IL-PAPA FRANĠISKU
REGINA CAELI
Pjazza San Pietru
III Ħadd tal-Għid, 14 ta’ April, 2024
Għeżież ħuti, il-jum it-tajjeb u l-Ħadd it-tajjeb!
Illum l-Evanġelu joħodna lura lejn l-Għid filgħaxija. L-Appostli huma miġburin fiċ-Ċenaklu, xħin minn Għemmaws jaslu lura ż-żewġ dixxipli biex jirrakuntaw il-laqgħa tagħhom ma’ Ġesù. U fil-waqt li jkunu jesprimu l-ferħ tal-esperjenza li kienu għaddew minnha, l-Irxoxt jidher lill-komunità kollha. Ġesù jasal propju fil-ħin li huma qed jaqsmu flimkien ir-rakkont tal-laqgħa miegħu. Dan iġagħalni nifhem kemm hu importanti li naqsmu l-fidi ma’ xulxin. Dar-rakkont ifakkarna fl-importanza li naqsmu l-fidi tagħna f’Ġesù Rxoxt, bejnietna.
Kuljum aħna bbumbardjati mill-eluf ta’ messaġġi. Mhux ftit minnhom huma superfiċjali u inutli, oħrajn huma kurżitajiet indiskreti jew, agħar minn hekk, li jinbtu mill-pettegolezzi u mill-malizzja. Huma aħbarijiet bla siwi, anzi jagħmlu d-deni. Imma jkollna wkoll aħbarijiet sbieħ, pożittivi, kostruttivi, u nafu kemm hu ta’ fejda għalina meta nisimgħu it-tajjeb, u kemm inħossuna aħjar meta jiġri dan. U huwa sabiħ ukoll li naqsmu bejnietna realtajiet, li fil-ġid jew fid-deni, jkunu missewlna ħajjitna, biex inkunu nistgħu ngħinu lill-oħrajn.
Madankollu hemm ħaġa li spiss inħossuha bi tqila nitkellmu dwarha. Fuq xiex insibuha bi tqila nitkellmu? Dwar l-isbaħ ħaġa li nistgħu nirrakkuntaw: il-laqgħa tagħna ma’ Ġesù. Kollha kemm aħna ltqajna ma’ Ġesù, iżda nsibuha bi tqila nitkellmu dwarha. Ilkoll kemm aħna nistgħu ngħidu dan: naraw kif il-Mulej missna, u dan nixxerjawh, mhux bl-arja ta’ min irid jgħallem lil ħaddieħor, imma billi naqsmu ma’ ħaddieħor il-waqtiet uniċi li fihom ħassejna l-Mulej ħaj, qrib, li kien jixgħel il-ferħ fi qlubna, li kien qed itina l-fiduċja u l-faraġ, il-forza u l-entużjażmu, inkella l-maħfra, it-tenerezza. Dawn il-laqgħat, li lkoll kemm aħna kellna ma’ Ġesù, hemm bżonn nixxerjawhom, ngħadduhom lill-oħrajn. Importanti nagħmlu dan fil-familja, fil-komunitajiet, mal-ħbieb. Kif hu tajjeb ukoll nitkellmu dwar l-ispirazzjonijiet tajbin li orjentawlna ħajjitna, il-ħsibijiet u s-sentimenti tajbin li huma ta’ għajnuna kbira biex nibqgħu mexjin ‘il quddiem, u wkoll l-isforzi u t-tbatija li ngħaddu minnhom biex nifhmu u biex insaħħu l-ħajja tal-fidi tagħna, forsi wkoll biex nindmu u ndawru triqtna lura. Jekk nagħmlu dan, Ġesù, kif ġara lid-dixxipli ta’ Għemmaws dakinhar tal-Għid filgħaxija, jissoprendina u l-laqgħat ta’ bejnietna u l-ambjenti tagħna jagħmilhomlna isbaħ.
Ejjwe allura niftakru, issa, f’waqt qawwi f’ħajjitna, f’laqgħa deċisiva ma’ Ġesù. Kull wieħed u waħda minnha għaddejna minn din l-esperjenza, kolllha kemm aħna kellna xi laqgħa mal-Mulej. Noqgħodu ftit fis-skiet u niftakru: meta kien li jien sibt lill-Mulej? Meta kien li l-Mulej ġie qribi? Naħsbu ftit dwar dan fis-skiet. U dil-laqgħa mal-Mulej, qatt qsamtha ma’ xi ħadd ieħor biex hekk nagħti glorja lill-Mulej? U wkoll, tajt widen lil ħaddieħor meta kien ikellimni dwar dil-laqgħa ma’ Ġesù?
Il-Madonna tgħinna nixxerjaw il-fidi biex il-komunitajiet tagħna nagħmluhom dejjem aktar imkejjen ta’ laqgħa mal-Mulej.
