IS-SINODU JEW IL-ĠUBLEW

Biex is-sinodu jkun ġrajja ġubilari u l-ġublew isir proċess sinodali

“Għandna l-ġublew, għandna s-sinodu. Issa ħierġa t-tieni parti tal-Laudato si’, sintendi għal min ġa qara l-ewwel waħda. Qrajna li l-Papa qed iħejji ittra fuq Santa Tereża tal-Bambin Ġesù. Għadna għaddejjin bil-ħidma fuq il-pjan pastorali. Xi ħadd reġa’ ħolom bid-dokumenti tal-Konċilju. U dan kollu, minbarra l-attivitajiet tagħna tas-soltu fil-parroċċa jew fl-għaqda. Aħna ma’ xhiex ħa naqbdu nlaħħqu? Minn xhiex ħa nibdew?”

Argument li smajtu diversi drabi, kif kważi ċert li smajtu inti wkoll. Kultant l-argument ikun kważi konvinċenti. “Mhux aħjar neħilsu minn dak li għad għandna x’nagħmlu fuq il-pjan pastorali qabel naqbdu fuq is-sinodu jew il-ġublew?”

Nistqarr li ġieli kont kważi ħa ngħid, “Għandek raġun. Aħjar nagħmlu hekk.” Imma meta ftakart li l-istess Konċilju Ekumeniku Vatikan II, li seħħ sittin sena ilu, għad irid iseħħ, allura ntbaħt li b’dan il-mod ta’ raġunar jilħaq jgħaddi s-sinodu u jiġi ieħor, jilħaqq jgħaddi l-ġublew u jasal ta’ warajh, u min jaf kemm aktar, bla ma nkunu għadna bdejna nagħmlu xejn. Allura minn fejn ħa nibdew, mill-ġublew jew mis-sinodu?

Jiena ċert li l-ewwel pass irid ikun li nibdlu l-attitudni. Ma nistgħux nibqgħu nħarsu lejn il-ħajja tal-Knisja bħala kalendarju ta’ ġrajjiet u ħidmiet. L-istess kif ma nistgħux inħarsu lejn il-fidi tagħna bħala lista ta’ dommi li rridu nemmnu u liġijiet li rridu nosservaw. Is-sena liturġika tal-Knisja hija ferm aktar minn orarju ta’ quddies, festi u ċelebrazzjonijiet, hija qabel xejn stedina, li saret lill-ewwel dixxipli u li llum qed issir lili u lilek. “Kelli xewqa kbira li nagħmel din l-ikla tal-Għid magħkom.” [Lq 22:15] Dan kollu għaliex l-Evanġelju mhux sempliċi rakkont ta’ ġrajjiet, mirakli u diskorsi ta’ Ġesù li seħħew 2000 sena ilu, imma huwa laqgħa ħajja u personali li Kristu nnifsu jixtieq ikollu miegħi u miegħek illum.

Pellegrini tat-Tama

Dak li l-Papa Franġisku qed jistedinna għalih fl-okkażjoni tal-Ġublew 2025, li nkunu Pellegrini tat-Tama, mhux ħa jintemm sentejn oħra. Forsi dakinhar inkunu għadna bilkemm bdejna. Il-pellegrinaġġ li jirreferi għalih il-logo, mhux biss għal dawk li ser ikollhom l-opportunità li jmorru Ruma, imma għalina lkoll. Anke għal dawk li lanqas biss jistgħu joħorġu minn kamrithom jew jinżlu minn soddithom. Forsi għal dawn trid tkun sejħa aktar speċjali milli għall-oħrajn.

Is-Sinodu …

Is-Sinodu? Huwa minnu li hemm laqgħat differenti li jsiru matul il-proċess. Minnu li fl-istorja tal-Knisja, b’mod speċjali dik ricenti, kellna diversi sinodi b’diversi temi. Imma dak li huwa aktar importanti mis-sinodu nnifsu, hija s-sinodalità. Mhux il-laqgħat fihom infushom, għalkemm dawn huma importanti, mhux il-ġrajjiet minkejja li dawn iridu jsiru, imma l-attitudni, għaliex il-laqgħat jispiċċaw, il-ġrajjiet jiġu u jmorru, imma l-attituidni trid tibqa’. Trid tkun attitudni ta’ komunjoni, parteċipazzjoni u missjoni. Dan huwa dak li l-Knisja qed tenfasizza fuqu għal matul dan is-sinodu li għaddejja minnu. Hija attituidni li trid tibqa’ fina bħala individwi u bħala komunità, anke wara li s-sinodu jkun intemm. Anke għal matul il-Ġublew.

