IL-PAPA FRANĠISKU
ANGELUS
Pjazza San Pietru
Il-Ħadd 29 ta' Novembru, 2020
Għeżież ħuti, il-jum it-tajjeb!
Illum, l-ewwel Ħadd tal-Avvent, tibda sena liturġika ġdida. Matulha l-Knisja tartikola l-mixja taż-żmien biċ-ċelebrazzjoni tal-ġrajjiet ewlenin tal-ħajja ta' Ġesù u tal-istorja tas-salvazzjoni. Hi hu tagħmel dan, bħala Omm, iddawwal il-mixja tal-eżistenza tagħna, tweżinna fil-ħidma tagħna ta' kuljum u turina t-triq lejn il-laqgħa tal-aħħar ma' Kristu. Il-liturġija tal-lum tistedinna ngħejxu l-ewwel "żmien qawwi" li hu dan l-Avvent, li jħejjijna għall-Milied, u għal din it-tħejjija, dan hu żmien ta' stennija, hu żmien ta' tama. Stennija u tama.
San Pawl (cfr 1 Kor 1,3-9) jurina l-għan tal-istennija. Liema hu? "Il-manifestazzjoni tal-Mulej" (v. 7). L-Appostlu jistieden lill-insara ta' Korintu biex jikkonċentraw l-attenzjoni tagħhom fuq il-laqgħa mal-persuna ta' Ġesù. Għan-nisrani l-aktar ħaġa importanti hi l-laqgħa ma taqta' xejn mal-Mulej, li jkun mal-Mulej. Hekk, imdorrijin inkunu mal-Mulej, nitħejjew għal-laqgħa, biex inkunu mal-Mulej fl-eternità. U dil-laqgħa definittiva sseħħ fl-aħħar tad-dinja. Iżda l-Mulej jiġi kuljum, sabiex, bil-grazzja tiegħu, aħna nkunu nistgħu nagħmlu l-ġid f'ħajjitna u fil-ħajja tal-oħrajn. Alla tagħna hu Alla-li-jiġi - tinsewhiex din: Alla hu Alla li dejjem ġej, ġej dejjem - : Hu ma jiddiżappuntax l-istennija tagħna! Il-Mulej qatt ma jiddiżappuntana. Forsi jħallina nistennew, iħallina nistennew xi waqtiet fid-dlam biex fina timmatura t-tama, imma qatt ma jiddiżappuntana. Il-Mulej dejjem ġej, dejjem jinsab qrib tagħna. Kultant jibqa' mistur, imma jiġi dejjem. Ġie f'waqt preċiz tal-istorja u sar bniedem biex jieħu dnubietna fuq spallejh - il-festa tal-Milied tfakkar din l-ewwel miġja ta' Ġesù f'dak il-waqt storiku -; jiġi mill-ġdid fl-aħħar taż-żminijiet bħala mħallef universali; u jiġi wkoll it-tielet darba, bit-tielet manjiera: jiġi kuljum iżur il-poplu tiegħu, biex iżur lil kull raġel u mara li jilqugħ fil-Kelma, fis-Sagramenti, fl-aħwa. Il-Bibbja tgħidilna li Ġesù jinsab fil-bieb iħabbat. Kuljum. Qiegħed fil-bieb ta' qlubna. Iħabbat. Inti taf tisma' l-Mulej iħabbat, li llum ġie jżurek, li jħabbat fuq qalbek bil-ħrara, b'idea, b'ispirazzjoni? Ġie f'Betlem, jerġa' jiġi fl-aħħar tad-dinja, imma kuljum jiġi għandna. Oqgħodu attenti, araw x'qed tħossu fi qlubkom meta l-Mulej ikun iħabbat.
Nafu li l-ħajja hi magħmula mit-tlugħ u l-inżul, mid-dawl u d-dlam. Kull wieħed u waħda minna ġarrabna waqtiet ta' delużjoni, nuqqas ta' suċċess u telfien. Minbarra dan, is-sitwazzjoni li qed ngħejxu fiha bħalissa, immarkata bil-pandemija, tqanqal ħafna nkwiet, biża' u skoraġġiment; hemm ir-riskju li naqgħu fil-pessimiżmu, ir-riskju li ningħalqu u naqgħu fl-apatija. X'għandha tkun ir-reazzjoni tagħna quddiem dan kollu? Jgħidhielna s-Salm tal-lum: "Ruħna tixxennaq għall-Mulej, hu l-għajnuna u t-tarka tagħna. Fih jinsab l-hena ta’ qalbna". Jiġifieri r-ruħ li tistenna, stennija mimlija fiduċja fil-Mulej ittina l-faraġ u l-kuraġġ fil-waqtiet mudlama tal-eżistenza. U mnejn jinbet dal-kuraġġ u dIn l-isfida mimlija fiduċja? Mnejn jinbtu? Jinbtu mit-tama. U t-tama ma tqarraqx, hija l-virtù li tmexxina 'l quddiem b'għajnejna fuq il-laqgħa mal-Mulej.
