LECTIO DIVINA |
TALBA LILL-ISPIRTU
S-SANTU FIL-BIDU TAL-LECTIO DIVINA
Ejja Spirtu Qaddis
u mlieni bil-qawwa tal-preżenza tiegħek, l-istess
kif nhar Għid il-Ħamsin inti kont
imlejt lill-ewwel insara. Għinni nitbattal
minn dak kollu li hemm ġewwa fija, mill-pjanijiet
u l-proġetti kollha li nagħmel għalija
nnifsu u għall-oħrajn għax b'hekk biss inkun
nista' nilqa’ aħjar il-Kelma li se tagħtini.
Dawwalli moħħi biex nifhem il-messaġġ li
għandek għalija u kebbisli qalbi biex
nwettqu f’ħajti u f’dik ta’ ħuti. Dan għal
akbar glorja tiegħek. Ammen.
|
|
5. Bih wera l-glorja tiegħu u d-dixxipli
tiegħu emmnu fih.
Ġw: 2:
1-12..
|
|
Q
Qari |
Il-Mara li emmnet bla ma rat.
Mbagħad fit-tielet jum sar tieġ f'Kana tal-Galilija, u omm
Ġesù kienet hemm. Ġesù kien mistieden għat-tieġ hu wkoll
flimkien mad-dixxipli tiegħu. Billi ma kienx fadal iżjed
inbid, omm Ġesù qaltlu: "Ma għandhomx inbid." U Ġesù qalilha:
"X'hemm bejni u bejnek, mara? Is-siegħa tiegħi għadha ma
waslitx." Omm Ġesù qalet lill-qaddejja: "Agħmlu kull ma
jgħidilkom hu."
Issa kien hemm sitt ġarar tal-ħaġar, mqiegħda hemm għar-rit
tal-purifikazzjoni tal-Lhud, kull waħda minnhom tasa' xi
mitt jew mija u għoxrin litru. Ġesù qal lill-qaddejja: "Imlew
il-ġarar bl-ilma." U dawk imlewhom sax-xifer. Mbagħad
qalilhom: "Issa ħudu minnu u newwluh lil dak li qiegħed
jieħu ħsieb il-mejda." U huma marru jagħtuhulu.
Hu daq l-ilma mibdul fi nbid; u billi ma kienx jaf mnejn ġie,
għalkemm il-qaddejja li ħadu mill-ilma kienu jafu, sejjaħ
lill-għarus u qallu: "Kulħadd l-inbid it-tajjeb iservi l-ewwel;
meta mbagħad ikun ħadhom iġibu dak li jkun inqas tajjeb.
Imma int l-inbid it-tajjeb erfajtu sa issa."
Dan li għamel
Ġesù f'Kana tal-Galilija kien l-ewwel wieħed fost is-sinjali
tiegħu. Bih wera l-glorja tiegħu u d-dixxipli tiegħu emmnu
fih. Wara dan, niżel Kafarnahum, hu, ommu, ħutu u d-dixxipli
tiegħu, iżda ma qagħdux hemm għal ħafna żmien.
|
IL-KUNTEST TAS-SILTA U S-SIMBOLIŻMU LI FIHA
Dawn il-ftit noti mhux parti mil-Lectio
Divina, imma qegħdin
biex ifissru
l-kuntest tal-ġrajja
u s-simboliżmu
kbira li hemm marbut magħha.
Għalhekk
huma jistgħu
jkunu ta’ għajnuna
waqt il-meditazzjoni. Minħabba
t-tul tagħhom,
ikun tajjeb
li dawn in-noti jinqraw qabel u mhux waqt il-Lectio Divina
nfisha.
Ma’ l-ewwel daqqa t’għajn, dan jista’ jidher bħala rakkont ta’
ġrajja oħra fil-ħajja publika ta’ Ġesù, tagħrif dwar l-ewwel
miraklu li huwa għamel, u minħabba ċ-ċirkustanzi tal-każ
faċli ħafna li kull riflessjoni li toħroġ minnu spiss tkun
lokaliżata f’ambjent ta’ żwieġ u familja. U dan ikun tajjeb.
Madankollu l-kuntest ta’ din il-ġrajja li seħħet f’Kana
tal-Galileja huwa ferm aktar wiesgħa minn hekk. F’dan
ir-rakkont, unikament mogħti lilna mir-raba’ Evanġelista,
hemm tant ċirkustanzi u simboliżmu li jippuntaw ‘l barra
mis-silta nfisha, li din trid tinqara u tkun meditata mhux
biss fid-dawl tal-ġrajja kollha ta’ Ġesù Kristu, speċjalment
tal-aħħar jiem; iżda wkoll fl-isfond tal-istorja kollha
tas-salvazzjoni, li tmur sa mill-ewwel mumenti fi Ġnien
l-Eden.
