IL-PAPA FRANĠISKU
REGINA CAELI
Biblijoteka Appostolika
Il-Ħadd, 3 ta' Mejju, 2020
Għeżież ħuti,
Ir-raba' Ħadd tal-Għid, li qed niċċelebraw illum, hu dedikat lil Ġesù r-Ragħaj it-Tajjeb. L-Evanġelju jgħid: "In-nagħaġ jisimgħu leħnu: Hu jsejjaħ in-nagħaġ tiegħu waħda waħda b'isimhom" (Ġw. 10,3). Il-Mulej isejjħilna b'isimna, isejjħilna għax iħobbna. Iżda l-Evanġelju jgħidilna li hemm ilħna oħra li m'għandiex immorru warajhom: dawk tal-barranin, tal-ħallelin u tal-briganti li jridu jagħmlu d-deni lin-nagħaġ.
Dawn l-ilħna l-oħra jidwu ġewwa fina. Hemm leħen Alla, li jkellem lill-kuxjenza tagħna bil-ħlewwa, u hemm il-leħen tat-tentazzjoni li jimbuttana lejn il-ħażen. Kif nistgħu nagħrfu leħen ir-Ragħaj it-Tajjeb minn dak tal-ħalliel, kif nagħmlu biex nagħżlu bejn dak li jispirana Alla mill-frugħa tal-malinn? Nistgħu nitgħallmu niddixxernu bejn dawn iż-żewġ ilħna: infatti dawn jitkellmu żewġ lingwi differenti, jiġifieri għandhom metodi kontra xulxin biex iħabbtu fuq qlubna. Jitkellmu lingwi differenti. Kif aħna għanda ħila nagħżlu bejn waħda u oħra, nistgħu ukoll nagħrfu nagħżlu leħen Alla minn dak tal-malinn. Il-leħen t'Alla qatt ma jġiegħel: Alla jipproponi, ma jimponix ruħu. Iżda l-leħen ħażin isaħħar, iġiegħel; jipproponi l-illużjonijiet li jgħammxu, emozzjonijiet li jħajjru, imma li jgħaddu f'ħakka t'għajn. Għall-bidu jimpostura, iġagħalna nemmnu li aħna nistgħu kollox, imma mbagħad iħallielna vojt ġewwa fina u jibda' jakkużana: "Int ma tiswa xejn". Imma leħen Alla, jikkoreġina b'ħafna paċenzja, jinkoraġġina dejjem, ifarraġna, dejjem iqawwilna t-tama. Leħen Alla hu leħen li għandu xefaq, iżda leħen il-ħażin idaħħlek ġo ħajt, jagħlqek f'rokna.
Differenza oħra. Leħen l-għadu jaljenak mill-preżent u jrid li aħna nraħħmu fuq il-biżgħat tal-ġejjieni jew dwar is-swied il-qalb tal-imgħoddi - l-għadu ma jridx il-preżent -: iqanqal fik l-imrar, il-fakra tal-inġustizzji li sofrejt, (ifakkar) f'dawk li għamlulna l-ħsara..., ħafna tifkiriet koroħ. Iżda leħen Alla jitkellem fil-preżent: "issa tista' tagħmel il-ġid, issa tista' tħaddem il-kreattvità tal-imħabba, issa tista' twarrab id-dispjaċiri u r-rimorsi li qed iżommulek qalbek fil-jasar". Jagħmlilna l-kuraġġ, imexxina 'l quddiem, imma jitkellem fil-preżent: issa.
Aktar: iż-żewġ ilħna jqanqlu fina mistoqsijiet differenti. Dik ġejja minn Alla tkun: "X'inhu ta' ġid għalija?" Minflok, it-tentatur jinsisti fuq mistoqsija oħra: "X'għandi aptit nagħmel?" X'għandi aptit: leħen il-ħażin idur dejjem mal-'jiena', mal-impulsi, mal-bżonnijiet tiegħi, u kollox minnufih. Iżda leħen Alla qatt ma jwiegħed il-ferħ b'irħis: jistedinna biex immorru lil hinn minna nfusna biex insibu l-ġid veru, il-paċi. Niftakru: il-ħażen qatt ma jtik paċi, l-ewwel jimlik eċċitament u mbagħad iħallilek il-morr. Dan hu l-istil tal-ħażen.
