|
Novena bi tħejjija għas-Solennita’ ta’ Pentekoste 2021
In-novena hi marbuta mal-kuntest preżenti li qed ngħixu fih bħalissa tal-pandemija. In-novena preferibilment isir waqt il-quddiesa billi jsir ħsieb qasir wara l-Vanġelu marbut mat-tema tan-novena skont il-jum. In-novena tista jsir ukoll barra mill-quddiesa. In-novena tibda l-Ħamis 13 ta’ Mejju.
Il-frott tal-Ispirtu huma: l-imħabba, l-hena, is-sliem, is-sabar, il-ħniena, it-tjieba, il-fidi, il-ħlewwa, ir-rażan.... Jekk ngħixu bl-Ispirtu, ħalli nimxu bl-Ispirtu...(Gal. 5, 22-25)
L-Ewwel jum tan-Novena - Is-solitudni tinbidel fraternita’
“Dawk kollha li kienu jemmnu kienu ħaġa waħda, u kienu jaqsmu kollox bejniethom, ibigħu ġidhom u kulma kellhom u jqassmu d-dħul bejn kulħadd, skont il-ħtieġa ta’ kull wieħed. U kuljum kienu jmorru fit-tempju flimkien, jaqsmu l-ħobż fi djarhom, u jissieħbu fl-ikel bi qlub ferħana u safja..” (Atti 2, 44-46)
Attivita’: Telefonata lil xi persuni li joqgħodu weħidhom
It-tieni jum tan-Novena - Il-biża tinbidel f’qawwa
“F’daqqa waħda ġie mis-sema ħoss bħal ta’ riħ qawwi, u mela d-dar kollha fejn kienu qegħdin. U dehrulhom ilsna qishom tan-nar, li tqassmu u qagħdu fuq kull wieħed minnhom. Imtlew ilkoll bl-Ispirtu s-Santu u bdew jitkellmu b’ilsna oħra, skont ma l-Ispirtu kien jagħtihom li jitkellmu.” (Atti 2, 2-4)
Attivita’: Żjara fejn hu possibli jew telefonata lill-persuni anzjani jew morda.
It-tielet jum tan-Novena - L-indifferenza tinbidel f’ħeġġa u solidarjieta’
“Imma Pietru u Ġwanni weġbuhom: “Għidulna intom jekk hux sewwa quddiem Alla li aħna nisimgħu aktar minnkom milli minn Alla; għax aħna ma nistgħux ma nitkellmux fuq dak li rajna u smajna.” Imbagħad reġgħu hedduhom u telquhom, għaliex minħabba l-poplu ma għarfux kif jaqbdu jikkastigawhom, għax kulħadd kien qiegħed jagħti glorja lil Alla għal dak li ġara.” (Atti 4, 19-21)
Attivita’: Kampanja ta’ ġbir ta’ preserve u oġġetti tal-ikel għall-familji fil-bżonn.
Ir-raba’ jum tan-Novena - L-inġustizzja tinbidel f’ġustizzja, rettitudni
“Ara, jiena ġej dalwaqt, u miegħi nġib il-ħlas ħalli rrodd lil kull wieħed skont ma ħaqqu għal għemilu.” (Ap. 22,12)
Attivita’: F’dan il-jum tal-Ħadd isir talb partikulari waqt il-quddiesa biex issaltan il-ġustizzju u r-rettitudni.
Il-ħames jum tan-Novena - L-egoiżmu jinbidel f’altruwiżmu
“Għax Alla hekk ħabb lid-dinja li ta lil Ibnu l-waħdieni, biex kull min jemmen fih ma jintilifx, iżda jkollu l-ħajja ta’ dejjem. Għax Alla ma bagħatx lil Ibnu fid-dinja biex jagħmel ħaqq mid-dinja, imma biex id-dinja ssalva permezz tiegħu.” (Ġw. 3, 16-17)
Attivita’: Fejn hu possibli ħidma volontarja ma’ xi persuni li għandhom bżonn l-għajnuna tagħna.
Is-sitt jum tan-Novena – Il-faqar jinbidel f’dinjita’
“Il-Mulej ħalaq il-bniedem mill-art,...Tahom żmien u jiem magħduda, u tahom setgħa fuq kulma hawn fuq l-art. Libbishom b’saħħa tixbah lil tiegħu, u għamilhom skont xbihatu. Nissel f’kull ħlejqa l-biża’ tagħhom, u tahom is-setgħa fuq it-tajr u l-bhejjem. Irċevew l-użu ta’ ħames ħidmiet tal- Mulej, qassmilhom id-don tal-moħħ bħala s-sitt wieħed,u bħala s-seba’ r-raġuni għat-tifsir tal-ħidmiet tiegħu.Tahom ir-raġuni, l-ilsien u l-għajnejn, u wkoll il-widnejn u moħħ biex jaħsbu.” (Bin Sirak 17, 1-6)
Attivita’: Tkompli l-kampanja ta’ ġbir ta’ preserve u oġġetti tal-ikel għall-familji fil-bżonn.