Fit-tielet jum:
Din l-espressjoni, “fit-tielet jum”, żgur kellha tifsira
speċjali għall-ewwel komunità nisranija. Fil-kotba tat-Testment
il-Ġdid, insibuha erbatax-il darba. Fi tnax minnhom
tirreferi għal dakinhar li bil-qawmien tiegħu mill-imwiet,
il-Mulej Ġesù wera l-glorja tiegħu lid-dixxipli tiegħu u
dawn emmnu fih. Anke b’dak li Ġesù għamel f’Kana
tal-Galileja, “huwa wera l-glorja tiegħu u d-dixxipli emmnu
fih.”
It-tieġ:
L-ambjent tal-ġrajja ma nistgħux ninjorawh. Wara li fl-istess
kapitlu, Ġwanni l-Għammiedi jindika lil Ġesù bħala l-Ħaruf
ta’ Alla, wieħed mill-ewwel jintebaħ li l-festa tat-tieġ li
saret f’Kana tal-Galileja, minkejja li hija ġrajja li seħħet
tassew, madankollu hija wkoll simbolu ċar tal-festa tat-tieġ
tal-Ħaruf. L-għarusa tal-Ħaruf hija l-Knisja, rappreżentata
f’din il-ġrajja mill-ewwel ftit dixxipli, li kif naqraw fi
tmiem is-silta, raw is-sinjal li kien għamel Ġesù u emmnu
fih. Forsi huwa għalhekk li għajr għal referenza qasira
għall-għarus, mill-bqija l-għarajjes ma jissemmew xejn.
Anke jekk mal-ewwel daqqa t’għajn donnu jidher li huma l-akbar
żewġ benefiċarji tal-miraklu.
Omm Ġesù:
Fir-raba’ evanġelju, isimha ma jidher imkien u barra din
ir-riferenza tal-Evanġelista, Ġesù nnifsu lil ommu jsejħilha,
“Mara”.
Ir-raba’ Evanġelista huwa wieħed, li fir-rakkont tiegħu
jidħol f’tant dettal u jipprovdi saħansitra l-ismijiet ta’
diversi personaġġi li huma sekondarji għall-ġrajja.
Għakhekk meta huwa jħalli kompletament barra l-isem ta’
protagonista daqshekk importanti bħal ma kienet Omm Ġesù,
żgur għamel dan bi skop għax ried iwassal messaġġ. Huwa juża
l-istess tattika fil-każ tad-Dixxiplu l-Maħbub għax ismu ma
nsibuh imkien.
Lejn tmiem il-ġrajja, meta Ġesì kien fuq is-salib, huwa
jerġa jsejjaħ lil ommu bl-istess mod, “Mara, hawn hu ibnek.”
(Ġw 19:26) U allura dan il-fatt iġagħlna mill-ewwel norbtu
dak li ġara f’Kana ma dak li seħħ fuq il-Kalvarju. Dan
nerġgħu narawh aktar ‘l isfel meta niflu dak li jgħid Ġesù dwar is-siegħa
tiegħu.
Imma l-kelma, “Mara”, użata minn Ġesù għal ommu, fil-bidu u
fit-tmiem tal-missjoni tiegħu, tfakkarna wkoll fil-wegħda li Alla
stess għamel fil-ġnien ta’ l-Eden, meta lix-xitan,
raffigurat mis-serp, jgħidlu, “Inqajjem mibegħda bejnek u
bejn il-Mara, bejn nislek u nisilha. U huwa jisħaqlek rasek.”
(Ġen. 3:15)
Għalhekk fl-anonimità tal-isem tagħha u fl-użu tal-kelma,
“Mara”, l-Evanġelista qed juri li Ġesù huwa dak il-wild
imwiegħed fl-Eden, li l-Mara tal-wegħda ta’ Alla, hija Omm
Ġesù. Fuq kollox juri li issa, il-wegħda ta’ Alla kienet bdiet titwettaq.
