IL-PAPA FRANĠISKU

ANGELUS

Pjazza San Pietru
Il-Ħadd, 27 ta’ Ottubru, 2024

Għeżież ħuti, il-Ħadd it-tajjeb,

Illum l-Evanġelju tal-liturġija (Mk 10,46-52) jgħidilna li Ġesù jfejjaq raġel għama.  Jismu Bartimew, imma l-folla tat-triq tinjorah: hu tallab imsejken.  Dawk in-nies mank iħarsu lejn dan l-għama; iwarrbuh, jinjorawh.  Ebda ħarsa ta’ attenzjoni, ebda sentiment ta’ ħniena.  Bartimew ma jarax imma jisma’ u jsamma’ leħnu.  Jgħajjat, jgħolli leħnu sew: “Bin David, ikollok ħniena minni!” (v. 48).  Iżda Ġesù jisimgħu, jarah.   Itiħ attenzjoni u jsaqsih: “Xi tridni nagħmillek?” (v. 51).

“Xi tridni nagħmillek?”  Dil-mistoqsija quddiem persuna għamja donnha provokazzjoni, imma fil-fatt hi prova.  Lil Bartimew Ġesù qed isaqsih: lil min qed tfittex verament, u għal liema raġuni.  Min hu “Iben David” għalik?  U hekk il-Mulej jibda jiftaħ għajnejn l-għama.  Neżaminaw tliet aspetti ta’ dil-laqgħa, li ssir djalogu” l-għajta, il-fidi, il-mixja.

L-ewwelnett l-għajta ta’ Bartimew li mhix biss talba għall-għajnuna.  Hi affermazzjoni tiegħu nnifsu.  L-għama qed jgħid: “Jien neżisti, arawni.  Jien ma narax, Ġesù.  Inti Tarani?”  Iva, Ġesù jara r-raġel tallab, jisimgħu, bil-widnejn tal-ġisem u b’dawk tal-qalb.  Naħsbu ftit dwarna, meta fit-triq niltaqgħu ma’ xi tallab: kemm drabi nħarsu n-naħa l-oħra, kemm drabi ninjorawh, qisu mank jeżisti.  U aħna nisimgħuha l-għajta tat-tallaba?

It-tieni punt: il-fidi.  X’jgħid Ġesù?  “Mur, il-fidi tiegħek salvatek” (v. 52).  Bartimew jara għax jemmen; Kristu hu d-dawl ta’ għajnejh.  Il-Mulej josserva kif Bartimew qed iħares lejH.  Lit-tallab jien kif inħares lejh?  Ninjorah?  Inħares lejh kif jagħmel Ġesù?  Għandi ħila nifhem il-mistoqsijiet tiegħu, l-għajta tiegħu għall-għajnuna?  Meta tagħti l-elemożina tħares f’għajnejn it-tallab?  Tmisslu idu biex tħoss laħmu?

Fl-aħħar, il-mixja.  Bartimew imfejjaq, “baqa’ miexi wara Ġesù fit-triq” (v. 52).  Imma aħna lkoll Bartimew, għama minn ġewwa, li baqa’ miexi wara Ġesù ladarba kien qorob lejH.  Meta tersaq lejn xi talab u turih li int qribu, ikun Ġesù li qed jersaq lejk fil-persuna ta’ dak il-fqir.  Jekk jogħobkom, ma nagħmlux konfużjoni: l-elemożima mhix donazzjoni.  Huwa dak li jkun qed jagħti l-elemożina li jirċievi l-aktar grazzji, għax ikun qed jippermetti lill-Mulej iħares lejh.

Nitolbu flimkien lil Marija, żerniq tas-salvazzjoni, biex tindokra l-mixja tagħna fid-dawl ta’ Kristu.

Wara l-Angelus

Għeżież ħuti!

Illum temmejna s-Sinodu tal-Isqfijiet.  Nitolbu sabiex dak kollu li għamilna tul dax-xahar jibqa’ miexi għall-ġid tal-Knisja.  Fit-22 ta’ Ottubru kien il-50 anniversarju minn meta San Pawlu VI kien waqqaf il-Kummissjoni għar-relazzjonijiet reliġjużi mal-Għebraiżmu, u għada jaħbat is-60 anniversarju tad-Dikjarazzjoni Nostra Aetate, tal-Konċilju Ekumeniku Vatikan II.  F’daż-żmien ta’ sofferenzi kbar u tensjoniijiet, nagħmel kuraġġ lil kull min hu impenjat fuq livell lokali fid-djalogu għall-paċi.

Għada f’Ginevra se tiftaħ Konferenza Internazzjonali importanti mnedija mis-Salib l-Aħmar u n-Nofs Qamar l-Aħmar, fl-okkażjoni tal-75 sena tal-Konvenzjoni ta’ Ginevra.  Jalla dil-ġrajja terġa’ tniggez il-kuxjenzi sabiex waqt il-kunflitti armati tkun rispettata l-ħajja u d-dinjità tal-persuni u tal-popli, kif ukoll l-integrità tal-istrutturi ċivili u l-imkejjen tal-kult, b’rispett tad-dritt umanitarju internazzjonali.  Hu ta’ swied il-qalb tara li fil-gwerra, f’xi nħawi, qed jinqerdu sptarijiet u skejjel.

Ningħaqad mal-maħbuba Knisja ta’ San Cristóbal de las Casas, fl-istat messikan ta’ Chiapas, li qed tibki s-saċerdot Marcelo Pérez Pérez, li kien assassinat il-Ħadd li għadda.  Kien qaddej żelanti tal-Evanġelju u tal-poplu fidil ta’ Alla.  Jalla s-sagrifiċċju tiegħu, bħal dak ta’ saċerdoti oħra li nqatlu minħabba l-fedeltà tagħhom lejn il-ministeru, ikun żerriegħa tal-paċi u tal-ħajja nisranija.

Jien qrib il-popolazzjonijiet tal-Filippini li ntlaqtu minn ċiklun qawwi ħafna. Il-Mulej iwieżen lil dak il-poplu tant mimli fidi.

Insellem lilkom rumani u Pellegrini.  Insellem partikolarment lill-Konfraternità tas-Señor de los Milagros, tal-peruvjani ta’ Ruma, u rroddihom ħajr għat-testimonjanza tagħhom filwaqt li nikoraġġihom biex ikomplu l-mixja tal-fidi tagħhom.

Insellem lill-grupp tal-anzjani minn Loiri Porto San Paolo, lill-adoloxxenti tal-Griżma minn Assemini (Cagliari), lill-“Pellegrini della Salute” minn Piacenza, lill-Oblati Sekulari Ċisterċensi tas-Santwarju ta’ Cotrino u lill-Konfederazzjoni tal-Poveri Cavalieri di San Bernardo di Chiaravalle.

U, jekk jogħġobkom inkomplu nitolbu għall-paċi, speċjalment fl-Ukrajna, fil-Palestina, f’Iżrael, fil-Libanu, ħalli ma tibqax tikbes il-gwerra u fl-ewwel post jitqiegħed ir-rispett lejn il-ħajja umana, li hi qaddisa!  L-ewwel vittmi huma l-popolazzjoni ċivili: naraw dan ta’ kuljum.  Wisq vittmi innoċenti!  Kuljum naraw immaġni ta’ tfal immassakrati.  Wisq tfal!  Nitolbu għall-paċi.

Nawgura lil kulħadd il-Ħadd it-tajjeb.  U jekk jogħġobkom tinsewx titolbu għalija.  L-ikla t-tajba u arrivederci!

Miġjub għall-Malti minn Joe Huber