VJAĠĠ APPOSTOLIKU TAL-QDUSIJA TIEGĦU FRANĠSIKU FIL-PORTUGALL
[2 - 6
TA’ AWWISSU,
2023]
TALBA TAR-RUŻARJU MAŻ-ŻGĦAŻAGĦ MORDA
DISKORS TAL-QDUSIJA TIEGĦU
Kappella tad-dehriet fis-Santwarju tal-Madonna ta’ Fatima
(Fatima)
Il-Ħamis, 5
ta’ Awwissu,
2023
Għeżież ħuti, il-jum it-tajjeb!
Grazzi Mons Ornelas għal kliemek u grazzi lilkom ilkoll tal-preżenza tagħkom u tat-talb. Għadna kif irreċitajna r-Rużarju, talba mill-isbaħ, u vitali, għax tqegħedna f’kuntatt mal-ħajja ta’ Ġesù u ta’ Marija. U mmeditajna l-misteri tal-ferħ, li jfakkruna illi l-Knisja ma tista’ tkun xejn aktar ħlief id-dar tal-ferħ. Il-kappella ċkejkna fejn ninsabu hi xbieha sabiħa tal-Knisja: akkoljenti, mingħajr bibien. Il-Knisja m’għandhiex bibien, sabiex ikun jista’ jidħol kulħadd. U hawn nistgħu ukoll ninsistu fuq il-fatt li kulħadd jista’ jidħol, għax din hi d-dar tal-Omm, u l-omm dejjem qalbha miftuħa għal uliedha kollha, kollha, kollha, kollha, bla ebda esklużjoni.
Ninsabu hawn taħt il-ħarsa materna ta’ Marija, ninsabu hawn bħala Knisja, Knisja Omm. Il-pellegrinaġġ hu propju karatteristika marjana, għax l-ewwel li għamlet pellegrinaġġ wara t-tħabbira ta’ Ġesù, kienet Marija. Malli saret taf li kuġintha kienet tqila – kienet imdaħħla fiż-żmien il-kuġina – telqet bil-ġirja. Hi traduzzjoni ftit jew wisq libera, l-Evanġelju jgħid: “marret tħaffef”, aħna ngħidu “marret tiġri” telqet tiġri b’dik ix-xewqa li tgħin, li tkun preżenti.
Marija għandha ħafna titoli, imma meta naħsbu ftit hemm wieħed li nistgħu ngħidu li hu dan: il-Verġni “li tmur b’ġirja” kull darba li jkun hemm xi problema; kull darba li ninvokawha, ma titlajjax, tiġi, mimlija premura. Il-Madonna mimlija premura, togħġobkom? Ngħiduha lkoll flimkien: il-Madonna mimlija premura! Tħaffef biex tkun qrib tagħna, tħaffef għax hi Omm. Bil-portugiz tgħidu “apressada”, qalli Mons Ornelas. Il-Madonna “apressada”. U hekk takkumpanja l-ħajja ta’ Ġesù; u wara l-Qawmien ma tinħebhiex, takkumpanja d-dixxipli huma u jistennew lill-Ispirtu s-Santu; u takkumpanja l-Knisja li tibda toktor wara l-Pentekoste. Madonna ta’ premura u Madonna li takkumpanja. Takkumpanja dejjem. Qatt ma hi protagonista. Il-ġest ta’ Marija li tilqa’ hu doppju: l-ewwel tilqa’ u mbagħad turi lil Ġesù. Matul ħajjitna Marija ma tagħmel xejn aktar ħlief turi lil Ġesù. “Agħmlu dak li jgħidilkom Hu”. Imxu wara Ġesù.
Dawn huma ż-żewġ ġesti ta’ Marija, nasbu ftit sew: tilqagħna lkoll u turina lil Ġesù. U dan tagħmlu bil-premura, “apressada”. Madonna mimlija premura li tilqagħna lkoll u turina lil Ġesù. U kull darba li niġu hawnhekk niftakruh dan. Hawnhekk Marija wriet ruħha b’mod speċjali, sabiex in-nuqqas ta’ twemmin ta’ tant qlub jinfetaħ għal Ġesù. Bil-preżenza tagħha turina lil Ġesù, dejjem turina lil Ġesù. U llum tinsab hawn fostna, Hi dejjem fostna, iżda llum inħossuha aktar qrib. Marija mimlija premura.
Ħbieb, Ġesù jħobbna tant li jidentifika ruħu magħna u jitlobna nikkollaboraw miegħu. U Marija turina dak li jitlob minna Ġesù: nimxu fil-ħajja bil-kollaborazzjoni miegħu. Nixtieq li llum inħarsu lejn ix-xbieha ta’ Marija u kull wieħed u waħda minn naħsbu: x’qed tgħidli Marija bħala Omm? X’qed turini? Qed turina lil Ġesù; kultant turina wkoll xi ħaġa żgħira li ma tkunx qed taħdem sewwa f’qalbna, imma turi dejjem. “Omm tiegħi x’qed turini?” Nagħmlu waqt żgħir ta’ skiet u kulħadd f’qalbu jgħid: “Omm tiegħi, x’qed turini?” X’hemm f’ħajti li qed jinkwetak? X’hemm f’ħajti li qed iqanqlek? X’hemm f’ħajti ta’ interess għalik? U inti turiehomli. U hemmhekk turina l-qalb, sabiex jiġi Ġesù. U kif lilna turina lil Ġesù, lil Ġesù turih il-qalb ta’ kull wieħed u waħda minna.
Għeżież ħuti, ejjew inġarrbu llum il-preżenza ta’ Marija Omm, l-Omm li dejjem tgħid: “Agħmlu dak li jgħidilkom Hu”; turina lil Ġesù. Imma nħossu wkoll lill-Omm li lil Ġesù tgħidlu: “Agħmel dak li dawn qed jitolbuk”. Din hi Marija. Din hi Ommna, il-Madonna mimlija premura biex tkun qrib tagħna. Jalla tberikna lkoll. Ammen.
Miġjub għall-Malti mit-Taljan minn Joe Huber