L-Avvent hu sejħa bla temma għat-tama: ifakkarna li Alla hu preżenti fl-istorja biex imexxieha lejn l-għan aħħari tagħha u għall-milja tagħha, li hi l-Mulej, il-Mulej Ġesù Kristu. Alla hu preżenti fl-istorja ta-umanità, huwa "l-Alla magħna", Alla mhux imbiegħed, dejjem jinsab magħna, sal-punt li jħabbat fuq il-bibien ta' qalbna bosta drabi. Alla jimxi ħdejna biex iweżinna. Il-Mulej ma jabbandunanhiex; jakkumpanjana fil-ġrajjiet tal-eżistenza tagħna biex jgħinna niskopru s-sens tal-mixja, it-tifsira tal-ħajja ta' kuljum, biex jimliena bil-kuraġġ waqt il-provi u waqt in-niket. Qalb it-tempesti tal-ħajja, Alla jnewlilna jdejh u jeħlisna mit-theddid. Dan sabih! Fil-Ktieb tad-Dewteronomju hemm pass sabiħ ħafna meta lill-poplu l-profeta jgħidlu: "Liema poplu għandu l-allat daqstant qrib tiegħu bħalma hu Alla tiegħek?" Ħadd, aħna biss għandna l-grazzja li għandna lil Alla qrib tagħna. Aħna nistennew lil Alla, nittammaw li jimmanifesta ruħu, imma Huwa wkoll jittama li aħna nuruh lilna nfusna!
Marija Santissma, mara tal-istennija, takkumpanja l-passi tagħna mal-medda ta' dis-sena lliturġika ġdida li qed nibdew, u tgħinna nwettqu dmirna bħala dixxipli ta' Kristu kif jurina l-Appostlu Pietru. U liema hu dan id-dmir? Li nagħtu r-raġuni tat-tama li hemm fina (cfr1 Pt 3,15).
Wara l-Angelus
Għeżież ħuti!
Nixtieq nesprimi mill-ġdid il-qrubija tiegħi mal-popolazzjonijiet tal-Amerika tan-Nofs li ntlaqtu mill-uragani qawwija. Niftakar partikolarment fil-gżejjer San Andrés, Providencia e Santa Catalina, kif ukoll il-kosta tal-Paċifiku tal-Kolombja. Nitlob għall-pajjiżi kollha li qed isofru minħabba dawn it-traġedji.
Nagħti tislima minn qalbu lilkom, fidili minn Ruma u pellegrini minn pajjiżi diversi. Insellem b'mod partikolari lil dawk kollha - sfortunatament f'numru żgħir ħafna - li ġew fl-okkażjoni tal-ħatra tal-Kardinali l-ġodda li saret ilbieraħ waranofsinhar. Nitolbu għat-tlettax-il membru ġdid tal-Kulleġġ tal-Kardinali.
Nawgura lilkom ilkoll il-Ħadd it-tajjeb u l-mixja tal-Avvent it-tajba. Nippruvaw nislitu l-ġid anki mis-sitwazzjoni diffiċli li qed iġġib fuqna l-pandemija: aktar rażan, attenzjoni raġjonevoli u rispettuża lejn il-ġirien li jistgħu jkunu fil-bżonn, xi waqt ta' talb fil-familja, bis-sempliċità. Dawn it-tliett affarijiet jgħinuna ħafna: rażan akbar, attenzjoni raġjonevoli lejn il-ġirien li jistgħu jkunu fil-bżonn u mbagħad, importanti ħafna, xi waqtiet ta' talb fil-familja, bis-sempliċità. Jekk jogħġobkom tinsewx titolbu għalija. L-ikla t-tajba u arrivederci.
Miġjub għall-Malti mit-Taljan minn Joe Huber