SOLENNITÀ TAL-QADDISIN PIETRU U PAWLU
IL-PAPA FRANĠISKU
ANGELUS
Pjazza San Pietru
It-Tlieta, 29 ta' Ġunju, 2021
Għeżież ħuti, il-jum it-tajjeb!
Fil-qofol tal-Evanġelju tal-liturġija tal-lum (Mt 16,13-19), lid-dixxipli l-Mulej jagħmlilhom mistoqsija deċisiva: "Intom, min tgħidu li jien?" (v. 15). Hi mistoqsija kruċjali li Ġesù jtenni lilna wkoll illum: "Min jien għalik?" int li lqajt il-fidi imma għadek tibża' taqdef fil-fond bis-saħħa tal-Kelam tiegħi? Min jien għalik li ilek nisrani tant żmien imma minħabba s-susa tad-drawwa tlift l-ewwel imħabba? Min jien għalik int li għaddej minn żmien diffiċli u għandek bżonn tqum fuq tiegħek biex terġa' taqbad it-triq? Ġesù jistaqsi: min jien għalik? Ejjew illum intuh tweġiba imma tweġiba li tiġi mill-qalb. Ilkoll kemm aħna, ejjew intuh tweġiba li ġejja mill-qalb.
Qabel dil-mistoqsija lid-dixxipli Ġesù kien għamlilhom oħra: "In-nies min jgħidu li jien?" (cfr v. 13). Kienet test biex jisma' l-ideat dwaru u dwar il-fama li kellu, imma lil Ġesù ma tinteressaħx il-popolarità, dan ma kienx dak it-tip ta' test. Allura għalfejn għamel dik il-mistoqsija? Biex jisħaq dwar differenza fundamentali fil-ħajja nisranija. Hemm min jeħel mal-ewwel mistoqsija, mal-opinjoni u jitkellem dwar Ġesù u hemm min jitkellem ma' Ġesù, jippreżentalu ħajtu, jidħol f'relazzjoni miegħu, jagħmel it-tranżizzjoni deċisiva. Dan jinteressah lill-Mulej: li Hu jkun iċ-ċentru ta' ħsibijietna, li jsir il-punt ta' riferiment tal-għozza tagħna; fi ftit kliem isir l-imħabba ta' ħajjitna. Mhux l-opinjonijiet li għandna dwaru: ma jinteressawhx. Tinteressah imħabbitna, jekk Hu jinsabx fi qlubna.
Il-qaddisin li qed niċċelebraw illum għamluha dit-tranżizzjoni u saru xhieda. Il-bidla fl-opinjoni biex ikollhom lil Ġesù f'qalbhom: xhieda. Ma kinux ammiraturi, imma imitaturi ta' Ġesù. Ma kinux spettaturi imma protagonisti tal-Evanġelju. M'emmnux bil-kliem iżda bil-fatti. Pietru ma qagħadx jitkellem dwar il-missjoni, għex il-missjoni, kien sajjied tal-bnedmin; Pawlu ma qagħadx jikteb kotba kulturali, imma kiteb ittri mgħejxa filwaqt li kien jivvjaġġa u jagħti xhieda. It-tnejn taw ħajjithom għall-Mulej u għall-aħwa. U jipprovokawna. Għax aħna għandna r-riskju li neħlu mal-ewwel mistoqsija, li nagħtu pariri u opinjonijiet, li jkollna ideat kbar u ngħidu kliem sabiħ, imma qatt ma nirriskjaw. U Ġesù jridna nirriskjaw. Per eżempju, kemm drabi ngħidu li rridu Knisja aktar fidila lejn l-Evanġelju, aktar qrib in-nies, aktar profetika, aktar missjunarja, imbagħad ma nagħmlu xejn konkret! Hu ta' swied il-qalb tara tant li jitkellmu, jikkummentaw u jiddiskutu,imma ftit huma li jagħtu xhieda. Ix-xhieda ma jintilfux fil-kliem, imma jnisslu l-frott. Ix-xhied ma joqgħodux igemgmu dwar l-oħrajn u dwar id-dinja, imma jibdew minnhom infushom. Ifakkruna li lil Alla mhux nispjegawh irridu imma nuruh bix-xhieda li nagħtu; mhux inħabbruh bil-proklami imma nkunu xhieda tiegħu bl-eżempju. Dan ifisser li "nirriskjaw ħajjitna".
