FESTA TA' SAN STIEFNU PROTOMARTRI
ANGELUS
Biblijoteka tal-Palazz Appostoliku
Is-Sibt, 26 ta' Diċembru, 2020
Għeżież ħuti, il-jum it-tajjeb!
L-Evanġelju tal-bieraħ kellimna dwar Ġesł "il-veru dawl" li ġie fid-dinja, dawl "li jiżreġ fid-dlam" u li "d-dlam ma għelbux" (Ġw 1, 9.5). illum naraw lix-xhud ta' Ġesł, San Stiefnu, li jiddi fid-dlam. Ix-xhieda jiddu bid-dawl ta' Ġesł mhumiex dawl fihom infushom. Lanqas il-Knisja m'għandha d-dawl tagħha; minħabba f'hekk il-missirijiet tal-qedem kienu jagħrfu l-Knisja bħala: "l-misteru tal-qamar". L-istess kif il-qamar m'għandux id-dija fih innifsu, ix-xhieda m'għandhomx dija fihom infushom, il-ħila tagħhom hi li jieħdu d-dawl minn Ġesł u jkunu rifless tiegħu. Stiefnu jiġi mixli bil-qerq u mħaġġar bla ħniena, imma fid-dlam tal-mibgħeda, waqt it-turment tat-tħaġġir, hu jilma d-dawl ta' Ġesł: jitlob għal dawk li kienu qed joqtluh u jaħfrilhom, bħal Ġesł fuq is-salib. Hu l-ewwel martri, jiġifieri l-ewwel xhud, l-ewwel minn sensiela ta' ħutna rġiel u nisa li, sal-lum, għadhom iwasslu d-dawl fid-dlam: persuni li jwieġbu għall-ħażin bit-tajjeb, li ma jaqgħux għall-vjolenza u għall-gideb, imma jkissru l-ispirali tal-mibgħeda bil-manswetudni tal-imħabba. Dawn ix-xhieda jixgħelu ż-żerniq ta' Alla fl-iljieli tad-dinja.
Imma kif insiru xhieda? Bl-imitazzjoni ta' Ġesł, billi nieħdu d-dawl minn Ġesł. Din hi t-triq għal kull nisrani: jimita lil Ġesł, jixrob id-dawl minn Ġesł. San Stiefnu jtina l-eżempju: Ġesł ġie biex jaqdi mhux biex ikun moqdi (cfr Mk 10,45), u hu jgħix biex jaqdi u mhux biex ikun moqdi, u hu jiġi biex jaqdi: Stiefnu kien magħżul djaknu, jiġifieri qaddej, u kien jgħin lill-foqra fl-imwejjed (Atti 6,2). Jagħmel ħiltu biex jimita lill-Mulej kuljum u jagħmel hekk sal-aħħar: jisfa arrestat bħal Ġesł, ikkundannat u maqtul 'il barra mill-belt, u, bħal Ġesł, jitlob u jaħfer. Waqt li kienu qed iħaġġruh jgħid: "Mulej, tgħoddhulhomx dan id-dnub" (7,60). Stiefnu hu xhud għax jimita lil Ġesł.
Imma tista' tqum mistoqsija: jiswew verament dawn it-testimonjanzi ta' tjubija, meta fid-dinja ssaltan il-kattiverja? X'jiswa li titlob u taħfer? Biex tkun ta eżempju tajjeb biss? Imma għal xiex iservi dak? Le, hemm ħafna aktar minn hekk. Niskopruh minn dettall. Fost dawk li Stiefnu kien qed jitlob għalihom u li kien qed jaħfrilhom, kien hemm, jgħidilna t-test, "żagħażugħ jismu Sawlu" (v. 58) li kien "fehma waħda magħhom fil-mewt li tawh" (8, 1). Ftit wara, bil-grazzja t'Alla, Sawl jikkonverti, jirċievi d-dawl ta' Ġesł, jaċċettah, jikkonverti u jsir Pawlu, l-akbar missjunarju tal-istorja. Pawlu jitwieled propju mill-grazzja t'Alla imma permezz tal-maħfra ta' Stiefnu. Din hi ż-żerreigħa tal-konverżjoni. Hi l-prova li l-ġesti ta' mħabba jibdlu l-istorja: ukoll dawk żgħar, moħbija, ta' kuljum. Għaliex Alla jmexxi l-istorja permezz tal-kuraġġ umli ta' min jitlob, iħobb u jaħfer. Tant qaddisin moħbija, il-qaddisin tal-bieb ta' ħdejna, xhieda moħbija tal-ħajja, b'ġesti żgħar ta' mħabba li jibdlu l-istorja.
