|
ITTRA APOSTOLIKA
F’FORMA TA’ «MOTU PROPRIO»
TAL-QDUSIJA
TIEGĦU
IL-PAPA FRANĠISKU
IS-SANTWARJI FIL-KNISJA
Li biha l-ġurisdizzjoni fuq
is-Santwarji qed tkun mgħoddija
lill-Kunsill Pontifiċju
għall-Promozzjoni
tal-Evanġeliżżazzjooni l-Ġdida
1. Fil-Knisja, is-Santwarji
għandhom «valur simboliku kbir»
(1) u li wieħed imur fihom bħala
pellegrin hi stqarrija ġenwina
tal-fidi. Bil-kuntemplazzjoni
tax-xbieha sagra, infatti, tkun
mistqarra t-tama li wieħed iħoss
aktar qawwija l-qrubija ta’ Alla
li jiftaħ il-qalb għall-fiduċja
illi x-xewqat l-aktar profondi
ta’ dak li jkun, ikunu mismugħin
u mitmugħa (2). Il-pjetà
popolari, li hi «espressjoni
awtentika tal-azzjoni
missjunarja spontanja tal-Poplu
t’Alla» (3), fis-Santwarju ssib
l-imkien privileġġjat fejn
tista’ tesprimi t-tradizzjoni
sabiħa tat-talb, tad-devozzjoni
u l-fiduċja fil-ħniena t’Alla li
huma inkulturati fil-ħajja ta’
kull poplu.
Infatti, sa mill-ewwel sekli,
il-pellegrinaġġ, qabel kollox,
kien meqjus bħala mixja lejn
l-imkejjen fejn Ġesù Kristu kien
għex, ħabbar il-misteru
tal-imħabba tal-Missier, fejn,
fuq kollox, kien jinstab sinjal
tanġibbli tal-qawmien mill-mewt
tiegħu: il-qabar vojt. Aktar
tard, il-pellegrini bdew jagħmlu
mixjiet lejn imkejjen fejn,
skont it-tradizzjonijiet
differenti, kienu jinstabu
l-oqbra tal-Appostli. Imbagħad,
matul is-sekli, il-pellegrinaġġ
beda jsir ukoll lejn dawk
l-imkejjen, li llum saru
l-maġġoranza, fejn il-pjetà
popolari misset b’idejha
l-preżenza misterjuża ta’ Omm
Alla, tal-Qaddisin u tal-Beati
(4).
2. Sa żmienna, is-Santwarji
f’kull rokna tad-dinja għadhom
sinjal partikulari tal-fidi
sempliċi u umli ta’ dawk li
jemmnu, li f’dawn il-postijiet
sagri jsibu d-dimensjoni
bażilari tal-eżistenza tagħhom
bħala persuni ta’ twemmin.
Hawnhekk huma jħossu b’mod
profond il-qrubija ta’ Alla,
it-tenerezza tal-Verġni Marija u
l-kumpanija tal-Qaddisin:
esperjenza ta’ spiritwalità
awtentika li ma jistax
jitnaqqsilha l-valur tagħha,
inkella jkunu qed jisfgħu
mrażżna l-azzjoni tal-Ispirtu
s-Santu u l-ħajja tal-grazzja.
Ħafna Santwarji, minn dan
l-aspett, kienu jkunu meqjusin
parti mill-ħajja tal-persuni,
tal-familji u tal-komunitajiet
tant, li sawwru l-identità ta’
ġenerazzjonijiet sħaħ, sa laħqu
ħallew timbru fuq l-istorja ta’
xi nazzjonijiet. Il-mewġiet
kbar ta’ pellegrini, it-talb
umli u sempliċi tal-Poplu
t’Alla, li jalternaw
maċ-ċelebrazzonijiet liturġiċi,
il-ħafna grazzji li bosta minn
dawk li jemmnu jistqarru li
qalgħu, is-sbuħija naturali ta’
dawn il-postijiet,
jippermettulna nikkonfermaw kif
fl-għamliet kollha tagħhom,
is-Santwarji huma espressjoni
ta’ opportunità insostitwibbli
għall-evenġeliżżazzjoni fi
żmienna.
