LECTIO DIVINA |
TALBA LILL-ISPIRTU
S-SANTU FIL-BIDU TAL-LECTIO DIVINA
Ejja Spirtu Qaddis
u mlieni bil-qawwa tal-preżenza tiegħek, l-istess
kif nhar Għid il-Ħamsin inti kont
imlejt lill-ewwel insara. Għinni nitbattal
minn dak kollu li hemm ġewwa fija, mill-pjanijiet
u l-proġetti kollha li nagħmel għalija
nnifsu u għall-oħrajn għax b'hekk biss inkun
nista' nilqa’ aħjar il-Kelma li se tagħtini.
Dawwalli moħħi biex nifhem il-messaġġ li
għandek għalija u kebbisli qalbi biex
nwettqu f’ħajti u f’dik ta’ ħuti. Dan għal
akbar glorja tiegħek. Ammen.
|
|
9. Marija
oħt Lazzru, u
Ġuda; Din mhux ħela?
Ġw:
12:1-11.
|
|
Q
Qari |
Id-dilka ta' Ġesù f'Betanja
[Ġw:12:1]
Sitt ijiem qabel il-festa ta' l-Għid Ġesù mar Betanja, fejn
kien joqgħod Lazzru li Ġesù kien qajjem mill-imwiet. [Ġw:12:2]
Hemmhekk għamlulu ikla; Marta bdiet isservi, waqt li Lazzru
kien wieħed minn dawk li qagħdu fuq il-mejda ma' Ġesù. [Ġw:12:3]
Marija ħadet libbra fwieħa tan-nard pur, tiswa ħafna, u
dilket biha riġlejn Ġesù, mbagħad ixxuttathomlu b'xagħarha;
u d-dar imtliet bir-riħa tfuħ. [Ġw:12:4] Ġuda l-Iskarjota,
wieħed mid-dixxipli tiegħu, dak li kien se jittradih, qal:[Ġw:12:5]
"Din il-fwieħa għax ma nbigħetx tliet mitt dinar biex
jingħataw lill-foqra?" [Ġw:12:6] Issa dan qalu mhux
għax kien jimpurtah mill-foqra, imma għax kien ħalliel, u,
billi hu kien il-kaxxier, kien jisraq kull ma kienu jaqilgħu.
[Ġw:12:7] Qallu Ġesù: "Ħalliha, din il-fwieħa kienet
refgħetha għal jum id-difna tiegħi. [Ġw:12:8] Il-foqra
dejjem issibuhom magħkom, imma lili mhux dejjem issibuni."
[Ġw:12:9]
Kotra kbira ta' Lhud saru jafu li hu kien qiegħed hemm, u
marru mhux biss minħabba Ġesù, imma wkoll biex jaraw lil
Lazzru, li hu kien qajjem mill-imwiet. [Ġw:12:10]
Għalhekk il-qassisin il-kbar ftiehmu li joqtlu lil Lazzru
wkoll, [Ġw:12:11] għax minħabba fih ħafna mil-Lhud
bdew jitilquhom u jemmnu f'Ġesù.
|
IL-KUNTEST TA’ DIN IS-SILTA FID-DAWL
TA’ DAK LI KITBU
L-EVANĠELISTI
L-OĦRA
Dawn
il-ftit noti mhux parti mil-Lectio Divina, imma qegħdin biex
ifissru l-kuntest tal-ġrajja u s-simboliżmu kbira li hemm
marbut magħha. Għalhekk huma jistgħu jkunu ta’ għajnuna
waqt il-meditazzjoni. Minħabba t-tul tagħhom, ikun tajjeb
li dawn in-noti jinqraw qabel u mhux waqt il-Lectio Divina
nfisha.
Is-silta
dwar id-dilka f’Betanja tfakkar immedjatament f’rakkonti
oħra li jagħtu l-Evanġelisti sinottiċi u li fihom ukoll
ċertu xebħ ma’ dak li jikteb ir-raba’ Evanġelista, iżda
ninnutaw ukoll differenzi.
