LECTIO DIVINA |
TALBA LILL-ISPIRTU
S-SANTU FIL-BIDU TAL-LECTIO DIVINA
Ejja Spirtu Qaddis
u mlieni bil-qawwa tal-preżenza tiegħek, l-istess
kif nhar Għid il-Ħamsin inti kont
imlejt lill-ewwel insara. Għinni nitbattal
minn dak kollu li hemm ġewwa fija, mill-pjanijiet
u l-proġetti kollha li nagħmel għalija
nnifsu u għall-oħrajn għax b'hekk biss inkun
nista' nilqa’ aħjar il-Kelma li se tagħtini.
Dawwalli moħħi biex nifhem il-messaġġ li
għandek għalija u kebbisli qalbi biex
nwettqu f’ħajti u f’dik ta’ ħuti. Dan għal
akbar glorja tiegħek. Ammen.
|
|
8.
Mulej, ħabibek Lazzru, marid.
Ġw:
11:1-44.
|
|
Q
Qari |
[Ġw:11:1]
Kien hemm wieħed marid, Lazzru minn Betanja, ir-raħal ta'
Marija u oħtha Marta. [Ġw:11:2] Marija kienet dik li
dilket il-Mulej b'żejt ifuħ u xxuttatlu riġlejh b'xuxitha; u
Lazzru, il-marid, kien ħuha. [Ġw:11:3] Iż-żewġ nisa
bagħtu jgħidu lil Ġesù: "Mulej, ara, ħabibek marid." [Ġw:11:4]
Meta sama' l-aħbar Ġesù qal: "Din m'hijiex marda tal-mewt,
iżda hi għall-glorja ta' Alla, biex biha tingħata glorja
lill-Iben ta' Alla." [Ġw:11:5] Ġesù kien iħobbhom lil
Marta u lil oħtha u lil Lazzru. [Ġw:11:6] Meta sama'
li dan marad, baqa' jumejn oħra fejn kien, [Ġw:11:7]
u mbagħad qal lid-dixxipli: "Ejjew nerġgħu mmorru l-Lhudija."
[Ġw:11:8] Qalulu d-dixxipli: "Rabbi, il-Lhud għadhom
kemm kienu qegħdin ifittxu li jħaġġruk, u int rieġa' sejjer
hemm?" [Ġw:11:9] Weġibhom Ġesù: "M'hux tnax-il siegħa
fiha l-ġurnata? Sakemm wieħed jimxi binhar, ma jitfixkilx,
għax ikun qiegħed jara d-dawl ta' din id-dinja. [Ġw:11:10]
Imma jekk jimxi billejl, jitfixkel, għax ma jkollux dawl."
[Ġw:11:11] Qalilhom hekk, u mbagħad issokta
jgħidilhom: "Ħabibna Lazzru rieqed; iżda ħa mmur u nqajjmu."
[Ġw:11:12] Qalulu d-dixxipli: "Mulej, jekk inhu
rieqed, jiġifieri se jfiq." [Ġw:11:13] Iżda Ġesù kien
tkellem mill-mewt tiegħu, u huma ħaduha li kien qalilhom fuq
l-irqad ta' meta wieħed ikun bin-ngħas. [Ġw:11:14]
Mbagħad qalilhom ċar u tond: "Lazzru miet. [Ġw:11:15]
U jiena nifraħ minħabba fikom li ma kontx hemm, ħalli temmnu.
Iżda ejjew immorru sa ħdejh." [Ġw:11:16] Tumas,
mlaqqam it-Tewmi, qal lil sħabu d-dixxipli: "Immorru aħna
wkoll ħa mmutu miegħu."
[Ġw:11:17]
Meta wasal, Ġesù sab li Lazzru kien ġa ilu erbat ijiem fil-qabar.
[Ġw:11:18] Betanja kienet qrib Ġerusalemm, xi ħmistax-il
stadju 'l hemm minnha. [Ġw:11:19] Ħafna Lhud kienu
ġew għand Marta u Marija biex ifarrġuhom minħabba ħuhom.
