FRANĠISKU
KOSTITUZZJONI APPOSTOLIKA
VULTUM DEI QUÆRERE
FUQ IL-ĦAJJA KONTEMPLATTIVA FEMMINILI
1.
It-tiftixa ta’ wiċċ Alla tofroq
l-istorja tal-bniedem, sa minn dejjem
imsejjaħ għal djalogu ta’ mħabba
mal-Ħallieq. Fil-fatt,
ir-raġel u l-mara għandhom dimensjoni
reliġjuża li ma tistax tiġi fgata u li
torjenta l-qalb tagħhom għat-tiftixa
tal-Assolut, ta’ Alla, li tiegħu jħossu
l-bżonn, imqar jekk mhux dejjem b’mod
konxju. Din it-tiftixa hi komuni
għall-bnedmin kollha ta’ rieda tajba.
Imqar ħafna li jgħidu li ma jemmnux,
jistqarru din ix-xenqa qawwija tal-qalb,
li tgħammar u tgħajjex lil kull raġel u
mara mixtieqa għall-hena u l-milja
tal-ħajja, b’passjoni ta’ mħabba li qatt
mhi mxebbgħa biżżejjed bil-ferħ.
Santu Wistin fl-iStqarrijiet dan
esprimieh b’qawwa kbira: “Int għamiltna
għalik u qalbna ma ssibx mistrieħ jekk
mhux biss fik”. Dan
in-nuqqas ta’ mistrieħ fil-qalb ġej minn
dik l-intuwizzjoni qawwija li hu Alla
l-ewwel li jfittex ’il-bniedem, u b’mod
misterjuż jiġbdu lejh.
Id-dinamika tat-tiftixa turina li ħadd
ma hu biżżejjed għalih innifsu u tridna
nimxu, fid-dawl tal-fidi, biex naslu li
noħorġu mill-jien li jdur magħna nfusna,
miġbudin mill-Wiċċ ta’ Alla kollu
qdusija u flimkien mill-“art imqaddsa
tal-persuna l-oħra”, biex
induqu komunjoni iktar profonda.
Dan
il-pellegrinaġġ li fih infittxu lil Alla
veru, li kull Nisrani u kull ikkonsagrat
jagħmel bil-qawwa li tagħtih
il-Magħmudija, bil-qawwa tal-Ispirtu
s-Santu jsir
sequela
pressius Christi,
mixja li fiha wieħed jitwaħħad
għalkollox ma’ Kristu l-Mulej, li
l-konsagrazzjoni reliġjuża tesprimiha
b’qawwa unika, u dan b’mod speċifiku
fil-ħajja monastika, sa mill-bidu
meqjusa mod partikulari ta’ kif
titwettaq il-Magħmudija.
2.
Il-persuni kkonsagrati, li bl-istess
konsagrazzjoni “jimxu wara l-Mulej b’mod
speċjali, b’mod profetiku”, huma
msejħa jiskopru s-sinjali tal-preżenza
ta’ Alla fil-ħajja ta’ kuljum, biex
isiru interlokuturi mimlija bil-għerf li
jafu jaqraw il-mistoqsijiet li qed
jagħmlulna Alla u l-bnedmin. L-isfida
l-kbira għal kull ikkonsagrat u
kkonsagrata hi l-ħila li jissokta
jfittex lil Alla u “jkompli ‘jarah’
fid-dinja li tiċħad il-preżenza tiegħu”,
u hekk jerġa’ jipproponi lill-bniedem
tal-lum il-ħajja ta’ kastità, faqar u
ubbidjenza li għex Ġesù, bħala sinjal li
jitwemmen u ta’ min jafdah, u hekk isir
“eseġesi ħajja tal-Kelma ta’ Alla”.
Sa
miż-żerniq tal-ħajja ta’ konsagrazzjoni
speċjali fil-Knisja, irġiel u nisa,
imsejħa minn Alla u nnamrati miegħu,
għexu ħajjithom mogħtija għalkollox
għat-tiftixa ta’ Wiċċu, mixtieqa li
jsibu u jikkontemplaw lil Alla fil-qalba
tad-dinja. Il-preżenza ta’ komunitajiet
qishom bliet fuq il-muntanji u msiebaħ
fuq l-imnajjar (ara Mt 5:14-15), imqar
fis-sempliċità tal-ħajja, hi sinjal ċar
tad-destinazzjoni li lejha miexja
l-komunità ekkleżjali kollha, li “timxi
’l quddiem tul iż-żminijiet, moħħha biss
fit-tiġdid ta’ kollox fi Kristu
fil-ġejjieni”, biex
hekk tħabbar minn qabel il-glorja
tas-Sema.
3.
Jekk għall-ikkonsagrati kollha għandhom
tifsira partikulari l-kelmiet ta’ San
Pietru: “Mulej, kemm hu sew li aħna
hawn!” (Mt 17:4), il-persuni
kontemplattivi, li b’komunjoni qawwija
mal-vokazzjonijiet l-oħra kollha
tal-ħajja Nisranija “qishom raġġi
tad-dawl waħdieni ta’ Kristu ‘li jiddi
f’wiċċ il-Knisja’”, “b’kariżma
speċifika tagħhom jiddedikaw ħafna ħin
mill-jiem tagħhom biex isiru jixbhu lil
Omm Alla, li kienet taħseb il-ħin kollu
bejnha u bejn ruħha fuq il-kliem u
l-għemejjel ta’ Binha (ara Lq 2:19,51),
u lil Marija ta’ Betanja, li, bilqiegħda
f’riġlejn il-Mulej, kienet tisma’
l-kelma tiegħu (ara Lq 10:38)”. Il-ħajja
tagħhom “moħbija flimkien ma’ Kristu
f’Alla” (ara Kol 3:3) hekk issir figura
tal-imħabba bla ebda kundizzjonijiet li
għandu l-Mulej, l-ewwel kontemplattiv,
tindika t-tensjoni Kristoċentrika ta’
ħajjithom kollha sa ma jistgħu jlissnu
mal-Appostlu: “Għalija l-ħajja hi
Kristu” (Fil 1:21), u tesprimi
l-karattru totalizzanti li jsawwar
id-dinamiżmu qawwi tal-vokazzjoni
għall-ħajja kontemplattiva.
Bħala rġiel u nisa li qed jgħixu
fl-istorja tal-bnedmin,
il-kontemplattivi, miġbuda mill-ġmiel
ta’ Kristu, “l-isbaħ fost ulied
il-bnedmin” (Salm 45:3), jinsabu
fl-istess qalb tal-Knisja u tad-dinja u
fit-tiftixa ta’ Alla li qatt mhi sħiħa
jsibu s-sinjal u kriterju ewlieni
tal-awtentiċità tal-ħajja kkonsagrata
tagħhom. San Benedittu, Missier
il-monastiċiżmu tal-Punent, jisħaq li
l-monaku hu dak li ħajtu kollha jfittex
lil Alla, u f’dak li jaspira għall-ħajja
monastika jitlob li jivverifika “si
revera Deum quærit»,
jekk hux tassew qed ifittex lil Alla.
B’mod partikulari, għadd bla qies ta’
nisa kkonsagrati, matul is-sekli sa
żmienna, orjentaw u jkomplu jorjentaw
“ħajjithom u ħidmiethom kollha
bil-kontemplazzjoni ta’ Alla”,
bħala sinjal u profezija tal-Knisja
verġni, għarusa u omm; sinjal ħaj u
tifkira tal-fedeltà li biha Alla,
fil-ġrajjiet
tal-istorja, jissokta
jwieżen lill-poplu tiegħu.
4.
Il-ħajja monastika, element ta’ għaqda
mal-konfessjonijiet Insara l-oħra,
tingħaraf mill-istil propju tagħha li hu
profezija u sinjal u li “jista’ u għandu
jiġbed b’mod effikaċi lill-membri kollha
tal-Knisja biex jaqdu b’ħeġġa
d-dmirijiet tas-sejħa Nisranija”.
Il-komunitajiet ta’ dawk li jitolbu, u
speċjalment dawk kontemplattivi, “li
fix-xejra tal-qtugħ tagħhom mid-dinja
jsibu mod kif jingħaqdu iktar intimament
ma’ Kristu, qalb tad-dinja”, ma
jipproponux twettiq iżjed perfett
tal-Vanġelu imma, bit-twettiq ta’ dak li
titlob minnhom il-Magħmudija, huma lok
ta’ dixxerniment u sejħa għall-qadi
tal-Knisja kollha: sinjal li juri mixja,
tiftixa, u jfakkar lill-poplu kollu ta’
Alla fl-għan ewlieni u aħħari ta’ dak li
hu jgħix.
Stima, ġieħ u radd il-ħajr għall-ħajja
kkonsagrata u l-ħajja kontemplattiva
monastika
5.
Sa
mis-sekli bikrin tagħha l-Knisja wriet
stima għolja u mħabba sinċiera lejn dawk
l-irġiel u nisa li, kollhom ħlewwa
għas-sejħa tal-Missier u għat-tqanqil
tal-Ispirtu, għażlu li jimxu wara Kristu
“iktar mill-qrib”,
biex jiddedikaw ħajjithom għalih b’qalb
mhix mifruda fiha nfisha (ara 1 Kor
7:34). Imqanqla mill-imħabba bla
kundizzjonijiet lejn Kristu u lejn
il-bnedmin, fuq kollox lejn il-foqra u
dawk li qed ibatu, huma msejħa
jirriproduċu fid-diversi xejriet tagħhom
– verġni kkonsagrati, romol, eremiti,
monaċi u reliġjużi – il-ħajja ta’ Ġesù
fuq din l-art: kast, fqir u ubbidjenti.
Il-ħajja kontemplattiva monastika, li
fil-parti l-kbira tagħha xxaqleb lejn
il-femminil, għandha għeruqha fis-skiet
tal-kunvent fejn tagħmel frott prezzjuż
ta’ grazzja u ta’ ħniena. Il-ħajja
kontemplattiva femminili dejjem kienet
fil-Knisja u għall-Knisja dik il-qalb li
titlob, ħarriesa ta’ gratwità u ta’
fekondità appostolika għanja, u kienet
xhud li jidher ta’ qdusija misterjuża u
ta’ bosta għamliet.