… jew il-Ġublew?

Il-Ġublew? Iva. dan il-ġublew ukoll huwa ġrajja importanti, kif wara kollox kienu importanti kull ġublew ieħor li l-Knisja sejħet matul l-istorja tagħħa u kif ser ikunu importanti anke dawk li għad iridu jiġu, b’mod speċjali dak li jmiss fl-2033 u li jimmarka l-2000 anniversarju mill-akbar ġrajja li qatt seħħet fl-umanità, il-passjoni, il-mewt u l-qawmien mill-imwiet tal-Mulej tagħna, Kristu Ġesù.

Dan il-ġublew huwa ġrajja importanti, daqkemm huma importanti wkoll il-laqgħat u ċ-ċelebrazzjonijiet li ser isuru matulu. Imma dak li huwa aktar importanti mill-ġublew innifsu, dak li jrid jibqa’ wara li l-ġrajja tkun intemmet, huwa dak li l-Knisja qed tistedinna għalih permezz tiegħu, ċioè li niskopru lkoll is-sejħa komuni tagħna li nkunu Pellegrini tat-Tama. Il-pellegrinaġġ la ħa jibda issa u lanqas ħa jintemm fl-2025, għax aħna msejjħa li niskopruh kuljum fiċ-ċirkustanzi kollha tal-ħajja tagħna, bħala insara, bħala Knisja u bħala soċjetà. Huwa mixja li rridu nagħmlu flimkien mal-oħrajn u ma’ Kristu. Inkella minflok pellegrinaġġ ikunu tlajjar fil-vojt. Il-bżonn kbir tat-tama li hija t-tema ewlenija tal-ġublew, la beda llum u lanqas ħa jintemm mal-ġublew, imma rridu nibqgħu nimxu fit-triq tagħha l-jiem kollha ta’ ħajjitna; mhux għalina biss, imma għall-umanità kollha, għaliex kif stqarr il-Papa Franġisku fl-ittra tiegħu lill-Monsinjur Fisichella, hija l-umanità kollha li għandha bżonn ta’ ħafna tama.

Komunjoni, parteċipazzjoni, missjoni.

Għal ġublew ukoll jeħtieġ ikollna attitudni sinodali. Anke hawn jeħtieg l-istil ta’ komunjoni, parteċipazzjoni u missjoni. Huwa l-uniku mod kif din il-ġrajja tista’ tibqa ħajja, anke wara li tkun intemmet. Forsi mhux dan kien ukoll l-istil ta’ Vatikan II, komunjoni, parteċipazzjoni, missjoni?

Komunjoni, parteċipazzjoni, missjoni, mhumiex biss is-sejħa għas-sinodu jew għal matulu. Huma sejħa għal dak kollu li nwettqu u ngħixu fil-Knisja u magħħa. Huma l-uniku mod li permezz tiegħu aħna Knisja. Huma l-uniku mod kif dak li nwettaq jien u li twettaq int, ma nkunux qed inwettquh jiena jew int, imma aħna, il-Knisja kollha – dak il-ġisem li tiegħu Kristu huwa r-ras.

Komunjoni, partecipazzjoni, missjoni. Huma l-uniku mod kif is-sinodu jkun ġrajja ġubilari u kif il-ġublew isir proċess sinodali. Permezz tagħħom nistgħu niskopru aħna wkoll u nagħmlu tagħna dak li stqarr Ġesù fis-Sinagoga ta’ Nazaret. “L-Ispirtu tal-Mulej fuqi, għax hu kkonsagrani. Bagħatni nħabbar il-ħelsien lill-imjassrin, inwassal il-bxara t-tajba lill-fqajrin, u d-dawl mill-ġdid lill-għomja, inrodd il-ħelsien lill-maħqurin u nxandar sena tal-grazzja tal-Mulej.” [Lq:4:18-19]

Dan huwa l-ġublew! Dan ukoll huwa s-sinodu!

Iva, għax l-Ispirtu tal-Mulej fuqna, hu kkonsagrana. Bagħatna nħabbru l-ħelsien lill-imjassrin, inwasslu l-bxara t-tajba lill-fqajrin, u d-dawl mill-ġdid lill-għomja, inroddu l-ħelsien lill-maħqurin u nxandru sena tal-grazzja tal-Mulej.

Minn Joe Farrugia