LECTIO DIVINA |
TALBA LILL-ISPIRTU
S-SANTU FIL-BIDU TAL-LECTIO DIVINA
Ejja Spirtu Qaddis
u mlieni bil-qawwa tal-preżenza tiegħek, l-istess
kif nhar Għid il-Ħamsin inti kont
imlejt lill-ewwel insara. Għinni nitbattal
minn dak kollu li hemm ġewwa fija, mill-pjanijiet
u l-proġetti kollha li nagħmel għalija
nnifsu u għall-oħrajn għax b'hekk biss inkun
nista' nilqa’ aħjar il-Kelma li se tagħtini.
Dawwalli moħħi biex nifhem il-messaġġ li
għandek għalija u kebbisli qalbi biex
nwettqu f’ħajti u f’dik ta’ ħuti. Dan għal
akbar glorja tiegħek. Ammen.
|
|
6.
Nikodemu ġie għand Ġesù
billejl
Ġw: 3:
1-21.
|
|
Q
Qari |
Kien hemm fost il-Fariżej raġel jismu Nikodemu, wieħed mill-kbarat
tal-Lhud. Dan ġie għand Ġesù billejl u qallu: "Rabbi, aħna
nafu li inti Mgħallem mibgħut minn Alla; għax ħadd ma jista'
jagħmel is-sinjali li qiegħed tagħmel int jekk ma jkunx Alla
miegħu." Ġesù wieġbu: "Tassew tassew ngħidlek li jekk wieħed
ma jitwelidx mill-ġdid, ma jistax jara s-Saltna ta' Alla."
Qallu Nikodemu: "Kif jista' wieħed jitwieled wara li jkun
xjieħ? Jista' forsi jerġa' jidħol f'ġuf ommu u jitwieled?"
Wieġbu Ġesù: "Tassew tassew ngħidlek, li jekk wieħed ma
jitwelidx mill-ilma u l-Ispirtu, ma jistax jidħol fis-Saltna
ta' Alla. Dak li jitwieled mill-ġisem hu ġisem; u dak li
jitwieled mill-Ispirtu hu spirtu. La tistagħġibx jekk jiena
għedtlek li jeħtiġilkom titwieldu mill-ġdid. Ir-riħ fejn
irid jonfoħ; tisma' ħossu, imma ma tafx mnejn hu ġej jew
fejn hu sejjer. Hekk jiġri minn kull min jitwieled mill-Ispirtu."
"Kif qatt jista' jkun dan?" raġa' qallu Nikodemu.
U Ġesù qallu: "Inti mgħallem f'Iżrael u dan ma tafux?
Tassew tassew ngħidlek li aħna qegħdin nitħaddtu fuq dak li
nafu, u qegħdin nagħtu xhieda ta' dak li rajna, imma x-xhieda
tagħna ma tilqgħuhiex. Jekk intom ma temmnux meta nitkellem
magħkom fuq il-ħwejjeġ ta' l-art, kif sejrin temmnu meta
nkellimkom fuq il-ħwejjeġ tas-sema?
"Ħadd
ma tela' s-sema ħlief Bin il-bniedem, li niżel mis-sema. U
kif Mosè rafa' s-serp fid-deżert, hekk jeħtieġ li jkun
merfugħ Bin il-bniedem, biex kull min jemmen fih ikollu l-ħajja
ta' dejjem. Għax Alla hekk ħabb lid-dinja li ta lil Ibnu l-waħdieni,
biex kull min jemmen fih ma jintilifx, iżda jkollu l-ħajja
ta' dejjem. Għax Alla ma bagħatx lil Ibnu fid-dinja biex
jagħmel ħaqq mid-dinja, imma biex id-dinja ssalva permezz
tiegħu. Min jemmen fih ma jkunx ikkundannat; iżda min ma
jemminx huwa ġa kkundannat, għax ma emminx fl-isem ta' l-Iben
il-waħdieni ta' Alla.
"U
l-ġudizzju huwa dan: li d-dawl ġie fid-dinja, imma l-bnedmin
ħabbew id-dlam aktar mid-dawl, għax l-għemil tagħhom kien
ħażin. Għax kull min jagħmel il-ħażen jobgħod id-dawl, u ma
jersaqx lejn id-dawl, biex għemilu ma jinkixifx. Imma min
jagħmel is-sewwa jersaq lejn id-dawl, biex juri li hemm Alla
f'għemilu."
|
IL-KUNTEST TAS-SILTA U S-SIMBOLIŻMU LI FIHA
Dawn il-ftit noti mhux parti mil-Lectio
Divina, imma qegħdin
biex ifissru
l-kuntest tal-ġrajja
u s-simboliżmu
kbira li hemm marbut magħha.
