|
VIA CRUCIS FIL-KOLOSSEW
TALBA TAL-QDUSIJA TIEGĦU FRANĠISKU
Il-Ġimgħa l-Kbira, 15 ta’ April 2022
Missier ħanin,
li ttella’ x-xemx sew fuq it-tajbin u l-ħżiena,
la titlaqx għemil idejk,
li minħabba fih ma bqajtx lura
milli tagħti lil Ibnek il-waħdieni,
imwieled mill-Verġni,
mislub taħt Ponzju Pilatu,
mejjet u midfun fil-qalba tal-art,
imqajjem mill-mewt fit-tielet jum,
li deher lil Marija ta’ Magdala,
lil Pietru, lill-appostli u d-dixxipli l-oħra,
dejjem ħaj fil-Knisja mqaddsa,
il-Ġisem ħaj tiegħu fid-dinja.
Żomm imkebbes fil-familji tagħna
l-musbieħ tal-Vanġelu,
li jdawwal ferħ u niket,
taħbit u tamiet:
ħa tkun kull dar mera tal-wiċċ tal-Knisja,
li l-ogħla liġi tagħha hi l-imħabba.
Bit-tiswib tal-Ispirtu tiegħek,
għinna ninżgħu l-bniedem il-qadim,
imħassar mill-passjonijiet qarrieqa,
u erġa’ libbisna l-bniedem il-ġdid,
maħluq skond il-ġustizzja u l-qdusija.
Aqbdilna jdejna, bħal Missier,
biex ma nitbiegħdux minnek;
dawwar lejn qalbek il-qlub ribelli tagħna,
biex nitgħallmu nfittxu proġetti ta’ paċi;
l-għedewwa wassalhom biex jieħdu b’idejn xulxin,
ħa jiggustaw il-maħfra reċiproka;
żarma d-driegħ merfugħ tal-aħwa wieħed kontra l-ieħor,
biex fejn hemm il-mibegħda twarrad il-fehma waħda.
Agħmel li aħna ma nġibux ruħna ta’ għedewwa tas-salib ta’ Kristu,
biex nistgħu hekk ikollna sehem fil-glorja tal-qawmien tiegħu.
Hu li miegħek jgħix u jsaltan,
flimkien mal-Ispirtu s-Santu,
għal dejjem ta’ dejjem.
R/. Amen.
miġjuba mit-Taljan għall-Malti minn Francesco Pio Attard