[Ġw:11:20] Kif, mela, semgħet li kien ġej Ġesù, Marta
ħarġet tilqgħu, iżda Marija baqgħet id-dar. [Ġw:11:21]
Marta qalet lil Ġesù: "Mulej, kieku kont hawn, ħija ma kienx
imut. [Ġw:11:22] Imma wkoll issa, jiena naf li kull
ma int titlob lil Alla, Alla jagħtihulek." [Ġw:11:23]
Ġesù qalilha: "Ħuk jerġa' jqum!" [Ġw:11:24] Qaltlu
Marta: "Jiena naf li jerġa' jqum, fil-qawmien mill-imwiet fl-aħħar
jum." [Ġw:11:25] Qalilha Ġesù: "Jien hu l-qawmien u
l-ħajja. Kull min jemmen fija, ukoll jekk imut, jgħix; [Ġw:11:26]
u kull min jgħix u jemmen fija, dan ma jmut qatt. Temmnu
inti dan?" [Ġw:11:27] "Iva, Mulej," weġbitu, "Jiena
nemmen li inti l-Messija, l-Iben ta' Alla, dak li ġie fid-dinja."
[Ġw:11:28]
Kif qalet dan, marret issejjaħ lil oħtha Marija u minn taħt
l-ilsien qaltilha: "L-Imgħallem hawn, u qiegħed isejjaħlek."
[Ġw:11:29] Dik, malli semgħetha, qamet minnufih u
marret ħdejh. [Ġw:11:30] Ġesù kien għadu ma daħalx
fir-raħal, imma baqa' fejn kienet ġiet tiltaqa' miegħu
Marta. [Ġw:11:31] Il-Lhud li kienu d-dar ma' Marija
biex ifarrġuha, kif rawha tqum malajr u toħroġ, marru
warajha, għax stħajjluha sejra lejn il-qabar biex toqgħod
tibki hemm. [Ġw:11:32] Meta Marija waslet fejn kien
Ġesù u ratu nxteħtet f'riġlejh, tgħidlu: "Mulej, kieku kont
hawn, ħija ma kienx imut." [Ġw:11:33] Ġesù, kif ra
lilha tibki u l-Lhud, li ġew magħha, jibku wkoll, ħass ruħu
mqanqal u tħawwad ħafna. [Ġw:11:34] "Fejn qegħedtuh?"
staqsiehom. Huma weġbuh: "Mulej, ejja u ara." [Ġw:11:35]
U Ġesù beka. [Ġw:11:36] Għalhekk il-Lhud qalu: "Ara
kemm kien iħobbu!" [Ġw:11:37] Iżda xi wħud minnhom
qalu: "Ma setax dan il-bniedem, li fetaħ għajnejn l-agħma,
jagħmel ukoll li dan ma jmutx?"
[Ġw:11:38]
Ġesù ħass ruħu mqanqal għal darb' oħra u resaq lejn il-qabar.
Dan kien għar magħluq bi blata fuqu. [Ġw:11:39] Ġesù
qal: "Neħħu l-blata." Marta, oħt il-mejjet, qaltlu: "Mulej,
issa beda jrejjaħ; ġa ilu erbat ijiem mejjet." [Ġw:11:40]
Qalilha Ġesù: "Ma għedtlikx li jekk inti temmen, tara l-glorja
ta' Alla?" [Ġw:11:41] Mbagħad neħħew il-blata. Ġesù
rafa' għajnejh 'il fuq u qal: "Missier, nroddlok ħajr li
smajtni. [Ġw:11:42] Kont naf li inti dejjem tismagħni,
imma għedt dan minħabba n-nies li hawn madwari, biex huma
jemmnu li inti bgħattni." [Ġw:11:43] Kif qal hekk,
għajjat b'leħen għoli: "Lazzru, oħroġ!" [Ġw:11:44] U
dak li kien mejjet ħareġ, b'idejh u riġlejh infaxxati u
b'maktur ma' wiċċu. Ġesù qalilhom: "Ħollulu l-faxex u ħalluh
imur."
|
IL-KUNTEST TA’ DIN IS-SILTA FID-DAWL TA’ KLIEM ĠESÙ,
“JIEN HU L-QAWMIEN U L-ĦAJJA”
Dawn il-ftit noti mhux parti mil-Lectio
Divina, imma qegħdin
biex ifissru
l-kuntest tal-ġrajja
u s-simboliżmu
kbira li hemm marbut magħha.
