Kristu
jgħix, Kristu huwa ħaj!
“Kristu jgħix. Hu t-tama tagħna
u l-isbaħ żgħożija ta’ din id-dinja.
Dak kollu li jmiss isir żagħżugħ,
jiġġedded, ifur bil-ħajja.
Għalhekk, l-ewwel kelmiet li
nixtieq illissen lil kull
żagħżugħ nisrani huma: Hu jgħix
u jridek ħaj!” Hekk tiftaħ l-Eżortazzjoni
appostolika postsinodali
Christus vivit tal-Papa
Franġisku, indirizzata
“liż-żgħażagħ u lill-poplu kollu
ta’ Alla”.
Fl-Eżortazzjoni,
l-Papa, wara li jagħti ħarsa
lejn dak li tgħid il-Kelma ta’
Alla dwar iż-żgħażagħ, juri kif
xi kitbiet juruna kif Alla
jħares lejhom b’għajnejn
differenti u jippreżenta figuri
ta’ żgħażagħ mill-Bibbja. Huwa
jfakkar li Ġesù, dejjem żagħżugħ,
“irid jagħtina qalb dejjem
żagħżugħa,” u li r-relazzjoni
tiegħu man-nies kienet dik ta’
żagħżugħ li kien jaqsam
fil-ħajja kollha ta’ familja
intergrata tajjeb fir-raħal.” Huwa
jħeġġeġ liż-żgħażagħ “biex ikunu
qrib ta’ Ġesù u jkunu jistgħu
jixorbu mill-għajn vera, li
żżomm ħajja l-ħolmiet,
il-proġetti u l-ideali kbar
tagħhom u li tindirizzahom lejn
it-tħabbira ta’ ħajja li hi ta’
min jgħixha.” Il-Papa jgħid
liż-żgħażagħ, “il-Mulej qed
isejħilna biex nixegħlu kwiekeb
fil-lejl ta’ żgħażagħ oħra.”
Dwar iż-żogħżija
tal-Knisja, Franġisku jgħid:
“Nitolbu lill-Mulej jeħles
lill-Knisja minn dawk li jridu
jxejħuha, iżommuha mwaħħla
fil-passat, iwaqqfuha, ma
jħalluhiex tiċċaqlaq.” Huwa
jitlob biex jeħlisha minn
tentazzjoni oħra: “li temmen li
hi żagħżugħa għax tbaxxi rasha
għal dak kollu li d-dinja
toffrilha, li temmen li
tiġġedded jekk taħbi l-messaġġ
tagħha u tinħeba qalb il-kotra.”
Il-Papa jgħid li l-Knisja hi
żagħżugħa meta tkun dak li
tassew hi, “meta tirċievi l-qawwa
tagħha dejjem ġdida mill-Kelma
ta’ Alla, mill-Ewkaristija,
mill-preżenza ta’ Kristu u
tal-qawwa tal-Ispirtu tiegħu
kuljum.” Huwa jgħid li
fil-Knisja “irid ikollna l-kuraġġ
li nkunu differenti, li nikxfu
ħolm ieħor li din id-dinja ma
toffrix, li nagħtu xhieda
tal-ġmiel tal-ġenerożità,
tas-servizz, tas-safa, tal-qawwa,
tal-maħfra, tal-fedeltà
għall-vokazzjoni tagħna, tat-talb,
tat-taqbida għall-ġustizzja u l-ġid
komuni, tal-imħabba għall-foqra,
tal-ħbiberija soċjali.” Huma
sewwasew “iż-żgħażagħ li jistgħu
jgħinuha tibqa’ żagħżugħa.”
Fl-Eżortazzjoni
jingħad li hemm żgħażagħ li
jħossu li l-preżenza tal-Knisja
“tagħtihom fastidju u ddejjaqhom”
minħabba nuqqasijiet li jaraw
fiha, waqt li hemm oħrajn li
“jixtiequ Knisja li tisma’ iżjed,
li ma toqgħodx il-ħin kollu
tikkundanna lid-dinja.”
Franġisku jafferma li ma
nistgħux nillimitaw ruħna u
ngħidu li “ż-żgħażagħ huma l-futur
tad-dinja: huma l-preżent, qed
jagħnuh bil-kontribut tagħhom.”
Għalhekk jeħtieġ nisimgħuhom.”
Min hu msejjaħ ikun missier,
ragħaj u gwida taż-żgħażagħ
għandu jkollu l-ħila “jindividwa
mixjiet fejn oħrajn qed jaraw
biss ħitan, jilmaħ
possibbiltajiet fejn oħrajn
jaraw biss perikli. Għalhekk
il-qalb ta’ kull żagħżugħ
għandha titqies ‘art qaddisa.’”