Is-siegħa
ta’
Ġesù:
Din ma kienx xi
jum jew xi waqt meta
Ġesù
kellu jibda jwettaq il-mirakli. F’dan l-evanġelju
nsibu kontinwament lil
Ġesù
jsemmi s-siegħa
tiegħu,
u minnhom wieħed
faċli
jintebah li
huwa dejjem kien qed jirreferi għal dak il-mument meta kellu
jintrefa’ mill-art u hekk jiġbed lill-bnedmin kollha lejh. (Ġw.
12:32). Tant hu hekk li kif l-aħħar ikla mad-dixxipli, huwa
jgħid, “Missier, waslet is-siegħa.” (Ġw. 17:1) (ara
noti dwar
is-Siegħa
ta’
Ġesù)
F'Kana, fuq il-kelma ta’ Ommu,
Ġesù
jagħti
l-ewwel pass lejn is-siegħa
tiegħu.
Meta tasal is-siegħa,
Ommu terġa
tkun hemm.
L-ilma mibdul f'inbid:
Dak li
jikteb l-Evanġelista
dwar il-ġarar
li kienu wżati
għar-rit
tal-purifikazzjoni tal-Lhud, mhux dettal
żejjed
li qiegħed
hemm biex jagħmel
storja aktar mirquma. Il-Missjoni ta’
Ġesù
kienet waħda
ta’ purifikazzjoni li magħha
ġġib
bidla radikali kemm fil-poplu ta’ Alla, kif ukoll
fil-persuni nfushom li minn rajhom jagħżlu
li jkunu dixxipli tiegħu.
Din it-tema ta’ bidla radikali nsibuha aktar
ċara
f’siltiet oħra,
l-ewwel waħda
fosthom meta huwa jgħid
lil Nikodemu li jinħtieġlu
jitwieled mill-ġdid.
(Ġw.
3:3)
Barra minn hekk, l-inbid huwa
dejjem assoċjat
mal-hena. Fuq kollox
Ġesù
stess, fl-aħħar
ikla, jgħid
lid-dixxipli,
"Ngħidilkom li
ma nerġax nixrob
iżjed minn dan il-frott tad-dielja sa dak in-nhar li
nixrob inbid ġdid
magħkom fis-Saltna ta' Missieri.” (Mt 26: 17.29)
Għalhekk
fis-simboliżmu
ta’ l-ilma mill-ġarar
tal-purifikazzjoni mibdul fl-inbid “it-tajjeb”, l-Evanġelista
jrid juri li huwa permezz tal-purifikazzjoni u l-bidla
radikali, l-istess bħal
ta’ l-ilma mibdul f’inbid, li jista’ jkollna l-hena tassew.
Dan jista’ jwettqu
Ġesù
biss, madankollu jiena, l-istess kif għamlu
l-qaddejja, irrid nikkopera miegħu
u fuq il-parir ta’ Omm
Ġesù
jinħtieġli
nagħmel
dak li jgħidli
hu.
|
M
Meditazzjoni
|
Ġesù kien mistieden ukoll.
Jidher li l-istedina saret lil Omm Ġesù, imma għax stiednu
lilha, magħha stiednu ukoll lil binha. U għax stiednu lilu,
miegħu stiednu wkoll lid-dixxipli tiegħu.
-
Devozzjoni u mħabba vera lejn Omm Ġesù qatt ma tieqaf
fuqha, imma tkun hija stess li tressaqna lejn binha.
Fejn hemm Marija, hemm Ġesù ukoll.
-
Ġesú, l-Iben ta’ Alla, li skont ma jgħidilna l-istess
Evanġelista fil-bidu tal-ktieb, “kollox sar bih u
mingħajru ma sar xejn” (Ġw. 1:3). Aktar ‘l isfel naqraw
li meta ġie fid-dinja huwa kien ġie propju f’daru
(Ġw.1:11), minkejja dan, Ġesù qatt ma jinforza lilu
nnifsu fuqna, iżda jistenna li nistednuh biex jidħol
f’darna u f’ħajjitna. Jiena stedintu jidħol f’ħajti u
f’dik tal-familja tiegħi?
Flimkien mad-dixxipli tiegħu.
Spiss nisemgħu l-kliem, “Kristu iva, imma l-Knisja le.”
Iżda kultant jiena nagħmel bil-maqlub. Nieħu sehem jew nattendi
ċelebrazzjonijiet reliġjużi, iżda dan mhux dejjem jissarraf
f’relazzjoni personali ma’ Kristu.
-
Possibli jkolli relazzjoni mar-Ras imma mhux mal-Ġisem
jew bil-maqlub?
