ŻJARA TAL-QDUSIJA TIEGĦU FRANĠISKU
FIL-BELT TA’ VERONA
LAQGĦA TAL-PAPA MAT-TFAL U L-ADOLOXXENTI
Pjazza San Zeno (Verona)
Is-Sibt, 18 ta’ Mejju, 2024
IL-PAPA FRANĠISKU:
Sewwa… Il-jum it-tajjeb!
Issa nibdew niddjalogaw… Ħbiebkom se jagħmlu xi mistoqsijiet..
L-ewwel mistoqsija: Fl-Evanġelju Ġesù jsejjaħ lid-dixxipli biex jimxu warajh minkejja li mhumiex perfetti. Kif nagħmlu biex nisimgħu s-sejħa tiegħu?
IL-PAPA FRANĠISKU
Din hi mistoqsija importanti ħafna. X’għandi nagħmel biex nisma’ s-sejħa ta’ Ġesù? Għax fl-Evanġelju naraw li Ġesù jsejjaħ lid-dixxipli li ma kinux perfetti, kienu nies komuni, u jien li jien tifla, tifel, komuni, x’għandi nagħmel biex nisma’ s-sejħa ta’ Ġesù? Għidli ħaġa: meta int tkun ma’ missieriek, ma’ ommok, man-nanniet, tħossok komdu? (Iwieġbu: Iva!) u hemm inti tħossok maħbub: l-imħabba ta’ missier, ta’ omm, ta’ nannu, ta’ nanna. Meta int tagħmel ħaġa tajba, per eżempju jkollok żewġ ħelwiet u tagħti waħda lil xi ħaddieħor, jew jekk tara persuna fil-bżonn u ttiha xi ħaġa tal-flus, tħossok sew? (Iwieġbu: Iva! Ħafna!). Tajjeb ħafna… U meta, per eżempju, int tgħid gidba, tħossok sew? (Iwieġbu: Le!) Bravi, bravi…u meta tiġġieled ma’ ħuk, ma’ oħtok, tħossok sew? (Iwieġbu: Le!). Intom qed tindunaw li kapaċi “tħossu”: tħossukom sew, ma tħossukomx sew jekk ma tisimgħux jew tagħmlu xi ħaġa. Meta Ġesù jitkellem – isimgħuha sewwa din – meta Ġesù jitkellem, inissel il-ferħ fi qlubna. Fhimtu? Iva!. Issa nsaqsikom: meta Ġesù jitkellem, kif inħossuna? (Iwieġbu: Tajjeb!) Kif? (Iwieġbu: Tajjeb!) Bravi! U hekk ikollna ħila nisimgħu s-sejħa ta’ Ġesù, għax Ġesù jgħinna nħossuna sew. U jekk tiġi persuna li ma tħobbokx u ttik daqtejn ta’ ħarta, kif tħossok? (Iwieġbu: Ħażin!) U jekk jiġi x-xitan jgħidlek xi ħaġa, kif tħossok? (Iwieġbu: Ħażin!). Hekk intom fhimtu sewwa dak li nħossu meta jiġi Ġesù u xi nħossu meta nagħmlu xi ħaġa kerha. Fhimtu sew? (Iwieġbu: Iva!). Meta jiġi Ġesù kif inħossuna? (Iwieġbu: Tajjeb!); u jekk naraw jew nagħmlu li ħaġa kerha kif inħossuna? (Iwieġbu: Ħażin!) Ah! Bravi! Kuraġġ! Complimenti!
It-tieni mistoqsija: Ġesù jibgħat lid-dixxipli fid-dinja kollha, kif nistgħu nkunu sinjal ta’ paċi aħna t-tfal?