L-eżortazzjoni
titkellem dwar dak li jgħaddu
minnu żgħażagħ, li jgħixu
f’kuntesti ta’ gwerra, dawk
sfruttati u vittmi ta’ ħtif,
kriminalità organizzata,
traffikar ta’ bnedmin, jasar u
sfruttament sesswali, stupri, u
anki dawk li jġarrbu atti
kriminali u vjolenzi. “Ħafna
żgħażagħ huma użati bħala laħam
tal-priża u bħala għodda biex
teqred, tbeżża’ jew tirredikola
lill-oħrajn. U l-agħar ħaġa hi
li ħafna jinbidlu f’suġġetti
individwalisti, għedewwa u
suspettużi f’kulħadd, u hekk
isiru priża faċli ta’ proposti
li jnaqqsu jbaxxu ġieħ
il-bniedem u ta’ pjanijiet
qerrieda minsuġa minn gruppi
politiċi jew poteri ekonomiċi.”
Iżjed kotrana huma dawk li
jġarrbu xi xorta ta’
emarġinazzjoni u esklużjoni
soċjali għal raġunijiet
reliġjużi, etniċi jew ekonomiċi.
Franġisku jikkwota adolexxenti u
żgħażagħ li “joħorġu tqal u l-pjaga
tal-abort, kif ukoll it-tixrid
tal-HIV, il-bosta xorta ta’
dipendenza (drogi, logħob
tal-azzard, pornografija, u l-bqija)
u s-sitwazzjoni tat-tfal tat-triq.”
“Ma nistgħux inkunu Knisja li ma
tibkix quddiem dawn it-traġedji
ta’ wliedha żgħażagħ. Qatt ma
għandna nidraw.” Il-Papa
jistieden liż-żgħażagħ
“jitgħallmu jibku għal sħabhom
li huma agħar minnhom.”
Meta jitkellem
fuq id-diffikultajiet ta’
żmienna, l-Papa jsemmi l-“ambjent
diġitali”, li ħoloq “mod ġdid ta’
komunikazzjoni” u li “jista’
jiffaċilita ċ-ċirkulazzjoni ta’
informazzjoni. L-internet u x-xbieki
soċjali “saru post essenzjali
biex nilħqu u ninvolvu
liż-żgħażagħ,” imma “huma wkoll
territorju ta’ solitudni,
manipulazzjoni, sfruttament u
vjolenza. Il-midja diġitali
tista’ tesponi għar-riskju ta’
dipendenza, ta’ iżolament u biex
bil-mod il-mod jintilef
il-kuntatt mar-realtà konkreta.”
Il-Papa jsemmi wkoll xejriet
ġodda ta’ vjolenza li jinxterdu
permezz tal-midja soċjali,
fosthom “l-ibbuljar,
il-pornografija, l-isfruttament
tal-persuni għal skop sesswali
jew il-logħob tal-azzard.” Huwa
jfakkar li fid-dinja diġitali
“hemm għaddejjin interessi
ekonomiċi ġganteski.” Hemm
ċrieki magħluqa li “jiffaċilitaw
it-tixrid ta’ informazzjoni u
aħbarijiet foloz, jagħwu bi
preġudizzji u mibegħda.
Il-Papa jitkellem ukoll fuq
żgħażagħ involuti
fil-migrazzjoni, u jsemmi l-isfruttar
tagħhom u l-fatt li jħossuhom
maqlugħa mill-għeruq kulturali u
reliġjużi tagħhom. Il-Papa
jsemmi l-abbużi fuq il-minuri, u
dnubiet oħra, imma jfakkar
liż-żgħażagħ li “hemm triq biex
noħorġu” mis-sitwazzjonijiet
kollha koroh u ta’ tbatija: l-Aħbar
it-Tajba li xxandret fl-għodwa
tal-Qawmien.