Għalhekk
huma jistgħu
jkunu ta’ għajnuna
waqt il-meditazzjoni. Minħabba
t-tul tagħhom,
ikun tajjeb
li dawn in-noti jinqraw qabel u mhux waqt il-Lectio Divina
nfisha.
Fil-kapitlu ta’ qabel, dak dwar il-laqgħa u d-djaloġu ta’
Ġesù mas-Samaritana, jidher bħal donnu kuntrast fit-talba ta’
Ġesù lil mara biex tagħtih jixrob, u l-offerta li huwa stess
jagħmlilha biex hu jagħtiha l-ilma ħaj. Fil-ġrajja
tal-qawmien ta’ Lazzru naraw kuntrast ieħor; Ġesù li ġie
biex jagħti l-ħajja, imma fl-aħħar tar-rakkont jispiċċa huwa
stess imfiitex biex ikun maqtul. Anzi, minn dak li jgħid l-istess
qassis il-kbir, dan kellu jmut hu biex il-poplu jkollu l-ħajja.”
(Ġw 11:50-51)
Il-kuntest tal-ġrajja jagħtihulna l-Evanġelista nnifsu. Il-ġrajja
seħħet f’Betanja, mhux wisq bogħod minn Ġerusalemm. Huwa r-raħal
fejn kienu joqgħodu l-aħwa Lazzru, Marta u Marija.
L-Evanġelista jħoss il-bżonn ukoll li jfakkarna li Marija
kienet dik li dilket il-Mulej b’żejt ifuħ, ġrajja li fl-evanġelju
niltaqgħu magħha fil-kapitlu ta’ wara (Ġw 12:1-8). Din id-dilka,
Ġesù nnifsu jxebbaħha mad-dilka tad-difna tiegħu. “Din
il-fwieħa kienet refgħetha għal jum id-difna tiegħi.” (Ġw
12;7)
Bejn dawn iż-żewġ ġrajjiet, dik tal-qawmien ta’ Lazzru u l-oħra
tad-dilka ta’ Ġesù minn Marija (oħt Lazzru), l-Evanġelista
jinfilsa l-komplott tal-qassisin il-kbar biex joqtlu mhux
biss lill-Ġesù, iżda wkoll lil-Lazzru. B’dan il-mod,
il-kittieb irid bħal donnu juri li dan l-qawmien ta’ Lazzru
u d-dilka minn Marija, tant kellhom rabta mal-mewt ta’ Ġesù
li ma jistgħux jinfirdu minn xulxin.
Il-qawmien ta’ Lazzru jista’ jitqies bħala l-quċċata
tal-ewwel parti ta’ dan l-evanġelju, li spiss hija msejjħa
wkoll, "Il-Ktieb tas-Sinjali". Dan il-miraklu huwa wkoll
il-mument l-aktar kruċjali (salib it-toroq - turning
point) fil-ħajja ta’ Ġesù, u dan jintebħu bih l-istess
mexxejja tal-Lhud, tant li minn dakinhar Ġesù ma għaddiex
aktar bid-dieher f’nofshom, imma telaq minn hemm lejn
il-kampanja qrib id-deżert. (Ġw 11;54) Din l-assenza tiegħu
bdew iħossuha il-Lhud infushom, u kif waslet il-festa
tal-Għid tagħhom, bdew jistaqsu wieħed lill-ieħor, “Tgħid
jitla' għall-festa?” (Ġw. 11:56)
Il-messaġġ tal-Evanġelju kollu huwa li Ġesù ġie biex jagħti
l-ħajja fil-milja tagħha.
