|
IL-PAPA
FRANĠISKU
UDJENZA ĠENERALI
Awla
Pawlu VI
L-Erbgħa
15 ta’ Frar
2017
It-Tama
Nisranija – 11. It-tama ma tqarraqx bina (ara Rum 5:1-5)
Għeżież
ħuti, l-għodwa t-tajba!
Sa minn
ċkunitna jgħallmuna li mhux sewwa titkabbar bik innifsek.
F’pajjiżi, dawk li jiftaħru jsejħulhom “paguni”. U veru,
għax meta niftaħru b’dak li aħna jew b’dak li għandna, dan,
barra li jġib ċerta suppervja, jikxef ukoll ċertu nuqqas ta’
rispett lejn l-oħrajn, speċjalment lejn dawk li huma inqas ixxurtjati
minna. Imma f’din is-silta tal-Ittra lir-Rumani, l-Appostlu Pawlu
jissorprendina, għax għal darba darbtejn jistedinna niftaħru.
Mela biex nistgħu niftaħru? Għax jekk hu jsejħilna biex
niftaħru, b’xi ħaġa tista’ tiftaħar. U kif nistgħu
nagħmlu dan, bla ma nweġġgħu lill-oħrajn, bla ma
neskludu lil ħadd?
Fl-ewwel każ,
aħna mistednin niftaħru
bil-kotra tal-grazzja li biha mtlejna fi Kristu Ġesù, permezz
tal-fidi. Pawlu jrid jurina li, jekk nitgħallmu naqraw kull ħaġa
bid-dawl tal-Ispirtu s-Santu, nintebħu li kollox hu grazzja! Kollox hu
don! Fil-fatt, jekk noqogħdu attenti, nintebħu li – fl-istorja, kif
ukoll f’ħajjitna – mhux aħna imma qabelxejn hu Alla li qed
jaġixxi. Hu l-protagonista assolut, li joħoloq kollox bħala don
ta’ mħabba, li jinseġ il-ħjata tal-pjan tiegħu ta’ salvazzjoni
u jwasslu għat-twettiq tiegħu minħabba fina, permezz ta’ Ibnu
Ġesù. Minna hu mitlub li nagħrfu dan kollu, li nilqgħuh bi
gratitudni u li nagħmlu minnu motiv ta’ tifħir, ta’ barka u ta’ hena
kbir. Jekk nagħmlu dan, inkunu fis-sliem ma’ Alla u ngħixu fil-ħelsien.
U dan is-sliem imbagħad jinfirex fl-oqsma u r-relazzjonijiet kollha ta’
ħajjitna: inkunu fis-sliem magħna nfusna, inkunu fis-sliem
fil-familja, fil-komunità tagħna, fuq ix-xogħol u mal-persuni li
magħhom niltaqgħu ta’ kuljum fil-mixja tagħna.
Imma Pawlu
jsejħilna niftaħru anki
fit-tiġrib. Din mhux faċli nifhmuha. Dan jidhrilna iktar
diffiċli u jista’ jidher li m’għandu xejn x’jaqsam mal-qagħda
tas-sliem li għadna kemm fissirna. Imma fil-verità hu l-presuppost l-aktar
awtentiku tagħha, l-iktar wieħed veru. Fil-fatt, is-sliem li
joffrilna u li jiggarantilna l-Mulej ma hux in-nuqqas ta’ tħassib, ta’
delużjonijiet, ta’ nuqqasijiet, ta’ motivi ta’ tbatija. Kieku kien hekk,
li kellna nsibu ftit ħin tal-mistrieħ, dak il-mument malajr kien jgħosfor
u żgur nerġgħu nispiċċaw m’aħniex sew. Għax
is-sliem li joħroġ mill-fidi huwa don: hi l-grazzja li nduqu li Alla
jħobbna u li hu dejjem magħna, ma jitlaqna qatt waħidna lanqas
għal waqt wieħed biss ta’ ħajjitna. U dan, kif jafferma
l-Appostlu, iġib is-sabar, għax nafu li, imqar fl-iktar mumenti iebsa
u li jħawduna, il-ħniena u t-tjieba tal-Mulej huma ikbar minn kull
ħaġa oħra u xejn ma jista’ jaqlagħna minn ġo dirgħajh
u mill-komunjoni tagħna miegħu.
Għalhekk li t-tama
Nisranija hi b’saħħitha, għalhekk ma tqarraqx bina. Qatt ma tqarraq bina. It-tama ma tqarraq qatt
bina! Mhix mibnija fuq dak li aħna nistgħu nagħmlu jew inkunu, u
lanqas fuq dak li fih nistgħu naqgħu. Il-bażi tagħha,
jiġifieri l-bażi tat-tama Nisranija, hi l-aktar ħaġa fidila
u żgura li tista’ teżisti, jiġifieri l-imħabba li Alla
nnifsu juri għal kull wieħed u waħda minna. Faċli
ngħiduha: Alla jħobbna. Kollha ngħiduha. Imma aħsbu naqra:
kull wieħed u waħda minna kapaċi jgħid: Jiena ċert li
Alla jħobbni? Din mhux daqshekk faċli ngħiduha. Imma hi vera. Hu
taħriġ tajjeb, dan, li ngħidu lilna nfusna: Alla jħobbni.
Dan hu l-għerq taċ-ċertezza tagħna, l-għerq tat-tama.
U l-Mulej sawwab bil-kotra l-Ispirtu tiegħu fi qlubna – li hi
l-imħabba ta’ Alla – bħala ħallieq, bħala garanti, proprju
biex jista’ jseddaq fina l-fidi u jżomm ħajja din it-tama. U din
iċ-ċertezza: Alla jħobbni. “Imma f’dan iż-żmien ikrah
li għaddej minnu?” – Alla jħobbni. “U lili, li għamilt din
il-ħaġa kerha jew ħażina?” – Alla jħobbni. Dik iċ-ċertezza
ħadd ma jista’ jeħodhielna. U jeħtieġ intennuha bħala
talba: Alla jħobbni. Jiena ċert li Alla jħobbni. Jiena
ċerta li Alla jħobbni.
Issa nifhmu
għaliex l-Appostlu Pawlu jistedinna niftaħru dejjem b’dan kollu. Jien
niftaħar bl-imħabba ta’ Alla, għax hu jħobbni. It-tama li
ngħatatilna ma tifridniex mill-oħrajn, wisq inqas twassalna biex
inbaxxuhom jew inwarrbuhom. Anzi, dan hu don tal-għaġeb li aħna
msejħin insiru “kanali” tiegħu, b’umiltà u sempliċità, għal
kulħadd. U għalhekk l-ikbar ftaħir tagħna jkun dak li
jkollna bħala Missierna Alla li ma jagħmilx preferenzi, li ma jaqta’
lil ħadd barra, imma li jiftaħ daru għall-bnedmin kollha, ibda
minn dawk tal-aħħar u mbiegħda, biex bħala wliedu
nitgħallmu nfarrġu lil xulxin u nwieżnu wieħed
lill-ieħor. U tinsewx: it-tama ma tqarraqx bina.
miġjub mit-Taljan għall-Malti minn
Francesco Pio Attard