Fir-rakkont komuni ta’ Mark-Mattew, il-mara li isimha li
isimha ma jissemmiex, tidlek ras Ġesù b’żejt ifuħ. (ara Mk
14:3-9 u Mt 26:6-13) Fir-rakkont ta’ Luqa, mara midinba
xxarrablu riġlejh bid-dmugħha u wara tixxuttahomlu b’xuxitha.
(ara Lq 7:36-50) Fir-rakkont ta’ Ġwanni, il-mara li kien
jisimha Marija u kienet oħt Lazzru, l-istess wieħed li Ġesù
kien qajjem mill-mewt, ħadet libbra fwieħa tan-nard pur,
tiswa ħafna, u biha dilket riġlejn Ġesù u mbagħad
ixxuttathomlu b’xagħarha. U d-dar imtliet bir-riħa tfuħ.
Ninnutaw ukoll x’għidu l-Evanġelisti dwar il-post fejn
seħħet il-ġrajja. Fir-rakkont Mark-Mattew, Ġesù kien qiegħed
għand Xmun il-lebbruż, f’Betanja. Fir-rakkont ta’ Luqa,
il-ġrajja sseħħ għand Xmun il-Fariżew. Differenza? Mhux
neċċesarjament għaliex Xmun il-lebbruż għandu mnejn kien
ukoll membru tal-Fariżej. Mill-banda l-oħra, Ġwanni jikteb
li l-ġrajja seħħet f’Betanja, fejn kien joqgħod Lazzru, iżda
ma jgħidx li kienu fid-dar ta’ Lazzru. Dwar min kien li
stieden lil Ġesù huwa ma jsemmi xejn. Anzi l-fatt li l-Evanġelista
jħoss il-bżonn jikteb li Lazzru kien wieħed minn dawk li
qagħdu fuq il-mejda ma’ Ġesù, juri li aktarx ma kienetx daru,
għaliex kieku, bħala dak li jistieden, dan kien ikun ovvju u
ma kienx ikun meħtieġ li jingħad.
Il-konnotazzjoni
tad-dilka tar-ras, li naqraw f’Marku-Mattew hija waħda
Messjanika. Ir-rakkont tal-mara midimba f’Luqa jagħti aktar
wieħed x’jifhem li dan kien att profond ta’ mħabba u indiema
u f’konformità mal-kumplament ta’ dan l-evanġelju jkompli
juri il-ħniena kbira ta’ Alla lejn il-midneb. Iżda l-messaġġ
ta’ Ġwanni joħroġ minn kliem Ġesù nnifsu “Din il-fwieħa
kienet refgħeta għal jum id-difna tiegħi; kliem li fih
nnifsu huwa tħabbira oħra tal-mewtu u s-siegħa li huwa tant
stenna b’ħerqa.
Imbagħad hemm dettal ieħor ta’ ċerta mportanza. Fl-Evanġelji
ta’ Marku-Mattew l-istmerrija lejn dak li għamlet il-mara
tiġi minn għand xi uħud minn dawk li kienu hemm. F’Luqa din
tiġi minn għad Xmun nnifsu. Iżda fi Ġwanni din tiġi minn
għand wieħed mid-dixxipli stess, Ġuda, li kien se jittradih.
Dawn il-ftit noti, li jqabblu r-rakkonti minn Evanġelisti
differenti bejniethom, huma biss riflessjoni storika u forsi
kultant teoloġika tal-ġrajja u bħala tali ma jagħmlux parti
mill-meditazzjoni tagħna fil-Lectio Divina. Dan irid ikun
enfasizzat għaliex il-meditazzjoni fil-Lectio Divina trid
tkun waħda spiritwali, li fiha nirrifletti/u dwar il-messaġġ
personali li s-silta għandha għalija, jew għalina bħala
grupp. Madankollu, kull riflessjoni storika jew teoloġika
li nagħmel qabel jibda l-proċess tal-Lectio Divina, jista’
jgħinni biex nifhem aħjar l-messaġġ li l-Mulej irid iwassal
lili/lilna permezz tal-qari.