IL-PAPA FRANĠISKU
Ġesù jibgħat lid-dixxipli tiegħu fid-dinja kollha, dan hu minnu. Għax lill-Appostli Ġesù qalilhom: “Morru u xandru l-Bxara t-Tajba”. Ġesù jibgħat lid-dixxipli, lill-Appostli u lilna lkoll biex nipprietkaw fid-dinja kollha, ċertament… Iżda l-mistoqsija hi: aħna, issa, kif nistgħu nkunu sinjal ta’ paċi fid-dinja? Intom tafu li f’din id-dinja, propju f’dal-ħin, id-dinja tinsab fi gwerra. Tafuh dan? Hawn tant gwerer, tant gwerer, kemm fl-Ukrajna, fl-Art Imqaddsa, fl-Afrika, fil-Myanmar... Bosta u bosta gwerer… U Ġesù jipprietka l-gwerra jew il-paċi? (Iwieġbu: Il-paċi!). U aħna x’għandna nagħmlu, il-gwerra jew il-paċi? (Iwieġbu: Il-paċi). Jiġifieri li għandna nkunu sinjal ta’ paċi, mhux hekk? (Iwieġbu: Iva!) Imma jekk int ikollok xi tgħid ma’ xi tifel, tifla mill-iskola, tkun sinjal ta’ paċi? ((Iwieġbu: Le!). Ma tinstemgħux sew.. (iwieġbu: Le!). Għandna nkunu sinjal ta’ paċi, naqsmu mal-oħrajn, niżirgħu t-tajjeb, nisimgħu lill-oħrajn, nilgħabu magħhom imma mhux niġġieldu magħhom. Ngħiduha flimkien: Għandna nkunu sinjal ta’ paċi! Flimkien! (Iwieġbu: għandna nkunu sinjal ta’ paċi!) Intom bravi, intom bravi! Complimenti!
Issa l-aħħar mistoqsija…
It-tielet mistoqsija: Aħna t-fal tal-iskola sekondarja, li qed nagħmlu l-festa biex ngħaddu għall-iskola superjuri, kif nistgħu nibqgħu fil-fidi fil-waqtiet ta’ diffikultà u ma nibżgħux nieħdu deċiżjonijiet kontra l-kurrent?
IL-PAPA FRANĠISKU
Bravu! Mistoqsija diffiċli… Kif nistgħu nibqgħu fil-fidi fil-mumenti fejn kollox hu iswed, diffiċli. Per eżempju, kif nistgħu nibqgħu sħaħ fil-fidi quddiem il-mewt ta’ xi persuna għażiża, in-nanniet, iz-zijiet u xi drabi l-missier, l-omm? Waqt dawn id-diffikultajiet, fil-mumenti diffiċi, iebsin, kif nistgħu nibqgħu fil-fidi? Anzi, kif nistgħu naqdfu kontra l-kurrent, għax jgħidulna: «imma int trid tibqa’ għaddej? Israq dan….» Għandna nisirqu? (Iwieġbu: Le!) Le? Mintomx konvinti… Nistgħu nisirqu? (Iwieġbu: Le!) U intom, biex ma tagħmlux xi ħaġa kerha, għandkom tmorru kontra l-kurrent, fhimtuha din? (Iwieġbu: Iva!). Nagħmlu dak li ħaddieħor forsi ma jagħmlux. Kif nistgħu ngħelbu l-biża’ li mmorru kontra l-kurrent? Dil-mistoqsija nagħmilha jien lilkom. Xi ħadd kuraġġuz, iwieġeb... X’għandna nagħmlu biex naqdfu kontra l-kurrent? (Xi ħadd iwieġeb: Nisimgħu l-qlubna!) Bravu! Xi ħadd ieħor… (Xi ħadd iwieġeb: Il-kuraġġ!) Tajjeb, tajjeb, għajtu aktar… (Iwieġbu: Il-Kuraġġ!) Bravi, bravi! Hekk qed ittuni pjaċir.. isimgħu ħaġa: tibżgħux tmorru kontra l-kurrent jekk tkunu tridu tagħmlu xi ħaġa tajba, fhimtu? (Iwieġbu: Iva!) Għandna nibżgħu mmorru kontra l-kurrent? (Iwieġbu: Le!) Intom bravi! Grazzi għeżież, grazzi!
Issa ngħidu talba flimkien, nitolbu flimkien. “Missierna, li inti fis-smewwiet…”. Issa fis-skiet nirċievu l-barka. (Iberikom).
Fil-ħajja tagħna għandna nbierku jew nisħtu? (Iwieġbu: Inbierku!) Inbierku lix-xitan ukoll? (Iwieġbu: Le!) Tajjeb… intom bravi! Ibqgħu sodi! Grazzi!
Miġjub għall-Malti mit-Taljan minn Joe Huber