VJAĠĠ
APPOSTOLIKU TAL-QDUSIJA TIEGĦU FRANĠISKU(
fl-UNGERIJA
(28 - 30
ta’ April, 2023)
REGINA CAELI
Budapest, Pjazza
Kossuth Lajos
Il-Ħadd, 30
ta’ April,
2023
Irrodd ħajr lill-Kardinal Erdő għall-kliem li ndirizzali. Insellem lis-Sinjura President, lill-Prim Ministru u lill-Awtoritajiet preżenti. Issa li rġajt sejjer lura lejn Ruma nixtieq nesprimi rikonoxxenza lilhom, lil ħuti Isqfijiet, lis-saċerdoti, lill-persuni konsagrati rġiel u nisa u lill-għażiż popli ungeriż kollu għall-akkoljenza u l-għożża li ħassejt dawn l-aħħar jiem. U nesprimi gratitudni lejn min ġie hawn mill-bogħod u lil min ħadem u ħadem tant tajjeb biex setgħet isseħħ diż-żjara. Ngħid lil kulħadd köszönöm, Isten fizesse! (Grazzi, Alla jroddilkom lura!) Tifkira speċjali għall-morda u l-anzjani, għal min ma setax ikun hawn, min iħossu waħdu u min tilef il-fidi f’Alla u t-tama fil-ħajja. Jien qribkom, nitlob għalikom u nberikkom.
Insellem lid-Diplomatiċi u lil ħuti ta’ konfessjonijiet insara oħra. Grazzi tal-preżenza tagħkom u grazzi għaliex f’dal-pajjiż il-konfessjonijiet u r-reliġjonijiet differenti jiltaqgħu u jwieżnu lil xulxin. Il-Kardinal Erdő qal li hawnhekk ilkom tgħixu “elf sena fil-konfini orjentali tal-kristjanità oċċidentali”. Sabiħ li l-konfini ma jirrappreżentawx fruntieri li jifirdu, iżda żoni ta’ kuntatt; u li dawk li jemmnu fi Kristu jqiegħdu fl-ewwel post il-karità li tgħaqqad u mhux id-differenzi storiċi, kulturali u reliġjużi li jifirdu. Jorbotna flimkien l-Evanġelju u huwa biss meta nduru lejn dik l-għajn li l-mixja bejn l-insara tista’ tkompli miexja skont ir-rieda ta’ Ġesù, ir-Ragħaj it-tajjeb li jridna magħqudin f’merħla waħda.
Induru issa lejn il-Madonna. F’idejha Magna Domina Hungarorum, (il-Kbira Reġina tal-Ungeriżi), li tinvokawha bħala Reġina u Patruna, nafda lill ungeriżi kollha. U minn dil-belt kbira u minn dal-pajjiż nobbli rrid inqiegħed f’qalbha l-fidi u l-ġejjieni tal-Kontinent ewropew kollu, li tant ftakart fih dal-ġranet, u b’mod partikolari l-kawża tal-paċi. Verġni Mqaddsa, ħares lejn il-popli li qed isofru. Ħares fuq kollox lejn il-poplu martri ġâr tal-Ukrajna u lejn il-poplu russu, it-tnejn ikkonsagrati lilek. Inti Reġina tal-Paċi, nissel fil-qlub tal-bnedmin u ta’ min hu responsabbli fost in-nazzjonijiet, ix-xewqa li jibnu l-paċi, li lill-ġenerazzjonijiet li ġejjin ituhom futur ta’ tama, mhux ta’ gwerra; ġejjieni mimli bennieni, mhux bl-oqbra; dinja ta’ aħwa mhux ta’ ħitan.
Aħna nħarsu lejk, Qaddisa Omm Alla: wara l-qawmien ta’ Ġesù int akkumpanjajt l-ewwel passi tal-komunità nisranija, għamiltha perseveranti u bnejtha fl-armonija bit-talb (cfr Atti 1, 14). Hekk żammejt magħqudin lil dawk li jemmnu u ħarist l-għaqda bl-eżempju manswet u ta’ qadi. Nitolbuk għall-Knisja fl-Ewropa, sabiex issib mill-ġdid il-qawwa tat-talb, sabiex mill-ġdid titgħallem minnek l-umiltà u l-ubbidjenza, il-ħeġġa tax-xhieda u s-sbuħija tal-aħbar. Nafdawlek lil dil-Knisja u lil dal-pajjiż. Int li fraħt meta Ibnek qam, fawwrilna qlubna bl-hena tiegħu. Għeżież ħuti, dan nawguralkom, li tferrxu l-ferħ ta’ Kristu: Isten éltessen! (Awguri!). Inħossni grat għal dawn il-ġranet, inżommkom f’qalbi u nitlobkom titolbu għalija. Isten áld meg a magyart! (Alla jbierek lill-ungeriżi!)
Miġjub għall-Malti mit-Taljan minn Joe Huber