Il-PAPA FRANĠISKU
REGINA CAELI
Biblijoteka
tal-Palazz Appostoliku
Il-Ħadd, 24
ta’
Mejju, 2020
Għeżież ħuti, il-jum it-tajjeb!
Illum fl-Italja u f’pajjiżi oħra qed tkun iċċelebrata s-solennità tat-Tlugħ fis-Sema tal-Mulej. Is-silta tal-Evanġelju (cfr Mt 28,16-20) turina lill-Appostli miġburin fil-Galilija “fuq il-muntanja fejn kien ordnalhom Ġesù” (v. 16). Hawnhekk isseħħ l-aħħar laqgħa il-Mulej Irxoxt ma’ ħbiebu, fuq l-muntanja. “Il-Muntanja għandha rwol simbolkiu qawwi, evokattiv. Ġesù jħabbar il-Beatitudnijiet fuq muntanja (cfr Mt5, 1-12); kien imur jinġabar fit-talb fuq il-muntanji (cfr Mt 14,23); hemmhekk kien jilqa’ l-folol u jfejjaq il-morda (cfr Mt 15,29). Imma did-darba, fuq il-muntanja, m’għadux aktar l-Imgħallem li jwettaq u jgħallem, imma huwa l-Irxoxt li lill-appostli jitlobhom jaġixxu u jħabbru, u jħalli f’idejhom il-mandat li jkomplu l-opra tiegħu.
Jgħabbihom b’missjoni lejn il-ġnus kollha. Jgħid: “Morru u agħmlu dixxipli mill-ġnus kollha , u għammduhom fl-isem tal-Missier u tal-Iben u tal-Ispirtu s-Santu, u għallmuhom iħarsu dak kollu li ordnajtilkom jien” (vv. 19-20). Dan hu l-kontenut tal-missjoni mogħtija lill-Appostli: it-tħabbir, jgħammdu, jgħallmu u l-mixi fit-triq imfassla mill-Imgħallem, jiġifieri l-Evanġelju ħaj. Dal-messaġġ ta’ salvazzjoni jimplika l-ewwel u qabel kollox id-dmir tax-xhieda – mingħajr xhieda ma jistax isir it-tħabbir -, li aħna wkoll, id-dixxipli tal-lum, għandna s-sejħa għaliha biex nagħtu l-r-raġuni tal-fidi tagħna. Quddiem biċċa xogħol daqstant impenjattiva, filwaqt li niftakru fid-dgħufijiet tagħna, aħna nħossuna nieqsin, l-istess kif żgur ħassewhom l-istess Appostli. Iżda m’għandniex naqtgħu qalbna, niftakru fil-kliem li Ġesù qalilhom qabel ma tela’ s-Sema: “Jiena magħkom dejjem, sal-aħħar taż-żmien” (v. 20).
Dil-wegħda tiżgurna mill-preżenza dejjiema u ta’ faraġ ta’ Ġesù fostna. Imma b’liema mod isseħħ dil-preżenza? Bis-saħħa tal-Ispirtu tiegħu, li jmexxi l-Knisja tul l-istorja bħala l-ħabiba ta’ kull bniedem tul it-triq. Dak l-Ispirtu mibgħut minn Kristu u mill-Missier, iġib il-maħfra tad-dnubiet u jqaddes lil kull min, niedem, ikun miftuħ bil-fiduċja għad-don tiegħu. Bil-wegħda li jibqa’ magħna sal-aħħar taż-żmien, Ġesù jinawgura stil ġdid tal-preżenza tiegħu fid-dinja bħala l-Irxoxt. Ġesù huwa preżenti fid-dinja imma bi stil ieħor, l-istil tal-Qawmien, jiġifieri preżenza li tintwera bil-Kelma, bis-Sagramenti, bl-azzjoni bla heda u interjuri tal-Ispirtu s-Santu. Il-festa tat-Tlugħ fis-Sema tgħidilna li minkejja li tela’ s-Sema biex joqgħod fil-glorja fuq il-lemin tal-Missier, Ġesù xorta waħda għadu fostna: minn hawn tiġi l-qawwa tagħna, il-perseveranza tagħna u l-ferħ tagħna, propju mill-preżenza ta’ Ġesù fostna u bil-qawwa tal-Ispirtu s-Santu.
Il-Verġni Marija tkkumpanja l-mixja tagħna bil-protezzjoni materna tagħha: minnha nitgħallmu l-ħlewwa u l-kuraġġ biex inkunu xhieda fid-dinja tal-Mulej Irxoxt.
Wara r-Regina Caeli
Għeżież ħuti,
Ningħaqdu spiritwalment mal-fidili kattoliċi taċ-Ċina li llum qed jiċċelebraw, b’devozzjoni kbira, il-festa tal-Beata Verġni Marija Għajnuna tal-Insara u patruna taċ-Ċina, li hi meqjuma fis-santwarju ta’ Sheshan f’Shangai. Inqiegħdu f’idejn ommna Ċelesti u taħt il-protezzjoni tagħha, lir-Rgħajja u lill-fidili tal-Knisja kattolika ta’ dak il-pajjiż kbir, sabiex ikunu qawwijin fil-fidi u sodi fl-għaqda fraterna, xhieda ferrieħa u promoturi tal-karità u ta’ tama fraterna u jkunu ċittadini tajba.
