ITTRA TAL-QDUSIJA TIEGĦU FRANĠISKU

LILL-ISQFIJIET TAL-ISTATI UNITI TAL-AMERIKA

 

Għeżież Ħuti fl-Episkopat,

 

Qed niktbilkom illum biex ngħidilkom kelmtejn f’dan iż-żmien delikat li qed tgħixu bħala Ragħajja tal-Poplu ta’ Alla pellegrin fl-Istati Uniti tal-Amerika.

 

1. Il-mixja mill-jasar għall-ħelsien li għamel il-Poplu ta’ Iżrael, hekk kif jirrakkontaha l-ktieb tal-Eżodu, tistedinna nħarsu lejn ir-realtà ta’ żmienna, immarkata b’mod hekk ċar mill-fenomenu tal-migrazzjoni, bħala mument deċiżiv fl-istorja biex naffermaw mill-ġdid mhux biss il-fidi tagħna f’Alla li hu dejjem qrib tagħna, inkarnat, migrant u rifuġjat, imma anki fid-dinjità infinita u traxxendenti ta’ kull persuna umana.[1]

 

2. Dawn il-kelmiet li bihom qed inħeġġiġkom mhumiex biss tal-wiċċ. Imqar jekk niflu ħafif ħafif id-duttrina soċjali tal-Knisja naraw b’ċerta enfasi li Ġesù Kristu huwa l-veru Għimmanu-El (ara Mt 1:23); ġarrab huwa wkoll l-esperjenza diffiċli li ġie mkeċċi minn art twelidu minħabba periklu imminenti għal ħajtu u l-esperjenza li jistkenn f’soċjetà u kultura barranin għal tiegħu. L-Iben ta’ Alla, meta sar bniedem, għażel ukoll li jgħix it-traġedja tal-immigrazzjoni. Nieħu gost infakkar, fost ħwejjeġ oħra, fil-kelmiet li bihom il-Papa Piju XII fetaħ il-Kostituzzjoni appostolika tiegħu dwar il-kura tal-migranti, li hi meqjusa l-“Magna Carta” tal-ħsieb tal-Knisja dwar il-migrazzjoni:

 

“Il-Familja ta’ Nazaret fl-eżilju, Ġesù, Marija u Ġużeppi, emigranti fl-Eġittu u rifuġjati hemmhekk biex jaħabru mir-rabja ta’ sultan ħażin, huma x-xempju, l-eżempju u l-faraġ tal-emigranti u tal-pellegrini f’kull żmien u f’kull pajjiż, tar-rifuġjati kollha f’kull qagħda tagħhom li, minħabba l-persekuzzjoni u l-ħtieġa, ikollhom iħallu art twelidhom, il-familja maħbuba u l-għeżież ħbieb tagħhom biex imorru f’art barranija”.[2]

 

3. Daqstant ieħor, Ġesù Kristu, li jħobb lil kulħadd bi mħabba universali, jedukana għall-għarfien dejjiem tad-dinjità ta’ kull essri uman, bla eċċezzjonijiet. Fil-fatt, meta nitkellmu fuq “dinjità infinita u traxxendenti”, nixtiequ nisħqu li l-valur l-aktar importanti li għandha l-persuna umana jegħleb u jwieżen kull kunsiderazzjoni ġuridika oħra li tista’ ssir biex tirregola l-ħajja fis-soċjetà. Għalhekk, il-fidili Nsara u l-persuni ta’ rieda tajba kollha huma msejħin jirriflettu fuq il-leġittimità ta’ normi u xejriet ta’ politika pubblika fid-dawl tad-dinjità tal-persuna u tad-drittijiet fundamentali tagħha, u mhux bil-maqlub.

 

4. Qed insegwi mill-qrib il-kriżi kbira li qed isseħħ fl-Istati Uniti bit-tnedija ta’ programm ta’ deportazzjonijiet tal-massa. Il-kuxjenza ffurmata tajjeb ma tistax ma tagħmilx ġudizzju kritiku u tesprimi n-nuqqas ta’ qbil tagħha ma’ kull xorta ta’ miżura li impliċitament jew espliċitament tidentifika l-istatus illegali ta’ xi migranti mal-kriminalità. Fl-istess waqt, hemm bżonn nagħrfu d-dritt ta’ nazzjon li jiddefendi lilu nnifsu u jżomm lill-komunità fiż-żgur minn dawk li għamlu atti kriminali vjolenti jew gravi matul il-permanenza tagħhom fil-pajjiż jew qabel ma waslu. Minkejja dan, l-att ta’ deportazzjoni ta’ persuni li f’ħafna każi ħallew arthom għal raġunijiet ta’ faqar estrem, nuqqas ta’ sigurtà, sfruttament, persekuzzjoni jew deterjorament gravi tal-ambjent, jagħmel ħsara lid-dinjità ta’ ħafna rġiel u nisa, u ta’ familji sħaħ, u jqegħidhom fi stat ta’ vulnerabbiltà jew nuqqas ta’ ħila partikulari li jiddefendu ruħhom.