Mill-esperjenza bikrija individwali
tal-verġni kkonsagrati lil Kristu, li
ħarġet bħala frott spontanju tal-ħtieġa
għal tweġiba ta’ mħabba għall-imħabba
ta’ Kristu l-għarus, dlonk għaddejna
għal stat definit u għal ordni magħruf
mill-Knisja, li beda jilqa’
l-professjoni ta’ verġinità mistqarra
pubblikament. Mal-medda tas-sekli
l-parti l-kbira tal-verġni kkonsagrati
ngħaqdu flimkien, u taw il-ħajja lil
għamla ta’ ħajja ċenobitika, li l-Knisja
fl-għożża tagħha rat li tieħu ħsiebha
b’dixxiplina xierqa, waħda li rat
il-ħajja tal-klawsura bħala ħarriesa
tal-ispirtu u tal-għan essenzjalment
kontemplattiv li dawn iċ-ċenobi kienu
qed jipproponu għalihom infushom.
Għalhekk maż-żmien, bis-sinerġija bejn
l-azzjoni tal-Ispirtu li jaħdem fil-qalb
ta’ dawk li jemmnu u dejjem iqanqal
xejriet ġodda ta’ mixja, u l-għożża
materna u attenta tal-Knisja, issawru
bixriet ġodda ta’ ħajja kontemplattiva u
għalkollox kontemplattiva, kif
nafuhom illum. Waqt li fil-Punent
l-ispirtu kontemplattiv infirex f’għadd
ta’ kariżmi, fil-Lvant żamm magħqud
ħafna, biex
baqa’ jagħti dejjem xhieda tal-għana u
tal-ġmiel ta’ ħajja kollha kemm hi
mogħtija lil Alla.
Matul is-sekli l-esperjenza ta’ dawn
is-sorijiet, iċċentrata fuq il-Mulej
bħala l-ewwel u l-unika mħabba (ara Hos
2:21-25), tat frott kotran ta’ qdusija u
ta’ missjoni. X’qawwa appostolika toħroġ
mill-monasteri permezz tat-talb u
tal-offerta personali! Kemm ferħ u
profezija jgħajjat quddiem id-dinja
s-skiet tal-kunventi!
Għall-frott ta’ qdusija u ta’ grazzja li
l-Mulej sa minn dejjem qanqal permezz
tal-ħajja monastika femminili, ejjew
quddiem it-“twajjeb Mulej, l-ogħla, li
jista’ kollox” ngħollu l-għanja ta’ radd
il-ħajr: “Laudato
si’”.
6.
Għeżież sorijiet kontemplattivi,
x’kienet tkun mingħajrkom il-Knisja u
dawk kollha li qed jgħixu fil-periferiji
tal-ħajja tal-bnedmin u jaħdmu fit-truf
imbiegħda tal-evanġelizzazzjoni?
Il-Knisja tapprezza ħafna l-ħajja
tagħkom kollha kemm hi mogħtija.
Il-Knisja sserraħ fuq it-talb tagħkom u
fuq l-offerta tagħkom biex twasslu
lill-bnedmin ta’ żmienna l-aħbar
it-tajba tal-Vanġelu. Il-Knisja għandha
bżonnkom!
Mhuwiex faċli li din id-dinja, tal-inqas
dik il-parti kbira tagħha li tobdi
lil-loġika tal-poter, tal-ekonomija u
tal-konsumiżmu, tifhem il-vokazzjoni
speċjali tagħkom u l-missjoni moħbija
tagħkom, u safrattant tant għandha
bżonnha. Kif il-baħħar qalb il-baħar
fond għandu bżonn tal-fanal li jurih
ir-rotta biex jasal fil-port, hekk
id-dinja għandha bżonnkom. Intom fanali,
għal dawk fil-qrib u fuq kollox għal
dawk fil-bogħod. Kunu msiebaħ jiddu li
jsieħbu l-mixja tal-bnedmin taż-żmien
mudlam tagħna. Kunu għassiesa tas-sebħ
(ara Is 21:11-12) li jħabbru tlugħ
ix-xemx (ara Lq 1:78). Bil-ħajja tagħkom
mibdula u bi kliem sempliċi, xtarru
fis-skiet, uruna lil Dak li hu t-triq,
il-verità u l-ħajja (ara Ġw 14:6),
il-Mulej waħdieni li joffri l-milja
lill-eżistenza tagħna u jagħtina l-ħajja
bil-kotra (ara Ġw 10:10). Bħal Xmun u
Indrì uruna t-triq: “Sibna ’l-Mulej”
(ara Ġw 1:40); xandru, bħal Marija ta’
Magdala, l-għodwa tal-qawmien: “Rajt
lill-Mulej!” (Ġw 20:18). Żommu ħajja
l-profezija ta’ ħajjitkom mogħtija.
Tibżgħux tgħixu l-ferħ tal-ħajja
evanġelika skond il-kariżma tagħkom.
It-tisħib u l-gwida tal-Knisja
7.
Il-Maġisteru Konċiljari dejjem wera
għożża partikulari għall-għamliet kollha
ta’ ħajja kkonsagrata permezz ta’
dikjarazzjonijiet importanti. Fost dawn,
jixirqilhom attenzjoni partikulari
d-dokumenti kbar tal-Konċilju Vatikan
II: il-Kostituzzjoni dommatika fuq
il-Knisja Lumen gentium u
d-Digriet fuq it-tiġdid tal-ħajja
reliġjuża
Perfectæ
caritatis.
L-ewwel wieħed iqiegħed il-ħajja
kkonsagrata fi ħdan l-ekkleżjoloġija
tal-poplu ta’ Alla, li minnha tagħmel
sehem sħiħ, minħabba fis-sejħa komuni
għall-qdusija u l-għeruq tagħha
fil-konsagrazzjoni tal-Magħmudija.
It-tieni jitlob mill-ikkonsagrati tiġdid
xieraq fid-dawl tal-kundizzjonijiet
dejjem jinbidlu taż-żminijiet, u joffri
l-kriterji essenzjali għal dan
it-tiġdid: fedeltà lejn Kristu, lejn
il-Vanġelu, lejn il-kariżma, lejn
il-Knisja u lejn il-bniedem tal-lum.
Ma
nistgħux ninsew l-Eżortazzjoni
appostolika postsinodali Vita
consecrata, tal-predeċessur tiegħi
San Ġwanni Pawlu II. Dan id-dokument, li
jiġbor l-għana tas-Sinodu tal-Isqfijiet
fuq il-ħajja kkonsagrata, fih elementi
dejjem iżjed validi biex jissokta
t-tiġdid tal-ħajja kkonsagrata u jġedded
it-tifsira evanġelika tagħha fi żmienna
(ara fuq kollox nn.
59
u
68).
Imma, biex nuru kif il-ħajja
kontemplattiva tagħkom dejjem kienet
imsieħba u mdawla, lanqas nistgħu ninsew
dawn id-dokumenti:
-
In-Normi direttivi maħruġa
mill-Kongregazzjoni għall-Istituti ta’
Ħajja Kkonsagrata u s-Soċjetajiet ta’
Ħajja Appostolika
(CIVCSVA)
Potissimum institutioni,
tat-2 ta’ Frar
1990,
b’siltiet sħaħ iddedikati kollha
lill-għamla speċifikament kontemplattiva
ta’ ħajja kkonsagrata mħaddna minnkom
(kap.
IV, 78-85).
-
Id-dokument interdikasterjali
Żviluppi, tas-6 ta’ Jannar 1992, li
jiffoka fuq il-problema tal-iskarsità
tal-vokazzjonijiet għall-ħajja
kkonsagrata b’mod ġenerali u, f’qies
iżgħar, għal dik tagħkom (n. 81).
- Il-Katekiżmu
tal-Knisja Kattolika,
imxandar bil-Kostituzzjoni appostolika
Fidei depositum fil-11 ta’
Ottubru 1992, importantissmu biex
il-fidili kollha jagħrfu u jifhmu
l-għamla ta’ ħajja tagħkom: b’mod
partikulari nn.
915-933
iddedikati għall-għamliet kollha; n.
1672 fuq il-konsagrazzjoni tagħkom mhux
sagramentali u fuq il-barkiet
tal-Abbatijiet u l-Badessi; n. 1974
flimkien mal-2102 fuq ir-rabta bejn
l-għaxar kmandamenti u l-professjoni
tal-kunsilli evanġeliċi; n. 2518 li
jippreżenta r-rabta stretta bejn is-safa
tal-qalb imxandar mis-sitt Beatitudni,
li jiggarantixxi li wieħed jara lil
Alla, u l-imħabba għall-veritajiet
tal-fidi; nn. 1691 u 2687 li jgħollu
l-intereċessjoni perseveranti lil Alla
li titla’ ’l fuq mill-monasteri
kontemplattivi, imkejjen insostitwibbli
li jbewsu flimkien it-talb personali u
dak maqsum bejn l-aħwa; u n. 2715 li
jqiegħed bħala prerogattiva
tal-kontemplattivi l-ħarsa msammra fuq
Ġesù u l-misteri ta’ ħajtu u
tal-ministeru tiegħu.
-
L-Istruzzjoni tal-CIVCSVA Congregavit
nos,
tat-2 ta’ Frar 1994, li f’nn. 10 u 34
torbot is-skiet u s-solitudni mal-ħtieġa
qawwija li għandha l-komunità
għall-ħajja tal-aħwa u tisħaq fuq
il-koerenza bejn qtugħ mid-dinja u
atmosfera ta’ ġabra fil-ħajja ta’
kuljum.
-
L-Istruzzjoni tal-CIVCSVA Verbi
sponsa,
Ecclesia,
tat-13 ta’ Mejju 1999 li, fl-artikli
1-8, toffri sintesi storiko-sistematika
mill-isbaħ tal-Maġisteru suprem
preċedenti fuq is-sens missjunarju
eskatoloġiku tal-ħajja klawstrali
tal-monaċi kontemplattivi nisa.
-
Fl-aħħar, l-Istruzzjoni tal-CIVCSVA Ripartire
da Cristo
(Nerġgħu nitilqu minn Kristu),
tad-19 ta’ Mejju 2002, li tistedinna
b’qawwa kbira biex nikkontemplaw dejjem
il-wiċċ ta’ Kristu; tippreżenta
lill-monaċi fil-quċċata tal-ġieħ korali
u tat-talb sieket tal-Knisja (n. 25) u,
fl-istess waqt, tfaħħarhom għax dejjem
ipprivileġġjaw u qiegħdu fiċ-ċentru
l-Liturġija tas-Sigħat u ċ-ċelebrazzjoni
Ewkaristika
(ibid.).
8.