Is-seba’ jum tan-Novena – Il-firda tinbidel f’għaqda
“Ibqgħu fija, u jiena nibqa’ fikom. Kif il-fergħa ma tistax tagħmel frott minnha nfisha jekk ma tibqax fid-dielja, hekk anqas intom jekk ma tibqgħux fija. Jiena d-dielja, intom il-friegħi. Min jibqa’ fija u jiena fih, dan jagħmel ħafna frott; għax mingħajri ma tistgħu tagħmlu xejn. Jekk wieħed ma jibqax fija, jintrema barra bħal fergħa, u jinxef; imbagħad, friegħi bħal dawn jiġbruhom u jixħtuhom fin-nar u jinħarqu.” (Ġw. 15, 4-6)
Attivita’: Jum ta’ ċaħda minn l-aktar ħaġa li togħġbok u toffriha bħala talba lil Alla għall-għaqda fil-familji, fil-parroċċi u fil-Knisja.
It-tminn jum tan-Novena – In-niket jinbidel f’hena
“Tassew tassew ngħidilkom, intom għad tibku u tingħu, iżda d-dinja għad tifraħ; għad iġġarrbu n-niket, imma n-niket tagħkom għad jitbiddel f’hena. Il-mara, meta tkun se tiled tħossha mdejqa, għax tkun waslet is-siegħa tagħha; iżda meta tkun twieldet it-tarbija, ma tiftakarx iżjed fl-uġigħ, bil-ferħ li twieled bniedem fid-dinja. Hekk intom, issa tħossukom imdejqa; imma għad nerġa’ narakom u qalbkom tifraħ, u l-ferħ tagħkom ħadd ma jeħodhulkom.” (Ġw. 16, 20-22)
Attivita’: Iżżur fejn hu possibli jew iċċempel lil xi persuni li jinsabu għaddejja minn niket jew tbatija.
Id-disa’ jum tan-Novena – Is-superfiċjalita’ tinbidel essenzjalita’
Għalhekk toqogħdux tinkwetaw ruħkom u tgħidu, “X’se nieklu?’ jew ‘X’se nixorbu?’ jew ‘X’se nilbsu?’, għax dawn huma kollha ħwejjeġ li jfittxuhom il-pagani. Imma Missierkom li hu fis-smewwiet jaf li dan kollu teħtiġuh. Mela fittxu l-ewwel is-Saltna u l-ġustizzja ta’ Alla, u dan kollu jingħatalkom ukoll. Mela toqogħdux tħabblu raskom għall-għada, għax il-jum ta’ għada jħabbel rasu hu għalih innifsu. Biżżejjed hu għall-jum it-taħbit tal-ġurnata.” (Mt. 6, 31-34)
Attivita’: Ieqaf għall-mument biex tara fuq hiex mibnija ħajtek hux fuq dak li hu superfiċjali jew dak li hu essenzjali.
Talb biex jingħad wara t-tqarbin fil-jiem tan-novena bi tħejjija għas-Solennita’ ta’ Pentekoste.
Spirtu ta’ l-għerf, aħna nadurawk: urina x-xejn tal-ħwejjeġ tad-dinja u l-importanza tal-ħwejjeġ tas-sema. Glorja.
Spirtu tal-fehma, aħna nirringrazzjawk: dawwalna bil-fidi biex tmexxina f’kull opra tagħna.
Glorja.
Spirtu tal-kunsill, aħna nfaħħruk: agħmilna ubbidjenti għat-tnebbiħ tiegħek.
Glorja.
Spirtu ta’ qawwa, aħna nberkuk: agħmel li nirbħu dejjem l-għedewwa ta’ ruħna.
Glorja.
Spirtu tax-xjenza, aħna nigglorifikawk: għinna sabiex naqilgħu l-vera sapjenza tal-qaddisin.
Glorja.
Spirtu tal-pjetà, aħna nitolbuk: agħmel li nitolbu aktar bil-ġabra.
Glorja.
Spirtu tal-biża’ ta’ Alla, aħna nħobbuk: żommna dejjem fil-preżenza tiegħek.
Glorja.
jew
Talba għall-miġja ta’ l-Ispirtu s-Santu
Missier etern Alla, f’isem Ġesù Kristu, ibnek, u għall-interċessjoni tal-verġni Marija Immakulata, ibgħat fija l-Ispirtu qaddis tiegħek:
Ejja, Spirtu qaddis, f’qalbi u qaddishieli.
Ejja, missier il-fqajrin u wennisni.
Ejja, ħallieq ta’ kull ġid u farraġni.
Ejja, dawl ta’ l-imħuħ u dawwalni.