Għalhekk
huma jistgħu
jkunu ta’ għajnuna
waqt il-meditazzjoni. Minħabba
t-tul tagħhom,
ikun tajjeb
li dawn in-noti jinqraw qabel u mhux waqt il-Lectio Divina
nfisha.
Nikodemu
Spiss forsi nistgħu
noħduha
kontra Nikodemu għaliex naħsbu
li staħa
jew beża
jmur għand
Ġesù
binhar. Madankollu l-Evanġelista,
li fil-kitba tiegħu
jikkuntrasta diversi drabi, id-dawl u dlam, donnu ried
jurina dixxiplu ta’
Ġesù,
li mid-dlam tal-ħajja
tiegħu
ta’ qabel,
ġie
għad-dawl
tassew li huwa
Ġesù.
(ara
Ġw
8:12) Aktar 'il quddiem, dan jikkuntrastah ma' dak li għamel
Ġuda,
meta mid-dawl ta’ Kristu fiċ-Ċenaklu
joħroġ
għad-dlam
tad-dnub u tat-tradiment
tiegħu.
L-Evanġelista
jinnota, li “kien billejl” (Ġw
13:30)
Aktar ‘il quddiem, l-awtur
tar-raba’ evanġelju,
jlaqqana ma' Nikodemu meta
jiddefendi lil Gesù fis-Sinedriju. F’dan il-każ
l-evanġelista
jinnota li dan kien l-istess Nikodemu li kien mar għand
Ġesù
billejl. (Ġw
7:50)
Fl-aħħar,
wara l-mewt ta’
Ġesù,
meta d-dixxipli
ħarbu
għax
forsi
ħasbu
li kollox kien spiċċa,
Nikodemu joħroġ
fid-deher u bla biża
jgħin
lil
Ġużeppi
ta’ Arimatea biex jidfen l-ġisem
mejjet tal-Imgħallem.
Anke hawn l-Evanġelista
jerġa’
jirrimarka li dan kien dak l-istess Nikodemu li mar għand
Ġesù
billejl. (Ġw
19:39)
Id-Djalogu
bejn
Ġesù
u Nikodemu.
Ir-raba’ Evanġelista jibni l-kitba tiegħu fuq numru ta’
djalogi li Ġesù nnifsu jagħmel ma’ diversi personaġġi.
F’partijiet minnu, id-djalogu ma’ Nikodemu jinħass fih
element ta’ ironija.
Għalkemm
mal-ewwel daqqa t’għajn
id-diffikultà ta’ Nikodemu tidher waħda
ta’ natura bioloġika,
madankollu huwa evidenti li huwa aktarx kien fehem sewwa li
Ġesù
ma kienx qed jitkellem dwar it-twelid naturali. Id-diffikultà
tiegħu
kienet dwar kif jista’ bniedem anzjan bħalu,
wara li kien kiber u xjieħ
fi drawwiet u uzanzi tal-liġi l-qadima, jħalli dawn kollha
warajh biex jimxi ma’ dak li issa kien beda jipproponilu
Ġesù.
It-twelid li dwaru Ġesù kellem lil Nikodemu jrid jiftiehem
fid-dawl ta’ dak li l-Evanġelista jgħid fl-ewwel kapitlu
meta jsemmi lil dawk li twieldu mhux bid-demm, anqas mill-ġibda
tal-ġisem, u anqas mir-rieda tal-bniedem, iżda minn Alla. (Ġw
1:13)
Imma huwa donnu jibqa’ ma jifhimx u jerġa',
“Imma kif qatt jista' jkun dan?” Fid-diskursata jidhru
diversi kuntrasti:-
-
Nikodemu jpoġġi l-enfasi tiegħu fuq is-sinjali, “ħadd ma
jista jagħmel is-sinjali li qed tagħmel int jekk Alla ma
jkunx miegħu.” Imma Ġesù jwieġeb li biex wieħed jara s-Saltna
ta’ Alla jeħtieġlu jitwieled mill-ġdid.