Ħamsin sena fuq il-Konċilju Vatikan II,
wara l-konsultazzjonijiet meħtieġa u
d-dixxerniment attent, ħassejt il-ħtieġa
li noffri lill-Knisja, b’riferiment
partikulari għall-monasteri ta’ rit
Latin, din il-Kostituzzjoni Appostolika,
li tqis kemm il-mixja intensa u
għammiela tal-Knisja nfisha fl-aħħar
għaxriet ta’ snin, fid-dawl tat-tagħlim
tal-Konċilju Ekumeniku Vatikan II, u
kemm il-kundizzjonijiet soċjo-kulturali
li nbidlu. Dan iż-żmien ra progress
mgħaġġel fl-istorja tal-bniedem: magħha
jeħtieġ ninsġu djalogu li imma jħares
il-valuri fundamentali li fuqhom hi
msejsa l-ħajja kontemplattiva, li,
fl-insistenza tagħha fuq is-skiet,
is-smigħ, is-sejħa biex wieħed jidħol
fih innifsu, l-istabbiltà, tista’ u
għandha tkun sfida għall-mentalità
tal-lum.
B’dan id-Dokument nixtieq intenni
l-apprezzament personali tiegħi,
flimkien mar-rikonoxximent grat
tal-Knisja kollha, għall-għamla unika
ta’
sequela
Christi li
jħaddnu l-monaċi nisa ta’ ħajja
kontemplattiva, li għal ħafna minnhom hi
ħajja kollha kemm hi kontemplattiva, don
bla qies u essenzjali li l-Ispirtu
s-Santu jissokta jqanqal fi ħdan
il-Knisja.
Fil-każi fejn tqis meħtieġ jew opportun,
il-Kongregazzjoni għall-Istituti ta’
Ħajja Kkonsagrata u s-Soċjetajiet ta’
Ħajja Appostolika teżamina
l-kwistjonijiet u tistabbilixxi qbil
mal-Kongregazzjoni
għall-Evanġelizzazzjoni tal-Popli u
l-Kongregazzjoni għall-Knejjes
Orjentali.
Elementi
essenzjali tal-ħajja kontemplattiva
9.
Il-ħajja kontemplattiva, mill-ewwel
sekli sa żmienna, baqgħet dejjem ħajja
fil-Knisja, kemm tul perjodi ta’ ħeġġa
kbira u kemm f’oħrajn ta’ dekadenza,
grazzi għall-preżenza kostanti
tal-Mulej, imxierka mal-ħila tal-Knisja
nfisha li tiġġedded u tadatta ruħha
għall-bidliet tas-soċjetà: hi dejjem
żammet ħajja t-tiftixa tal-wiċċ ta’ Alla
u l-imħabba bla kundizzjonijiet lejn
Kristu, li huma l-element speċifiku u
karatteristiku tagħha.
Il-ħajja kkonsagrata hi storja ta’
mħabba kollha passjoni għall-Mulej u
għall-bniedem: fil-ħajja kontemplattiva
din l-istorja tiżvolġi, jum wara
l-ieħor, fit-tiftixa appassjonata
għall-wiċċ ta’ Alla, fir-relazzjoni
intima miegħu. Lil Kristu l-Mulej, li
“ħabbna hu l-ewwel” (1 Ġw 4:19) u “ta
lilu nnifsu għalina” (Efes 5:2), intom
nisa kontemplattivi tweġbuh bl-offerta
ta’ ħajjitkom kollha, billi tgħixu fih u
għalih, “għat-tifħir tal-glorja tiegħu”
(Efes 1:12). F’din id-dinamika ta’
kontemplazzjoni intom leħen tal-Knisja
li bla heda jfaħħar, irodd ħajr, jokrob
u jittallab għall-umanità kollha, u
bit-talb tagħkom intom kollaboraturi ta’
Alla nnifsu u terġgħu terfgħu
lill-membri tal-ġisem ineffabbli tiegħu
li jkunu waqgħu.
Ibda mit-talb personali u komunitarju,
intom tiskopru lill-Mulej bħala teżor
ta’ ħajjitkom (ara Lq 12:34), il-ġid
tagħkom, “il-ġid kollu, l-ogħla ġid”,
l-“għana kollu” tagħkom u,
qawwija fil-fidi li “Alla waħdu
biżżejjed”, tagħżlu
l-aħjar sehem (ara Lq 10:42). Tajtu
ħajjitkom, waqqaftu ħarsitkom fil-Mulej,
intasabtu fil-kamra ta’ ġewwa ta’
qalbkom (ara Mt 6:5), fis-solitudni
tal-ħajja tal-kunvent u fil-ħajja
mal-aħwa fil-komunità. Hekk intom xbieha
ta’ Kristu li jfittex li jiltaqa’
mal-Missier fuq il-muntanja (ara Mt
14:23).
10.
Il-Knisja tul is-sekli dejjem urietna
lil Marija bħala
summa
contemplatrix. Mit-tħabbira
għall-qawmien, fil-pellegrinaġġ tal-fidi
tagħha li laħaq il-qofol tiegħu
f’riġlejn is-salib, Marija tibqa’
tikkontempla l-Misteru li jgħammar fiha.
F’Marija nilmħu l-mixja mistika
tal-persuna kkonsagrata, imnissla
fl-għerf umli li jaf jiggosta l-misteru
tal-milja aħħarija.
Fuq
il-passi tal-Omm Verġni,
il-kontemplattiv hu l-persuna li
ħajjitha ddur ma’ Alla, hu dak li għalih
Alla hu l-unum
necessarium (ara Lq
10:42),
li
quddiemu kollox jieħu qies ieħor u dehra
ġdida, għax qed iħares lejh b’għajnejn
ġodda. Il-persuna kontemplattiva tifhem
l-importanza tal-ħwejjeġ, imma dawn ma
jisirqulhiex qalbha u ma jibblukkawx
il-ħsieb tagħha, anzi huma tarġa biex
tasal għand Alla: f’kollox “tara”
lill-Aktar Għoli! Min jogħdos
fil-misteru tal-kontemplazzjoni jara
b’għajnejn spiritwali: dan jagħtih li
jikkontempla d-dinja u l-persuni
bl-istess ħarsa ta’ Alla, hemm fejn
mill-banda l-oħra l-oħrajn “għandhom
l-għajnejn u ma jarawx” (Salm
115:5;
135:16;
ara Ġer
5:21),
għax iħarsu biss bl-għajnejn tal-ġisem.
11.
Għalhekk, li nikkontemplaw ifisser li,
fi Kristu Ġesù, li għandu wiċċu l-ħin
kollu mdawwar lejn il-Missier (ara Ġw
1:18), ikollna ħarsitna midbula
mill-azzjoni tal-Ispirtu, ħarsa li fiha
twarrad l-għoġba għal Alla u
l-għeġubijiet tiegħu; ifisser li jkollna
ħsieb ċar, fejn jidwu l-eku tal-Verb u
l-leħen tal-Ispirtu li hu żiffa ħelwa
(ara 1 Slat 19:12). Mhux ta’ b’xejn li
l-kontemplazzjoni tiġi mill-fidi, li hi
għall-kontemplazzjoni bieb u frott: huwa
biss bl-“hawn jien” mimli fiduċja (ara
Lq 2:38) li nistgħu nidħlu fil-Misteru.
F’din il-kalma siekta u miġbura
tal-ħsieb u tal-qalb jistgħu jinfdu
bosta tentazzjonijiet, u għalhekk
il-kontemplazzjoni tagħkom tista’ ssir
art ta’ taqbida spiritwali, li intom
twieżnu b’kuraġġ f’isem il-Knisja kollha
u għall-ġid tagħha, li tafkom bħala
għassiesa fidili, qawwija determinati
fit-taqbida. Fost l-eqqel
tentazzjonijiet għall-kontemplattiv,
niftakru f’dak li l-Missirijiet
tad-deżert isejħulu d-“demonju ta’
nofsinhar”: hi t-tentazzjoni li tinqeda
bl-apatija, bir-rutina,
bid-demotivazzjoni, bit-telqa li
tipparalizza. Kif ktibt fl-Eżortazzjoni
appostolika Evangelii gaudium,
dan naqra naqra jwassal għall-“psikoloġija
tal-qabar, li bil-mod il-mod tibdel
lill-Insara f’mummji
tajbin għal ġo mużew.
Qalbhom maqtugħa
mir-realtà ta’ madwarhom, mill-Knisja u
minnhom infushom, jgħixu t-tentazzjoni
kontinwa li jintrabtu ma’
niket ħelu, bla
tama, li jaħkmilhom
qalbhom donnu kien ‘l-aktar
droga prezzjuża
tax-xitan’”.
Temi oġġett ta’ dixxerniment u ta’
reviżjoni normattiva
12.
Biex ngħin lin-nisa kontemplattivi
jilħqu l-għan propju tal-vokazzjoni
speċifika tagħhom imfissra hawn fuq,
nistedinhom jirriflettu u jiddixxernu
fuq dawn it-tnax-il tema tal-ħajja
kkonsagrata b’mod ġenerali u, b’mod
partikulari, tat-tradizzjoni monastika:
il-formazzjoni, it-talb, il-Kelma ta’
Alla, l-Ewkaristija u
r-Rikonċiljazzjoni, il-ħajja tal-aħwa
fil-komunità, l-awtonomija,
il-federazzjonijiet, il-klawsura,
ix-xogħol, is-skiet, il-mezzi ta’
komunikazzjoni u l-axxeżi. Dawn it-temi
jitqiegħdu iktar fis-seħħ b’modi li
jixirqu lit-tradizzjonijiet kariżmatiċi
speċifiċi tad-diversi familji monastiċi,
f’armonija man-normi tal-Parti finali
ta’ din il-Kostituzzjoni u
bl-indikazzjonijiet għall-applikazzjoni
partikulari li sa jingħataw fi żmien
qasir mill-Kongregazzjoni għall-Istituti
ta’ Ħajja Kkonsagrata u s-Soċjetajiet
ta’ Ħajja Appostolika.
Il-formazzjoni
13.
Il-formazzjoni tal-persuna kkonsagrata
hi mixja li għandha twassal għat-twaħħid
tagħha mal-Mulej Ġesù biex hi tixrob
mis-sentimenti tiegħu fl-offerta sħiħa
tagħha lill-Missier; dan hu proċess li
ma jintemm qatt, għax hu maħsub biex
jilħaq il-persuna kollha kemm hi, sakemm
kull atteġġjament u ġest tagħha jikxfu
li hi b’ferħ liema bħalu tħossha kollha
kemm hi ta’ Kristu, u għalhekk dan
jitlob konverżjoni kontinwa lejn Alla.
Dan irid jagħġen il-qalb, il-moħħ u
l-ħajja b’mod li jiffaċilita
l-integrazzjoni tad-dimensjonijiet
umani, kulturali, spiritwali u
pastorali.
B’mod partikulari, il-formazzjoni
tal-persuna kkonsagrata kontemplattiva
tfittex dik il-qagħda ta’ armonija u
komunjoni ma’ Alla u mal-aħwa sorijiet,
f’atmosfera ta’ skiet imħarsa mill-ħajja
ta’ kuljum fil-klawsura.
