Il-Ħadd, 17 ta' Jannar 2016
It-Tieni Ħadd matul is-Sena (Sena Ċ).
Riflessjoni fuq l-Evanġelju ta' San Gwann
(2:1-12) minn Dun Pawl Camilleri. Video
iffilmjat u editjat minn George Palmier.
Iżjed riflessjonijiet fuq l-Evanġelju
issibuhom fil-Youtube Channel - Parrocca
Iklin Malta.
F’dak iż-żmien, sar tieġ f’Kana tal-Galilija,
u omm Ġesù kienet hemm. Ġesù kien mistieden
għat-tieġ hu wkoll flimkien mad-dixxipli
tiegħu.
Billi ma kienx fadal iżjed inbid, omm Ġesù
qaltlu: «Ma għandhomx inbid.» U Ġesù qalilha:
«X’hemm bejni u bejnek, mara? Is-siegħa
tiegħi għadha ma waslitx.» Omm Ġesù qalet
lill-qaddejja: «Agħmlu kulma jgħidilkom hu.»
Issa kien hemm sitt ġarar tal-ħaġar,
imqiegħda hemm għar-rit tal-purifikazzjoni
tal-Lhud, kull waħda minnhom tasa’ xi mitt
jew mija u għoxrin litru. Ġesù qal
lill-qaddejja: «Imlew il-ġarar bl-ilma.» U
dawk imlewhom sax-xifer. Imbagħad qalilhom:
«Issa ħudu minnu u newluh lil dak li qiegħed
jieħu ħsieb il-mejda.» U huma marru
jagħtuhulu.
Hu daq l-ilma mibdul fi nbid; u billi ma
kienx jaf mnejn ġie, għalkemm il-qaddejja li
ħadu mill-ilma kienu jafu, sejjaħ
lill-għarus u qallu: «Kulħadd l-inbid it-tajjeb
iservi l-ewwel; meta mbagħad ikun ħadhom
iġibu dak li jkun inqas tajjeb. Imma int l-inbid
it-tajjeb erfajtu sa issa.»
Dan li għamel Ġesù f’Kana tal-Galilija kien
l-ewwel wieħed fost is-sinjali tiegħu. Bih
wera l-glorja tiegħu u d-dixxipli tiegħu
emmnu fih.
|