Taħt
hawn lista ta’ xi siltiet mir-raba’ evanġelju li juru dan:-
-
Kull ma sar kellu l-ħajja fih. (Ġw 1:4)
-
“Kif Mosè rafa’ s-serp fid-deżert, hekk jeħtieġ li jkun
merfugħ Bin il-bniedem biex kull minn jemmen fih ikollu
l-ħajja ta’ dejjem.” (Ġw 3:16)
-
“Min jemmen fl-Iben għandu l-ħajja ta’ dejjem.” (Ġw
3:36)
-
“L-ilma li nagħti jien isir fih għajn ta’ ilma li
jwassal sal-ħajja ta’ dejjem.” (Ġw 4:14)
-
“Għax bħal ma l-Missier iqajjem lill-mejtin u jagħtihom
il-ħajja, hekk ukoll l-Iben jagħti l-ħajja lil dawk li
jrid hu.” (Ġw 5:21)
-
“Tassew tassew ngħidilkom li min jisma’ kelmti u jemmen
f’min bagħatni, għandu l-ħajja ta’ dejjem, u ma jsirx
ħaqq minnu, imma għadda mill-mewt għall-ħajja.” (Ġw
5:24)
-
“Tiġi siegħa meta dawk kollha li jkunu fl-oqbra jisemgħu
leħnu (leħen l-Iben), u joħorġu; dawk li jkunu għamlu t-tajjeb
iqumu għall-ħajja.” (Ġw 5:28)
-
Lil-Lhud qalilhom “Intom ma tridux tiġu għandi biex
ikollkom il-ħajja.” (Ġw 5:40)
-
“Jiena hu l-ħobż tal-ħajja.” (ara Ġw 6:22-59)
-
Pietru jistqarr, “Mulej, inti għandek il-kliem tal-ħajja
ta’ dejjem.” (Ġw 6:68)
-
“Min jiġi warajja ma jimxix fid-dlam, iżda jkollu d-dawl
tal-ħajja.” (Ġw 8:12)
-
“Jiena ġejt biex ikollkom il-ħajja, u l-ħajja bil-kotra.”
(Ġw 10:10)
-
“In-nagħaġ tiegħi jisemgħu leħni … u jiena nagħtihom
il-ħajja ta’ dejjem.” (Ġw 10:28)
-
“Jiena hu l-qawmien u l-ħajja.” (Ġw 11:25)
-
“Jienu hu t-triq, il-verità u l-ħajja.” (Ġw 14:6)
-
“Missier, waslet is-siegħa; agħti glorja lil Ibnek biex
l-Iben jagħti glorja lilek, bħalma inti tajtu s-setgħa
fuq il-bnedmin kollha, biex huwa jagħti l-ħajja ta’
dejjem lil dawk kollha li inti fdajtlu f’idejh.” (Ġw
17:1-2)
-
“Dawn inkitbu sabiex intom temmnu li Ġesù hu l-Messija
l-Iben ta’ Alla, u biex bit-twemmin tagħkom ikollkom
il-ħajja f’ismu.” (Ġw 20:31)
|
M
Meditazzjoni
|
"Mulej, ħabibek marid."
Kliem dawk li ġew għand Ġesù, jidher donnu sempliċi aħbar.
Imma fil-qalba ta’ dik l-aħbar, hemm talba ħerqana biex hu
jfejjqu.
-
Ġieli mort għand Ġesù u b’persważjoni fija li huwa
tassew il-ħabib tiegħi li jista’ jfejjaqni għidtlu dan
il-kliem, “Mulej, ħabibek marid” ?
-
Ġieli għamiltlu din it-talb f’isem xi ħadd minn ħuti?
"Din m'hijiex marda tal-mewt, iżda hi għall-glorja
ta' Alla."
-
Marda jew mewt – għall-glorja ta’ Alla? Ma nifhimx kif.
Imma nemmen?
-
Għax naf x’kien ir-rizultat tal-mewt ta’ Lazzru, allura
nista’ nifhem għaliex Ġesù qal hekk. Imma f’dik ta’
ħbiebi, u qrabati? Kif jista’ jkun?
-
Lest li nkompli nagħti glorja lil Alla, anke
f’ċirkustanzi ta’ tbatija, mard u mewt? Waħdi ma
naħsibx li nista' nasal, imma bil-qawwa ta’ l-Ispirtu li
hemm fija …
Baqa' jumejn oħra fejn kien.
-
Imma għaliex il-Mulej, idum ma jwieġeb meta nsejjaħlu?