14.
Alla l-Missier hu dak li per eċċellenza
jifforma l-qlub, imma f’din l-opra “ta’
sengħa” jinqeda bil-medjazzjoni umana,
dawk l-irġiel u nisa responsabbli
għall-formazzjoni, aħwa maġġuri, li
l-missjoni ewlenija tagħhom hi li juru
“l-ġmiel tal-mixi wara Kristu u l-kobor
tal-kariżma li fih jidher”.
Il-formazzjoni, speċjalment dik
permanenti, “kundizzjoni essenzjali
għall-konsagrazzjoni reliġjuża”, għandha
l-humus tagħha fil-komunità u
fil-ħajja ta’ kuljum. Għalhekk ħa
jiftakru s-sorijiet li l-post ordinarju
fejn isseħħ il-mixja ta’ formazzjoni hu
l-monasteru u li l-ħajja tal-aħwa
fil-komunità, fil-manifestazzjonijiet
kollha tagħha, għandha tiffavorixxi din
il-mixja.
15.
Fil-kuntest soċjo-kulturali u reliġjuż
ta’ żmienna, il-monasteri jridu joqogħdu
attenti ħafna għad-dixxerniment
vokazzjonali u spiritwali, bla ma
jittieħdu mit-tentazzjoni tan-numru jew
tal-effiċjenza; ħa
jiżguraw tisħib personalizzat
tal-kandidati u jippromovu għalihom
mixjiet ta’ formazzjoni xierqa, waqt li
jżommu dejjem quddiem għajnejhom li
l-formazzjoni tal-bidu u dik wara
l-professjoni temporanja “teħtieġ żmien
twil biżżejjed”, jekk
jista’ jkun mhux inqas minn disa’ snin,
lanqas iżjed minn tnax.
It-talb
16.
It-talb liturġiku u personali hu ħtieġa
fundamentali biex tistgħu ssaħħu
l-kontemplazzjoni tagħkom: jekk “it-talb
hu l-‘mudullun’ tal-ħajja kkonsagrata”, iżjed
u iżjed hu għall-ħajja kontemplattiva.
Illum ħafna ma jafux kif jitolbu. Ħafna
sempliċement ma jħossux il-bżonn li
jitolbu, jew jirriduċu r-relazzjoni
tagħhom ma’ Alla għal xi talba fi żmien
ta’ prova, meta ma jafux fuq min iduru.
Oħrajn jirriduċu t-talb tagħhom għal
sempliċi att ta’ tifħir fil-mumenti li
fihom iħossuhom kuntenti. Intom u
titolbu u tkantaw it-tifħir lil Alla
bil-Liturġija tas-Sigħat, intom issiru
leħen ukoll għal dawn il-persuni u, kif
għamlu l-profeti, tidħlu
għas-salvazzjoni ta’ kulħadd. It-talb
personali jgħinkom iżżommu magħquda
mal-Mulej, bħall-friegħi mad-dielja, u
hekk il-ħajja tagħkom tagħmel kotra ta’
frott
(ara Ġw
15:1-15).
Imma ftakru li l-ħajja tat-talb u
l-ħajja kontemplattiva ma tistgħux
tgħixuhom magħluqin fikom infuskom, imma
jridu jwessgħulkom qalbkom biex tħaddnu
magħkom lill-bnedmin kollha,
partikularment dawk li qed ibatu.
Permezz tat-talb ta’ interċessjoni,
intom għandkom rwol fundamentali
fil-ħajja tal-Knisja. Itolbu u interċedu
għal tant aħwa li qegħdin fil-ħabs,
immigranti, rifuġjati u pperesegwitati,
għal tant familji midruba, għall-persuni
bla xogħol, għall-foqra, għall-morda,
għall-vittmi tal-vizzji, biex insemmi xi
sitwazzjonijiet li ta’ kuljum qed isiru
iżjed urġenti. Intom bħal dawk
il-persuni li ħadu wieħed magħtub
quddiem il-Mulej biex dan ifejqu (ara Mk
2:1-12). Permezz tat-talb intom, lejl u
nhar, tqarrbu lejn il-Mulej il-ħajja ta’
tant aħwa li minħabba f’diversi
ċirkustanzi ma jistgħux jilħquh biex
jagħmlu esperjenza tal-ħniena tiegħu li
tfejjaq, meta hu qed jistenniehom biex
iraxxax fuqhom il-grazzja tiegħu.
Bit-talb tagħkom tistgħu tfejqu l-ġrieħi
ta’ tant aħwa.
Il-kontemplazzjoni ta’ Kristu ssib
fil-Verġni Marija l-ogħla mudell tagħha.
Il-wiċċ tal-Iben hu tagħha b’mod
waħdieni. Omm u Għalliema li twaħħdet
b’mod perfett ma’ Binha, bil-preżenza
eżemplari u materna tagħha hi twieżen
mhux ftit lil min irid jibqa’ fidil ta’
kuljum lejn il-ħajja tat-talb (ara Atti
1:14), speċjalment lil uliedha.
17.
Il-ktieb tal-Eżodu jurina li t-talb ta’
Mosè kien deċiżiv għax-xorti tal-poplu
tiegħu, għax rebbħu t-taqbida kontra
l-għadu tiegħu meta rnexxielu jżomm
dirgħajh merfugħa biex isejjaħ
l-għajnuna tal-Mulej (ara 17:11).
Jidhirli li dan it-test hu xbieha
espressiva ħafna tal-qawwa u l-effikaċja
li għandu t-talb tagħkom b’riżq
il-bnedmin kollha u l-Knisja,
partikularment dawk il-membri tagħha
l-iżjed dgħajfa u fil-bżonn. Anki llum,
bħal dakinhar, nistgħu nistħajlu li
x-xorti tal-bnedmin hi deċiża fil-qalb
li titlob u fid-dirgħajn merfugħa
tas-sorijiet kontemplattivi. Għalhekk
jien nitlobkom tibqgħu fidili, skond
il-Kostituzzjonijiet tagħkom, għat-talba
liturġika u għal dik personali, li hi
tħejjija għaliha u titwil tagħha.
Nitlobkom biex “xejn ma tqiegħdu f’nofs
it-triq tal-opus
Dei»,
ħalli xejn ma jkun ta’ xkiel għalikom,
xejn ma jifridkom, xejn ma jidħol
fin-nofs tal-ministeru tagħkom tat-talb. Hekk
intom, permezz tal-kontemplazzjoni,
tinbidlu fix-xbieha ta’ Kristu u
l-komunitajiet tagħkom isiru tabilħaqq
skejjel ta’ talb.
18.
Dan
kollu jitlob spiritwalità msejsa fuq
il-Kelma ta’ Alla, fuq il-qawwa
tal-ħajja sagramentali, fuq it-tagħlim
tal-Maġisteru tal-Knisja u fuq
il-kitbiet tal-fundaturi tagħkom;
spiritwalità li tagħmel minnkom ulied
is-Sema u wlied l-art, dixxipli u
missjunarji, skond ix-xejra partikulari
ta’ ħajjitkom. Iżjed minn hekk, jitlob
formazzjoni progressiva fil-ħajja
tat-talb personali u liturġiku u
fl-istess kontemplazzjoni, bla ma tinsew
li din qabelxejn tinbena fuq il-“ġmiel
skandaluż” tas-Salib.
Iċ-ċentralità
tal-Kelma ta’ Alla
19.
Wieħed mill-elementi l-iktar importanti
tal-ħajja monastika b’mod ġenerali hu
ċ-ċentralità tal-Kelma ta’ Alla
fil-ħajja personali u komunitarja. Dan
jisħaq fuqu San Benedittu, meta
mill-irħieb tiegħu jitlob li jisimgħu
bil-qalb il-qari tal-kotba mqaddsa: “lectiones
sanctas libenter audire”. Tul
is-sekli l-monastiċiżmu kien ħarries
tal-lectio
divina.
Billi llum din hi rrikkmandata
lill-poplu kollu ta’ Alla u mitluba
mill-ikkonsagrati reliġjużi kollha,
intom imsejħin
tagħmlu minnha ikel
għall-kontemplazzjoni tagħkom u
għall-ħajja ta’ kuljum tagħkom, hekk li
tistgħu taqsmu din l-esperjenza
trasformanti tal-Kelma ta’ Alla
mas-saċerdoti, id-djakni, l-ikkonsagrati
l-oħra u l-lajċi. Dan il-qsim ħossuh
bħala missjoni vera tagħkom fil-Knisja.
Bla
dubju ta’ xejn, it-talb u
l-kontemplazzjoni huma l-imkejjen
l-iżjed xierqa fejn tilqgħu l-Kelma ta’
Alla, imma, fl-istess waqt, kemm it-talb
u kemm il-kontemplazzjoni joħorġu
mis-smigħ tal-Kelma. Il-Knisja kollha, u
partikularment il-komunitajiet li huma
mogħtija kollhom għall-kontemplazzjoni,
għandhom bżonn jiskopru mill-ġdid
iċ-ċentralità tal-Kelma ta’ Alla, li,
kif fakkar il-predeċessur tiegħi San
Ġwanni Pawlu II, hi “l-ewwel għajn ta’
kull spiritwalità”. Jeħtieġ
li l-Kelma titma’ l-ħajja, it-talb,
il-kontemplazzjoni, il-mixja ta’ kuljum
u ssir prinċipju ta’ komunjoni
għall-komunitajiet tagħkom u l-ħajja
tal-aħwa. Huma fil-fatt imsejħin
jilqgħuha, jimmeditawha,
jikkontemplawha, jgħixuha flimkien, u
jxerrdu u jaqsmu l-frott li jitnissel
minn din l-esperjenza. Hekk tkunu
tistgħu tikbru fi spiritwalità awtentika
ta’ komunjoni.
Dwar dan, nitlobkom “tevitaw ir-riskju
ta’ ħarsa individwalistika, u żżommu
f’moħħkom li l-Kelma ta’ Alla
ngħatatilna sewwasew biex nibnu
l-komunjoni, biex ningħaqdu fil-Verità
tul il-mixja tagħna lejn Alla.
[…]
Għalhekk it-test sagru dejjem għandna
nersqu lejh fil-komunjoni ekkleżjali”.
20.
Il-lectio
divina jew qari tal-Kelma ta’
Alla fi spirtu ta’ talb hi l-arti li
tgħinna nagħmlu l-mixja mit-test Bibliku
għall-ħajja, hi l-ermenewtika
eżistenzjali tal-Iskrittura Mqaddsa, li
grazzi għaliha nistgħu nimlew dak
il-vojt bejn l-ispiritwalità u l-ħajja
ta’ kuljum, bejn fidi u ħajja.