-
Nikodemu jinsisti dwar it-twelid tal-ġisem u jistaqsi
kif jista’ wieħed xiħ jerġa jitwieled. Imma Ġesù jwieġeb
billi jinsisti fuq it-twelid mill-ilma (konverżjoni) u
l-Ispirtu s-Santu. F’post ieħor naqraw dwar l-insistenza
ta’ Ġesù li l-fatt waħdu, li wieħed huwa mwieled
mir-razza ta’ Abraham, mhux biżżejjed biex jikkwalifikah
għas-Saltna ta’ Alla. (ara Ġw 8:31-59)
-
Nikodemu jibda’ d-diskursata billi jsejjah lil Ġesù,
“Mgħallem mibgħut minn Alla”. Aktar ‘il quddiem, huwa
Ġesù li jgħid lil Nikodemu, “Inti, Mgħallem f’Iżrael u
dan ma tafux?”
-
Nikodemu jgħid, “aħna nafu li inti mibgħut minn Alla.”
Ġesù jurih li minkejja li kienu jafu, madankollu huma
xorta ma laqgħux ix-xhieda
tiegħu.
"Ħadd
ma tela' s-sema ħlief Bin il-bniedem, li niżel
mis-sema.
Fil-bidu tad-diskursata tiegħu
ma’ Gesù, Nikodemu kien aċċetta
li l-missjoni ta’
Ġesù
kienet waħda
ġejja
minn Alla. Imma
Ġesù
jinsisti li mhux il-missjoni tiegħu
biss kellha oriġini
divina, imma anke huwa nnifsu kien niżel
mis-sema.
Ġesù
nnifsu kien ir-rigal tal-imħabba
li l-Missier għandu
għad-dinja.
L-iskop kien wieħed,
dak li min jemmen fih, ikollu
ħajja
ta’ dejjem. Dan huwa wkoll l-istess skop li għalih
kien miktub l-evanġelju;
“biex intom temmnu li
Ġesù
huwa l-Messija, l-Iben ta’ Alla, u biex bit-twemmin tagħkom
ikollkom il-ħajja
f’ismu." (Ġw
20:31)
Lil wieħed
mgħallem tal-liġi u tal-profeti bħal ma kien Nikodemu, Ġesù
jfakkru kif kellha titwettaq din il-missjoni tal-Messija.
Dan jagħmlu billi jsemmilu l-figura tas-serp tal-bronż li
rafa’ Mosè fid-deżert (Num 21:4-9), xbieha ta’ Kristu
merfugħ fuq is-salib. Imma l-kelma merfugħ hija
waħda li turi li fl-istess kruċifissjoni kien hemm il-glorja.
Hija l-istess kelma li Ġesù jerġa’ juża’ meta jgħid; “meta
nintrefa ‘l fuq mill-art, jiena niġbed il-bnedmin
kollha lejja.” (Ġw 12:32)
|
M
Meditazzjoni
|
Nikodemu, Fariżew u wieħed mill-kbarat tal-Lhud ...ġie
għand Ġesù billejl.
Nikodemu kien membru tal-għaqda tal-Fariżej,
duttur tal-liġi Lhudija, meqjus bħal Mgħallem f’Iżrael u
membru tas-Sinedriju, li f’dawk iż-żminijiet kien il-qorti
sumprem tal-Iżreal. Kien personaġġ li mill-kwalitajiet
esterni tiegħu seta’ faċilment ikun meqjus wieħed minn dawk
li kienu tant kontra Ġesù.
Kristu, li ma kien jikkritika lil ħadd,
imma lilhom sejħilhom oqbra mbajda (Mt 23:27). Qalilhom
li huma, kienu jduru d-dinja biex idawwru
bniedem għal magħhom u wara jagħmluh ħaqqu l-infern darbtejn
aktar minnhom. (Mt 23:15)
Nikodemu, membru ta’ ċirku bħal dan,
x’mar jagħmel għand Ġesù? Imma fuq kollox għaliex mar għandu
billejl?
-
Forsi llum Nikodemu jista’ jkun
simbolu tiegħi, meta għal xi raġuni jew oħra stħajt jew
forsi bżajt nuri li jiena nisrani u allura dixxiplu ta’
Ġesù?
-
Fost sħabi tax-xogħol, fil-ħanut
mnejn nixrtri, mal-ħbieb jew fil-familja, nitkelem xejn
dwar Ġesù, jew forsi kapaci nitkellem fuq kollox imma
mhux dwaru u dwar Alla?
-
Lest jiena
wkoll nagħmel
il-konverżjoni
li għamel
Nikodemu?
"Is-sinjali
li qiegħed tagħmel int."
Fit-tieġ
ta’ Kana rajna kif wara is-sinjal li kien għamel
Ġesù,
id-dixxipli tiegħu
emmnu fih. F’din is-silta nintebħu
li kien aktarx minħabba
s-sinjali, li Nikodemu beda jemmen f’Ġesù.