|
M
Meditazzjoni
|
Nota dwar
il-Meditazzjoni:-
Fil-Meditazzjoni tal-laqgħat preċedenti konna tfajna enfasi
tagħna fuq kliem, frażijiet u sentenzi mis-silta li minnhom
stajna ħadna messaġġ personali li japplika għalina
fiċ-ċirkustanzi preżenti tal-ħajja tagħna. Fis-silta tallum
dan il-metodu se jibqa’ validu u nistgħu nkomplu
napplikawh. Madankollu, biex nuru mod ieħor ta’ kif nistgħu
nagħmlu l-meditazzjoni fuq is-silta moqrija, illum iċ-ċentru
tal-attenzjoni se jkunu l-personaġġi nfushom. Dak li
jagħmlu u dak li jgħidu se jdur magħhom, imma l-iskop aħħari
huwa li jiena nara l-messaġġ li l-personaġġ għandu għalija.
F’uħud mill-każi, huwa jiena stess li nieħu post dan
il-personaġġ.
-----------
Lazzru
Hawn għandna silta oħra li fejn Lazzru huwa preżenti, imma
l-preżenza tiegħu tidher waħda passiva. Qiegħed hemm iżda ma
jgħid xejn u ma jagħmel xejn. Iżda dawk li huma kontra Ġesù
jaħsbuha mod ieħor, tant li
l-qassisin il-kbar ftiehmu li joqtlu mhux biss lil Ġesù,
imma lil Lazzru wkoll, għax minħabba fih ħafna mil-Lhud bdew
jitilquhom u jemmnu f'Ġesù. Altru milli preżenza passiva.
-
U jiena?
Il-preżenza tiegħi tħalli l-istess effett fl-oħrajn?
Il-preżenza tiegħi hija, fiha nfisha, xhieda tal-qawwa
ta’ Kristu f’ħajti?
-
Anke jekk qabel
kont mejjet, imma l-fatt li llum jiena ħaj jista’ juri
l-qawwa li Ġesù għandu fuq il-mewt, mhux biss dik
tal-ġisem, imma anke dik tar-ruħ. Il-qawwa li l-Ħajja
għandha fuq il-mewt. Il-qawwa li d-Dawl għandu fuq
id-dlam.
-
Kristu darba
qal, “Jekk
ippersegwitaw lili, għad jippersegwitaw lilkom ukoll.” (Ġw
15:20). Ma’ Lazzru hekk imxew. U miegħi? Il-fatt li
għadni ma kontx ippersegwitat għal Kristu jista’ jfisser
li għadni mhux qed inkun xhud tajjeb tiegħu.
Marta
Għal kuntrarju ta’
Lazzru, Marta hija l-hin kollu għaddejja b’ħajja ta’
attività kontinwa. Hija mara tajba. Tħobb ħafna lil Ġesù.
Imma mill-Evanġelju ieħor nafu kemm hi kienet tinkwieta wisq
u taħseb dwar bosta ħwejjeġ. Imbagħad ħalliet warajha
l-ħaġa importanti; l-aħjar sehem. (Luqa 10:41-42)
-
U jiena, hemm
xejn minn Marta fija? Inqis lili nnifsi ħabib ta’
Ġesù. Iżda liema huma l-ħwejjeġ li l-aktar ninkwieta u
naħseb dwarhom?
-
F’din is-silta,
Marta tidher qed isservi. Forsi li nkun qaddej ta’
l-oħrajn mhux waħda mill-kummissjonijiet (ordnijiet) li
Ġesù ħalla f’idejn id-dixxipli tiegħu? Imma jista’ jkun
li l-qadi tiegħi lill-oħrajn sar skop fih nnifsu?
Jista’ jkun li l-istess xogħol li ngħid li qed nagħmel
għal Ġesù, mhux qed iħallili ħin biżżejjed għalih. Biex
ikun miegħu?
-
Nifhem
id-differenza kbira li hemm bejn BEING u
DOING? Bejn li NKUN u li
NAGĦMEL? Bejn MARIJA u MARTA?