 

5. Din mhix kwistjoni żgħira: Stat ta’ dritt awtentiku jidher proprju fit-trattament dinjituż li jixirqilhom il-persuni kollha, speċjalment dawk l-iżjed foqra u mwarrbin. Il-veru ġid komuni jiġi promoss meta s-soċjetà u l-gvern, bi kreattività u rispett rigoruż tad-drittijiet ta’ kulħadd – kif affermat f’diversi okkażjonijiet – jilqgħu, jipproteġu, jippromovu u jintegraw lill-aktar dgħajfa, dawk li ma għandhomx min jiddefendihom, u l-vulnerabbli. Dan ma jxekkilx l-iżvilupp ta’ politika li tirregolamenta migrazzjoni ordnata u legali. Madankollu, dan l-iżvilupp ma jistax iseħħ permezz tal-privileġġ ta’ xi wħud u s-sagrifiċċju ta’ oħrajn. Dak li jiġi mibni fuq il-fundament tal-forza u mhux fuq il-verità dwar id-dinjità ndaqs ta’ kull essri uman jibda ħażin u jispiċċa ħażin.

 

6. L-Insara jafu tajjeb li hu biss bl-affermazzjoni tad-dinjità infinita ta’ kulħadd li l-identità tagħna ta’ persuni u ta’ komunità tista’ timmatura. L-imħabba Nisranija mhijiex twessigħ konċentriku ta’ interessi li ftit ftit jitwessgħu għal persuni u gruppi oħra. Fi kliem ieħor: il-persuna umana mhijiex sempliċi individwu, relattivament espansiv, b’xi sentiment filantropiku! Il-persuna umana hija suġġett mogħni b’dinjità li, permezz tar-relazzjoni kostituttiva ma’ kulħadd, speċjalment mal-iktar foqra, ftit ftit kull darba jista’ jimmatura fl-identità u l-vokazzjoni tiegħu. Il-veru ordo amoris li għandna nippromovu hu dak li niskopru meta nimmeditaw kontinwament il-parabbola tas-“Samaritan it-Tajjeb” (ara Lq 10:25-37), jew aħjar meta nimmeditaw fuq l-imħabba li tibni fraternità miftuħa għal kulħadd, bla eċċezzjonijiet.[3]

 

7. Imma l-preokkupazzjoni għall-identità personali, komunitarja jew nazzjonali, lil hemm minn dawn il-kunsiderazzjonijiet, faċilment tintroduċi kriterju ideoloġiku li jgħawweġ il-ħajja soċjali u bħala kriterju ta’ verità jimponi r-rieda ta’ min hu l-aktar b’saħħtu.

 

8. Nirrikonoxxi l-isforzi prezzjużi tagħkom, għeżież ħuti Isqfijiet tal-Istati Uniti, intom u taħdmu f’kuntatt strett mal-migranti u r-rifuġjati, tipproklamaw lil Ġesù Kristu u tippromovu d-drittijiet umani fundamentali. Alla jħallaskom bil-kotra għal dak kollu li tagħmlu biex tipproteġu u tiddefendu lil dawk li huma meqjusa inqas prezzjużi, inqas importanti jew inqas umani!

 

9. Inħeġġeġ lill-fidili kollha tal-Knisja Kattolika, kif ukoll lill-bnedmin kollha ta’ rieda tajba, biex ma jċedux għal narrattivi li jiddiskriminaw u jikkawżaw tbatijiet inutli lil ħutna migranti u rifuġjati. Bi mħabba u ċarezza aħna msejħin ngħixu f’solidarjetà u fraternità, biex nibnu pontijiet li jqarrbuna dejjem iżjed lejn xulxin, biex nevitaw ħitan ta’ disprezz mifrux u biex nitgħallmu nagħtu l-ħajja tagħna hekk kif tahielna Ġesù Kristu għas-salvazzjoni ta’ kulħadd.

 

10. Nitolbu lil Sidtna Marija ta’ Guadalupe biex tipproteġi l-persuni u l-familji li jgħixu fil-biża’ u fit-tbatija minħabba l-migrazzjoni u/jew id-deportazzjoni. Il-“Virgen morena”, li kienet taf kif tirrikonċilja l-popli meta bejniethom kien hemm il-mibegħda, tagħti lilna lkoll li niltaqgħu mill-ġdid bħala aħwa, fit-tħaddina tagħha, u hekk immiddu l-pass ’il quddiem fil-bini ta’ soċjetà iżjed fraterna, inklużiva u rispettuża tad-dinjità ta’ kulħadd.

 

Fraternament,

 

Franġisku

 

Mill-Vatikan, 10 ta’ Frar 2025

 

 

miġjuba mit-Taljan għall-Malti minn Francesco Pio Attard