Ejja, faraġ ta’ l-erwieħ u hennini.
Ejja, mistieden għażiż u tħallini qatt waħdi.
Ejja, fewġa ħelwa ta’ ħajti u ’tini s-saħħa.
Glorja. (x3)
Spirtu qaddis, imħabba bla tmiem.
Ejja fina bil-ħeġġa tiegħek,
ejja kebbes il-qlub tagħna.
N.B. Litanija lill-Ispirtu s-Santu biex tingħad waqt ir-rużarju fil-jiem tan-novena ...
LITANIJA TAL-ISPIRTU S-SANTU
Mulej ħniena -- Mulej ħniena
Kristu ħniena -- Kristu ħniena
Mulej ħniena -- Mulej ħniena
Missier li tista’ kollox – Ħenn għalina
Ġesù, Iben Etern tal-Missier -- Ħenn għalina
Feddej tad-dinja – Salvana
Spirtu tal-Missier u ta’ l-Iben – Salvana
Ħajja bla qies, tagħhom it-tnejn -- Qaddisna
Trinità Qaddisa -- Ismagħna
Spirtu Santu li ġej mill-Missier -- Inżel f’qalbna
Spirtu Santu, li Int daqs il-Missier u l-Iben -- Inżel f’qalbna
Wegħda t’Alla l-Missier – Ħenn għalina
Raġġ ta’ dawl mis-sema -- Ħenn għalina
Għerq ta’ kull tjubija -- Ħenn għalina
Għajn ta’ l-ilma tas-sema -- Ħenn għalina
Nar imħeġġeġ -- Ħenn għalina
Karità mimlija ħrara -- Ħenn għalina
Balzmu ta’ faraġ spiritwali -- Ħenn għalina
Spirtu ta’mħabba u verità -- Ħenn għalina
Spirtu ta’ għerf u fehma -- Ħenn għalina
Spirtu ta’ kunsill u qawwa -- Ħenn għalina
Spirtu ta’ għaqal u devozzjoni -- Ħenn għalina
Spirtu tal-biża’ qaddis t’Alla -- Ħenn għalina
Spirtu ta’ grazzja u talb -- Ħenn għalina
Spirtu ta’ paċi u ħlewwa -- Ħenn għalina
Spirtu ta’ modestja u innoċenza -- Ħenn għalina
Spirtu s-Santu li jagħti l-faraġ -- Ħenn għalina
Spirtu s-Santu li jqaddes -- Ħenn għalina
Spirtu s-Santu li jmexxi l-Knisja -- Ħenn għalina
Don t’Alla l-Għoli -- Ħenn għalina
Spirtu li jimla’ l-ħolqien kollu -- Ħenn għalina
Spirtu li jagħmilna wlied Alla -- Ħenn għalina
Spirtu s-Santu li jikxfilna l-kruha tad-dnub -- Ħenn għalina
Spirtu s-Santu, ejja u ġedded wiċċ id-dinja -- Ħenn għalina
Spirtu s-Santu, sawwab id-dawl tiegħek f’ruħna -- Ħenn għalina
Spirtu s-Santu, onqox il-liġi tiegħek fuqna -- Ħenn għalina
Spirtu s-Santu, onqox il-liġi tiegħek fuq qalbna -- Ħenn għalina
Spirtu s-Santu, kebbes fina n-nar ta’ mħabbtek -- Ħenn għalina
Spirtu s-Santu, iftħilna t-teżori tal-grazzji tiegħek -- Ħenn għalina
Spirtu s-Santu, għallimna nitolbu tajjeb -- Ħenn għalina
Spirtu s-Santu, dawwalna bid-dawl tiegħek tas-sema -- Ħenn għalina
Spirtu s-Santu, mexxina fit-triq tas-salvazzjoni -- Ħenn għalina
Spirtu s-Santu, agħtina dak l-għerf li hu biss meħtieġ -- Ħenn għalina
Spirtu s-Santu, ħeġġiġna biex nagħmlu dak li hu tajjeb -- Ħenn għalina
Spirtu s-Santu, agħtina l-merti tal-virtujiet kollha -- Ħenn għalina
Spirtu s-Santu, kun Int il-premju tagħna ta’ dejjem -- Ħenn għalina
Ħaruf t’Alla, li tneħħi d-dnubiet tad-dinja – Ibagħtilna l-Ispirtu s-Santu
Ħaruf t’Alla, li tneħħi d-dnubiet tad-dinja –Ferra’ f’ruħna d-doni ta’ l-Ispirtu s-Santu
Ħaruf t’Alla, li tneħħi d-dnubiet tad-dinja –Agħtina l-Ispirtu ta’ għerf u qdusija
Ejja Spirtu s-Santu ! Imla’ l-qlub tal-fidili u kebbes fihom in-nar ta’ Imħabbtek Ammen