-
Kif nista’ ngħid, Ġesù iva, imma l-Knisja le? Kif nista’
ngħidlu ma’ dawk “iva” imma ma l-oħrajn “le”?
-
San Pawl ixebbaħ lill-Knisja ma’ ġisem, li r-ras tiegħu
huwa Kristu. (1 Kor 12:12-30). Mhemmx firda fi Kristu.
Persważ minn dan? Nipprattikah f'ħajti?
-
Jekk jiena dixxiplu veru ta’ Kristu, huwa jistenna minni
li nkun kull fejn ikun hu. Isibni miegħu kuljum u
kullimkien? Kemm f'Kana, imma wkoll fuq il-Kalvarju!
“M’għandhomx inbid.”
Fl-evanġelju ta’ Ġwanni nindunaw kif rakkont storiku bi
ġrajjiet u personaġġi reali, huwa żviluppat f’test simboliku
li bih il-qarrej ta’ kull żmien jista’ huwa wkoll jirrelata
mal-ġrajja u mal-figura prinċipali tal-ġrajja, Ġesú Kristu.
L-inbid f’dan ir-rakkont irid jwassalna għal realtà ferm
profonda. F’diversi siltiet tal-Bibbja nsibu l-inbid
deskritt bħala dak li jferraħ qalb il-bniedem. (Salm 104:15)
Għalhekk is-simboliżmu tiegħu f’din is-silta rridu nifhmuh
ukoll f’dak il-kuntest.
Aktarx li l-istess għarajjes lanqas biss kienu intebħu
bil-gwaj li kienu fih. Iżda Omm Ġesù, intebħet u daħlet
għalihom quddiem binha.
-
Nemmen li dak li Omm
Ġesù
għamlet
mal-għarajjes
fit-tieġ
ta’ Kana, illum għadha
trid tagħmlu
miegħi
wkoll? Imma jiena stedintha tidhol fil-grajjiet ta’
ħajti
jew forsi, indur lejha biss meta l-gwaj tiegħi
jkun daħal
wisq ‘il
ġewwa?
Il-Mara u nisilha.
Mal-ewwel daqqa t’għajn, il-mod kif Ġesù jsejjaħ lil Ommu,
jista’ jfixkilni għax jidhirli li il-kelma, “Mara” mhux il-mod
kif Iben jindirizza lill-ommu. Fl-evanġelju skont San Ġwann
stess, Ġesù sejjaħ lill-ommu bl-istess mod meta kien fuq is-Salib,
“Mara, hawn hu ibnek.” (Ġw 19:26)
Madankollu, f’dan l-evanġelju, li tant jorbot ġrajjiet u
kliem Ġesù ma’ dak li hemm fit-Testment il-Qadim, b’mod
speċjali fil-ktieb ta’ Ġenesi, il-kelma “Mara” li biha Ġesù
jsejjaħ lill-Ommu tfakkar mill-ewwel fil-wegħda li għamel
Alla fil-ġnien tal-Eden meta lix-xitan, raffigurak fis-serp,
jgħidlu, “Inqajjem gwerra bejnek u bejn il-Mara, bejn nislek
u nisilha, u Huwa jisħaqlek rasek.” (Ġen 3:15). U allura bi
kliemu Ġesù qed juri li Ommu hija dik il-Mara mwegħda minn
Alla u li huwa stess kien il-Feddej imwiegħed.
-
F’din il-gwerra bejn it-tajjeb u l-ħażin, jiena ma
nistgħax nibqa’ newrali. Kif ngħidu fil-Malti, jien ma’
Alla jew max-xitan? Mhux bi kliemi, imma bil-fatti ta’
għamili!
-
Min hi tassew għalija, Omm Ġesù? Għandha xi rwol
f’ħajti bħala nisrani?
-
Xi tfisser tassew għalija li Ġesù huwa l-Feddej
imwiegħed?
-
Għandi tama tassew li minkejja l-ħażin kollu ta’ madwari,
Ġesù saħaq ras ix-xitan?
"Agħmlu kull ma
jgħidilkom hu."
Din hija l-unika kelma li nsibu minn fomm Omm Ġesù f’dan
ir-raba’ evanġelju. Minkejja li hi Ommu, hija wkoll dixxiplu
tiegħu, l-ewwel fost id-dixxipli. U ta’ dixxiplu veru,
dejjem turina lil Binha. L-istess bħal Ġwanni l-Battista
taf li jinħtieġ tiċkien hi biex jikber Hu.
