IL-PAPA FRANĠISKU
ANGELUS
Pjazza
San Pietru
Il-Ħadd,
28
ta’ Jannar,
2024
Għeżież ħuti, il-jum it-tajjeb!
L-Evanġelju tal-lum jippreżentalna lil Ġesù jeħles persuna li kienet maħkuma minn spirtu ħażin (cfr Ml 1,21-28) li kien iħabbatha u jġagħalha tgħajjat (cfr vv. 23.26). Hekk jagħmel ix-xitan: irid jaħkimna biex “jorbtilna qlubna bil-ktajjen”. Jorbtilna qlubna: dak irid ix-xitan. U aħna rridu nitħarsu minn dawn “il-ktajjen” li joħonqu l-libertà. Għax ix-xitan jisraqlek il-libertà, dejjem. Allura ejjew nagħtu isem lil xi wħud minn dawn il-ktajjen li jxekklu qlubna.
Qed naħseb fid-dipendenzi li jagħmluk ilsier, qatt m’int sodisfatt, jherrulek l-enerġija, ġidek u l-għożża ta’ dawk ta’ madwarek; qed naħseb fil-modi dominanti u perfezzjoniżmi impossibbli, fil-konsumiżmu, fl-edoniżmu li lill-persuna jirrenduha biċċa merċa u jirvinawlha r-relazzjonijiet. U ktajjen oħra: hemm it-tentazzjonijiet u l-kundizzjonamenti li jfarrku l-awtostima, is-serenità u l-ħila tal-għażla u l-imħabba lejn il-ħajja; katina oħra: il-biża’ li ġġagħlek tħares bil-pessimiżmu lejn il-futur, u l-intolleranza li dejjem titfa’ l-ħtija fuq ħaddieħor; imbagħad hemm katina kerha ħafna: l-idoatrija tal-poter, li tiġġenera kunflitti u ddur għall-armi qattiela jew tinqeda bl-inġustizzja ekonomika u l-manipulazzjoni tal-ħsieb. Bosta huma l-ktajjen ta’ ħajjitna.
U Ġesù ġie biex jeħlisna minn dawn il-ktajjen kollha. U llum, quddiem l-isfida tax-xitan li jgħajjet: “Xi trid minna?....Ġejt biex teqridna?” (v. 24), iwieġeb: “Iskot! Oħroġ minnu!” (v. 25). Ġesù għandu s-setgħa jkeċċi lix-xitan. Ġesù jeħles mis-setgħa tal-ħażen, u, noqgħodu attenti: ikeċċi lix-xitan imma ma jiddjalogax miegħu! Ġesù qatt ma ddjaloga max-xitan: u meta safa ittantat fid-deżert, it-tweġibiet tiegħu kienu kliem mill-Bibbja, qatt djalogu. Ħuti, max-xitan ma niddjalogawx! Iftħu għajnejkom: max-xitan ma niddjalogawx, għax jekk taqbad tiddjaloga miegħu, jerbaħlek, dejjem. Oqgħodu attenti.
Allura x’nagħmlu meta nħossuna ittantati jew magħkusin? Ninnegozjaw max-xitan? Le, miegħu ma ninnegozjawx. Għandna ninvokaw lil Ġesù: nitolbuh bil-ħerqa, hemmhekk, fejn inħossu l-ktajjen tal-ħażen u tal-biża’ jagħfsuna aktar bil-qawwa. Bil-qawwa tal-Ispirtu tiegħu, lill-malinn, il-Mulej jixtieq itennilu llum ukoll: “Itlaq, ħalli lil dir-ruħ fil-paċi, tifridx id-dinja, il-familji, il-komunitajiet; ħallihom jgħixu bil-kwet, sabiex fihom iwarrad il-frott tal-Ispirtu tiegħi, mhux tiegħek – hekk jgħid Ġesù -, sabiex bejnitehom isaltnu l-imħabba, il-ferħ, il-ħlewwa u minflok il-vjolenza u l-għajjat ta’ mibgħeda jsaltnu l-libertà u l-paċi.