Il-proċess li tagħti bidu għalih il-lectio
divina mis-smigħ irid iwassalna
għall-għarfien, u mill-għarfien
għall-imħabba.
Grazzi għall-moviment Bibliku, li reġa’
ssaħħaħ fuq kollox wara l-promulgazzjoni
tal-Kostituzzjoni dommatika Dei
Verbum tal-Konċilju Vatikan II,
illum qed issir proposta lil kulħadd
biex joqrob lejn l-Iskrittura Mqaddsa
permezz tal-qari assidwu tat-test
Bibliku fi spirtu ta’ talb, hekk li
d-djalogu ma’ Alla jsir realtà tal-ħajja
ta’ kuljum tal-poplu ta’ Alla. Il-lectio
divina għandha tgħinkom trawmu fikom
qalb ħelwa, għarfa u għaqlija
(ara
1 Slat
3:9,12),
biex tiddixxernu dak li ġej minn Alla u
dak li mill-banda l-oħra jista’
jbegħidkom minnu; biex tiksbu dik
ix-xorta ta’ stint sopranaturali, li bih
il-fundaturi tagħkom ma waqgħux
għall-mentalità tad-dinja, imma ġeddu
l-ħsieb tagħhom, “biex iseħħilkom
tagħrfu x’inhi r-rieda ta’ Alla, x’inhu
t-tajjeb li jogħġbu, x’inhu perfett”
(Rum 12:2).
21.
Il-ġurnata tagħkom, personali u
komunitarja, għadduha mill-għarbiel
tal-Kelma ta’ Alla. Hekk il-komunitajiet
u fraternitajiet tagħkom isiru skejjel
fejn il-Kelma tiġi mismugħa, megħjuxa u
mħabbra lil dawk li jiltaqgħu magħkom.
Fl-aħħar nett, tinsewx li “l-lectio
divina ma tingħalaqx fid-dinamika
tagħha imma twassal għall-azzjoni (actio),
li tqanqal lil min jemmen biex isir don
għall-oħrajn fil-karità”.
Hekk hi tagħmel frott kotran fil-mixja
li fiha titwaħħad ma’ Kristu, l-għan
tal-ħajja kollha tagħna.
Is-sagramenti tal-Ewkaristija u
r-Rikonċiljazzjoni
22.
L-Ewkaristija hi s-sagrament per
eċċellenza tal-laqgħa mal-persuna ta’
Ġesù: fiha “jinsab il-ġid spiritwali
kollu tal-Knisja, jiġifieri Kristu
nnifsu”.
L-Ewkaristija, qalba tal-ħajja ta’ kull
mgħammed u tal-istess ħajja kkonsagrata,
hija hekk b’mod partikulari għall-ħajja
kontemplattiva. Fil-fatt, l-offerta ta’
ħajjitkom tlaqqamkom b’mod partikulari
fil-misteru tal-Għid tal-mewt u
l-qawmien li kull darba jitwettaq
fl-Ewkaristija. Fil-fatt, meta naqsmu
flimkien il-ħobż, inkunu ntennu u
nwettqu llum id-don li Ġesù wettaq
tiegħu nnifsu meta “ġie maqsum, jinqasam
għalina” u li jitlobna biex issa aħna
“ningħataw, ninqasmu għall-oħrajn”.
Biex dan il-misteru għani jitwettaq u
jidher b’mod tassew ħaj, jeħtieġ li
ċ-ċelebrazzjoni tal-Ewkaristija titħejja
b’attenzjoni, dekor u sobrjetà, u nieħdu
sehem fiha b’mod sħiħ, b’fidi u
b’għarfien ta’ dak li qed niċċelebraw.
Fl-Ewkaristija l-ħarsa tal-qalb tagħraf
lil Ġesù.
San
Ġwanni Pawlu II ifakkarna: “Li
nikkontemplaw lil Kristu jimplika li
nsiru nagħrfuh f’kull post li fih huwa
juri lilu nnifsu, fin-numru kbir ta’
preżenzi, iżda l-aktar fis-Sagrament ħaj
tal-ġisem u tad-demm tiegħu.
Il-Knisja tgħix bi Kristu
Ewkaristiku, minnu hi mitmugħa, minnu hi
mdawla. L-Ewkaristija hija misteru ta’
fidi, u fl-istess waqt ‘misteru
tad-dawl’. Kull
darba li l-Knisja tiċċelebrah, il-fidili
jistgħu jgħixu b’xi mod mill-ġdid
l-esperjenza taż-żewġ dixxipli ta’
Għemmaws:
‘infetħulhom għajnejhom u għarfuh’
(Lq 24:31)”. Għalhekk
l-Ewkaristija ddaħħalkom ta’ kuljum
fil-misteru tal-imħabba, li hi mħabba
bejn għarus u għarusa: “Kristu hu
l-Għarus tal-Knisja bħala Feddej
tad-dinja. L-Ewkaristija hi s-sagrament
tal-fidwa tagħna. Hi s-sagrament
tal-Għarus, tal-Għarusa”.
Għalhekk, ta’ min ifaħħar it-tradizzjoni
li ttawwal iċ-ċelebrazzjoni
bl-adorazzjoni Ewkaristika, mument
ipprivileġġjat biex nirċievu
fil-ġewwieni tagħna l-ħobż tal-Kelma
maqsum matul iċ-ċelebrazzjoni u nkomplu
l-azzjoni ta’ radd il-ħajr.
23.
Mill-Ewkaristija jnixxi dak l-impenn
għal konverżjoni kontinwa, li jsib
l-espressjoni sagramentali tiegħu
fir-Rikonċiljazzjoni. Ħa tkun għalikom
iċ-ċelebrazzjoni personali u komunitarja
ta’ spiss tas-sagrament
tar-Rikonċiljazzjoni jew tal-Penitenza
okkażjoni pprivileġġjata biex
tikkontemplaw il-wiċċ ħanin tal-Missier,
Ġesù Kristu, biex
iġedded il-qalb tagħkom u jsaffi
r-relazzjoni tagħkom ma’ Alla
fil-kontemplazzjoni.
Mill-esperjenza hienja tal-maħfra
mingħand Alla f’dan is-sagrament toħroġ
il-grazzja li ssiru profeti u ministri
tal-ħniena u għodda ta’
rikonċiljazzjoni, maħfra u sliem,
profeti u ministri li d-dinja llum
għandha bżonn partikulari tagħhom.
Il-ħajja tal-aħwa fil-komunità
24.
Il-ħajja tal-aħwa fil-komunità hi
element essenzjali tal-ħajja reliġjuża
b’mod ġenerali, u b’mod partikulari
tal-ħajja monastika, anki jekk bosta
huma l-kariżmi.
Ir-relazzjoni ta’ komunjoni hi wirja ta’
dik l-imħabba li tgelgel mill-qalb ta’
Kristu u tkaxkarna lejn l-Ispirtu li
Ġesù stess jagħtina. Meta l-Knisja
tagħmel viżibbli din ir-realtà, bħala
familja ta’ Alla, issir sinjal
tal-għaqda profonda miegħu u tidher
bħala l-għamara li fiha din l-esperjenza
hi possibbli u tagħti l-ħajja lil
kulħadd. Kristu l-Mulej, meta jsejjaħ
lil xi wħud biex jaqsmu fl-istess ħajja
tiegħu, isawwar komunità li tagħmel
tidher “il-ħila tal-komunjoni tal-ġid,
tal-imħabba bejn l-aħwa, tal-proġett ta’
ħajja u ta’ ħidma, li jseħħ għax wieħed
ikun laqa’ l-istedina li jimxi warajh
b’mod iktar ħieles u mill-qrib”.
Il-ħajja tal-aħwa, li
biha l-ikkonsagrati jfittxu li jkollhom
“qalb waħda u ruħ waħda” (Atti 4:32),
fuq l-eżempju tal-ewwel komunitajiet
Insara, “issir stqarrija u sinjal
tat-Trinità”.
25.
Il-komunjoni bejn l-aħwa hi mera ta’ kif
Alla hu u kif jingħata, hi xhieda li
“Alla hu mħabba” (1 Ġw 4:8,16). Il-ħajja
kkonsagrata tistqarr li temmen u li
tgħix bl-imħabba tal-Missier, tal-Iben u
tal-Ispirtu s-Santu, u għalhekk
il-komunità tal-aħwa ssir mera
tal-grazzja ta’ Alla Trinità ta’ Mħabba.
B’differenza mill-eremiti, li jgħixu
“fis-skiet tas-solitudni” u
anki huma jgawdu stima kbira min-naħa
tal-Knisja, il-ħajja monastika titlob
il-ħajja komunitarja fi proċess kontinwu
ta’ maturità, li jwassalha biex tgħix
komunjoni awtentika bejn l-aħwa,
koinonia.
Dan
jitlob mill-membri kollha tagħha li
jħossuhom bennejja tal-komunità u mhux
biss dawk li jgawdu mill-ġid li jistgħu
jirċievu minnha. Komunità teżisti
daqskemm titwieled u tinbena bis-sehem
ta’ kulħadd, kull wieħed u waħda skond
id-doni li għandu, billi tikkultiva
spiritwalità qawwija ta’ komunjoni, li
jwassal lil kull wieħed u waħda li jħoss
u jgħix l-appartenenza reċiproka. Hekk
biss il-ħajja komunitarja ssir għajnuna
ta’ wieħed lill-ieħor fit-twettiq
tal-vokazzjoni propja ta’ kull persuna.
26.
Intom li ħaddantu l-ħajja monastika,
ftakru dejjem li l-bnedmin ta’ żmienna
jistennew minnkom xhieda ta’ komunjoni
vera bejn l-aħwa li turi bil-qawwa
kollha, f’din is-soċjetà mmarkata minn
firdiet u nuqqas ta’ ugwaljanza, li hu
possibbli u sabiħ li tgħix flimkien (ara
Salm 133:1), minkejja d-differenzi
fil-ġenerazzjonijiet, fil-formazzjoni u,
xi drabi, fil-kulturi. Ħa jkunu
l-komunitajiet tagħkom sinjali li
jitwemmnu li dawn id-differenzi, mhux
biss mhumiex impediment għall-ħajja bejn
l-aħwa, imma jżidu jagħnuha. Ftakru li
l-għaqda u l-komunjoni ma jfissrux
uniformità, u li jissaħħu bid-djalogu,
il-qsim flimkien, l-għajnuna reċiproka u
umanità profonda, speċjalment
fil-konfront tal-membri l-iżjed dgħajfa
u fil-bżonn.
27.
