SOLENNITÀ TAL-IMMAKULAT KONĊEPIMENT TAL-VERĠNI MARIJA
ATT TA’ QIMA LILL-IMMAKULATA FI PIAZZA DI SPAGNA
TALBA TAL-QDUSIJA TIEGĦU FRANĠISKU
LIL MARIJA IMMAKULATA
Piazza di Spagna
Il-Ħamis 8 ta’ Diċembru 2022
Omm tagħna Immakulata,
illum il-poplu Ruman qed iross madwarek.
Il-ward imqiegħed f’riġlejk
minn tant realtajiet tal-belt
jesprimi l-imħabba u l-qima lejk,
li tindokra lilna lkoll.
U int tara u tilqa’ wkoll
dak il-ward li ma jidhirx li huma l-ħafna invokazzjonijiet,
il-ħafna talb fis-skiet, xi kultant fgat,
moħbi imma mhux għalik, li inti Omm.
Wara sentejn li fihom ġejt hawn
nagħtik qima waħdi qabel sbiħ il-jum,
illum erġajt lura hawn għandek flimkien man-nies,
in-nies ta’ din il-Knisja, in-nies ta’ din il-Belt.
U nwassallek ir-radd il-ħajr u t-talbiet
ta’ wliedek kollha, tal-qrib u tal-bogħod.
Int, mill-Ġenna fejn laqgħek Alla,
il-ħwejjeġ ta’ din l-art tarahom ħafna aħjar minna;
imma bħala Omm tagħti widen għall-invokazzjonijiet tagħna
biex tippreżentahom lil Ibnek,
lill-Qalb tiegħu mimlija ħniena.
Qabelxejn inwassallek l-imħabba ta’ wlied
ta’ għadd bla tarf ta’ rġiel u nisa, mhux biss Insara,
li għandhom lejk l-akbar rikonoxximent
għall-ġmiel tiegħek kollu grazzja u umiltà:
għax qalb tant sħab mudlam
inti sinjal ta’ tama u ta’ faraġ.
Inwassallek it-tbissimiet tat-tfal,
li quddiem xbieha tiegħek jitgħallmu ismek,
f’dirgħajn l-ommijiet u n-nanniet,
u jibdew jintebħu
li għandhom ukoll Omm fis-Sema.
U meta, fil-ħajja, jiġri li flok dawk it-tbissimiet
jitfaċċa d-dmugħ,
kemm ikun importanti li jkunu saru jafuk,
li jkunu rċivew b’don il-maternità tiegħek!
Inwassallek il-gratitudni tal-anzjani u tax-xjuħ:
radd ta’ ħajr li hu ħaġa waħda ma’ ħajjithom,
nisġa ta’ tifkiriet, ta’ ferħ u ta’ tbatija,
ta’ miri li huma jafu tajjeb
li rnexxielhom jilħqu bl-għajnuna tiegħek,
billi żammew idejhom f’tiegħek.
Omm tagħna, jiena nwassallek it-tħassib tal-familji,
tal-missirijiet u tal-ommijiet li spiss qed isibuha bi tqila
jħallsu l-ispejjeż kollha tad-dar,
u ta’ kuljum jaffrontaw
sfidi żgħar u kbar biex jibqgħu mexjin.
B’mod partikulari nafdalek il-koppji żgħażagħ,
biex waqt li jħarsu lejk u lejn San Ġużepp,
jaffaċċjaw il-ħajja bil-kuraġġ
u jafdaw fil-Providenza ta’ Alla.
Inwassallek il-ħolm u l-ansjetajiet taż-żgħażagħ,
miftuħa għall-futur imma mliġġma minn kultura
sinjura fil-ġid u fqira fil-valuri,
mimlija informazzjoni u nieqsa milli teduka,
li tilludi b’perważjoni u tiddeludi mingħajr ħniena.
Nirrakkomandalek b’mod speċjali l-adolexxenti
li l-aktar batew minħabba l-pandemija,
biex ftit ftit jerġgħu jibdew
iċaqilqu u jifirxu ġwenħajhom
u jsibu mill-ġdid il-gost li jtiru fil-għoli.
Verġni Immakulata, illum kieku xtaqt
inġiblek ir-radd il-ħajr tal-poplu Ukren,
għall-paċi li issa ilna żmien nitolbu lill-Mulej.
Minflok ikolli mill-ġdid nippreżentalek it-talba
tat-tfal, tal-anzjani,
tal-missirijiet u tal-ommijiet, taż-żgħażagħ
ta’ dik l-art mifnija, li qed tbati tant.
Imma fir-realtà lkoll kemm aħna nafu
li inti tinsab magħhom u ma’ dawk kollha li qed ibatu,
l-istess kif kont maġenb is-salib ta’ Ibnek.
Grazzi, Omm tagħna!
Meta nħarsu lejk, li inti bla ħtija,
nistgħu nkomplu nemmnu u nittamaw
li fuq il-mibegħda tirbaħ l-imħabba,
fuq il-gidba tirbaħ il-verità,
fuq l-offiża tirbaħ il-maħfra,
fuq il-gwerra tirbaħ il-paċi. Hekk ikun!
miġjuba mit-Taljan għall-Malti minn Francesco Pio Attard