|
|
|
IL-PAPA FRANĠISKU
UDJENZA ĠENERALI
Pjazza
San Pietru
L-Erbgħa
1 ta’ Marzu
2017
It-Tama
Nisranija – 13.
Ir-Randan hu mixja ta’ tama
Għeżież
ħuti, l-għodwa t-tajba!
F’dan il-jum,
l-Erbgħa tar-Rmied, nidħlu fiż-Żmien liturġiku
tar-Randan. U ladarba qed nagħmlu ċ-ċiklu tal-katekeżi tagħna
fuq it-tama Nisranija, illum nixtieq nippreżentalkom ir-Randan bħala mixja ta’ tama.
Fil-fatt, din
il-perspettiva dlonk nilmħuha jekk naħsbu kif fil-Knisja r-Randan
beda bħala żmien ta’ tħejjija għall-Għid, u
għalhekk is-sens kollu ta’ dan il-perjodu ta’ erbgħin jum
nistgħu nifhmuh fid-dawl tal-misteru
tal-Għid li lejh hu orjentat. Nistgħu nistħajlu lill-Mulej
Irxoxt isejħilna biex noħorġu mid-dlamijiet tagħna, u
aħna nibdew mexjin lejh, li hu d-Dawl. U r-Randan hu mixja lejn Kristu
Rxoxt, hu perjodu ta’ penitenza, anki ta’ sagrifiċċju, imma mhux
bħala fini fih innifsu, imma maħsub biex jgħinna nirxoxtaw ma’
Kristu, biex iġedded l-identità batteżimali tagħna,
jiġifieri biex nitwieldu mill-ġdid “mill-għoli”,
mill-imħabba ta’ Alla (ara Ġw 3:3). Għalhekk li r-Randan,
min-natura tiegħu, hu żmien ta’ tama.
Biex nifhmu
aħjar xi jfisser dan, irridu nirriferu għall-esperjenza fundamentali
tal-eżodu tal-Israelin mill-Eġittu, li l-Bibbja tirrakkonta fil-ktieb
li jġib dan l-isem: l-Eżodu.
Il-punt tat-tluq hu l-qagħda ta’ jasar fl-Eġittu, il-moħqrija,
ix-xogħol iebes u sfurzat. Imma l-Mulej ma nesiex lill-poplu tiegħu u
l-wegħda tiegħu: isejjaħ lil Mosè u, bi driegħ qawwi,
joħroġ lill-Israelin mill-Eġittu u jmexxihom mid-deżert
lejn l-Art tal-ħelsien. Matul din il-mixja mill-jasar
għall-ħelsien, il-Mulej jagħti lill-Israelin il-liġi, biex
jedukahom kif għandhom iħobbu lilu, is-Sid waħdieni
tagħhom, u kif iħobbu lil xulxin bħal aħwa. L-Iskrittura
turina li l-eżodu hu twil u mimli tiġrib: simbolikament itul
erbgħin sena, jiġifieri t-tul ta’ ħajja ta’ nisel
sħiħ. Nisel li, quddiem il-provi tal-mixja, hu dejjem ittentat jibki
ż-żmien li għadda fl-Eġittu u li jerġa’ lura.
Aħna wkoll ilkoll nafu x’inhi t-tentazzjoni li nerġgħu lura,
ilkoll. Imma l-Mulej jibqa’ fidil u dak il-ġens fqajjar, immexxi minn
Mosè, fl-aħħar jasal fl-Art Imwiegħda. Din il-mixja kollha hi
mwettqa fit-tama: it-tama li
għad jaslu f’dik l-Art, u proprju f’dan is-sens hi “eżodu”,
ħruġ mill-jasar għall-ħelsien. U dawn l-erbgħin jum
huma wkoll għalina lkoll ħruġ mill-jasar, mid-dnub, lejn
il-libertà, lejn il-laqgħa ma’ Kristu Rxoxt. Kull pass, kull taħbit,
kull prova, kull waqgħa u kull qawmien mill-ġdid, kollox għandu
sens biss fi ħdan il-pjan ta’ salvazzjoni ta’ Alla, li għall-poplu
tiegħu jrid il-ħajja u mhux il-mewt, il-ferħ u mhux in-niket.
L-Għid ta’ Ġesù hu l-eżodu
tiegħu, li bih hu fetħilna t-triq biex naslu
għall-ħajja sħiħa, eterna u hienja. Biex jiftħilna din
it-triq, din il-mogħdija, Ġesù kellu jitneżża’ mill-glorja
tiegħu, jiċċekken, isir ubbidjenti sal-mewt, anzi sal-mewt
tas-salib. Biex jiftħilna t-triq għall-ħajja ta’ dejjem swielu
demmu kollu, u grazzi għalih aħna ġejna mifdija mill-jasar
tad-dnub. Imma dan ma jfissirx li hu diġà għamel kollox u aħna
m’hemm bżonn nagħmlu xejn, li hu għadda mis-salib u aħna
“se mmorru l-ġenna bil-ferrovija”. Le, mhux hekk. Is-salvazzjoni
tagħna bla dubju hi don tiegħu, imma, ladarba hi storja ta’
mħabba, titlob l-“iva” tagħna u s-sehem tagħna fi mħabbtu,
kif turina Ommna Marija u warajha l-qaddisin kollha.
Ir-Randan
jgħix b’din id-dinamika: Kristu jimxi qabilna bl-eżodu tiegħu, u
aħna naqsmu d-deżert grazzi għalih u warajh. Hu ttentat
għalina, u rebaħ lit-Tentatur għalina, imma aħna wkoll
irridu bħalu naffrontaw it-tentazzjonijiet u negħlbuhom. Hu
jagħtina l-ilma ħaj tal-Ispirtu tiegħu, imma aħna rridu
nersqu lejn l-għajn tiegħu u nixorbu, fis-Sagramenti, fit-talb,
fl-adorazzjoni; hu d-dawl li jirbaħ id-dlamijiet, u aħna rridu
nixegħlu l-fjamma ċkejkna li ġiet fdata lilna fil-jum
tal-Magħmudija tagħna.
F’dan is-sens
ir-Randan hu “sinjal sagramentali tal-konverżjoni tagħna” (Missal Ruman, Kolletta tal-Ewwel
Ħadd tar-Randan); min jimxi t-triq tar-Randan dejjem jinsab fit-triq
tal-konverżjoni. Ir-Randan hu sinjal sagramentali tal-mixja tagħna
mill-jasar għall-ħelsien, li dejjem trid tiġi mġedda. Mixja
li ċertament hi impenjattiva, kif għandha tkun, għax
l-imħabba titlob impenn, imma hi mixja mimlija tama. Anzi, ngħid iżjed
minn hekk: l-eżodu tar-Randan hu l-mixja li fiha l-istess tama tiġi msawra. It-taħbit
tal-qsim tad-deżert – il-provi kollha, it-tentazzjonijiet,
l-illużjonijiet, it-taqriq kollu… –, dan kollu jiswa biex isawwar tama
qawwija, soda, fuq ix-xempju ta’ dik tal-Verġni Marija, li qalb
id-dlamijiet tal-passjoni u tal-mewt ta’ Binha ssoktat temmen u tittama
fil-qawmien tiegħu, fir-rebħa tal-imħabba ta’ Alla.
B’qalbna
miftuħa għal dan ix-xefaq, nidħlu llum fir-Randan.
Inħossuna parti mill-poplu qaddis ta’ Alla, u nibdew bil-ferħ din
il-mixja ta’ tama.
miġjub mit-Taljan għall-Malti minn
Francesco Pio Attard