Fl-aħħar nett, ftakru li l-ħajja
fraterna fil-komunità hi wkoll l-ewwel
għamla ta’ evanġelizzazzjoni: “Minn
dan jagħraf kulħadd li intom dixxipli
tiegħi, jiġifieri, jekk ikollkom
l-imħabba bejnietkom”
(Ġw 13:34-35). Għalhekk inħeġġiġkom ma
tittraskurawx il-mezzi li għandkom
f’idejkom biex issaħħuha, hekk kif
tipproponiha u twettaqha l-Knisja, billi
toqogħdu għassa l-ħin kollu fuq dan
l-aspett tal-ħajja monastika, delikat u
mhux ta’ importanza sekondarja. Flimkien
mal-qsim tal-Kelma u tal-esperjenza ta’
Alla u mad-dixxerniment komunitarju,
“ta’ min ifakkar ukoll fil-korrezzjoni
fraterna, ir-reviżjoni tal-ħajja u
għamliet oħra tipiċi tat-tradizzjoni.
Huma modi konkreti kif naqdu lil xulxin
u kif insawbu fuq il-komunità d-doni li
l-Ispirtu jxerred bil-kotra għall-bini
tagħha u għall-missjoni tagħha
fid-dinja”.
Kif
għidt dan l-aħħar f’laqgħa li kelli
mal-ikkonsagrati li ġew Ruma
għall-għeluq tas-Sena tal-Ħajja
Kkonsagrata, agħmlu
premura li tkunu qrib tas-sorijiet
l-oħra li l-Mulej takom b’don prezzjuż.
Min-naħa l-oħra, kif kien ifakkar San
Benedittu, hu fundamentali fil-ħajja
komunitarja li “tqimu lill-anzjani u
tħobbu liż-żgħażagħ”. F’din
it-tensjoni ta’ armonija bejn memorja u
l-futur imwiegħed issib għeruqha wkoll
ħajja fraterna għammiela fil-komunità.
L-awtonomija tal-monasteri
28.
L-awtonomija tiffavorixxi l-istabbiltà
tal-ħajja u l-għaqda interna ta’ kull
komunità, u tiggarantixxi l-aħjar
kundizzjonijiet għall-kontemplazzjoni.
Imma din l-awtonomija m’għandhiex
tfisser indipendenza jew iżolament,
partikularment mill-monasteri l-oħra
tal-istess Ordni jew tal-familja
kariżmatika li tkun.
29.
Konxji li “ħadd ma jibni l-futur tiegħu
billi jinqata’ għalih waħdu, u lanqas
bil-ħila tiegħu biss, imma billi jagħraf
lilu nnifsu fil-verità
ta’ komunjoni li dejjem hi miftuħa
għal-laqgħa, għad-djalogu, għas-smigħ,
għall-għajnuna reċiproka”,
araw li
tħarsu ruħkom
“mill-marda
tal-awtoreferenzjalità”
u għożżu l-valur tal-komunjoni bejn
id-diversi monasteri bħala mixja li
tiftaħ għall-futur, billi taġġornaw u
hekk twettqu l-valuri permanenti u
kodifikati tal-awtonomija tagħkom.
Il-Federazzjonijiet
30.
Il-federazzjoni hi struttura importanti
ta’ komunjoni bejn il-monasteri li
għandhom sehem mill-istess kariżma, biex
hekk ma jibqgħux iżolati.
Għan prinċipali tal-federazzjonijiet hu
li jippromovu l-ħajja kontemplattiva
fil-monasteri li jagħmlu parti minnhom,
skond il-ħtiġijiet ta’ dik il-kariżma, u
jiggarantixxu l-għajnuna fil-formazzjoni
permanenti u tal-bidu, kif ukoll
fil-ħtiġijiet konkreti, bl-iskambju ta’
monaċi u l-qsim ta’ ġid materjali; għal
dan il-għan, ta’ min jinkuraġġihom u
jżidhom.
Il-klawsura
31.
Il-qtugħ mid-dinja, meħtieġ għal dawk li
jimxu wara Kristu fil-ħajja reliġjuża,
għalikom, sorijiet kontemplattivi,
jidher b’mod partikulari fil-klawsura,
li hi l-post tal-intimità tal-Knisja
għarusa: “xbieha tal-għaqda waħdanija
tal-Knisja bħala Għarusa ma’ Sidha, li
tħobbu fuq kull ħaġ’oħra”.
Il-klawsura ngħatat kodifikazzjoni
kanonika f’erba’ xejriet u modalitajiet: barra
dik komuni għall-Istituti reliġjużi
kollha, hemm tliet karatteristiċi
tal-komunitajiet ta’ ħajja
kontemplattiva, imsejħa papali,
kostituzzjonali u monastika. Il-klawsura
papali hi dik “konformi man-normi
mogħtija mis-Sede Appostolika” u
“teskludi dmirijiet esterni ta’
appostolat”. Il-klawsura
kostituzzjonali hi rregolata min-normi
tal-Kostituzzjonijiet propji; u
l-klawsura monastika, għad li tħares
il-karattru ta’ “dixxiplina iktar
rigoruża” meta
mqabbla ma’ dik komuni, tippermetti li
mal-funzjoni primarja tal-kult divin
jixxierku għamliet usa’ ta’ akkoljenza u
ospitalità, dejjem skond
il-Kostituzzjonijiet propji.
Il-klawsura
komuni hi l-inqas magħluqa mill-erbgħa.
Il-varjetà ta’ modi kif tiġi osservata
l-klawsura fi ħdan l-istess Ordni
għandha titqies għana u mhux impediment
għall-komunjoni, għax ixxierek flimkien
sensibbiltajiet diversi f’għaqda ogħla. Din
il-komunjoni tista’ titlaħħam f’diversi
xejriet ta’ laqgħa u ta’
kollaborazzjoni, fuq kollox
fil-formazzjoni permanenti u dik
tal-bidu.
Ix-xogħol
32.
Anki għalikom ix-xogħol hu sehem fl-opra
li Alla ħallieq qed ikompli jwettaq
fid-dinja. Din il-ħidma tqegħidkom
f’relazzjoni stretta ma’ dawk li jaħdmu
b’responsabbiltà biex jgħixu mill-frott
ta’ jdejhom stess (ara Ġen 3:19), biex
tagħtu sehemkom fl-opra tal-ħolqien u
taqdu lill-bnedmin; b’mod partikulari
tagħmilkom solidali mal-foqra li ma
jistgħux jgħixu jekk ma jaħdmux u li
spiss, imqar jekk jaħdmu, għandhom bżonn
tal-għajnuna providenzjali tal-aħwa.
Biex ix-xogħol ma jitfix l-ispirtu ta’
kontemplazzjoni, kif jgħallmuna
l-qaddisin kbar kontemplattivi, u biex
din tagħkom tkun ħajja “fqira tassew u
fl-ispirtu, imqattgħa f’moderazzjoni
bieżla” kif timponi fuqkom
il-professjoni, b’vot solenni,
tal-kunsill evanġeliku tal-faqar, ix-xogħol
għandu jsir b’devozzjoni u fedeltà, bla
ma tħallu jikkundizzjonawkom
il-mentalità effiċjentista u l-attiviżmu
tal-kultura ta’ żmienna. Ħa jibqa’
għalikom dejjem validu l-motto
tat-tradizzjoni Benedittina
“ora et
labora”,
li
jedukana biex insibu dik ir-relazzjoni
bbilanċjata bejn it-tensjoni lejn
l-Assolut u t-tħabrik
fir-resposabbiltajiet ta’ kuljum, bejn
is-sikta tal-kontemplazzjoni u l-ħeffa
fil-qadi.
Is-skiet
33.
Fil-ħajja kontemplattiva, partikularment
f’dik għalkollox kontemplattiva, huwa
importanti li nkunu attenti għas-skiet
li fih tgħammar il-Preżenza, bħala
spazju meħtieġ ta’ smigħ u fejn wieħed
jixtarr il-Kelma, u kundizzjoni
għal ħarsa ta’ fidi li tagħraf
il-preżenza ta’ Alla fl-istorja
personali, f’dik tal-aħwa li l-Mulej
jagħtikom u fil-ġrajjiet tad-dinja ta’
żmienna. Is-skiet ifisser li nitbattlu
minna nfusna biex nagħmlu wisa’ ħalli
nilqgħu fina; fl-istorbju ta’ ġo fina ma
nistgħu nilqgħu lil ħadd u xejn.
Ħajjitkom kollha kemm hi kontemplattiva
trid iż-“żmien u ħila li żżommu
s-silenzju biex tisimgħu”
lil Alla u
l-karba tal-bniedem. Mela ħa jiskot
l-ilsien tal-laħam u jitkellem dak
tal-Ispirtu, imqanqal mill-imħabba li
kull waħda minnkom għandha għal Sidha.
F’dan hu ta’ eżempju għalikom is-skiet
ta’ Marija Santissma, li setgħet tilqa’
fiha l-Kelma għax kienet mara tas-skiet:
mhux skiet sterili, vojt;
għall-kuntrarju, skiet mimli, għani. Dak
tal-Omm Verġni hu wkoll skiet għani
bl-imħabba, li lest jilqa’ lill-Ieħor u
lill-oħrajn.
Il-mezzi ta’ komunikazzjoni
34.
Fis-soċjetà tagħna l-kultura diġitali
qed tħalli effett kbir u deċiżiv fuq
il-formazzjoni tal-ħsieb u fil-mod kif
inġibu ruħna mad-dinja u,
partikularment, man-nies. Din il-klima
kulturali tħalli effett ukoll fuq
il-komunitajiet kontemplattivi. Bla
dubju dawn il-mezzi jistgħu jkunu għodda
siewja għall-formazzjoni u
l-komunikazzjoni, imma nitlobkom tagħmlu
dixxerniment prudenti biex dawn
tqegħduhom għas-servizz tal-formazzjoni
għall-ħajja kontemplattiva u
tal-komunikazzjoni meħtieġa, u ma jkunux
okkażjoni ta’ ħela ta’ ħin jew ta’ ħarba
mill-ħajja mal-aħwa fil-komunità, lanqas
ta’ ħsara għall-vokazzjoni tagħkom, jew
xkiel għall-ħajja tagħkom mogħtija
kollha kemm hi għall-kontemplazzjoni.
L-axxeżi
35.
L-axxeżi, bil-mezzi kollha li l-Knisja
tipproponi għall-ħakma fuqna nfusna u
t-tisfija tal-qalb, twassalna wkoll biex
ninħelsu minn dak kollu li hu
tal-“mondanità” ħalli ngħixu l-loġika
tal-Vanġelu li hi l-loġika tad-don,
partikularment id-don tagħna nfusna,
ħaġa li titlobha bil-qawwa t-tweġiba
għal dik l-ewwel imħabba waħdanija ta’
ħajjitna. Hekk tistgħu twieġbu wkoll
għal dak li jistennew minnkom l-aħwa,
kif ukoll għall-ħtiġijiet morali u
spiritwali intrinsiċi għal kull wieħed
mit-tliet kunsilli evanġeliċi minnkom
mistqarra b’vot solenni.
