MESSAĠĠ TAL-QDUSIJA TIEGĦU
FRANĠISKU
GĦALL-JUM DINJI TAL-IKEL, 2019
Lill-Eċċellenza Tiegħu
Is-Sur Qu Dongyu
Direttur Ġenerali tal-FAO
Il-Jum Dinji tal-Ikel ta' kull
sena huwa eku tal-karba ta' tant
ħutna li għadhom iġarrbu t-traġedji
tal-ġuħ u n-nuqqas ta' ikel.
Fil-fatt, minkejja l-isforzi li
saru tul dawn l-aħħar għexieren
ta' snin, l-Aġenda 2030
għall-iżvilupp sostenibbli
għadha biss programm fuq
il-karta f'bosta nħawi tad-dinja.
Biex twieġeb għal dil-karba
tal-umanità, din is-sena l-FAO
issuġġeriet it-tema: "L-azzjonijiet
tagħna huma l-ġejjieni tagħna.
Nieklu sewwa biex fid-dinja ma
jkunx hawn il-ġuħ". Din it-tema
turi li hemm diskrepanza bejn
il-provvista tal-ikel u n-nutrizzjoni.
Qed naraw li l-ikel m'għadux
aktar mezz tal-għixien u qed
isir mezz ta' distruzzjoni
personali. Għalhekk, quddiem
it-820 miljun ruħ bil-ġuħ, fuq
in-naħa l-oħra tal-miżien
għandna 720 miljun ħoxnin
iżżejjed, vittmi ta' drawwiet
żbaljati fin-nutrizzjoni. Dawn
m'għadhomx sempliċiment emblema
tad-dieta "tal-popli
tal-abbundanza" (cfr Pawlu VI,
Enċ. Populorum Progressio),
imma issa bdew jidhru anki
f'pajjiżi fejn il-qligħ huwa
baxx, fejn l-ikel huwa ftit u
ħażin, għax qed jikkupjaw
mudelli ta' nutrizzjoni taż-żoni
sviluppati. Minħabba n-nutrizzjoni
ħażina, il-mard li nsibu fejn
hemm l-abbundanza jista' jiġi
kemm min-nuqqas ta' bilanċ,
mill-iffangarli jħallu l-effetti
tad-dijabete, mard tal-qalb u
xorta ta' mard ieħor
deġenerattiv, kif ukoll minn
sbilanċ "tan-nuqqas", kif juruna
d-dokumenti dwar l-imwiet
minħabba l-anoressija u l-bulimija.
Għaldaqstant jeħtieġ konverżjoni
fil-mod kif inġibu ruħna u
n-nutrizzjoni hi punt tat-tluq
importanti. Aħna ngħixu
bis-saħħa tal-frott li jtina
l-ħolqien (cfr Salm 65, 10-14;
104, 27-28) u dal-frott ma
nistgħux nirriduċuh bħala
sempliċi oġġett ta' użu jew ta'
dominju.
Għal dir-raġuni l-mard
nutrizzjonali jista' jkun
miġġieled biss jekk nikkultivaw
stili ta' ħajja mnebbħin minn
viżjoni grata lejn dak li hu
mogħti lilna, bil-kontroll fuqna
nfusna, il-moderazzjoni,
is-sawm, billi nirbħu lilna
nfusna u bis-solidarjetà:
virtuwjiet li akkumpanjaw
l-istorja tal-bniedem.
Jiġifieri għandna nduru lura
lejn is-sempliċità u
l-moderazzjoni fil-ħajja u
ngħixu kull waqt tal-eżistenza
tagħna bi spirtu attent
għall-ħtiġijiet tal-ieħor.
B'hekk inkunu nistgħu nsaħħu
r-rabtiet tal-fraternità
bejnietna li jimmira lejn il-ġid
komuni u jevita l-individwaliżmu
u l-egoiżmu li ma jġibu xejn
ħlief ġuħ u nuqqas ta'
ugwaljanza soċjali. Stil ta'
ħajja li jtina ċ-ċans
nikkultivaw relazzjoni sana
magħna nfusna, ma' ħutna u
mal-ambjent li ngħixu fih.