Fl-Eżortazzjoni,
liż-żgħażagħ, il-Papa
jħabbrilhom tliet veritajiet
kbar. L-ewwel li, “Alla li hu
mħabba” u għalhekk “Alla jħobbok,
qatt tiddubitah dan” u tista’
“tinxteħet bla nkwiet ta’ xejn
fid-dirgħajn ta’ Missierek
tas-Sema. It-tieni verità hi li
“Kristu jsalvak”. “La tinsa qatt
li hu jaħfer sebgħa għal sebgħa
u sebgħin darba.” Ġesù jħobbna u
jsalvana, għax “tista’ ssalva
biss lil min l-ewwel tkun
ħabbejtu. Tista’ tibdel biss
lil min tkun għannaqt. L-imħabba
tal-Mulej hi ikbar mill-ħażen
kollu tagħna, mid-dgħufijiet u
l-għemejjel imsejkna kollha
tagħna… Hu jaħfrilna u jeħlisna
b’xejn.” It-tielet verità hi li
“Hu jgħix!” “Jeħtieġ niftakruh
dan… għax nirriskjaw li nieħdu
lil Ġesù Kristu biss bħala
eżempju tajjeb mill-imgħoddi,
bħala tifkira, bħala xi ħadd li
salvana elfejn sena ilu. Jekk
“hu jgħix, dan hu garanzija li
t-tajjeb jista’ jsaltan
f’ħajjitna… Allura nistgħu
nieqfu ngemgmu u nibdew inħarsu
’l quddiem.”
“L-imħabba ta’
Alla u r-relazzjoni tagħna ma’
Kristu ħaj ma jżommuniex milli
noħolmu, anzi bil-maqlub, din l-imħabba
tixprunana, tistimulana,
tiftaħna għal ħajja aħjar u
isbaħ. Iż-żagħżugħ, għall-Papa,
huwa dak li jżomm dejjem riġlu
wieħed quddiem l-ieħor, lest
biex jitlaq, biex jagħmel xi
ħaġa, dejjem orjentat ’il
quddiem. Iż-żgħożija ma tistax
tibqa’ “żmien sospiż”, għax “hi
ż-żmien tal-għażliet” f’ambitu
professjonali, soċjali, politiku
u anki fl-għażla tas-sieħeb jew
sieħba jew li wieħed iġib l-ewwel
ulied. L-ansjetà “tista’ ssir
waħda mill-agħar għedewwa meta
twassalna biex inċedu l-armi
xħin niskopru li r-riżultati
mhumiex immedjati. L-isbaħ ħolm
jitwettaq bit-tama, is-sabar u
t-tħabrik, u meta nwarrbu l-għaġla
żejda. Fl-istess waqt, ma
nistgħux neħlu għax ma
nħossuniex fiż-żgur, ma rridux
nibżgħu nirriskjaw jew inkella
li ħa nagħmlu xi żball.”
Franġisku jistieden liż-żgħażagħ
biex ma jgħixux ħajjithom
gallarija, ma jgħaddux ħajjithom
quddiem skrin, ma jirriduċux
ruħhom għal karozzi mitluqa u ma
jħarsux lejn id-dinja qishom
kienu turisti: “Agħmlu ħoss!
Keċċu l-biżgħat li qed
iwaħħlukom… għixu!” Jistedinhom
“jgħixu l-preżent” billi jgawdu
bi gratitudni kull don ċkejken
tal-ħajja mingħajr ma jispiċċaw
“qatt mhuma sodisfatti b’xejn”
jew “ossessjonati bil-pjaċiri
bla tarf”
Il-Papa, meta
jitkellem fuq kif nikbru u
nimmaturaw, jurina bl-importanza
li nfittxu “żvilupp spiritwali”,
li “nfittxu lill-Mulej u nħarsu
l-Kelma tiegħu”, li nżommu
“l-għaqda ma’ Ġesù… għax m’intix
se tikber fil-ferħ u fil-qdusija
biss bil-qawwa u l-ħsieb tiegħek.”
Li tikber “ifisser tgħożż u
ssaħħaħ fik il-ħwejjeġ l-aktar
prezzjużi li tagħtik iż-żogħżija,
imma fl-istess waqt ifisser
inkunu miftuħa biex insaffu fina
dak li mhux tajjeb,” niskopru
min aħna u niżviluppaw il-mod
personali tagħna kif inkunu
qaddisa.”
Il-Papa jitkellem
fuq iż-“żgħażagħ impenjati”, u
jipproponi “liż-żgħażagħ li
jmorru lil hemm mill-gruppi ta’
ħbieb tagħhom u jibnu l-ħbiberija
soċjali, ifittxu l-ġid komuni.