3. Minkejja l-kriżi tal-fidi li
qed taħkem id-dinja
kontemporanja, dawn l-imkejjen
għadhom jitqiesu bħala spazji
sagri li lejhom immorru bħala
pellegrini biex insibu waqt li
fih nieqfu, is-silenzju u
l-kontemplazzjoni fil-ħajja
kaotika ta’ jiemna. Xewqat
moħbija jqanqlu f’ħafna
n-nostalġija ta’ Alla; u
s-Santwarji jistgħu jkunu
rifuġju veru fejn wieħed jerġa’
jsib lilu nnifsu u jsib il-forza
meħtieġa biex jikkonverti.
Fl-aħħar mill-aħħar,
(fis-Santwarji) il-fidili jkunu
jistgħu jirċievu s-sapport
għall-mixja ordinarja tagħhom
fil-parroċċa u fil-komunità
Kristjana. Din l-osmosi bejn
il-pellegrinaġġ lejn
is-Santwarju u l-ħajja ta’
kuljum hi għajnuna valida
għall-pastorali, għax
tippermetti li l-impenn
tal-evanġeliżżazzjoni permezz
ta’ testimonjanza aktar
konvinta, jiġġedded.
Għaldaqstant, mixja lejn
is-Santwarju u s-sehem
fl-ispiritwalità li jesprimu
dawn l-imkejjen diġà hija fiha
nfisha att ta’ evanġeliżżazzjoni
li jistħoqqlu jkun valoriżżat
minħabba l-valur pastorali qawwi
li għandu (5).
4. Għalhekk, mill-istess natura
tiegħu, is-Santwarju hu mkien
sagru fejn it-tħabbira tal-Kelma
t’Alla, iċ-ċelebrazzjoni
tas-Sagramenti, partikolarment
tar-Rikonċiljazzjoni u
l-Ewkaristija, flimkien
max-xhieda tal-karità, jesprimu
l-impenn kbir tal-Knisja
għall-evanġeliżżazzjoni; u
għalhekk (is-Santwarju) jieħu
l-karatteristika ta’ mkien
ġenwin ta’ evanġeliżżazzjoni,
fejn sa mill-ewwel tħabbira
saċ-ċelebrazzjoni tal-misteri
qaddisa, tidher ċara l-azzjoni
qawwija li biha taħdem il-ħniena
t’Alla fil-ħajja tal-persuni.
Bis-saħħa tal-ispiritwalità
karatteristika ta’ kull
Santwarju, il-pellegrini
jitmexxew “bil-pedagoġija
tal-evanġeliżżazzjoni” (6) lejn
impenn dejjem aktar responsabbli
kemm fil-formazzjoni Nisranija
tagħhom kif ukoll fix-xhieda
meħtieġa tal-karità li titnissel
minnha. Minbarra dan,
is-Santwarju hu kontribut mhux
żgħir lejn l-impenn kateketiku
tal-komunità Nisranija; (7) li,
fil-fatt jittrasmetti b’mod
koerenti għaż-żmien, il-messaġġ
li ta bidu għat-twaqqif tiegħu,
jgħani l-ħajja ta’ dawk li
jemmnu billi joffrilhom
ir-raġuni biex l-impenn tal-fidi
tagħhom (cfr 1 Ts 1,3)
jkun aktar matur, konxju u
infurmat. Fl-aħħar,
fis-Santwarju jinfetħu beraħ
il-bibien għall-morda,
għall-persuni diżabbli u, fuq
kollox, għall-foqra,
l-emarġinati, ir-rifuġjati u
l-migranti.
5. Fid-dawl ta’ dawn
il-kunsiderazzjonijiet jidher
ċar li s-Santwarji għandhom
sejħa biex ikollhom rwol
fl-evanġeliżżazzjoni l-ġdida
tas-soċjetà tal-lum u li
l-Knisja mħi msejħja biex tagħti
valur pastorali lill-movimenti
tal-qlub li jkunu mistqarra
permezz tal-pellegrinaġġi lejn
is-Santwarji u lejn l-imkejjen
ta’ devozzjoni.
Għaldaqstant, peress li nixtieq
niffaċilita l-iżvilupp pastorali
li jseħħ fis-Santwarji
tal-Knisja, iddeċidejt li
bis-saħħa tal-artiklu 97, 1,
tal-Kostituzzjoni Appostolika
Pastor Bonus, li s’issa
kienet mogħtija
lill-Kongregazzjoni għall-Kleru,
u wkoll minħabba dak li
jipprevedi l-artiklu 151
tal-istess Kostituzzjoni dwar
il-vjaġġi għal għanijiet ta’
pjetà, u, però, mingħajr
preġudizzju għad-drittijiet
leġittimi tal-Awtoritajiet
Ekkleżjastiċi u ta’ dawk li,
permezz ta’ liġijiet speċjali
huwa dritt ta’ organiżmi oħra
fejn jidħlu Santwarji
partikolari, nittrasferixxi
l-ġurisdizzjoni lill-Kunsill
Pontifiċju għall-promozzjoni
tal-Evanġeliżżazzjoni l-Ġdida,.