Il-post ewlieni fejn aħna nkunu
nistgħu nassimilaw dan l-istil
ta' ħajja huwa l-familja u l-FAO
tat attenzjoni partikolari
lill-ħarsien tal-familja rurali
u l-promozzjoni tal-agrikoltura
fil-gruppi tal-familji. Fi ħdan
il-familja, u grazzi
għas-sensibbiltà femminili u
materna, wieħed jitgħallem
igwadi l-frott tal-art bla ma
jabbuża minnu u jiskopri
strumenti aħjar biex jixterdu
l-istili ta' ħajja għall-ġid
personali u kollettiv.
Min-naħa l-oħra l-interdipendenza
bejn in-nazzjonijiet, li qed
naraw bħalissa, tista' tgħin
biex jingħataw il-ġenb l-interessi
partikolari sabiex jissaħħu l-fiduċja
u r-relazzjonijiet ta' ħbiberija
bejn il-popli (cfr Kompendju
tad-Duttrina Soċjali tal-Knisja
Kattolika, 482). Nawgura li t-tema
magħżula għal dis-sena tgħinna
biex ma ninsewx li għad hemm min
għadu jiekol b'mod li ftit huwa
ta' fejda għas-saħħa. Hija
krudili, inġusta u paradossali
li llum hemm ikel għal kulħadd
iżda, madankollu, mhux kulħadd
għandu aċċess għalih; inkella
hemm reġjuni fid-dinja li fihom
l-ikel jinħela, jintrema, hemm
l-iffangar jew l-ikel ikun użat
għal skopijiet oħra li
m'għandhomx x'jaqsmu man-nutrizzjoni.
Biex noħorġu minn dan iċ-ċirku
jeħtieġ nippromwovu "istituzzjonijiet
ekonomiċi u programmi soċjali li
jippermettu lill-aktar foqra
jkollhom aċċess għar-riżorsi
bażiċi b'mod regolari (Enċ
Laudato sì, 109).
ll-ġlieda kontra l-ġuħ u l-malnutrizzjoni
mhix se tnin sakemm tibqa'
tirrenja esklussivament
il-loġika tas-suq u dment li
nibqgħu nfittxu l-qligħ akkost
ta' kollox u l-ikel nirriduċuh
f'sempliċi prodott kummerċjali
mmexxi mill-ispekulazzjoni
finanzjarja aħna u ngħawwġu l-valur
kulturali, soċjali u immensament
simboliku tiegħu. L-ewwel
preokkupazzjoni tagħna għandha
tkun dejjem il-persuna umana,
speċjalment dawk neqsin mill-ikel
ta' kuljum u li bil-ħniena
jirnexxilhom jieħdu ħsieb
ir-relazzjonijiet familjari u
soċjali (cfr ibid. 112-113).
Meta l-persuna umana titqiegħed
fil-post li jixirqilha, il-ħidma
tal-għajnuna umanitarja u l-programmi
tal-iżvilupp ikollhom impatt
akbar u jagħtu r-riżultati
mixtieqa. Ma nistgħux ninsew li
dak li naħżnu u naħlu huwa ħobż
il-foqra.
Sur Direttur Ġenerali, dawn huma
ftit riflessjonijiet li xtaqt
naqsam miegħek fl-okkażjoni ta'
dal-Jum, filwaqt li nitlob lil
Alla jbierek lil kull wieħed u
waħda minnkom sabiex il-frott
tagħkom jagħmilulkom għammiel
biex b'hekk tibqa' tikber bla
heda l-paċi bħala servizz tal-progress
awtentiku u integrali
tal-familja umana kollha kemm
hi.
Mill-Vatikan, 16 ta' Ottubru,
2019
FRANĠISKU
Miġjub
mit-Taljan għall-Malti
minn Joe Huber
|