|
|
|
L-PAPA FRANĠISKU
UDJENZA ĠENERALI
It-Tama
Nisranija – 9. L-elmu tat-tama (1 Tess 5:4-11)
Għeżież
ħuti, l-għodwa t-tajba!
Fil-katekeżi
li għaddew bdejna l-mixja tagħna fuq it-tema tat-tama billi f’din
il-perspettiva qrajna mill-ġdid xi paġni tat-Testment il-Qadim. Issa
ejjew ngħaddu biex nixħtu dawl fuq l-importanza straordinarja li din
il-virtù għandha fit-Testment il-Ġdid, meta tiltaqa’ mal-element
ġdid irrappreżentat minn Ġesù Kristu u mill-ġrajja
tal-Għid: it-tama Nisranija. Aħna l-Insara, aħna rġiel u
nisa tat-tama.
Dan hu li
joħroġ b’mod ċar sa mill-ewwel test li nkiteb, jiġifieri
l-Ewwel Ittra ta’ San Pawl lit-Tessalonkin. Fis-silta li għadna kemm
smajna, nistgħu nħossu l-freskezza u l-ġmiel kollu tal-ewwel
tħabbira Nisranija. Dik ta’ Tessaloniki hi komunità
żagħżugħa, li ma kinitx ilha mwaqqfa; madankollu, minkejja
d-diffikultajiet u l-ħafna provi, għandha għeruqha
mniżżla fil-fidi u tiċċelebra b’ħeġġa u
b’ferħ il-qawmien tal-Mulej Ġesù. L-Appostlu għalhekk jithenna
f’qalbu ma’ kulħadd, għax dawk li jitwieldu mill-ġdid
fl-Għid isiru tabilħaqq “ulied id-dawl u wlied il-jum” (5:5),
bil-qawwa tal-komunjoni sħiħa tagħhom ma’ Kristu.
Meta kitbilha
Pawlu, il-komunità ta’ Tessaloniki kienet għadha kemm twaqqfet, u ftit
kien hemm snin jifirduha mill-Għid ta’ Kristu. Għalhekk, l-Appostlu
jfittex mod kif ifisser l-effetti u l-konsegwenzi kollha li din il-ġrajja
unika u deċiżiva, jiġifieri l-qawmien tal-Mulej, iġġib
fl-istorja u l-ħajja ta’ kull wieħed u waħda. B’mod partikulari,
id-diffikultà tal-komunità ma kinitx daqshekk li tagħraf li Ġesù qam
mill-mewt, dan kulħadd kien jemmnu, imma li temmen fil-qawmien
mill-imwiet. Iva, Ġesù qam mill-mewt, imma d-diffikultà kienet li temmen
li l-mejtin iqumu. F’dan is-sens, din l-ittra hi attwali daqs qatt qabel. Kull
darba li nsibu ruħna quddiem il-mewt tagħna, jew quddiem dik ta’
persuna għażiża, inħossu li l-fidi tagħna qed
tiġi ppruvata. Ifeġġu d-dubji kollha tagħna,
id-dgħufija kollha tagħna, u nistaqsu lilna nfusna: “Imma tassew li
sa jkun hemm ħajja wara l-mewt…? Ħa nkun nista’ nara u ngħannaq
mill-ġdid lill-persuni li ħabbejt…?”. Din il-mistoqsija
għamlithieli waħda mara xi jiem ilu waqt udjenza, għax kellha
dubju: “Se nerġa’ narahom lil tiegħi?”. Anki aħna, fil-kuntest
attwali, hemm bżonn nerġgħu lura għall-għeruq u
għall-bażi tal-fidi tagħna, biex nifhmu dak li Alla għamel
għalina fi Kristu Ġesù u xi tfisser il-mewt tagħna. Kollha
nibżgħu xi ftit minħabba f’din l-inċertezza tal-mewt.
Jiġini f’moħħi wieħed xwejjaħ, anzjan, twajjeb, li kien
jgħid: “Jien ma nibżax mill-mewt. Nibża’ xi ftit meta
nħossha ġejja”. Minn dan kien jibża’.
