|
|
|
IL-PAPA FRANĠISKU
UDJENZA ĠENERALI
Pjazza San Pietru
L-Erbgħa 19 ta’ April
2017
It-Tama Nisranija
– 19.
Kristu
Rxoxt it-tama tagħna
(ara 1 Kor
15)
Għeżież ħuti, l-għodwa
t-tajba!
Illum qed niltaqgħu għad-dawl
tal-Għid, li ċċelebrajna u nkomplu niċċelebraw
bil-Liturġija. Għalhekk, fil-mixja tagħna ta’ katekeżi fuq
it-tama Nisranija, illum nixtieq inkellimkom fuq Kristu Rxoxt, it-tama
tagħna, kif jippreżentah San Pawl fl-Ewwel Ittra lill-Korintin (ara
kap. 15).
L-Appostlu jrid isolvi problematika li żgur
li fil-komunità ta’ Korintu kienet fil-qalba ta’ diskussjonijiet jaħarqu.
Il-qawmien hu l-aħħar argument li taffronta l-Ittra, imma aktarx,
fl-ordni tal-importanza, hu l-ewwel wieħed: fil-fatt kollox jistrieħ
fuq dan il-presuppost.
Huwa u jkellem lill-Insara tiegħu, Pawlu
jitlaq minn ċertezza kbira, li mhix il-frott ta’ riflessjoni ta’ xi
raġel għaref, imma fatt, sempliċi fatt li daħal
fil-ħajja ta’ xi persuni. Il-Kristjaneżmu minn hawn jitwieled. Mhux
xi ideoloġija, mhux xi sistema filosofika, imma mixja ta’ fidi li titlaq
minn ġrajja, li xhieda tagħha huma l-ewwel dixxipli ta’ Ġesù.
Pawlu dan kollu jiġbru hekk: Ġesù miet għal dnubietna, ġie
midfun, u fit-tielet jum qam u deher lil Pietru u lit-Tnax (ara 1 Kor 15:3-5).
Dan hu l-fatt: miet, indifen, qam u deher. Mela Ġesù huwa ħaj! Din hi
l-qalba tal-messaġġ Nisrani.
Meta jħabbar din il-ġrajja, li hi
l-qalba tal-fidi, Pawlu fuq kollox jisħaq fuq l-aħħar element
tal-Misteru tal-Għid, jiġifieri fuq il-fatt li Ġesù qam.
Fil-fatt, kieku kollox kellu jintemm mal-mewt, fih kien ikollna eżempju
tal-ogħla għotja, imma dan ma kienx ikun biżżejjed biex
iwelled il-fidi tagħna. Kien eroj. Le! Miet, imma qam. Għax il-fidi
titnissel mill-qawmien. Li naċċettaw li Kristu miet, u miet mislub,
mhuwiex att ta’ fidi, hu fatt storiku. Imma li nemmnu li hu qam, iva. Il-fidi
tagħna titwieled fl-għodwa tal-Għid. Pawlu jagħtina lista
tal-persuni li lilhom deher Kristu Rxoxt (ara vv. 5-7). Hawn għandna
ġabra ċkejkna tar-rakkonti kollha tal-Għid u tal-persuni kollha
li ltaqgħu mal-Irxoxt. Fuq nett tal-lista hemma Kefa, jiġifieri
Pietru, u l-grupp tat-Tnax, imbagħad “ħames mitt aħwa” li
ħafna minnhom kienu għadhom jistgħu jagħtu x-xhieda
tagħhom, imbagħad jissemma Ġakbu. Fl-aħħar tal-lista –
qisu kien l-iżgħar fost kulħadd – ipoġġi lilu nnifsu.
Pawlu jgħid hekk fuqu nnifsu: “qisni twelidt mormi qabel il-waqt” (ara v.
8).