L-ostilità soċjali teqred
familji, pajjiżi u l-istess
dinja. “L-impenn soċjali u l-kuntatt
dirett mal-foqra jibqgħu
okkażjoni fundamentali ta’
skoperta u approfondiment
tal-fidi u ta’ dixxerniment
tal-vokazzjoni.” Iż-żagħażagħ
huma msejħa biex ikunu
“missjunarji kuraġġjużi”, u
jagħtu xhieda kullimkien
tal-Vanġelu b’ħajjithom u ma
nistgħux nistennew li
“l-missjoni ħa tkun ħafifa jew
komda.” Min-naħa l-oħra,
Franġisku jgħid li jiddispjaċih
“jara li xi wħud qed jipproponu
liż-żgħażagħ li jibnu futur bla
għeruq, bħallikieku d-dinja
bdiet issa.” Huwa jistieden
liż-żgħażagħ biex japprezzaw l-anzjani
u l-esperjenza tagħhom.
L-eżortazzjoni
titkellem ukoll dwar
il-pastorali maż-żgħażagħ
u turi kif din trid tkun kapaċi
ssawwar “mixja flimkien”, u
timplika żewġ linji kbar ta’
azzjoni: l-ewwel hi t-tiftixa,
it-tieni l-maturazzjoni. “Dan
jimplika li liż-żgħażagħ
nifhmuhom, nistmawhom u
nħobbuhom, u ma niġġudikawhomx
il-ħin kollu jew nesiġu minnhom
perfezzjoni li ma
tikkorrispondix mal-età tagħhom.”
Fuq il-vokazzjoni,
il-Papa jgħid li hu fundmentali
“li niddixxernu u niskopru li
dak li jrid Ġesù minn kull
żagħżugħ u żagħżugħa hu
qabelxejn il-ħbiberija tiegħu.”
Il-vokazzjoni hi sejħa
għas-servizz missjunarju lejn l-oħrajn,
“għax ħajjitna fuq din l-art
tilħaq il-milja tagħha meta
tinbidel f’offerta.”
F’dak li għandu
x’jaqsam mal-“imħabba u l-familja”,
il-Papa jikteb li “ż-żgħażagħ
iħossu b’ċerta qawwa s-sejħa
għall-imħabba u joħolmu li
jiltaqgħu mal-persuna t-tajba li
magħha jistgħu jibnu familja,” u
s-sagrament taż-żwieġ “igeżwer
din l-imħabba bil-grazzja ta’
Alla, iniżżlilha għeruqha f’Alla
nnifsu.” Minkejja d-diffikultajiet
kollha, “nixtieq ngħidilkom… li
l-familja hi ta’ min jirriskja
għaliha u fiha ssibu l-aqwa
tħeġġiġ biex timmaturaw u l-isbaħ
ferħ x’taqsmu ma’ xulxin.
Tħallux lil min jisirqilkom
il-possibbiltà li tħobbu
bis-serjetà.” “Li temmen li
xejn ma jista’ jkun għal dejjem
hu ingann u gidba… nitlobkom
tkunu rivoluzzjonarji, nitlobkom
tmorru kontra l-kurrent.”
Fejn jidħol ix-xogħol,
il-Papa jikteb: “Nistieden
liż-żgħażagħ biex ma
jippretendux li jistgħu jgħixu
bla ma jaħdmu, dejjem jiddependu
mill-għajnuna tal-oħrajn. Dan
mhuwiex sew, għax ix-xogħol hu
ħtieġa, hu parti mis-sens
tal-ħajja fuq din l-art, triq ta’
maturazzjoni, ta’ żvilupp uman u
ta’ mixja biex nilħqu l-milja
personali ta’ ħajjitna.
Franġisku jitlob liż-żgħażagħ li
fid-dixxerniment ta’ vokazzjoni
ma jaqtgħux barra l-possibbiltà
ta’ konsagrazzjoni lill-Mulej.
Fl-aħħar kapitlu,
l-Papa jfakkarna li “mingħajr l-għerf
tad-dixxerniment nistgħu
faċilment ninbidlu f’pupazzi
qisna merċa mitluqa
għat-tendenzi tal-mument.” Hi
ħidma li titlob spazji ta’
solitudni u ta’ skiet, għax din
hi deċiżjoni personali ħafna li
ħadd ma jista’ jeħodha hu flokna.”
L-Eżortazzjoni
tagħlaq b’“xewqa” tal-Papa
Franġisku: “Għeżież żgħażagħ,
kemm nieħu gost narakom tiġru
b’ħeffa ikbar minn min jeħodha
bil-mod u hu beżżiegħi. Iġru,
miġbuda minn dak il-Wiċċ hekk
maħbub, li aħna nqimu fl-Ewkaristija
mqaddsa u nagħrfu fil-ġisem ta’
ħuna li jbati… Il-Knisja għandha
bżonn tal-qabża tagħkom,
tal-intuwizzjonijiet tagħkom,
tal-fidi tagħkom…”
Patri Joe Saliba
O. Carm.
|