galilija ma’ Ġesù, marru
wara Ġużeppi u raw il-qabar u
kif kienu qiegħdu
l-katavru; imbagħad reġgħu lura
u ħejjew il-fwejjaħ u
l-mirra. Is-Sibt għaddewh
fil-mistrieħ, skont il-preċett
tal-Liġi. (Lq 23:55-56)
Meditazzjoni
In-nisa telqu. Dak li kienu mxew
miegħu, b’kuraġġ u premura,
fit-toroq tal-Galilija, ma kienx
għadu magħhom. Lilhom dik
il-lejla ma ħalla xejn
x’jagħmlilhom kumpanija, ħlief
ix-xbieha li se tibqa’ magħhom
tal-qabar u tal-liżar fejn issa
jinsab mistrieħ. It-tifkira umli
imma prezzjuża tal-jiem mimlijin
fervur issa għebet. Solitudni u
silenzju. Wara kollox, riesaq
ix-Shabbat, u Iżrael
mistieden jieqaf mix-xogħol,
bħalma Alla waqaf meta temm
il-ħolqien, li seħħ permezz
tal-barka tiegħu.
Dakinhar seħħ tmiem ieħor; moħbi
u misterjuż. Shabbat li
fih ma jagħmlu xejn, fil-ġabra
tal-qalb u fil-memorja miżgħuda
bid-dmugħ. Jippreparaw ukoll
il-fwejjaħ li bihom jagħtu
l-aħħar tislima lill-ġisem
tiegħu, l-għada, filgħodu
kmieni.
Iżda, b’dak il-ġest, qegħdin
biss jippreparaw irwieħhom biex
jibbalzmaw it-tama tagħhom? U
jekk Alla, bħala tweġiba
għad-devozzjoni tagħhom,
ippreparalhom xi ħaġa li qatt ma
setgħu jimmaġinaw, jissoponu,
jobsru?… Is-sejba ta’ qabar
vojt… Il-messaġġ li hu m’għadux
hemm, għax ġarraf il-bibien
tal-mewt…
Talba
Mulej, Alla tagħna, itfa’
ħarstek u bierek il-ġesti kollha
tan-nisa li f’din id-dinja
jagħtu ġieħ lill-iġsma fraġli li
huma jieħdu ħsieb bi ħlewwa u
b’ġieħ.
U lilna, li mxejna miegħek tul
din it-triq ta’ mħabba li tibqa’
għal dejjem, ħu ħsiebna,
man-nisa tal-Evanġelju, permezz
tat-talba u tal-istennija li
nafu li se jitwettqu fil-qawmien
mill-mewt ta’ Ġesù, li l-Knisja
tiegħek waslet biex tiċċelebra
fil-ferħ tal-lejl tal-Għid.
Missierna
Lilu glorja u qawwa għal dejjem
ta’ dejjem!
miġjuba mit-Taljan għall-Malti
minn Rossana Cremona
|