Bil-konsegwenza li qed
nistabbilixxi li fil-futur ikun
dmir tal-Kunsill Pontifiċju
għall-Promozzjoni
tal-Evanġilazzjoni l-Ġdida:
a) Li jwaqqaf Santawarji
internazzjonali u japprova
l-istatuti rispettivi skont
in-norma kan. 1232-1233 CIC;
b) li jistudja u jwettaq
il-provedimenti meħtieġa li
jiffavorixxu r-rwol ta’
evanġeliżżazzjoni tas-Santwarji
u l-kultivazzjoni
tar-reliġjożità popolari fihom;
c) il-promozzjoni ta’ pastorali
organika tas-Santwaarji bħala
ċentri ta’ stimulu
għall-evanġeliżżazzjoni l-ġdida;
d)
il-promozzjoni ta’ laqgħat
nazzjonali u internazzjonali li
jiffavorixxu ħidma komuni ta’
tiġdid tal-pastorali tal-pjetà
popolari u tal-pellegrinaġġ lejn
l-imkejjen ta’ devozzjoni;
e) il-promozzjoni ta’
formazzjoni speċifika
tal-operaturi tas-Santwarji u
tal-imkejjen ta’ pjetà u
devozzjoni;
f) il-kontroll sabiex
lill-pellegrini, fl-inħawi fejn
ikunu jduru, tingħatalhom
assistenza spiritwali u
ekkleżjali koerenti u sostnuta
li tippermettilhom jieħdu
l-akbar frott personali minn
dawn l-esperjenzi;
g) il-valoriżżazzjoni kulturali
u artistika tas-Santwarji skont
il-via pulchritudinis
bħala metodu tipiku
tal-evanġeliżżazzjoni
tal-Knisja.
Kull ma ddeliberajt b’din
l-Ittra Appostolika f’għamla ta’
Motu Proprio, nordna li
jkun osservat f’kull aspett
tiegħu, minkejja kull ħaġa li
tista’ tkun kontra anke jekk
denja li tissemma’ b’mod
partikulari, u nistabbilixxi li
jkun promulgat permezz
tal-pubblikazzjoni fuq il-ġurnal
ta’ kuljum L’Osservatore
Romano, u jidħol fis-seħħ
ħmistax-il ġurnata wara
l-promulgazzjoni, u mbagħad ikun
imdaħħal fl-Acta Apostolicae
Sedis.
Mogħti fil-Belt tal-Vatikan
fil-11 ta’ Frar, 2017, Tifkira
liturġika tas-Sinjura tagħna ta’
Lourdes, ir-IV sena
tal-pontifikat.
Franġisku
[1] Kongregazzjoni
għall-Kult Divin u d-Dixxiplina
tas-Sagramenti, Direttorju
dwar il-pjetà popolari u
l-liturġija.
Principji
u orjentamenti (2002),
263.
[2] Cfr V
Konferenza Ġenerali
tal-Episkopat Latino-Amerikan u
l-Karibew, Dokument
ta’
Aparecida,
29
ta’ Ġunju,
2007, 259.
[3] Eżort.
App. Il-Ferħ
tal-Vanġelu,
122.
[4] Cfr
Kunsill Pontifiċju tal-Pastorali
għall-Migranti u l-Itineranti, Il-pellegrinaġġ
tal-Ġublew il-Kbir tal-2000
(25
ta’ April, 1998), 12-17.
[5] Cfr Eżort.
App. Il-Ferħ
tal-Vanġelu,
124.126.
[6] Pawlu VI,
Eżort.
App. It-tħabbir
tal-Evanġelju.
[7] Cfr
Kunsill Pontifiċju tal-Pastorali
għall-Migranti u l-Itineranti,
Is-Santwarju,
memorja, preżenza u profezija ta’
Alla l-ħaj (8
ta’ Mejju, 1999), 10.
Miġjub
mit-Taljan għall-Malti minn Joe
Huber |