|
TALBA GĦALL-JUM DINJI TAN-NANNIET U L-ANZJANI
Imfakkra kull sena fir-Raba' Ħadd ta' Lulju
Nirringrazzjak, Mulej,
għall-konfort tal-preżenza tiegħek:
inti t-tama tiegħi, il-fiduċja tiegħi, anke meta nħossni waħdi;
sa minn żogħżiti, il-Blata u l-Qawwa tiegħi kont Int!
Nirringrazzjak li tajtni familja u li beriktni b’ħajja twila.
Nirringrazzjak tal-mumenti ta’ ferħ u ta’ qtigħ il-qalb,
għall-ħolm li għentni nwettaq u għal dak li għad irrid inwettaq.
Grazzi għal dan iż-żmien li fih qed issejjaħli biex niġġedded
ħalli nkompli nagħti l-frott.
Żid, Mulej, il-fidi tiegħi, agħmilni strument tal-paċi tiegħek;
għallimni nilqa’ lil dawk li jbatu iktar minni,
biex ma nieqafx noħlom u nitkellem dwar l-għeġubijiet tiegħek
mal-ġenerazzjonijiet il-ġodda.
Ħares u mexxi lill-Papa Franġisku u lill-Knisja,
biex id-dawl tal-Vanġelu jasal sa truf l-art.
Ibgħat l-Ispirtu Tiegħek, Mulej, biex iġedded id-dinja,
ħalli l-maltemp tal-pandemija jittaffa,
il-foqra jitfarrġu u tintemm kull gwerra.
Weżinni fid-dgħufija, u agħtini ngħix bis-sħiħ kull mument li tagħtini,
żgur li inti tkun miegħi kuljum sal-aħħar tad-dinja. Ammen
miġjuba mit-Taljan għall-Malti minn Fr Roy Galdes