SOLENNITÀ TAT-TNISSIL BLA TEBGĦA TAL-VERĠNI MQADDSA MARIJA
ATT TA’ QIMA LILL-IMMAKULATA FI PIAZZA DI SPAGNA
TALBA TAL-QDUSIJA TIEGĦU FRANĠISKU
LIL MARIJA IMMAKULATA
Piazza di Spagna
Il-Ġimgħa 8 ta’ Diċembru 2023
Verġni Immakulata!
Aħna niġu għandek b’qalbna maqsuma bejn tama u biża’.
Għandna bżonnok, Omm tagħna!
Imma qabelxejn irridu rroddulek ħajr,
għax fis-skiet, kif inhu l-istil tiegħek, inti tindokra din il-belt,
li llum qed iddawrek bil-ward biex turik imħabbitha.
Fis-skiet, lejl u nhar, tħares fuqna:
fuq il-familji, bil-ferħ u t-tħassib – dan int tafu tajjeb –;
fuq il-postijiet tal-istudju u tax-xogħol; fuq l-istituzzjonijiet u l-uffiċċji pubbliċi;
fuq l-isptarijiet u d-djar tal-anzjani; fuq il-ħabsijiet; fuq min jgħix fit-triq;
fuq il-parroċċi u l-komunitajiet kollha tal-Knisja ta’ Ruma.
Grazzi tal-preżenza tiegħek diskreta u kostanti,
li timliena bil-faraġ u t-tama.
Inti taf, għandna bżonnok, Omm tagħna;
għax inti l-Immakulata Kunċizzjoni.
Il-persuna tiegħek, l-istess fatt li int teżisti
jfakkarna li l-ħażen la għandu l-ewwel u lanqas l-aħħar kelma;
li d-destin tagħna mhuwiex il-mewt imma l-ħajja,
mhuwiex il-mibegħda imma l-fraternità, mhuwiex il-kunflitt imma l-armonija,
mhux il-gwerra imma l-paċi.
Inħarsu lejk u nħossuna mwettqin f’din il-fidi
li l-ġrajjiet xi kultant iqiegħdu taħt prova iebsa.
U int, Omm tagħna, dawwar ħarstek kollha ħniena
fuq il-popli kollha magħkusin mill-inġustizzja u mill-faqar,
imġarrbin mill-gwerra: Omm tagħna, ħares lejn il-poplu mifni tal-Ukrajna,
lejn il-poplu Palestinjan u lejn il-poplu Iżraeljan,
mill-ġdid mgħaddsin fi vjolenza ma taqta’ xejn.
Illum, Omm qaddisa, inġibulek hawn, taħt il-ħarsa tiegħek,
tant ommijiet li, kif ġralek int, huma addolorati.
L-ommijiet li qed jibku lill-ulied maqtula mill-gwerra u mit-terroriżmu.
L-ommijiet li jarawhom jitilqu għal vjaġġi ta’ tama ddisprata.
U anki l-ommijiet li jfittxu kif sa jħolluhom mill-għoqod tad-dipendenzi,
u dawk li jarawhom għaddejjin minn marda twila u qalila.
Illum, Marija, għandna bżonn tiegħek bħala mara,
biex nafdawlek lin-nisa kollha li ġarrbu l-vjolenza
u dawk li għadhom sa issa vittmi tagħha,
f’din il-belt, fl-Italja u f’kull parti tad-dinja.
Inti tafhom waħda waħda, taf l-uċuħ tagħhom.
Ixxotta, nitolbuk, id-dmugħ tagħhom u dak tal-għeżież tagħhom.
U għin lilna nagħmlu mixja ta’ edukazzjoni u ta’ tisfija,
u nagħrfu u neħduha kontra l-vjolenza li bejtet
fil-qlub tagħna u fil-ħsibijiet tagħna,
waqt li nitolbu lil Alla jeħlisna minna.
Urina għal darb’oħra, Omm tagħna, it-triq tal-konverżjoni,
għax ma hemmx paċi mingħajr maħfra,
u ma hemmx maħfra mingħajr indiema.
Id-dinja tinbidel jekk il-qlub jinbidlu;
u kulħadd irid jgħid: ibda minn tiegħi.
Imma l-qalb tal-bniedem Alla biss jista’ jibdilha
bil-grazzja tiegħu: dik li fiha int, Marija,
għodost sa mill-ewwel waqt.
Il-grazzja ta’ Ġesù Kristu, Sidna,
li int nissilt fil-ġisem,
li għalina miet u rxoxta, u li int dejjem turina.
Huwa s-salvazzjoni, għal kull bniedem u għad-dinja.
Ejja, Mulej Ġesù!
Ħa tiġi s-saltna tiegħek ta’ mħabba, ta’ ġustizzja u ta’ paċi!
Amen.
miġjuba mit-Taljan għall-Malti minn Francesco Pio Attard