-
Kultant bħal donnu rieqed. –
Hu kien fil-poppa, rieqed fuq imħadda. (Mk 4 :38)
-
Kultant nażzarda nasal li ngħid li bħal donnu ma
jinpurtaħx. - "Mgħallem, dan qisu m'hu xejn għalik li
aħna se nintilfu?" (Mk 4 :38)
-
Iżda hu qalilhom, "Dal-biża' kollu għaliex? Mela ma
għandkomx fidi?" (Mk 4 :41)
-
Tgħid iridni ngħarbel sewwa l-fidi tiegħi ? Ngħid li
nemmen. Imma x’fidi tiegħi hi din ?
"Sakemm wieħed jimxi binhar, ma jitfixkilx…
Imma jekk jimxi billejl, jitfixkel."
Sa mill-bidu tal-evanġelju tiegħu, San Ġwann jippreżenta lil
Ġesù bħal d-dawl li jiddi fid-dlam imma d-dlam ma għelbux (Ġw
1:5). Il-kuntrast bejn id-dawl u d-dlam jidher kontinwu tul
l-evanġelju kollu. F’din is-silta hu Ġesù nnifsu, li
għall-biża li juru d-dixxipli tiegħu, jurihom li sakemm l-azzjonijiet
tal-bniedem huma mdawwla mis-sewwa, allura m’għandux ikollu
biża’. Huwa biss meta nimxu fid-dlam tad-dnub li nitfixxklu.
-
Liema dawl infittex biex idawwal dak li nagħmel.
-
Kristu d-dawl tad-dinja! Imma tiegħi ukoll? Liema
ħwejjeġ f’ħajti nippreferi nagħmilhom fid-dlam?
-
U jiena, qiegħed inħalli d-dawl ta’ Kristu jirrifletti
minni, biex jasal ukoll għand dawk li qegħdin fid-dlam?
"Ħabibna Lazzru rieqed" … Mbagħad qalilhom
ċar u tond : "Lazzru miet."
Marid? Rieqed? Mejjet? Donnu għal Ġesù ftit li xejn
jagħmel differenza. Għalih xejn mhu mpossibli għaliex kif
qal huwa stess, “Kollox jista’ jkun għal min jemmen?” (Mk
9:23). Imma d-dixxipli bħal donnhom ma jistgħux
jifhmu. Mhux l-ewwel darba! Għalihom jekk rieqed, jista’
jqum. Jekk marid forsi jista’ jfiq. Imma jekk miet,
x’jista’ jagħmel Ġesù quddiem bniedem mejjet?
-
Kemm drabi, jiena wkoll poġġejt limitu għas-setgħa
divina ta’ Kristu?
-
Quddiem sitwazzjoni diffiċli ta’ mard?
-
F’sitwazzjoni ta’ mewt naturali, kemm drabi ħsibt li dak
kien it-tmiem, li issa spiċca kollox?
-
Quddiem mard u mewt spiritwali, kemm qtajt qalbi mill-qawwa
ta’ Alla, għalija nnifsi jew għal oħrajn?
"U jiena nifraħ minħabba fikom li ma kontx
hemm, ħalli temmnu."
Wara l-ewwel “iva” tagħhom, f’dan l-evanġelju, id-dixxipli
huma kważi spettaturi, imma fl-aħħar mill-aħħar, huma dawk
li l-aktar li qed igawdu minn dak li jagħmel Ġesù. Is-sinjali
tiegħu għandhom dejjem għan wieħed, “Biex intom temmnu.” (Ġw
20:31). F’Kana raw u emmnu. (Ġw 2:11). Fil-ġrajja
tas-Samaritana ħasdu frott li ma tħabtux għalih (Ġw 4:38).
F’din is-silta, huwa Ġesù nnifsu li jifraħ b’dak kollu li
qed iseħħ, “minħabba fikom.”
-
Napprezza kemm jiena, bħala dixxiplu ta’ Kristu, qiegħed
dejjem fiċ-ċentru tal-attenzjoni tiegħu?
-
Ninduna kemm sinjali huwa jwettaq għalija biex isaħħaħni
fil-fidi? Anke jekk dawn is-sinjali jsiru fil-ħajja
tal-oħrajn. Anke jekk fihom jiena nidher bħal sempliċi
spettatur. Warajhom, f’moħħ Alla, hemm dejjem, jien.