Madankollu, meta nħarsu lejn il-ħajja ta' Pietru u Pawlu, tista' tinbet oġġezzjoni: it-tnejn kienu xhieda, imma mhux dejjem eżemplari: kienu midinbin! Pietru ċaħad lil Ġesù u Pawlu ppresegwita lill-insara. Però - u hawn hu l-punt -huma taw xhieda tal-waqgħat tagħhom ukoll. Per eżempju, San Pietru seta' jgħid lill-evanġelisti: "tiktbu xejn dwar l-iżbalji li għamilt", għamlu evanġelju 'sportiv'. Imma le, l-istorja tiegħu toħroġ għerja, toħroġ ċara fl-Evanġelji, bil-miżerji tiegħu kollha. L-istess jagħmel San Pawl, li fl-ittri jirrakkonta l-iżbalji u d-dgħufijiet. Hekkhu, minn hawn jibda x-xhud: mill-verità dwaru nnifsu, mit-taqbida tiegħu mad-dupliċità u l-falsità. Il-Mulej jista' jagħmel ħwejjeġ kbar permezz tagħna meta minflok noqgħodu niddefendu l-apparenza tagħna nkunu trasparenti miegħu u mal-oħrajn. Illum, għeżież ħuti, il-Mulej qed jikkonfrontana. U l-mistoqsija tiegħu hi l-istess: min jien għalik? Jiskava ġewwa fina. Permezz tax-xhieda ta' Pietru u Pawlu jixprunana biex inċarrtu l-maskri tagħna, biex nirrinunzjaw għall-kompromessi, għall-iskużi li jagħmluna berdin u medjokri. F'dan tgħinna l-Madonna, Reġina tal-Appostli. Jalla tixgħel fina x-xewqa li nkunu xhieda ta' Ġesù.
WARA L-ANGELUS
Għeżież ħuti,
pitgħada l-1 ta' Lulju, fil-Vatikan se tkun ġurnata speċjali ta' talb u riflessjoni għall-bżonnijiet tal-Libanu. Flimkien mal-kapijiet tal-Knejjes kollha preżenti fil-pajjiż taċ-ċedru, se nħallu l-Kelma tal-Iskrittura tnebbaħna, il-kelma li tgħid: "Il-Mulej għandu pjanijiet ta' paċi" (Ġer 29,11). Nistieden lil kulħadd jingħaqad magħna spiritwalment u jitlob biex il-Libanu joħroġ mill-kriżi gravi li jinsab fiha u juri mill-ġdid lid-dinja l-wiċċ tiegħu ta' paċi u tama.
Nhar l-1 ta' Lulju jaħbat il-160 anniversarju tal-ewwel ħarġa tal-'Osservatore Romano', "il-ġurnal tal-partit" kif insejjaħlu jiena. Awguri sbieħ u grazzi ħafna tas-servizz li tagħtu. Komplu ħidmitkom bil-fedeltà u l-kreattività.
U llum għalina hu anniversarju li jmissilna qalbna lkoll: 70 sena ilu l-Papa Benedittu kien ordnat saċerdot (applaws). Lilek, Benedittu, għażiż missier u ħuna, intuk l-għozza tagħna, il-gratitudni tagħna u l-qrubija tagħna. Hu jgħix fil-monasteru, imkien maħsub biex jospita komunitajiet kontemplattivi hawn fil-Vatikan. Bħalissa huwa hu l-kontemplattiv tal-Vatikan, li jqatta' ħajtu jitlob għall-Knisja u għad-djoċesi ta' Ruma li hu l-Isqof emeritu tagħha. Grazzi Benedittu, għażiż missier u ħuna. Grazzi għax-xhieda kredibbli tiegħek. Grazzi għall-ħarsa tiegħek li dejjem imdawra lejn ix-xefaq ta' Alla: grazzi!
Insellem minn qalbi lilkom ilkoll, pellegrini taljani u minn pajjiżi varji; imma llum irrid insellem b'mod partikolari lir-rumani, fil-festa tal-qaddisin patruni tagħna. Inberikkom, għeżież rumani! Nagwura kull ġid lill-belt ta' Ruma; illi, bl-impenn tagħkom ilkoll, taċ-ċittadini kollha, ssir vivibbli u akkoljenti, fejn ħadd ma jibqa' barra, fejn it-tfal u l-anzjani jsibu min jieħu ħsiebhom, fejn ikun hemm ix-xogħol li jkun dinjituz, fejn il-foqra u min hu tal-aħħar ikun iċ-ċentru tal-proġetti politiċi u soċjali. Nitlob għal dan. U intom ukoll għeżież fidili minn Ruma, itolbu għall-Isqof tagħkom. Grazzi.Iil-festa t-tajba lil kuħadd! L-ikla t-tajba u arrivederci.
Miġjub għall-Malti mit-Taljan minn Joe Huber