Madankollu, il-kbarat l-oħra
u l-Fariżej,
li wkoll kien raw is-sinjali, baqgħu
ma emmnux.
-
Jiena nilmagħhom
is-sinjali li Alla għadu
jagħmel
madwari u f’ħajti
, anke llum?
-
Dawn is-sinjali
lili jqarbuni lejn Kristu jew iħalluni
biered u indifferenti?
-
Jew forsi
jiena wieħed
li dejjem niġri
nfittex is-sinjali, iżda
t-Triq nibqa’ ma nsibha qatt?
"Jekk
wieħed ma jitwelidx mill-ġdid... "
Nikodemu donnu ma setgħax jifhem x’ried jgħid Ġesù. Li
titwieled mill-ġdid mhux twemmin fir-riinkarnazzjoni, kif
uħud jaslu li jgħidu. It-twelid mill-ġdid li tkellem dwar
Ġesù huwa dak li San Pawl fissru bi kliem ieħor li jixxibah,
“Intom inżajtu l-bniedem il-qadim bl-għemil kollu tiegħu u
lbistu l-bniedem il-ġdid, li jiġġedded dejjem skont ix-xbieha
ta’ min ħalqu.” (Kol 3:9-10)
-
Lest li nitwieled mill-ġdid jiena wkoll, anke jekk dan
ifisser għalija li l-bniedem il-qadim tiegħi irid imut ma’
Kristu?
-
Fil-ħajja tiegħi, kif nista’ jiena wkoll fil-prattika,
nitwieled mill-ġdid?
-
Jiena lest għall-bidla radikali li dan it-twelid mill-ġdid
jista’ jitlob minni?
"Kif qatt jista' jkun dan?"
Bidla radikali f’ħajti tista’ tidher diffiċli. Kultant
ukoll impossibli u jiena wkoll nistaqsi lil Ġesù, “Kif jista’
jkun dan?” Darba l-Appostli għamlulu domanda simili u
dakinhar Ġesù weġibhom, “Għall-bniedem dan ma jistax ikun.
Imma għal Alla iva; għal Alla kollox jista’ jkun.” (Mk
10:27)
-
Qatt jiena wkoll għamiltlu din id-domanda? Forsi
oġġezzjoni! Kif jista jkun? !
-
Nifhem li bidla radikali f’ħajti tista’ tiġi biss minn
Alla, iżda jiena rrid ukoll nikkopera mal-grazzja tiegħu?
"Dak li jitwieled mill-ġisem .... u dak li jitwieled mill-Ispirtu."
Ġesù hawn jitkellem dwar dak li jitwieled mill-ġisem u dak
li jitwieled mill-Ispirtu. San Pawl, fl-ittra tiegħu lil
Galatin jgħid li l-għemejjel tal-ġisem u dawk ta’ l-Ispirtu.
Tal-ġisem huma żina, faħx, nuqqas ta’ rażan, idolatrija,
seħer, mibegħda, glied, għira, korla, ambizzjoni, partiti,
invidja, sokor, tbaħrid u ħwejjeġ bħal
dawn. Huwa jwissi li
min jagħmel dawn il-ħwejjeġ ma jiritx is-saltna ta’ Alla.
Mill-banda l-oħra, mal-frott tal-Ispirtu, Pawlu jsemmi l-imħabba,
l-hena, is-sliem, is-sabar, il-ħniena, it-tjieba, il-fidi,
il-ħlewwa, ir-rażan. (ara Galatin 5:16-26)
"Ir-riħ fejn irid jonfoħ."
Il-kelma Griega wżata
mill-Evanġelista
għal
Spirtu tfisser ukoll Riħ.
San
Ġwann
jagħmel
użu
minn din it-tifsira doppja tal-kelma griega biex juri li min
jitwieled mill-Ispirtu huwa liberu għaliex
mhux imxekkel minn użanzi
u tradizzjonijiet umani,
ġibdiet
tal-ġisem,
jew ambizzjoni. Min jitwieled mill-Ispirtu huwa dejjem
immexxi mill-Ispirtu u allura huwa liberu f’dak li jagħmel.
Fuq kollox, l-għemil
tiegħu
mhux imxekkel mil-liġi,
mhux għaliex
imur kontra l-liġi,
imma għaliex
il-liġi
ġejja
mill-Ispirtu nnifsu u għalhekk
hija f’armonija sħiħa
miegħu.
-
U jiena,
liberu f’dak li nagħmel
jew imxekkel mill-ħwejjeġ
tad-dinja u tal-ġisem?
-
Kif inwieġeb
għas-sejħat
li jagħmilli
Alla?