Wara r-Regina Caeli
Għeżież ħuti!
Qed insegwi bit-talb u bi preokkupazzjoni, u anki b’niket, l-aħbarijiet li waslu dawn l-aħħar siegħat dwar is-sitwazzjoni tal-gwerra li qed tkompli teħżien f’Iżrael minħabba l-intervent min-naħa tal-Iran. Nagħmel appell minn qiegħ qalbi biex tieqaf kull azzjon ili tista’ tkompli tkebbes l-ispirali tal-vjolenza bir-riskju li fil-Lvant Nofsani tiħrax is-sitwazzjoni tal-gwerra.
Ħadd m’għandu jhedded l-eżistenza tal-ieħor. In-nazzjonijiet kollha għandhom ikunu fuq in-naħa tal-paċi, u jgħinu lill-iżraeljani u l-palestinjani biex jgħixu f’żewġ stati, maġenb xuxlin, fis-sigurtà. Din hi xewqa profonda u leċita u huwa dritt tagħhom! Żewġ stati ġirien.
Araw li malajr kemm jista’ jkun jieqaf il-ġlied f’Gaża u jinfetħu toroq ta’ negozjati bis-serjetà. Il-popolazzjoni li tinsab f’sitwazzjoni unmanitarja katastrofika, għandu jkollha l-għajnuna meħtieġa, għandhom jinħelsu l-ostaġġi li nħatfu xhur ilu! Kemm tbatija! Nitolbu għall-paċi. Biżżejjed gwerra, biżżejjed bl-attakki, biżżejjed aktar vjolenza! Iva għad-djalogu u iva għall-paċi!
Illum fl-Italja qed issir iċ-ċelebrazzjoni tal-mitt Jum Nazzjonali tal-Università Kattolika tal-Qalb ta Ġesù bit-tema: “Il-ġejjieni jistaqsi. Iż-żgħażagħ bejn id-diżappunt u x-xewqa”. Nagħmel kuraġġ lil dil-kbira università biex tkompli s-servizz formattiv tagħha bil-fedeltà lejn il-missjoni tagħha u attenta għall-ħtiġijiet soċjali u taż-żgħażagħ tal-lum.
Minn qalbi nagħti merħba lilkom ilkoll, rumani u pellegrini mill-Italja u minn bosta pajjiżi oħra. Insellem partikolarment lill-fidili minn Los Angeles, Houston, Nutely u Riverside mill-Istati Uniti tal-Amerika; kif ukoll lill-pollakki, speċjalment – kemm bnadar pollakki! – lil dawk minn Bodzanów u liż-żgħażagħ volontarji tal-Equipe di Aiuto lill-Knisja tal-Orjent. Nilqa’ u nagħmel kuraġġ lil dawk responsabbli mill-Komunitajiet ta’ Sant Egidio minn xi pajjiżi latino-amerikani.
Insellem lill-volontarji tal-ACLI impenjati fil-Patronati mal-Italja kollha; lill-gruppi minn Trani, Arzachena, Monteliberti; lill-doloxxenti tal-professjoni tal-fidi mill-parroċċa Santi Sivestro e Matino minn Milan; lil dawk li se jagħmlu l-Griżma minn Pannarani; u lill-grupp taż-żgħażagħ “Arte e Fede” tal-sorijiet tad-Dorotej.
Insellem b’għożża lit-tfal minn diversi nħawi tad-dinja li ġew biex ifakkru li bejn il-25 u s-26 ta’ Mejju l-Knisja se tiċċelebra l-Ewwel Jum Dinji tat-Tfal. Grazzi! Nistieden lil kulħadd biex jakkumpanja bit-talb il-mixja lejn din il-ġrajja – l-Ewwel Jum Dinji tat-Tfal – u rrodd ħajr lil kulmin qed jaħdem fit-tħejjija. U lilkom, tfal bniet u subjien, ngħidilkom: nistennikom! Ilkoll kemm intom! Għadna bżonn il-ferħ tagħkom u x-xewqa tagħkom ta’ dinja aħjar, dinja ta’ paċi. Nitolbu, ħuti, għat-tfal li qed ibatu minħabba l-gwerer – huma bosta! – fl-Ukrajna, fil-Palestina, f’Iżrael, f’tant aktar postijiet fid-dinja, fil-Myanmar. Nitolbu għalihom u għall-paċi.
Nawgura lil kulħadd il-Ħadd it-tajjeb. Jekk jogħġobkom tinsewx titolbu għalija. Insellem liż-żgħażagħ tal-Immacolata. L-ikla t-tajba u arrivederci!
Miġjub għall-Malti mit-Taljan minn Joe Huber