Hawn, il-ħajja tagħkom kollha kemm hi
mogħtija, tikseb sens profetiku qawwi:
sobrjetà, distakk mill-ħwejjeġ tal-art,
għotja tagħkom infuskom
għall-ubbidjenza, trasparenza
fir-relazzjonijiet, għalikom kollox isir
iktar radikali u esiġenti minħabba
fl-għażla li tiċċaħħdu wkoll “minn
‘post’, minn kuntatti , mill-ġid kollu
tal-ħolqien
[… bħala]
mod speċjali li bih il-klawstrali joffru
l-‘ġisem’”. L-għażla
tagħkom ta’ ħajja ta’ stabbiltà ssir
sinjal elokwenti ta’ fedeltà quddiem
id-dinja tagħna globalizzata u mdorrija
għal ċaqliq dejjem iktar mgħaġġel u
faċli, bir-riskju li qatt ma tniżżel
għeruqha mkien.
Anki l-qasam tar-relazzjonijiet mal-aħwa
l-ħajja klawstrali tesiġih iżjed u
iżjed, għax
din timponi fil-komunità relazzjonijiet
kontinwi u dejjem eqreb ta’ xulxin.
Intom tistgħu tkunu eżempju u għajnuna
għall-poplu ta’ Alla u għall-umanità ta’
żmienna, immarkata u xi drabi miġruħa
minn tant firdiet, biex tibqa’ qrib
tal-aħwa anki hemm fejn hemm differenzi
x’jitranġaw, tensjonijiet u kunflitti
x’jissolvew, dgħufijiet x’jiġu milqugħa.
L-axxeżi hi wkoll mezz biex tiġu wiċċ
imb wiċċ mad-dgħufija tagħkom u tafdawha
f’idejn it-tjieba ta’ Alla u
tal-komunità.
Fl-aħħar nett, l-impenn axxetiku hu
meħtieġ biex tistgħu twettqu ta’ kuljum
bi mħabba u fedeltà d-dmirijiet tagħkom,
bħala okkażjoni biex taqsmu ma’ tant
aħwa fid-dinja x-xorti tagħhom, u bħala
offerta siekta u għammiela għalihom.
Ix-xhieda tal-monaċi nisa
36.
Għeżież ħuti, dak li ktibt f’din
il-Kostituzzjoni appostolika hu
għalikom, li ħaddantu l-vokazzjoni
kontemplattiva, għajnuna valida biex
tistgħu ġġeddu l-ħajja tagħkom
u l-missjoni
tagħkom
fil-Knisja u fid-dinja. Ħa jwettaq
il-Mulej fil-qlub tagħkom l-opra tiegħu
u jibdilkom għalkollox fih, l-għan
aħħari tal-ħajja kontemplattiva; u
jalla l-komunitajiet jew fraternitajiet
tagħkom ikunu skejjel veri ta’
kontemplazzjoni u talb.
Id-dinja u l-Knisja għandhom bżonnkom,
bħala “fanali” li jdawlu l-mixja
tal-bnedmin ta’ żmienna. Ħa tkun din
il-profezija tagħkom. L-għażla tagħkom
mhix li taħarbu mid-dinja għax
beżżiegħa, kif jaħsbu xi wħud. Intom
għadkom fid-dinja, bla ma intom
tad-dinja (ara Ġw 18:19) u, imqar jekk
maqtugħa minnha, b’sinjali li jesprimu
li intom ta’ Kristu, tieqfu qatt tidħlu
l-ħin kollu għall-umanità, u twasslu
quddiem il-Mulej il-beżgħat u t-tamiet
tagħha, il-ferħ u t-tbatija tagħha.
La
ċċaħħduniex min dan is-sehem tagħkom
fil-bini ta’ dinja iżjed umana u allura
iżjed evanġelika. Ingħaqdu ma’ Alla,
isimgħu l-karba ta’ ħutkom
(ara Eż
3:7; Ġak 5:4)
vittmi tal-“kultura tal-iskart”,
jew li sempliċement jeħtieġu d-dawl
tal-Vanġelu. Tħarrġu fl-arti tas-smigħ,
“li hi iktar
milli sempliċi tisma’ b’widnejk”, u
ħaddmu l-“ispiritwalità tal-ospitalità”,
billi fil-qalb tagħkom tilqgħu u
fit-talb tagħkom iġġorru dak kollu li
jolqot lill-bniedem maħluq fuq is-sura u
x-xbieha ta’ Alla (ara Ġen 1:26). Kif
ktibt fl-Eżortazzjoni appostolika
Evangelii gaudium, “meta
ninterċedu, ma nkunux qed nitbiegħdu
mill-vera kontemplazzjoni, għax
il-kontemplazzjoni li żżomm barra
lill-oħrajn hi qerq”.
Hekk ix-xhieda tagħkom tkun bħal twettiq
meħtieġ ta’ dik l-oħra ta’ dawk li,
kontemplattivi fil-qalba tad-dinja,
jagħtu xhieda tal-Vanġelu billi jibqgħu
għalkollox mgħaddsa fir-realtajiet u
fil-bini tal-belt ta’ din l-art.
37.
Għeżież ħuti sorijiet kontemplattivi,
tafu tajjeb li anki din tagħkom, bħal
kull għamla oħra ta’ ħajja kkonsagrata
“hi don lill-Knisja, titwieled
fil-Knisja, tikber fil-Knisja, hi kollha
orjentata lejn il-Knisja”. Kunu
mela f’komunjoni qawwija mal-Knisja,
biex issiru fiha l-kontinwazzjoni ħajja
tal-misteru tal-Verġni Marija, għarusa u
omm, li tilqa’ u tħares il-Kelma biex
imbagħad troddha lid-dinja, u hekk
tagħti sehemha biex tiled u tgħin lil
Kristu jikber fil-qalb tal-bnedmin
għatxana, anki jekk spiss bla ma jafu,
għal Dak li hu “triq, verità u ħajja”
(Ġw 14:6). Bħal Marija, kunu intom ukoll
“tarġa” li minnha Alla jinżel biex
jiltaqa’ mal-bniedem u l-bniedem jitla’
biex jiltaqa’ ma’ Alla u jikkontempla
l-wiċċ tiegħu fil-wiċċ ta’ Kristu.
KONKLUŻJONI NORMATTIVA
Fid-dawl ta’ dak li ntqal sa issa,
nordna u nistabbilixxi dan li ġej.
Art. 1.
B’riferenza għall-kanoni 20 tal-Kodiċi
tad-Dritt Kanoniku, u wara li ġew
meqjusa b’ħafna attenzjoni s-37 artiklu
t’hawn fuq, bil-promulgazzjoni u
l-pubblikazzjoni ta’ din
il-Kostituzzjoni Appostolika
Vultum Dei
quærere jiġu
derogati:
1.
il-kanoni tal-CIC li,
f’xi
parti minnhom, imorru direttament kontra
xi wieħed mill-artikli ta’ din
il-Kostituzzjoni;
2.
u,
b’mod iżjed speċifiku, l-artikli
dispożittivi-normattivi:
-
tal-Kostituzzjoni Appostolika
Sponsa
Christi
ta’
Piju
XII
tal-1950:
Statuta generalia Monialium;
-
tal-Istruzzjoni
Inter
præclara tas-Sagra
Kongregazzjoni tar-Reliġjużi;
-
tal-Istruzzjoni
Verbi
sponsa,
tal-CIVCSVA,
13
ta’ Mejju
1999,
fuq
il-ħajja kontemplattiva u l-klawsura
tal-monaċi nisa.
Art. 2 §1.
Din
il-Kostituzzjoni hija indirizzata kemm
lill-Kongregazzjoni għall-Istituti ta’
Ħajja Kkonsagrata u s-Soċjetajiet ta’
Ħajja Appostolika, u kemm lill-monasteri
femminili ta’ ħajja kontemplattiva jew
għalkollox kontemplattiva, federati u
mhumiex.
§2.
Huma materji regolati minn din
il-Kostituzzjoni Appostolika dawk
imniżżla hawn fuq f’n. 12 u żviluppati
f’nn. 13-35.
§3.
Il-Kongregazzjoni għall-Istituti ta’
Ħajja Kkonsagrata u s-Soċjetajiet ta’
Ħajja Appostolika – jekk ikun il-bżonn,
fi qbil mal-Kongregazzjoni għall-Knejjes
Orjentali u l-Kongregazzjoni
għall-Evanġelizzazzjoni tal-Popli –
tirregola l-modalitajiet differenti ta’
twettiq ta’ dawn in-normi kostituttivi,
skond id-diversi tradizzjonijiet
monastiċi u waqt li żżomm quddiem
għajnejha l-familji kariżmatiċi
differenti.
Art. 3 §1.
Il-monasteri partikulari għandhom jieħdu
ħsieb b’attenzjoni partikulari, permezz
ta’ strutturi xierqa li għandhom jiġu
magħżula fit-tfassil tal-proġett
tal-ħajja komunitarja, il-formazzjoni
permanenti, li hi bħall-humus ta’
kull fażi tal-formazzjoni, diġà sa minn
dik tal-bidu.
§2.
Biex jiżguraw formazzjoni permanenti
xierqa, il-federazzjonijiet għandhom
jippromovu l-kollaborazzjoni bejn
il-monasteri permezz ta’ skambju ta’
materjal ta’ formazzjoni u bl-użu
tal-mezzi ta’ komunikazzjoni diġitali,
filwaqt li jimxu dejjem bid-diskrezzjoni
kollha meħtieġa.
§3.
Minbarra l-attenzjoni fl-għażla
tas-sorijiet imsejħa biex jiffurmaw u
jsieħbu l-kandidati fil-mixja ta’
maturazzjoni personali tagħhom
(formaturi), il-monasteri partikulari u
l-federazzjonijiet għandhom itejbu
l-formazzjoni ta’ dawn il-formaturi u
tal-kollaboraturi tagħhom.
§4.
Is-sorijiet imsejħa biex iwettqu
s-servizz delikat tal-formazzjoni
jistgħu,
servatis de
iure servandis,
jiffrekwentaw korsijiet speċifiċi ta’
formazzjoni anki ’l barra mill-monasteru
tagħhom, waqt li jżommu klima xierqa u
li taqbel ma’ dak li titlob il-kariżma
speċifika tagħhom. Il-Kongregazzjoni
għall-Istituti ta’ Ħajja Kkonsagrata u
s-Soċjetajiet ta’ Ħajja Appostolika sa
xxandar normi partikulari dwar din
il-materja.