"Immorru aħna wkoll ħa mmutu miegħu."
Minkejja li ma fehmux x’kien qed jiġri, minkejja l-biża’
tagħhom, id-dixxipli lesti li jagħmlu dan l-pass, li jmorru
huma wkoll biex imutu miegħu. Tumas nnifsu, li spiss
nassoċjawh ma nuqqas ta’ fidi, tkellem f’isem sħabu u huwa
lest li jagħmel dal-pass. U dan għax l-Imgħallem għadu
magħhom. Kien aktar tard, meta l-Imgħallem ittieħedilhom u
ma kienux qed jarawh, li bezgħu u ħarbu.
-
Qatt indunajt kemm jiena b’saħti jekk inkun miegħu, imma
waħdi, mingħajru, ma niswa xejn?
-
X’inhu dak li lili jagħmilni b’saħti u jagħtini l-kuraġġ
li nistqarr li jiena wkoll dixxiplu tiegħu?
Marta : "Mulej, kieku kont hawn, ħija ma
kienx imut. …
Marija: "Mulej, kieku kont hawn, ħija ma
kienx imut."
Marta u Marija, ħut Lazzru. Kienu jemmnu fih. Imma l-fidi
tagħhom kienet għada żgħira wisq. Għax rawh ifejjaq oħrajn,
kienu emmnu li sakemm ħuhom kien għadu ħaj, allura Ġesù
kellu s-setgħa li jfejjqu. Imma issa, darba li hu mejjet,
x’setgħa jagħmel? L-istess fidi ta’ Marta fil-qawmien,
forsi aktarx kienet biss twemmin f’domma ta’ fidi, imma mhux
daqstant fil-qawwa ta’ Alla, li kif jista’ jqajjem fl-aħħar
jum, kien setgħa jqajjem ukoll dakinhar.
Fuq kollox, huma emmnu li Ġesù ħtieġlu jkun hemm biex
ifejjqu. Forsi anke ċ-ċenturjun pagan kellu fidi akbar, “Ma
jistħoqqlix tidħol taħt is-saqaf tiegħi. Iżda int għid kelma
waħda u l-qaddej tiegħi jfiq.” (Mt 8:8)
"Jien hu l-qawmien u l-ħajja."
-
Xi tfisser fil-ħajja tiegħi din l-isqarrija ta’ Ġesù?
-
Tagħmel differenza f’ħajti li Ġesù huwa l-qawmien u l-ħajja?
Kif?
-
Jew ngħid li nemminha u daqshekk? Biha u mingħajrha
nibqa ngħix xorta waħda?
"Ara kemm kien iħobbu! … Ma setax dan
jagħmel li dan ma jmutx?"
Kemm kien iħobbu? Forsi issa, għax
f’għajnejhom mejjet, allura m’għadux iħobbu? Forsi għalihom,
il-mewt ta’ ħabibu Lazzru hija xi sinjal li l-imħabba ta’
Ġesù għalih spiċċat?
Anke l-Lhud, l-istess bħal Marta u Marija, emmnu f’setgħa
parzjali ta’ Ġesù. Li jfejjqu, iva. Imma li jqajjmu mill-mewt
… !
"Mulej, issa beda jrejjaħ; ġa ilu erbat
ijiem mejjet."
-
Kemm drabi, l-ħajja tiegħi ta’ dnub lili tagħmilli l-istess?
Dan hu -vizzju li jidħol f’ħajti ftit. Ħajti
tibda tintenn u jiena lanqas biss nintebah, għax inkun
mejjet, l-istess kif Lazzru ma ntebaħx bir-rieħa ta’
taħsir li kienet ħierġa mill-ġisem mejjet tiegħu.
-
Iżda għal Ġesù, xejn ma hu impossibli. Hu jista'
jfejjaqni.
"Jekk inti temmen, tara l-glorja ta' Alla."
-
Il-glorja ta’ Alla f’din id-dinja hija li huwa jilmaħ
ix-xbieha tiegħu f’uliedu. Jikteb San Ġwann fil-prologu
tal-evanġelju tiegħu, “Lil dawk li laqgħuh tahom is-setgħa
li jsiru ulied Alla, dawk li jemmnu f’ismu. (Ġw 1:12).