It-tnejn huma importanti, imma dak li nagħmel irid
joħroġ minn dak li jien. Ma jistgħux
jinfirdu. Forsi huwa għalhekk li Marta u Marija huma
żewġt aħwa u li jridu kontinwament jimxu id f’id?
Marija
Jekk Marta hija
l-persuna ta’ l-azzjoni (missjoni), Marija hija l-persuna
tal-kontemplazzjoni. Fija dawn mhumiex żewġ persuni diversi,
imma żewġ sejħiet kbar li jiena għandi u li t-tnejn ġejjin
minn Alla nnifsu. Anke fija, l-azzjoni u l-kontemplazzjoni
huma żewġt aħwa li jridu jimxu id f’id. L-istess jgħodd
għalina bħala Knisja u bħala komunitajiet fi ħdanha.
-
Kemm lest li
jiena wkoll insib ħin li fiħ nieqaf mill-azzjoni, anke
jekk din hija waħda qaddisa, biex bħal Marija ngħaddih
f’kontemplazzjoni divina?
-
B’dak li għamlet
Marija, id-dar kollha
imtliet bir-riħa
tfuħ. Nemmen li b’dak li jidher bħal ħin privat bejni u
bejn Alla tiegħi, ma nqawdihx jiena biss, imma wkoll
dawk kollha li huma madwari ?
-
Mir-rakkont
f’dan l-evanġelju ma nafux x’kien dak li giegħel lil
Marija tagħmel dak li għamlet? Forsi gratitudni għax
qajjem lil ħuha mill-mewt? Forsi ndiema ta’ ħajja
passata kif naqraw f’rakkonti simili f’evanġelji oħra?
Bla dubju ta’ xejn kienet l-imħabba kbira li hija kellha
lejn l-Imgħallem tagħħa. U jiena, ma ngħidx li nħobbu
wkoll? Kif esprimejtha l-imħabba tiegħi lejh?
Ġuda
-
Ġuda kien
dixxiplu, magħżul huwa wkoll mill-Imgħallem. Imma
għalih, l-azzjoni ta’ Marija, kienet ħela. U jiena
x’jiena lest li “naħli” biex nuri l-imħabba tiegħi lejn
l-Ġesù?
-
Il-mottiv wara
l-kliem u l-attitudni ta’ Ġuda lejn dak li għamlet
Marija, jgħidulna l-Evanġelista nnifsu. “Għax kien
ħalliel.” Naf li meta ma nagħtix lil Alla, dak li huwa
tiegħu, jiena wkoll inkun ħalliel? X’jistgħu jkunu dawk
il-ħwejjeġ li jiena qiegħed nisraqlu lil Alla? Li huma
tiegħu u mhux qed naghtihom lilu?
-
"Dan qalu mhux
għax kien jimpurtah mill-foqra." Jista’ jkun li bl-iskuża
li għandi x’nagħmel, għal ġid ta’ l-oħrajn, nonqos milli
nwettaq atti ta’ mħabba diretti personalment lejn Alla?
Per eżempju ma nitlobx, jew ma nitlobx biżżejjed għax
għandi x’nagħmel! L-iskuża tkun dejjem l-oħrajn, imma
aktarx li r-raġuni tassew tkun is-sodisfazzjon personali
tiegħi.
-
Jista’ jkun li
bħal Ġuda, jiena wkoll inkun spiss pront niġġudika l-azzjonijiet
tal-oħrajn, imma mhux daqstant lest nifli sewwa l-azzjonijiet
u l-mottivi tiegħi?
-
Il-kritika ta’
Ġuda lejn Marija, kienet ukoll diretta lejn Kristu li
ppermetta dik l-azzjoni. Nifhem illi kull kritika lil
nagħmel lil ħuti hija wkoll diretta lejn Kristu, għax
huma wkoll jiffurmaw il-ġisem tiegħu?
Ġesù
-
Ġesù aċċetta u
ddefenda l-azzjoni ta’ Marija. Kieku minflok Marija
kien hemm jien, forsi mhux l-istess kien jagħmel miegħi
ukoll?