-
U jiena, ma’ dawk ta’ madwar, nimxi l-istess jew
infittex li nikber jien?
-
Nemmen li devozjoni vera lejn Marija, qatt ma twaqqafni
fiha, imma turini u tmexxini lejn Ġesù?
-
Lil dawk ta' madwari, speċjalment fil-familja jew fuq
ix-xogħol, nħeġġiġhom xejn biex jagħmlu dak li
jgħidilhom Ġesù jew aktar nistenna li jagħmlu dak li
ngħidilhom jew nixtieqhom jagħmlu jien?
"Imlew
il-ġarar bl-ilma." U dawk imlewhom sax-xifer.
Il-rwol importanti li kellhom il-qaddejja f’din il-ġrajja,
aktarx li ħafna drabi ma nintebħux bih. Kienu qaddejja bla
ebda pretensjoni ta’ xejn mhux bħad-dixxipli, li aktar ma
beda jgħaddi żmien aktar bdew jagħmlu pjanijiet għalihom
infushom u għall-Imgħallem tagħhom. Darba Ġesù qal, “Meta
tagħmlu kull ma tkunu ordnati, għidu, ‘Aħna qaddejja li ma
niswew għal xejn; għamilna biss dak li kellna nagħmlu.’”
Hekk għamlu il-qaddejja fit-tieġ ta’ Kana. Iżda aktar minn
hekk, dak li għamlu, għamluh bl-abbundanza. Taw dak kollu li
setgħu. Imlew il-ġarar sax-xifer.
-
Qatt ikkunsidrajt kif spiss Alla jrid jinqeda bija biex
jagħti l-grazzji u l-providenza tiegħu lill-oħrajn?
Allura spiss jista’ jiddependi minni u mill-mod kif
nagħmel il-parti tiegħi?
-
Dak li nagħmel mal-proxxmu tiegħi, nagħmlu bil-qalb, jew
forsi kollox nofs kedda?
-
Qatt intbaht li d-dixxiplu tassew, irid ikun qaddej.
“Min hu l-akbar fostkom irid ikun il-qaddej tagħkom.”
(Mk 10:43)
"Int, l-inbid it-tajjeb erfajtu
sa issa."
Minn kliem il-kap tal-mejda,
donnu jurini li lanqas dak li xorbu dakinhar waqt it-tieġ
f’Kana ma kienx l-inbid it-tajjeb, għaliex
l-inbid it-tajjeb tassew,
Ġesù
refahulna
sa l-aħħar meta huwa stess tah lid-dixxipli u qalilhom, “Ixorbu
minnu lkoll. Dan huwa demmi.” (Mt. 26:29)
-
Forsi
m'huwiex dan tassew
l-inbid it-tajjeb?
-
Kemm tassew il-Mulej jimxi
magħna b’mod differenti milli jimxi x-xitan jew milli
timxi d-dinja. Dawn fil-bidu jdewwquk il-ħelu u
wara jisquk il-morr.
Ġesù jdewwqek il-ħall imma jisqik l-inbid
tal-hena. Jitolbok
terfa’ salibek, imma ħejjilek post fis-saltna.
Sinjal
li
Ġesù
bih wera l-glorja tiegħu u d-dixxipli tiegħu emmnu
fih.
Fir-raba’ evanġelju
nsibu wżata
l-kelma, “sinjali” minflok il-kelma, “mirakli”. Dan għaliex
il-mirakli li għamel
Ġesù
kienu sinjal li bihom wera l-glorja tiegħu
u b’hekk “id-dixxipli emmnu fih”. Madankollu l-miraklu la
huwa l-għajn
u lanqas garanzija ta’ fidi. Infatti kien hemm bosta
persuni li raw il-mirakli ta’
Ġesù
u xorta baqgħu
ma emmnux fih. Anzi uħud
ħraxu
kontrih bħal
ma
ġara
wara l-qawmien tal-Lazzru mill-mewt. (ara
Ġw.
11:45-50) Il-fidi hija don minn għand
Alla, iżda
titlob tweġiba
libera mill-bniedem.
-
U jiena ninduna xejn bis-sinjali tal-għeġubijiet
li Alla għadu
kontinwament iwettaq madwar? Jew tant jiena aljenat
li dawn jgħaddu
bla ma biss nintebaħ.
-
Quddiem
is-sinjali li jurini l-Mulej, inwieġeb
bil-fidi jew inkompli nikber fid-dubji?