Nistaqsu lilna nfusna allura: jien irrid verament il-ħelsien minn dawk il-ktajjen li qed ijassruli qalbi? Imbagħad, naf ngħid “le” għat-tentazzjonijet tal-ħażen qabel ma dan jidħol jgħammar f’qalbi? Fl-aħħar, ninvoka lil Ġesù, inħallih jaħdem fija biex ifejjaqni minn ġewwa?
Il-Verġni Mqaddsa tħarisna mill-ħażen.
Wara l-Angelus
Għeżież ħuti!
Minn tliet snin ‘l hawn il-biki ta’ uġigħ u l-ħsejjes tal-armi ħadu post it-tbissima karatteristika tal-popolazzjoni tal-Myanmar. Għalhekk, ningħaqad mal-leħen ta’ xi Isqfijiet Birmani “sabiex l-armi ta-qerda jinbidlu fi strumenti biex jitkattru l-umanità u l-ġustizzja”. Il-paċi hi mixja u nistieden lill-partijiet kollha involuti biex jibdew passi ta’ djalogu u fehema biex l-art tal-Myanmar tasal għat-tragward tar-rikonċiljazzjoni fraterna. Ħallu l-għajnuna umanitarja tgħaddi biex tiggarantixxi l-meħtieġ lil kull persuna.
U jalla jiġri l-istess fil-Lvant Nofsani, fil-Palestina u f’Iżarel, u kull fejn hemm il-ġlied: għandu jkun hemm rispett lejn il-popolazzjonijiet! Niftakar dejjem b’għafsa kbira ta’ qalb fil-vittmi, speċjalment ċivili, li qed tħalli l-gwerra fl-Ukrajna. Jekk jogħġobkom, isimgħu l-għajta tal-paċi: l-għajta tan-nies għajjenin minħabba l-vjolenza u jridu l-gwerra tieqaf, il-gwerra li hi diżastru għall-popli u telfa bla qies għall-umanità!
B’sodisfazzjoni smajt li l-Reliġjużi nisa u persuni oħra li kienu nħatfu f’Haiti, inħelsu. Nitlob li jinħelsu dawk kollha li għadhom maħtufin u li tieqaf kull għamla ta’ vjolenza; kulħadd għandu jagħti sehemu għall-iżvilupp paċifiku tal-pajjiż, li jeħtieġ ikun imwieżen mill-ġdid mill-Komunità Internazzjonali.
Nesprimi l-qrubija tiegħi mal-komunità tal-knisja ta’ Santa Marija f’Istanbul, li waqt il-Quddiesa sar attakk bl-armi fuqha u ħalla persuna mejta u oħrajn midruba.
Illum qed niċċelebtraw il-Jum Dinji tal-Morda bil-Lebbra. Ngħmel kuraġġ lil kulmin hu impenjat li jgħin u li jerġa’ jintegra fis-soċjetà lill-persuni milqutin minn dil-marda, li minkejja li qed tonqos, għadha waħda mill-aktar mardiet li jbeżżgħu u tolqot lill-aktar foqra u emarġinati.
Insellem lilkom ilkoll li ġejtu minn Ruma, mill-Italja u minn bosta nħawi tad-dinja. Insellem b’mod partikolari lill-istudenti tal-Istitut “Puente Ajuda”: minn Olivenza, (Spanja), u lil dawk mill-Istitut “Sir Michelangelo Refalo” minn Għawdex.
Indur lejkom żgħażagħ tal-Azzjoni Kattolika, mill-parroċċi u mill-iskejjel kattoliċi ta’ Ruma. Ġejtu hawn fi tmiem “Il-Karwana tal-Paċi”, li tulha rriflettejtu dwar is-sejħa biex tkunu ħarriesa tal-maħluq, don t’Alla. Grazzi tal-preżenza tagħkom. U grazzi għall-impenn tagħkom biex tibnu soċjetà aħjar. Issa nisimgħu il-messaġġ li dawn sħabkom, li jinsabu maġenbi, se jaqrawlna.
(qari tal-messaġġ)
Nawgura lil kulħadd il-Ħadd it-tajjeb. Jekk jogħġobkom, tinsewx titolbu għalija. Rajtu kemm iż-żgħażagħ u t-tfal tal-Azzjoni Kattolika huma bravi! Kuraġġ! L-ikla t-tajba u arrivederci!
Miġjub għall-Malti mit-Taljan minn Joe Huber