-
L-azzjoni
sempliċi imma kollha mħabba ta’ Marija, ġiet mogħtija
tifsira ferm akbar minn Ġesù nnifsu. “Din
il-fwieħa kienet refgħetha għal jum id-difna tiegħi."
Żgur li lanqas hija stess ma kienet fehmet it-tifsira
kbira ta’ dak li għamlet. L-istess jiġri f’dak kollu li
jiena nagħmel miegħu. Anke l-aktar azzjonijiet privati
u moħbija. Basta jkunu huma wkoll imqanqlin mill-imħabba.
-
Kull att ta’
mħabba lejn il-proxxmu li jwettaq in-nisrani, jrid
joħroġ mill-imħabba li huwa għandu lejn Kristu, inkella
jkunu biss azzjoni soċjali. "Il-foqra dejjem issibuhom
magħkom, imma lili mhux dejjem issibuni." Inkella xi
nkunu nagħmlu żejjed? Mhux il-pagani wkoll jagħmluh dan?
(Mt 5 :47)
-
Ninota kif kull
mument u kull ġrajja li għadda minnha Ġesú kien iqisha
bħala pass ieħor fit-twettiq tal-missjoni, li l-Missier
fdalu f’idejh u li sab il-milja tiegħu fil-Misteru tal-Għid?
U jiena, fil-ġrajjiet li ngħaddi minnhom, kemm nilmaħ
ir-rieda ta’ Alla u t-twettieq tal-pjan tiegħu għalija ?
|
|
T
Talb
|
-
Mulej, irrid
li jiena wkoll, bil-ħajja tiegħi, inkun xhud ħaj ta’ dak
li Inti tagħmel miegħi.
-
Spirtu Qaddis,
kompli imlieni bil-preżenza tiegħek biex dak li nagħmel
ikun ġej biss minnek.
-
Alla tiegħi,
aħfirli ta’ kull darba li minħabba l-ħidma tiegħi,
insejt lilek.
-
Missier
Qaddis, inroddlok ħajr li ridt li Ibnek ikun bniedem
bħalna, biex fil-wiċċ uman tiegħu nikkontemplaw il-wiċċ
divin tiegħek.
-
Mulej Ġesù,
fakkarni kontinwament, li miegħek u għalik xejn ma jkun
moħli.
-
Aħfirli,
Mulej, ta’ kull darba li bl-iskuża ta’ l-oħrajn, ħadtha
kontrik.
-
Spirtu Qaddis,
kun inti d-Difensur tiegħi.
-
Sinjur Alla,
agħtini l-grazzja li nikkontempla kontinwament il-wiċċ
divin tiegħek.
|
K
Kontemplazzjoni
|
Jekk il-Lectio Divina qed issir fi grupp,
il-Kontemplazzjoni tista' ssir privatament wara.
Marija, oħt Marta u Lazzru, hija xempju ta’
kontemplazzjoni nisranija.
Ħa
nfittex jiena wkoll ħin biex imqanqal mill-imħabba,
ninxteħet sieket f’riġlejh, għax naf li miegħi
ukoll għamel dak kollu li għamel magħħa.
|
|
TALBA
FI TMIEM IL-LECTIO DIVINA
Inroddlok ħajr, Mulej Ġesù tal-Kelma tiegħek
li mhux biss tajtha lid-dixxipli elfejn sena
ilu, imma li llum ukoll tajtha anke lili.
Agħtini l-Ispirtu Qaddis tiegħek sabiex
bil-qawwa tiegħu ngħix kuljum fid-dawl
tagħha u sabiex bi mħabba nwassalha
lill-oħrajn. Dan nitlobulek
bl-interċessjoni ta’ Ommok u Ommi Marija, li
kienet l-ewwel waħda li laqgħatha f’qalbha u
f'ħajjitha. Għall-glorja tal-Missier li
miegħek jgħix u jsaltan flimkien ma’ l-Ispirtu
s-Santu. Ammen. |
|
|
|