Din hija glorja ta’ Alla, li jien nkun tassew ibnu l-għażiż.
Li fija jara lilu nnifsu.
-
U jiena liema xbieha nara meta nħares lejja nnifsi, mhux
fil-mera ta’ ħġieġ, imma f’dik tal-qalb?
-
U meta nħares lejn l-oħrajn, nara fihom l-istess xbieha
li Alla nnifsu poġġa fina lkoll?
"Lazzru, oħroġ! ... Neħħu l-blata. ...
Ħollulu l-faxex u ħalluh imur."
X’differenza bejn il-qawmien tad-dixxiplu u dak
tal-Imgħallem! Lil Lazzru qajjmu Ġesù. Imma Ġesù qam mill-mewt
bil-qawwa divina tiegħu stess.
-
“Lazzru, oħroġ!” - L-ordni minn fomm Kristu lill-mejjet
biex iqum u joħroġ.
-
“Neħħu l-blata.” – Forsi dan ma jfakkarx f’xena oħra
meta f’Ħadd il-Għid, Marija ta’ Magdala ġiet ħdejn
il-qabar u rat il-blata ġa mneħħija.
-
“Ħollulu l-faxex.” Lazzru li joħroġ mill-qabar,
imgeżwer fil-faxxex u kellhom ikunu l-oħrajn biex
jeħilsuh minnhom. Imma fil-qabar vojt ta’ Ġesù, l-Evanġelista
jerġa jsemmi l-faxxex tal-għażel kienu imqegħda hemm.
|
|
T
Talb
|
-
Mulej, ħabibek marid!
-
Inti l-għajnuna u l-ħelsien tiegħi; iddumx ma tgħinni,
Alla tiegħi. (Salm 40:18)
-
Mulej, agħti d-dawl lil għajnejja, li ma naqax fir-raqda
tal-mewt. (Salm 13:4)
-
Ħenn għalija, Mulej; ara n-niket tiegħi; inti rfajtni u
ħriġtni minn bibien il-mewt. (Salm 9:14)
-
Li kont hawn, Mulej, ħabibek ma kienx imut.
-
Eħlisni mill-pwieni tal-mewt, o Alla, Alla
tas-salvazzjoni tiegħi; u lsieni jfaħħar il-ġustizzja
tiegħek. (Salm 51:16)
-
Bil-glorja tiegħek jithennew ħbiebek, Mulej. (Salm
149:5)
|
K
Kontemplazzjoni
|
Jekk il-Lectio Divina qed issir fi grupp,
il-Kontemplazzjoni tista' ssir privatament wara.
"Mulej, inti żammejt ruħi fis-skiet u l-mistrieħ,
bħal tarbija f'ħoġor ommha; bħal tarbija miftuma,
hekk hi ruħi ġewwa fija." (Salm 131:2)
Strieħ issa, inti wkoll bħal tarbija f’ħoġor
ommha. Hekk tistrieħ inti wkoll f’ħoġor
il-Mulej Alla tiegħek. Itobu fil-bidu ta’ dan
il-ħin, biex ibattallek moħħok minn kull ħsieb,
u ħalli lilu jserrħek hu. Tfittix li tieħu
inizjattivi int, imma erħi lilek innifsek
f’idejh. |
|
TALBA
FI TMIEM IL-LECTIO DIVINA
Inroddlok ħajr, Mulej Ġesù tal-Kelma tiegħek
li mhux biss tajtha lid-dixxipli elfejn sena
ilu, imma li llum ukoll tajtha anke lili.
Agħtini l-Ispirtu Qaddis tiegħek sabiex
bil-qawwa tiegħu ngħix kuljum fid-dawl
tagħha u sabiex bi mħabba nwassalha
lill-oħrajn. Dan nitlobulek
bl-interċessjoni ta’ Ommok u Ommi Marija, li
kienet l-ewwel waħda li laqgħatha f’qalbha u
f'ħajjitha. Għall-glorja tal-Missier li
miegħek jgħix u jsaltan flimkien ma’ l-Ispirtu
s-Santu. Ammen. |
|
|
|