Li nkunu xhieda ta' Ġesł jgħodd għalina wkoll. il-Mulej irid li ħajjitna nagħmluha opra straordinarja permezz tal-ġesti ordinarji, il-ġesti tal-ħajja ta' kuljum. Hemmhekk, fejn ngħixu, fil-familja, fuq ix-xogħol, kullimkien, aħna msejħin biex inkunu xhieda ta' Ġesł, anki billi nagħtu d-dawl bi tbissima, dawl li mhuwiex tagħna: hu ta' Ġesł, anki jekk biss naħarbu mid-dellijiet tat-tqassis u tal-pettegolezzi. Imbagħad, meta naraw xi ħaġa li mhix sejra sew, minflok nikkritikaw, inpaċpċu, nilmentaw, nitolbu għal min ikun żbalja u għal dik is-sitwazzjoni diffiċli. U meta fid-dar tinqala' diskussjoni, minflok nippruvaw nieħdu tagħna minn fuq, nippruvaw inberrdu' u nerġgħu nibdew mill-ġdid kull darba, naħfru lil min offenda. Affarijiet żgħar, imma jibdlu l-istorja għax jiftħu l-bieb, jiftħu t-tieqa għad-dawl ta' Ġesł. Waqt li kien qed jilqa' ġo fih il-ġebel tal-mibgħeda, San Stiefnu kien qed irodd lura kliem ta' maħfra. B'hekk bidel l-itorja. Aħna wkoll, ta' kuljum, nistgħu nbiddlu l-ħażin f'tajjeb, kif jissuġġerixxi proverbju sabih li jgħid: "Agħmel bħal-palma: jitfgħulha l-ġebel u hi tħalli t-tamal jaqa'".
Illum nitolbu għal kull min qed isofri l-persekuzzjoni f'isem Ġesł. Sfortunatament huma ħafna. Huma aktar milli kien hemm fl-ewwel żminijiet tal-Knisja. Inħallu f'idejn il-Madonna lil dawn ħutna li jwieġbu bil-maswetudni għall-oppressjoni u, bħala xhieda veri ta' Ġesł, jegħlbu l-ħażen bit-tajjeb.
Wara l-Angelus
Għeżież ħuti,
insellem likom ilkoll, familji, gruppi u fidili singoli li qed issegwu dan il-waqt ta' talb permezz tal-mezzi tal-komunikazzjoni soċjali. Ikollna nagħmlu hekk biex nevitaw li n-nies jiġu fil-pjazza. Hekk, biex nikkollaboraw mad-dispożizzjonijiet li tawna l-awtoritajiet, biex ngħinu lil xulxin naħarbu minn dil-pandemija.
Jalla l-atmosfera tal-ferħ tal-Milied, li llum għadha tidwi fi qlubna, tqanqal f'kulħadd ix-xewqa li nikkuntemplaw lil Ġesł fil-presepju, biex naqduh u nħobbuh fil-persuni li jinsabu maġenbna. F'dal ġranet irċevejt messaġġi ta' awguri minn Ruma u minn inħawi oħra tad-dinja. Impossibbli nwieġeb għalihom wieħed wieħed, imma napprofitta ruħi biex issa nesprimi l-gratitudni tiegħi, speċjalment għad-don tat-talb li intom toffru għalija u li jien irroddilkom lura minn qalbi
Il-festa ta' San Stiefnu t-tajba. Jekk jogħġobkom, komplu itolbu għalija.
L-ikla t-tajba u arrivederci!
Miġjub għall-Malti mit-Taljan minn Joe Huber