IL-PAPA FRANĠISKU
ANGELUS
Pjazza San Pietru
Il-Ħadd 18 ta' Ottubru, 2020
Għeżież ħuti, il-jum
it-tajjeb!
L-Evanġelju ta' dan il-Ħadd (cfr Mt 22,15-21) jurina lil Ġesù
jħabbat wiċċu
mal-ipokrisija tal-għedewwa
tiegħu.
Huma jagħmlulu ħafna
kuimplimenti - għall-bidu,
tant kumplimenti - imma mbagħad jagħmlulu mistoqsija insidjuża biex iġibuh f'diffikultà u jnaqqsulu ġieħu mal-poplu. Jistaqsuh: "Sewwa jew le li wieħed iħallas it-tribut lil Ċesari?"
(v. 17), jiġifieri li jitħallsu
t-taxxi lil Ċesari. Dak iż-żmien fil-Palestina,
il-ħakma tal-imperu ruman kienet iddarras
- u wieħed jifhimha għax kienu invażuri - anki għal raġunijiet reliġjużi.
Għall-popolazzjoni, il-kult tal-imperatur, imsaħħaħ bix-xbieha
tiegħu fuq il-muniti, kienet offiża għal Alla ta' Iżrael. Dawk li kienu jkellmu lil
Ġesù huma konvinti li m'hemmx alternattiva għall-mistoqsija tagħhom:
jew "iva", inkella "le".
Kienu qed jistennew li b'dil-mistoqsija żgur li se jagħlqu lil Ġesù f'rokna
u jwaqqgħuh f'nasba. Imma hu jifhem il-ħażen tagħhom u jeħles min-nasba. Allura jitlobhom juruh il-munita, il-munita tat-taxxi, jeħodha f'idejh u jistaqsi ta' min hija x-xbieha li hemm imnaqqxa. Huma jwieġbu
li hi ta' Ċesari, jiġifieri dik tal-imperatur.
Allura Ġesù jwieġeb:
"Agħti lil Ċesari dak li hu ta' Ċesari
u lil Alla dak li hu ta' Alla" (v. 21).
B'din it-tweġiba Ġesù
jerfa' ruħu 'l fuq mill-polemika. Ġesù dejjem hu fuq kollox. Min-naħa jagħraf li t-taxxa lil Ċesari għandha titħallas - u lilna wkoll, it-taxxi għandhom jitħallsu - għax
ix-xbieha li hemm fuq il-munita hija
tiegħu; imma fuq kollox ifakkar
li kull persuna ġġorr fiha xbieha oħra - inġorruha fi qlubna, f'ruħna -: dik ta' Alla, u għalhekk huwa lilu u lilu
biss li kull wieħed u waħda minna aħna midjunin għall-eżistenza
tagħna, ta' ħajjitna.
F'dis-sentenza ta' Ġesù m'hemmx
biss il-kriterju tad-distinzjoni bejn l-isfera politika u l-isfera reliġuża, imma joħorġu ċari l-orjentamenti tal-missjoni ta' dawk li jemmnu f'kull żmien,
għalina wkoll illum. Il-ħlas tat-taxxi hu dmir taċ-ċittadini kif ukoll il-ħarsien tal-liġijiet ġusti tal-istat. Fl-istess waqt, jeħtieġ
ikun affermat il-primat ta' Alla fil-ħajja umana u fl-istorja, bir-rispett lejn id-dritt ta' Alla fuq dak kollu
li hu tiegħu.
Minn hawn titnissel
il-missjoni tal-Knisja u tal-insara: li jitkellmu dwar Alla u jkunu
xhieda tiegħu mal-bnedmin ta' żmienhom. Kull wieħed u waħda minna, bis-saħħa tal-Magħmudija,
aħna msejħin biex inkunu preżenza
ħajja fis-soċjetà,
nanimawha bl-Evanġelju
u b-ilma tal-ħajja vitali tal-Ispirtu s-Santu. Ifisser li nimpenjaw ruħna bl-umiltà u fl-istess ħin bil-kuraġġ, u nagħtu
s-sehem tagħna fil-bini ta' ċiviltà ta' mħabba fejn isaltnu l-ġustizzja u l-fraternità.
Maria Santissma tgħin
lil kulħadd biex jibqa' bogħod
minn kull ipokrisija u biex inkunu ċittadini onesti u kostruttivi. U twieżen lilna d-dixxipli ta' Kristu fil-missjoni tax-xhieda li Alla hu ċ-ċentru u s-sens tal-ħajja.
Wara l-Angelus
Għeżież ħuti!
Illum qed niċċelebraw
il-Jum Missjunarju Dinji li għandu bħala tema "Hawn jien, ibgħat lili. Nissieġa tal-fraternità". Sabiħa dil-kelma "nissieġa":
kull nisrani hu msejjaħ biex ikun nissieġ tal-fraternità. B'mod speċjali dawn huma l-missjunarji rġiel u nisa - saċerdoti, persuni konsagrati u lajċi - li jiżirgħu
l-Evanġelju fl-għalqa
kbira tad-dinja. Niltolbu għalihom u ngħinuhom b'mod konkret. F'dan il-qafas irrid niżżi
ħajr lil Alla għall-ħelsien tant
mistenni ta' Patri Pier Luigi Maccalli...
- insellmulu b'dan l-applaws! - li kien inħataf sentejn ilu fin-Niġer. Nifirħu wkoll għax miegħu inħelsu tliet ostaġġi oħra. Inkomplu nitolbu għall-missjunarji u l-katekisti
u anki għal dawk li huma persegwitati jew li jinħatfu f'diversi nħawi tad-dinja.
Nixtieq nagħti kelma
ta' inkoraġġiment u sostenn
lis-sajjieda li għal aktar minn xahar
ilhom maqbudin fil-Libja u lill-familjari tagħhom. Iżommu ħajja t-tama li ma jdumux ma jerġgħu iħaddnu magħhom lill-għeżież
tagħhom jekk jafdaw f'Marija Kewkba tal-Baħar. Nitlob ukoll għad-diversi taħdidiet li qed isiru fuq livell
internazzjonali sabiex ikunu ta' fejda għall-ġejjieni tal-Libja. Ħuti, waslet is-siegħa li titwaqqaf kull għamla ta' ostilità favur id-djalogu li jwassal għall-paċi, għall-istabbiltà u għall-għaqda
fil-pajjiż.
Nitolbu flimkien għas-sajjieda u għal-Libja,
fis-skiet.
Insellem lilkom ilkoll,
rumani u pellegrini minn pajjiżi differenti. B'mod partikolari insellem u nbierek b'għożża lill-komunità
peruvjana ta' Ruma, miġbura hawn bix-xbieha meqjuma tas-Señor de los Milagros (Is-Sinjur
tal-Mirakli). Applaws lill-komunità peruvjana u wkoll lill-volontarji tal-Għaqda Taljana għall-Ħarsien tal-Annimali
u l-Legalità.
U nawgura lil kulħadd il-Ħadd it-tajjeb. Jekk jogħġobkom, tinsewx titolbu għalija. L-ikla t-tajba u arrivederci!
Miġjub mit-Taljan
għalll-Malti minn Joe Huber