"Alla hekk ħabb lid-dinja li ta lil Ibnu ..
mhux biex
jagħmel ħaqq mid-dinja"
Ġesù jispjega lil Nikodemu, li bħala għotja ta’ Alla lid-dinja,
huwa ma kienx mibgħut biex jagħmel ħaqq mid-dinja iżda biex
din
ssalva permezz tiegħu. Huwa l-bniedem stess li bl-għażliet
żbaljati tiegħu jagħmel ġudizzju fuqu nnifsu meta jagħżel
id-dlam minflok id-dawl.
-
U jiena fhiex, jew f’min qed infittex is-salvazzjoni
tiegħi? Fija nnifsi? Fl-opri tajba li nagħmel? Jew
f'persuna oħra
jew oġġett
ieħor?
-
Min huwa Ġesù Kristu għalija? Nemmen li dan huwa rigal
mogħti lili mill-Missier ?
"Id-dawl ġie fid-dinja, imma l-bnedmin ħabbew id-dlam."
L-Evanġelista
jurina
lill-Ġesù bħala, id-dawl li jiddi fid-dlam u li dlam ma
għelbux. (Ġw 1:1)
-
X’inhuma l-għażliet li għamilt f’ħajti? Favur id-dawl?
Favur id-dlam? Jew forsi nippreferi nibqa newtrali,
fid-dell, bla ma qatt nikkometti ruħi?
-
Lil Nikodemu, Ġesù qallu li kull min jagħmel il-ħazen
jobgħod id-dawl u ma jersaqx lejn id-dawl biex għemilu
ma jinkixifx. Jista’ jkun li dan il-kliem jgħodd ukoll
xi ftit għalija?
-
Kif nista’ tassew, fil-prattika, nibda nħobb aktar id-dawl
milli d-dlam?
|
|
T
Talb
|
-
Spirtu Qaddis, għinni
inti biex wara l-laqgħa
tiegħi
ma’
Ġesù,
jiena wkoll nuri bla biża
li jiena dixxiplu tiegħu.
-
Mulej Ġesù, fl-għazliet
tiegħi bejn id-dawl u d-dlam, irriid dejjem nagħżel
lilek, id-Dawl veru tal-ħajja tiegħi.
-
Trintà Qaddisa, kien
fil-magħmudija tiegħi li f’isimkom jien kont imwieled
mill-ġdid bl-ilma u l-Ispirtu s-Santu. Irrid li
bil-grazzja qaddisa li ġejja minnkom jiena ngħix kuljum
dan it-twelid ġdid tiegħi.
-
Mgħallem Ġesù, inti biss
s-Salvaturi tiegħi. Tħallini qatt infittex salvazzjoni
oħra
ħlief
dik li ġejja minnek.
-
Missier Qaddis, grazzi
tal-imħabba kbira tiegħek li wasslitek tagħtina
lill-Ibnek stess biex ikun wieħed minna.
|
K
Kontemplazzjoni
|
Jekk il-Lectio Divina qed issir fi grupp,
il-Kontemplazzjoni tista' ssir privatament wara.
Dan
il-ħin
ta’ kontemplazzjoni huwa d-destinazzjoni
tal-mixja kollha tiegħi/tagħna
waqt il-Lectio Divina.
Wara li,
bħal
Nikodemu, jiena wkoll kelli l-grazzja tal-laqgħa
u djalogu tiegħi
ma’
Ġesù,
ħa
nsib il-ħin
biex nieqaf sieket fil-kumpanija tiegħu.
Forsi kultant nisemgħu
jkellimni, imma anke jekk le, jiena nemmen li
kemm jekk billejl u kif ukoll jekk binhar huwa
qiegħed
kontinwament miegħi.
|
|
TALBA
FI TMIEM IL-LECTIO DIVINA
Inroddlok ħajr, Mulej Ġesù tal-Kelma tiegħek
li mhux biss tajtha lid-dixxipli elfejn sena
ilu, imma li llum ukoll tajtha anke lili.
Agħtini l-Ispirtu Qaddis tiegħek sabiex
bil-qawwa tiegħu ngħix kuljum fid-dawl
tagħha u sabiex bi mħabba nwassalha
lill-oħrajn. Dan nitlobulek
bl-interċessjoni ta’ Ommok u Ommi Marija, li
kienet l-ewwel waħda li laqgħatha f’qalbha u
f'ħajjitha. Għall-glorja tal-Missier li
miegħek jgħix u jsaltan flimkien ma’ l-Ispirtu
s-Santu. Ammen. |
|
|
|