Leħen Alla u dak tat-tentaur, fl-aħħar, jitkellmu "f'ambjenti" differenti: l-għadu jippreferi d-dlam, il-falsità, it-tqassis; il-Mulej iħobb id-dawl tax-xemx, il-verità it-trasparenza sinċiera. L-għadu jgħidilna "ingħalaq fik innifsek, intant, ħadd ma jifhmek jew jisma', tafdax!" Bil-maqlub, it-tajjeb jistedinna ninfetħu, inkunu ċari u jkollna fiduċja f'Alla u fl-oħrajn. Għeżież ħuti, f'daż-żmien tant ħsibijiet u tħassib iwassluna bex nidħlu fina nfusna. Nagħtu widen għall-ilħna li jaslu fi qlubna. Nistaqsu lilna nfusna minn fejn ġejjin. Nitolbu l-grazzja li nagħrfu u nimxu wara leħen ir-Ragħaj it-Tajjeb, li jgħinna noħroġu mill-għeluq tal-egoiżmu tagħna u jmexxina lejn mergħat ta' libertà vera. Il-Madonna tal-Parir it-Tajjeb, torjenta u takkumpanja d-dixxerniment tagħna.
Wara r-Regina Caeli
Għeżież ħuti,
illum qed niċċelebraw il-Jum Dinji ta' talb għall-vokazzjonijiet. L-eżistenza nisranija kollha kemm hi dejjem hi tweġiba għas-sejħa t'Alla, f'kull stat tal-ħajja. Dal-jum ifakkarna f'dak li ġurnata waħda kien qal Ġesù, jiġifieri li l-għalqa tas-Saltna t'Alla teħtieġ ħafna xogħol, u għandna nitolbu 'l-Missier biex jibgħat ħaddiema biex jaħdmu fl-għalqa tiegħu (cfr Mt 9,37-38). Is-sċerdozju u l-ħajja konsagrata jesiġu kuraġġ u perseveranza; mingħajr it-talb ma nistgħux nimxu 'l quddiem f'dit-triq. Nisteden lil kulħadd biex jitlob lill-Mulej id-don ta' ħaddiema tajbin b'qalb u jdejn disponibbli għal imħabbtu.
Għal darb'oħra rrid nesprimi l-qrubija tiegħi lejn il-morda bil-Covid-19, lejn kull min hu impenjat biex jikkurahom u lejn dawk kollha li b'xi mod, qed isofru minħabba l-pandemija. Nixtieq fl-istess ħin nagħti appoġġ u ninkoraġġixxi l-kollaborazzjoni internazzjonali li hi impenjata b'ħafna inizjattivi, biex twieġeb b'mod xieraq u effikaċi għal dil-kriżi gravi li qed ngħixu bħalissa. Infatti huwa importanti li ngħaqqdu flimkien il-ħiliet xjentifiċi, b'mod trasparenti u diżinteressat, biex jinstabu tilqima u l-kura li jiggarantixxu aċċess dinji għat-teknoloġiji essenzjali li jippermettu lil kull-persuna mniġġsa, f'kull rokna tad-dinja, li jkollha l-kura sanitarja meħtieġa.
Ħsieb speċjali jmur lejn l-Assoċjazzjoni "Meter" li nediet il-Jum Nazzjonali għat-tfal vittmi tal-vjolenza, l-isfruttament u l-indifferenza. Ninkoraġġixxi lil min hu responsabbli u lill-operaturi biex ikomplu l-ħidma tagħhom ta' prevenzjoni u sesibiliżżazzjoni tal-kuxjenzi bi sħab ma' aġenzji edukattivi varji. U rrodd ħajr lit-tfal tal-Assoċjazzjoni li bagħtuli 'collage' b'mijiet ta' margeriti kkuluriti. Grazzi!
Għadna kif bdejna Mejju, xahar Marjan per eċċellenza, li tulu l-fidili jħobbu jżuru s-Santwarji dedikati lill-Madonna. Dis-sena, minħabba s-sitwazzjoni sanitarja, immorru f'dawn il-postijiet ta' fidi u devozzjoni, spiritwalment, biex inqiegħdu fil-qalb tal-Verġni Qaddisa l-preokkupazzjonijiet tagħna, l-istennija u l-proġetti għall-ġejjieni.
U peress li t-talb għandu valur universali, ilqajt il-proposta tal-Kumitat Għoli għall-Fratellanza Umana sabiex fl-14 ta' Mejju min jemmen, hu ta' liema reliġjon hu, jingħaqad spiritwalment f'ġurnata ta' talb u sawm u opri ta' karità, biex nitolbu ħerqana lil Alla jgħin lill-umanità tegħleb il-pandemija tal-coronavirus. Ftakru: fl-14 ta' Mejju, kull min jemmen ilkoll flimkien, nies ta' twemmin tad-diversi tradizzjonijiet, biex nitolbu, insumu u nagħmlu opri ta' karità.
Nawgura lil kulħadd il-Ħadd it-tajjeb. Jekk jogħġobkom, tinsewx titolbu għalija. L-ikla t-tajba u arrivederci.
Miġjub għall-Malti mit-Taljan minn Joe Huber