L-EWWEL JUM INTERNAZZJONALI TAL-FRATERNITÀ UMANA
MESSAĠĠ VIDEO MILL-QDUSIJA TIEGĦU PAPA FRANĠISKU
Il-Ħamis, 4 ta ’Frar, 2021
Ħuti. Din hija l-kelma: ħuti. Jeħtieġ li naffermaw il-fraternità.
B'mod speċjali lilek, għażiż ħija, ħabib tiegħi, għażiż kumpann tiegħi fl-isfidi
u fir-riskji fil-ġlieda għall-fraternità, l-Imam il-Kbir Aħmed Al-Tajjeb,
nirringrazzjak għas-sostenn tiegħek f'din il-mixja, għar-riflessjoni u
għall-kitba ta' dan id-dokument li ġie ppreżentat sentejn ilu. Ix-xhieda tiegħek
għenitni ħafna għax kienet xhieda kuraġġuża. Naf li ma kinitx biċċa xogħol
faċli. Imma miegħek stajna nagħmluh flimkien, u ngħinu lil xulxin. L-isbaħ ħaġa
kienet li dik l-ewwel xewqa għall-fraternità ġiet imwettqa fi fraternità vera.
Grazzi għażiż ħija, grazzi.
Irrid nirringrazzja wkoll lill-Altezza Tiegħu Xejik Moħammed bin Żajed
għall-isforzi kollha li għamel biex jgħinna nkomplu f'din it-triq. Huwa emmen
fil-proġett.
U naħseb ukoll li huwa ġust li nirringrazzja, u ippermettili, Sur Imħallef,
il-kelma: "l'enfant terrible" ta' dan il-proġett kollu, l-Imħallef Abdel Salam,
ħabib, ħaddiem, bniedem mimli ideat, li għenna nimxu 'l quddiem.
Grazzi lil kulħadd talli emmintu fil-fraternità, għax illum il-fraternità hija
l-fruntiera l-ġdida tal-umanità. Jew aħna aħwa, jew neqirdu lil xulxin.
Illum m'hemmx żmien għall-indifferenza. Ma nistgħux naħslu idejna billi nibqgħu
'l bogħod minn xulxin jew billi ma nagħtux każ ta' xulxin. Jew aħna aħwa -
ippermettuli - jew kollox jaqa'. Hija l-fruntiera. Il-fruntiera li fuqha rridu
nibnu; hija l-isfida tas-seklu tagħna, hija l-isfida ta’ żminijietna.
Fraternità tfisser id mifruxa, fraternità tfisser rispett. Fraternità tfisser
smigħ b’qalb miftuħa. Fraternità tfisser tkun sod f'dak li temmen. Għax m'hemm
l-ebda fraternità vera jekk toqgħod tilgħab bil-konvinzjonijiet tiegħek stess.
Aħna aħwa, imwielda mill-istess Missier. B'kulturi, tradizzjonijiet differenti,
imma lkoll aħwa. U meta nirrispettaw il-kulturi u t-tradizzjonijiet differenti
tagħna, iċ-ċittadinanzi differenti tagħna, aħna nibnu din il-fraternità. Mhux
ninnegozjawha.
Dan huwa l-mument tas-smigħ. Huwa l-mument li naċċettaw lil xulxin b'qalb
sinċiera. Huwa l-mument fejn aħna żguri li dinja mingħajr aħwa hija dinja ta'
għedewwa. U din irrid nenfasizzaha. Ma nistgħux ngħidu: jew aħwa jew m'aħniex
aħwa. Ejja ngħiduha bla tlaqliq: aħna jew aħna aħwa, inkella aħna għedewwa. Għax
meta ma nieħdux ħsieb xulxin, din hija forma sottili ħafna li aħna għedewwa.
M'hemmx għalfejn gwerra biex tagħmel l-għedewwa. Biżżejjed hu li ma tagħtix każ
l-oħrajn. Ejjew ngħidu "daqshekk!" lil din it-teknika - għax issa din saret
teknika - daqshekk għal dik l-attitudni li tħares lejn in-naħa l-oħra, li
tinjora lil ħaddieħor, daqslikieku ma jeżistix.
Għażiż Ħuna Imam Kbir: grazzi tal-għajnuna tiegħek, grazzi tax-xhieda tiegħek,
grazzi ta' din il-mixja li għamilna flimkien.
[Hawnhekk il-Papa ta l-awguri tiegħu lis-Segretarju Ġenerali tan-Nazzjonijiet
Uniti, António Guterres, rebbieħ tal-Premju Żajed.]
Irrid nifraħ lis-Segretarju Ġenerali tan-Nazzjonijiet Uniti għal dan il-premju u
nirringrazzjah għall-isforzi kollha li jagħmel għall-paċi. Paċi li tista’
tinkiseb biss b’qalb fraterna. Grazzi ta' dak kollu li tagħmel.
[Awguri tal-Papa lil Latifa Ibn Ziaten, rebbieħa tal-Premju Żajed.]
Għażiża oħt, l-aħħar kliemiet tiegħek ma għidthomx biex tkun għidthom: "aħna
lkoll aħwa." Huma konvinzjoni. Konvinzjoni mwaħħda mal-uġigħ tiegħek. Lgħabt
ħajtek biex tara tbissima, lgħabt ħajtek u għaddejt mit-tbatija meta tlift lil
ibnek. Hija biss l-omm li taf x'jiġifieri titlef lil binha. U permezz ta' dik
it-tbatija inti stajt tgħid "aħna lkoll aħwa". Inti żrajt kelmiet ta’ mħabba.
Grazzi tax-xhieda tiegħek. U grazzi talli kont omm għal ibnek, u għal tant
subien u bniet; talli llum inti omm ta’ din l-umanità li qed tisimgħek u
titgħallem mingħandek: jew it-triq tal-fraternità, jew aħna aħwa, jew nitilfu
kollox.
Grazzi grazzi!
Miġjub
mit-Taljan għall-Malti minn Fr Roy Galdes