Għeżież ħuti kattoliċi taċ-Ċina, nixtieq niżgurakom li l-Knisja universali, li intom parti sħiħa minnha, taqsam magħkom it-tamiet u tkun ta’ sostenn għalikom waqt il-provi tal-ħajja. Hi takkumpanjakom bit-talb biex jissawwab mill-ġdid l-Ispirtu s-Santu fuqkom, ħalli tkunu tistgħu tiddu bid-dawl u s-sbuħija tal-Evanġelju, qawwa t’Alla għas-savazzjoni ta’ kull min jemmen. Jien u nesprimi mill-ġdid l-imħabba kbira u sinċiera lejkom, intikom Barka Appostolika speċjali. Jalla l-Madonna tħariskom dejjem!
Fl-aħħar inħallu f’idejn l-interċessjonni ta’ Marija Awżiljatriċi lid-dixxipli tal-Mulej u lill-bnedmin kollha ta’ rieda tajba, li f’daż-żmien diffiċli, f’kull rokna tad-dinja, qed jaħdmu bil-ħerqa u impenn għall-paċi, għad-djalogu bejn in-nazzjonijiet, għas-servizz tal-foqra, għall-ħarsien tal-ħolqien u għar-rebħa tal-umanità fuq kull marda tal-ġisem, tal-qalb u tar-ruħ.
Illum hu l-Jum Dinji tal-Komunikazzjonijiet Soċjali, li dis-sena hu dedikat lit-tema tan-narrazzjoni. Jalla dan l-avveniment ikun ta’ kuraġġ biex jitwasslu u jitferrxu stejjer kostruttvi li jgħinuna nifmhu li aħna lkoll niffurmaw parti minn storja akbar minna u nkunu nistgħu nħarsu lejn il-ġejjieni bit-tama, jekk verament nieħdu ħsieb xulxin bħal aħwa.
Illum, fil-ġrurnata ta’ Marija Awżiljatriċi, nagħti tislima mimlija mħabba lis-sależjani rġiel u nisa. Niftkar bi gratitudni l-formazzjoni spiritwali li rċevejt mingħand ulied Don Bosco.
Illum kelli mmur Acerra biex insaħħaħ il-fidi ta’ dik il-popolazzjoni u l-impenn ta’ kull min hu impenajt biex jitqabad dan id-dramm ta’ tniġġis f’dik l-art imsejħa “Terra dei Fuochi”. Iż-żjara tiegħi tħalliet għal darb’oħra, madankollu lill-Isqof, lis-saċerdoti u lill-familji u lill-komunita’ djoċesana kollha kemm hi nibgħatilkom it-tislijiet tiegħi, il-barka tiegħi l-inkoraġġiment bl-istennija li malli jkun possibbli, niltaqgħu. Jien se mmur hemmhekk żgur!
Illum ukoll jaħbat il-ħames anniversajru tal-Enċiklika Laudato si’ li għan tagħha kien li tinġibed l-attenzjoni lejn l-għajta tal-Art u tal-foqra. Grazzi għall-inizjattiva tad-Dikasteru għas-Servizz tal-Iżvilupp Uman Integrali, “il-Ġimgħa Laudati si’” li għandna kif iċċelebrajna spiċċat warrdet u saret Sena speċjali tal-anniversarju tal-Laudato si’, sena speċjali biex nirriflettu dwar l-Enċiklika, mill-24 ta’ Mejju ta’ dis-sena sal-24 ta’ Mejju tas-sena li ġejja. Nistieden lil kull persuna ta’ rieda tajba biex tieħu sehem, biex tħares id-dar konuni tagħna u lil ħutna l-aktar dgħajfa. Fuq is-sit se tkun ippubblikata t-talba dedikata għal din is-Sena. Ikun sabiħ jekk ngħiduha.
Nawgura lil kulħadd il-Ħadd it-tajjeb. Jekk jogħġobkom tinsewx titolbu għalija. L-ikla t-tajba u arrivederci.
Alla ta’ mħabba, Ħallieq tas-sema u tal-art u ta’ dak kollu li jinsab fihom. Iftħilna moħħna u missilna qlubna sabiex inkunu parti mill-ħoqlien, rigal tiegħek.
Kun preżenti ma’ min hu fil-bżonn f’daż-żmien diffiċli, speċjalment l-aktar foqra u dgħajfin. Għinna nuru solidarjetà kreattiva aħna u naffrontaw il-konsegwenzi ta’ dil-pandemija globali. Tina l-kuraġġ biex inħaddnu t-tibdil li jfittex il-ġid komuni. Issa, aktar minn qatt qabel qed inħossuna marbutin sfiq flimkien u dipendenti minn xulxin.
Agħmel li jirnexxilna nisimgħu u nwieġbu għall-għajta tad-dinja u għall-għajta tal-foqra. Jalla t-tbatijiet ta’ issa jkunu l-uġigħ tal-ħlas ta’ dinja aktar fraterna u sostenibbli.
Nitolbuk iżżomna taħt il-ħarsien amorevoli ta’ Marija Awżiljatriċi, bi Kristu Sidna. Ammen.
Miġjub għall-Malti mit-Taljan minn Joe Huber