-
L-Evanġelista jtemm is-silta billi jikteb li wara li raw
dan l-ewwel sinjal ta’ Ġesù, id-dixxipli emmnu fih.
Forsi jiena nibqa' dejjem inħares lejn is-sinjali u qatt
ma nsib it-Triq li huma juruni? (ara Ġw. 14:6)
Il-Mara li emmnet qabel
ma rat.
Lil Tumas, Ġesù qallu, "Henjin dawk li ma rawx u emmnu.” (Ġw.
20:29) L-ewwel waħda fost dawn kienet Ommu, li emmnet
qabel ma rat. Forsi kien għalhekk li qabel ma twieled Ġesù,
Eliżabetta qaltilha, “Hienja dik li emmnet li jseħħ kull ma
bagħat jgħidilha l-Mulej!” (Lq. 1:45)
-
Lejn tmiem l-evanġelju, San Ġwann jgħid li dawn is-sinjali
nkitbu biex aħna nemmnu. Għalija, il-Kelma ta’ Alla,
hija stedina biex jiena nemmen jew sempliċiment rakkont
ta’ ġrajja li seħħet żmien ilu lil persuni oħra?
-
Il-fidi li biha Omm Ġesù wieġbet għas-sejħa tagħha, hija
ta’ mudell għalija fil-mixja tal-fidi tiegħi?
|
|
T
Talb
|
-
Idħol
illum ukoll fil-familja tiegħi,
Mulej, Int, Ommok u
ħbiebek
kollha.
-
Mulej
Ġesù,
ħallini
nkun jien, dak li nagħtik
l-ilma maħmuġ
tal-umanità tiegħi
biex illum ukoll inti tibdlu fl-inbid it-tajjeb tad-divintà
tiegħek.
-
Missier Qaddis, il-Mara
mwegħda minnek fil-ġnien ta’ Eden tatna lill-Ibnek ħalli
jkun il-Feddej tagħna. Fil-mument tal-Fidwa, Ibnek tana
lil din il-Mara, biex minn Ommu tkun Ommna.
Bl-interċessjoni tagħha nitolbok tkattar fina l-grazzji
tiegħek biex fuq il-parir tagħha, f’ħajjitna nagħmlu
dejjem dak li jgħidilna Hu.
-
Mgħallem Divin, fl-ewwel
ikla tiegħek mad-dixxipli, inti bdilt l–ilma f’inbid u
fl-aħħar ikla magħhom, dak l-inbid inti bdiltu f’demmek
stess. Agħtini l-Ispirtu tiegħek biex jgħinni ngħozz
dejjem dan il-Misteru kbir tal-fidi tagħna.
-
Mulej, inti ssiġġilajt l-ħidma
tiegħek kollha fostna, sa mill-ewwel mumenti f’Kana
tal-Galileja sa l-aħħar waqtiet tiegħek fiċ-Ċenaklu ta’
Ġerualemm billi minn fuq is-salib xerridt “demm u ilma”.
Tħalli qatt li għalija, l-opra tal-fidwa tiegħek tisfa
fix-xejn.
|
K
Kontemplazzjoni
|
Jekk il-Lectio Divina qed issir fi grupp,
il-Kontemplazzjoni tista' ssir privatament wara.
Ieqaf illum ukoll,
għal
ftit minuti,
fil-preżenza
divina.
F’dawn
il-waqtiet, biżżejjed
attività li
ġejja
minnek. Biżżejjed
talb li
ġej
minn fommok. Biżżejjed
ħidma
mentali. Strieħ
ħiemed
fil-preżenza
tiegħu.
“Biżżejjed!
Kun afu li jien Alla.” (Salm 46 (45):11) |
|
TALBA
FI TMIEM IL-LECTIO DIVINA
Inroddlok ħajr, Mulej Ġesù tal-Kelma tiegħek
li mhux biss tajtha lid-dixxipli elfejn sena
ilu, imma li llum ukoll tajtha anke lili.
Agħtini l-Ispirtu Qaddis tiegħek sabiex
bil-qawwa tiegħu ngħix kuljum fid-dawl
tagħha u sabiex bi mħabba nwassalha
lill-oħrajn. Dan nitlobulek
bl-interċessjoni ta’ Ommok u Ommi Marija, li
kienet l-ewwel waħda li laqgħatha f’qalbha u
f'ħajjitha. Għall-glorja tal-Missier li
miegħek jgħix u jsaltan flimkien ma’ l-Ispirtu
s-Santu. Ammen. |
|
|
|