Pawlu juża din l-espressjoni għax
l-istorja personali tiegħu hi drammatika: hu ma kienx xi abbati, imma kien
persekutur tal-Knisja, kburi bil-konvinzjonijiet tiegħu; kien iħossu
bniedem ta’ suċċess, b’idea ċara ħafna ta’ x’kienet
il-ħajja bid-dmirijiet tagħha. Imma f’dan il-kwadru perfett – kollox
kien perfett f’Pawlu, kien jaf kollox – f’dan il-kwadru ta’ ħajja
perfetta, jum minnhom wasal dak li assolutament ma kienx qed jistenna:
il-laqgħa ma’ Kristu Rxoxt, fit-triq ta’ Damasku. Hemm ma kienx hemm biss
bniedem li waqa’ mal-art: kien hemm persuna maħtufa minn ġrajja li
kellha taqilbilha ħajjitha ta’ taħt fuq. U l-persekutur isir
appostlu, għaliex? Għax jien rajt lil Ġesù ħaj! Jien rajt
lil Ġesù Kristu Rxoxt! Dan hu l-fundament tal-fidi ta’ Pawlu, kif ukoll
tal-fidi tal-Appostli l-oħra, kif ukoll tal-fidi tal-Knisja, kif ukoll
tal-fidi tagħna.
Kemm hi ħaġa sabiħa naħsbu
li l-Kristjaneżmu, essenzjalment, hu dan! Mhux tant li aħna nfittxu
lil Alla – tiftixa li, fil-verità, hi hekk imbandla –, imma pjuttost Alla li
jfittex lilna. Ġesù qabadna, ħatafna, rebaħna għalih biex
ma jitlaqna qatt u qatt iżjed. Il-Kristjaneżmu hu grazzja, hu
sorpriża, u għalhekk jitlob qalb li kapaċi tistagħġeb.
Qalb magħluqa, qalb li tirrazzjonalizza kollox mhijiex kapaċi
tistagħġeb, u ma tistax tifhem x’inhu l-Kristjaneżmu. Għax
il-Kristjaneżmu hu grazzja, u l-grazzja nistgħu nifhmuha biss, u
iżjed u iżjed niltaqgħu magħha, fl-għoġba
tal-laqgħa.
Mela, anki jekk aħna midinbin – u lkoll
aħna –, jekk il-proponimenti tagħna li nagħmlu t-tajjeb
baqgħu fuq il-karta, jew jekk, meta nħarsu lejn ħajjitna,
nintebħu li kellna tant fallimenti… fl-għodwa tal-Għid
nistgħu nagħmlu bħal dawk il-persuni li fuqhom jitkellem
il-Vanġelu: immur fil-qabar ta’ Kristu, nara l-ġebla kbira mgerrba, u
naħseb kif Alla qed iwettaq għalija, għalina lkoll, futur li
qatt ma stennejna. Immorru fil-qabar tagħna: kollha għandna xi qabar żgħir
fina. Immorru hemm, u naraw kif Alla kapaċi jqum minn hemm. Hawn jinsab
l-hena, hawn il-ferħ, il-ħajja, fejn kulħadd kien jaħseb li
kien hemm biss dwejjaq, telfa u dalma. Alla jkabbar l-isbaħ ward
tiegħu qalb il-blat l-aktar niexef.
Li nkunu Nsara jfisser ma nibdewx mill-mewt,
imma mill-imħabba ta’ Alla għalina, li rebaħ lill-eqqel
għadu tagħna. Alla hu ikbar mix-xejn, u biżżejjed
xemgħa mixgħula biex tirbaħ l-iktar lejl mudlam. Pawlu
jgħajjat, f’eku tal-profeti: “Fejn hi, ja mewt, ir-rebħa
tiegħek? Fejn hi, ja mewt, in-niggieża tiegħek?” (v. 55). F’dawn
il-jiem tal-Għid, ejjew inġorru f’qalbna din l-għajta. U jekk
jistaqsuna għaliex qed nitbissmu daqshekk jew kif jirnexxielna naqsmu
b’tant sabar mal-oħrajn, allura nistgħu nweġbuhom li Ġesù
għadu hawn, li għadu jgħix ħaj fostna, li Ġesù jinsab
hawn, fil-pjazza, magħna: ħaj u rxoxt.
miġjub mit-Taljan għall-Malti minn Francesco Pio Attard