§5.
Il-monasteri għandhom jagħtu attenzjoni
speċjali għad-dixxerniment spiritwali u
vokazzjonali, biex jiżguraw
lill-kandidati akkumpanjament
personalizzat u jippromovu programmi
xierqa ta’ formazzjoni, waqt li jżommu
dejjem quddiem għajnejhom li għandu
jingħata żmien biżżejjed
għall-formazzjoni tal-bidu.
§6.
Minkejja li t-twaqqif ta’ komunitajiet
internazzjonali u multikulturali jixhed
għall-universalità ta’ kariżma
partikulari, għandu assolutament jiġi
evitat ir-reklutaġġ ta’ kandidati minn
pajjiżi oħra bl-għan waħdieni li
monasteru jinżamm miftuħ. Għandhom jiġu
elaborati kriterji biex jiżguraw
it-twettiq ta’ dan.
§7.
Biex tiġi żgurata formazzjoni ta’
kwalità, skond iċ-ċirkustanzi,
il-monasteri għandhom jippromovu djar
komuni bejniethom għall-formazzjoni
tal-bidu.
Art. 4 §1.
Fl-għarfien li t-talb hu l-qalb
tal-ħajja kontemplattiva, kull monasteru
għandu jivverifika l-orarju tal-ġurnata
tiegħu biex jiżen jekk il-Mulej jinsabx
fiċ-ċentru tagħha.
§2.
Iċ-ċelebrazzjonijiet komunitarji
għandhom jiġu eżaminati biex jaraw
humiex qed ikunu tassew laqgħa ħajja
mal-Mulej.
Art. 5 §1.
Fid-dawl tal-importanza tal-lectio
divina,
kull monasteru għandu jistabbilixxi
ħinijiet u modi xierqa għal din
il-ħtieġa ta’ qari/smigħ, ruminatio,
talb, kontemplazzjoni u qsim
tal-Iskrittura Mqaddsa.
§2.
Ladarba l-qsim tal-esperjenza
trasformanti tal-Kelma mas-saċerdoti,
id-djakni, l-ikkonsagrati l-oħra u
l-lajċi hi espressjoni ta’ komunjoni
vera ekkleżjali, kull monasteru għandu
jfittex il-mezzi ta’ kif iwassal dan
il-qsim spiritwali ’l barra minnu.
Art. 6 §1.
Kull monasteru, meta jiġi biex ifassal
il-proġett komunitarju u tal-ħajja
fraterna fi ħdanu, minbarra t-tħejjija
mirquma taċ-ċelebrazzjonijiet
Ewkaristiċi, għandu jara li jkun hemm
ħin konsiderevoli ta’ adorazzjoni
Ewkaristika, u joffri anki lill-fidili
tal-Knisja lokali l-possibbiltà li
jieħdu sehem.
§2.
Għandha tintwera attenzjoni partikulari
fl-għażla tal-kappillani, tal-konfessuri
u tad-diretturi spiritwali, billi wieħed
iqis l-ispeċifiċità tal-kariżma u
l-esiġenzi tal-ħajja fraterna
fil-komunità.
Art. 7 §1.
Dawk li huma msejħa biex iħaddmu
l-ministeru tal-awtorità, barra li
jieħdu ħsieb tal-formazzjoni tagħhom
infushom, għandhom iħallu jmexxihom
spirtu veru ta’ fraternità u ta’ qadi,
biex jiffavorixxu klima ferrieħa ta’
libertà u ta’ responsabbiltà li hekk
tippromovi d-dixxerniment personali u
komunitarju u l-komunikazzjoni
fil-verità ta’ dak li wieħed jagħmel,
jaħseb u jħoss.
§2.
Il-proġett komunitarju għandu jilqa’
bil-qalb u jħeġġeġ l-iskambju tad-doni
umani u spiritwali ta’ kull waħda
mill-aħwa, għall-għana reċiproku u
l-progress tal-fraternità.
Art. 8 §1.
Mal-awtonomija ġuridika għandha
tikkorrispondi awtonomija vera ta’
ħajja, li tfisser: numru mqar minimu ta’
sorijiet, sakemm il-parti l-kbira
mhumiex imdaħħla fiż-żmien; il-vitalità
meħtieġa biex tingħax u tingħadda
l-kariżma; il-ħila vera ta’ formazzjoni
u tmexxija; id-dinjità u l-kwalità
tal-ħajja liturġika, fraterna u
spiritwali; is-sinifikat għall-Knisja
lokali u l-inseriment fiha;
il-possibbiltà li ssostni lilha nfisha;
struttura xierqa tal-binja monastika.
Dawn il-kriterji għandhom jitqiesu
fil-globalità tagħhom u f’viżjoni
magħquda.
§2. Jekk
dawn ir-rekwiżiti għal awtonomija vera
ta’ monasteru mhumiex milħuqa,
il-Kongregazzjoni għall-Istituti ta’
Ħajja Kkonsagrata u s-Soċjetajiet ta’
Ħajja Appostolika tiżen ikunx opportun
li twaqqaf kummissjoni ad hoc
magħmula mill-Ordinarju, mill-President
tal-Federazzjoni, mill-Assistenta
federali u mill-Badessa jew Prijura
tal-monasteru. Ikun xi jkun il-każ, dan
l-intervent ikollu bħala għan tiegħu li
jwettaq proċess ta’ akkumpanjament għal
tiġdid tal-monasteru, jew inkella biex
dan jingħalaq.
§3.
Dan
il-proċess jista’ jipprevedi wkoll
l-affiljazzjoni għal monasteru ieħor jew
l-affidament f’idejn il-President
tal-Federazzjoni, jekk il-monasteru hu
federat, bil-Kunsill tagħha. Hu x’inhu,
id-deċiżjoni finali tibqa’
tal-Kongregazzjoni għall-Istituti ta’
Ħajja Kkonsagrata u s-Soċjetajiet ta’
Ħajja Appostolika.
Art. 9 §1.
Fil-bidu l-monasteri kollha
jridu jagħmlu parti minn federazzjoni.
Jekk għal raġunijiet speċjali monasteru
ma jkunx jista’ jiġi federat, bil-vot
tal-kapitlu, jintalab il-permess
tas-Santa Sede, li hi kompetenza tagħha
tagħmel id-dixxerniment meħtieġ, biex
il-monasteru jkun jista’ ma jagħmilx
parti minn federazzjoni.
§2.
Il-federazzjonijiet jistgħu jitwaqqfu
mhux tant u mhux biss skond kriterju
ġeografiku, imma ta’ affinità fl-ispirtu
jew it-tradizzjonijiet. Il-modalitajiet
biex dan iseħħ jiġu indikati
mill-Kongregazzjoni għall-Istituti ta’
Ħajja Kkonsagrata u s-Soċjetajiet ta’
Ħajja Appostolika.
§3.
Tiġi wkoll garantita l-għajnuna
fil-formazzjoni u fil-ħtiġijiet konkreti
permezz tal-iskambju ta’ sorijiet u
l-qsim ta’ ġid materjali, kif tordna
l-Kongregazzjoni għall-Istituti ta’
Ħajja Kkonsagrata u s-Soċjetajiet ta’
Ħajja Appostolika, li tistabbilixxi
wkoll il-kompetenzi tal-President u
tal-Kunsill tal-Federazzjoni.
§4. Għandha
tiġi mħeġġa
l-assoċjazzjoni, anki ġuridika,
tal-monasteri mal-Ordni maskili
korrispondenti. Jitħeġġu wkoll
il-Konfederazzjonijiet u t-twaqqif ta’
Kummissjonijiet internazzjonali
tad-diversi Ordnijiet, bi statuti
approvati mill-Kongregazzjoni
għall-Istituti ta’ Ħajja Kkonsagrata u
s-Soċjetajiet ta’ Ħajja Appostolika.
Art. 10 §1.
Kull monasteru, wara dixxerniment serju
u f’rispett lejn it-tradizzjoni propja
tiegħu u dak li jitolbu
l-Kostituzzjonijiet, għandu jitlob
lis-Santa Sede liema xorta ta’ klawsura
jixtieq iħaddan, kemm-il darba jinħass
il-bżonn ta’ għamla differenti minn dik
attwali.
§2.
Meta tkun ġiet magħżula waħda
mill-għamliet ta’ klawsura previsti,
kull monasteru għandu jara li joqgħod
għaliha u jgħix skond dak li ġġib
magħha.
Art. 11 §1.
Anki jekk xi komunitajiet monastiċi
jista’ jkollhom dħul, fi qbil mal-liġi
tagħhom, xorta ma għandhomx jibqgħu lura
mid-dmir tax-xogħol.
§2.
Għall-komunitajiet mogħtija
għall-kontemplazzjoni, il-frott
tax-xogħol ma għandux ikollu biss l-għan
li jiżgura l-għajxien dinjituż imma
anki, meta possibbli, li jgħinu
fil-ħtiġijiet tal-foqra u tal-monasteri
fil-bżonn.
Art. 12.
L-orarju ta’ kuljum ta’ kull monasteru
għandu jħalli waqtiet opportuni ta’
skiet, biex hekk tiġi megħjuna l-klima
ta’ talb u ta’ kontemplazzjoni.
Art. 13.
Kull monasteru għandu jara li
fil-proġett komunitarju tiegħu jkollu
l-mezzi idoneji biex jista’ jesprimi
l-impenn axxetiku fil-ħajja monastika,
b’mod li jagħmilha iżjed profetika u li
titwemmen.
Dispożizzjoni finali
Art. 14 §1.
Il-Kongregazzjoni għall-Istituti ta’
Ħajja Kkonsagrata u s-Soċjetajiet ta’
Ħajja Appostolika se xxandar, skond
l-ispirtu u n-normi ta’ din
il-Kostituzzjoni Appostolika,
Istruzzjoni ġdida dwar il-materji
msemmija f’n. 12.
§2.
L-artikli tal-Kostituzzjonijiet jew
Regoli tal-Istituti partikulari, wara li
jiġu addattati għad-dispożizzjonijiet
il-ġodda, għandhom jitressqu
għall-approvazzjoni tas-Santa Sede.
Mogħtija Ruma f’San Pietru, nhar id-29
ta’ Ġunju, Solennità ta’ San Pietru u
San Pawl, tas-sena 2016, ir-raba’
tal-pontifikat tiegħi.
Franġisku
miġjub mit-Taljan għall-Malti minn
Francesco Pio Attard
ħajr ukoll lil Fr Brendan Gatt