Pawlu, quddiem
il-biżgħat u d-dubji tal-komunità, jistedinhom biex iżommu
sħiħa fuq rashom bħal elmu, fuq kollox fit-tiġrib u
fil-mumenti l-iżjed diffiċli tal-ħajja, “it-tama
tas-salvazzjoni”. Hi elmu. Dak li hi t-tama Nisranija. Meta nitkellmu fuq
it-tama, nistgħu naħsbu fiha skont it-tifsira komuni tat-terminu,
jiġifieri f’riferiment għal xi ħaġa sabiħa li
nixtiequ, imma li tista’ sseħħ jew ma sseħħx. Nittamaw li
sseħħ, hi bħal xewqa. Ngħidu aħna, ngħidu: “Nittama
li għada jagħmel ftit bnazzi!”; imma nafu li l-għada jista’
jagħmel temp ikrah… It-tama Nisranija mhix hekk. It-tama Nisranija hi
l-istennija ta’ xi ħaġa li diġà twettqet; hemm il-bieb hemm, u
jien nittama li nasal sal-bieb. Xi rrid nagħmel? Nimxi lejn il-bieb! Jiena
ċert li ħa nasal sal-bieb. Hekk it-tama Nisranija:
iċ-ċertezza li jien miexi lejn xi ħaġa li teżisti,
mhux li jien nixtieq li teżisti. Din hi t-tama Nisranija. It-tama Nisranija
hi l-istennija ta’ xi ħaġa li diġà twettqet u li żgur se
sseħħ għal kull wieħed u waħda minna. Mela anki
l-qawmien tagħna u dak tal-għeżież mejtin tagħna mhux
xi ħaġa li tista’ sseħħ jew le, imma hu realtà ċerta,
għax għandha għeruqha fil-ġrajja tal-qawmien ta’ Kristu.
Mela li nittamaw ifisser nitgħallmu ngħixu fl-istennija.
Nitgħallmu ngħixu fl-istennija u nsibu l-ħajja. Meta mara
tintebaħ li hi tqila, ta’ kuljum titgħallem tgħix fl-istennija
li għad tara l-ħarsa ta’ dik it-tarbija li ġejja. Hekk aħna
wkoll għandna ngħixu u nitgħallmu minn dawn l-istennijiet umani
kif ngħixu fl-istennija li għad naraw lill-Mulej, li għad
niltaqgħu mal-Mulej. Din mhix ħaġa faċli, imma wieħed
jitgħallem: jgħix fl-istennija. It-tama tfisser u timplika qalb umli,
qalb fqajra. Min hu fqir biss jaf jistenna. Min hu diġà mimli bih innifsu
u b’dak li għandu, ma jaf iqiegħed il-fiduċja tiegħu
f’ħadd iżjed jekk mhux fih innifsu.
Jikteb
mill-ġdid San Pawl: “[Ġesù] miet
għalina, sabiex sew jekk inkunu nishru u sew jekk inkunu rieqda meta
jiġi, ngħixu ħaġa waħda miegħu” (1 Tess 5:10).
Dawn il-kelmiet huma dejjem motiv ta’ faraġ u sliem kbir. Anki
għall-persuni maħbuba li ħallewna aħna msejħin nitolbu
biex jgħixu fi Kristu u jkunu f’xirka sħiħa magħna.
Ħaġa li tmissli tassew qalbi hi espressjoni ta’ San Pawl, dejjem
indirizzata lit-Tessalonkin. Lili timlieni biċ-ċertezza tat-tama.
Jgħid hekk: “Hekk inkunu dejjem mal-Mulej” (1 Tess 4:17). Kemm hi
sabiħa: kollox jgħaddi imma, wara l-mewt, sa nkunu dejjem mal-Mulej.
Din hi ċ-ċertezza sħiħa tat-tama, l-istess waħda li,
ħafna żmien qabel, wasslet lil Ġob biex jesklama: “Jien naf li
d-Difensur tiegħi ħaj […].
Lilu narah b’ħabib tiegħi, dak li jilmħu għajnejja ma jkunlix barrani” (Ġob 19:25,27). U
hekk għal dejjem inkunu mal-Mulej. Intom temmnuh dan? Qed nistaqsikom:
temmnuh dan? Biex nagħmlu ftit saħħa ħa nistedinkom tgħiduha
tliet darbiet flimkien miegħi: “Hekk inkunu dejjem mal-Mulej”. U hemm,
mal-Mulej, għad niltaqgħu lkoll flimkien.
miġjub mit-Taljan għall-Malti minn Francesco Pio Attard