IL-PAPA FRANĠISKU
ANGELUS
Pjazza
San Pietru
Il-Ħadd, 17
ta’ Diċembru,
2023
Għeżież ħuti, il-jum it-tajjeb!
Illum, it-tielet Ħadd tal-Avvent, l-Evanġelju jkellimna dwar il-missjoni ta’ Ġwanni l-Battista (cfr (Ġw 1,-8.19-28), u jippreżentahulna bħala l-profeta mibgħut minn Alla “biex jixhed għad-dawl” (v. 8). Nirriflettu dwar dan: jixhed għad-dawl.
Ix-xhieda. Ċertament il-Battista hu bniedem straordinarju. In-nies imorru bi ħġarhom jisimgħuh miġbudin mill-atteġġjament tiegħu koerenti u sinċier (cfr vv. 6.7). Ix-xhieda tiegħu ġejja mis-sinċerità tal-lingwaġġ, l-onestà fl-imġieba, l-awsterità tal-ħajja. Dan kollu, lil dal-persunaġġ jagħmlu differenti minn persunaġġi famużi u setgħana taż-żmien, li, minflok, kienu jorbtu ħafna fuq l-apparenza. Persuni bħalu, retti, ħielsa u kuraġġużi, huma persuni mdawlin, affaxxinanati: jixprunawna biex nintrefgħu mill-medjokrità u sabiex min-naħa tagħna nkunu mudelli ta’ ħajja tajba għall-oħrajn. Il-Mulej, f’kull żmien jibgħat irġiel u nisa minn dawn. Nafu nagħrfuhom? Nippruvaw nitgħallmu mix-xhieda tagħhom u nagħmlu ftit eżami tal-kuxjenza? Jew inħallu lill-persunaġġi ‘tal-moda’ jsaħħruna? U nispiċċaw b’atteġġjament superfiċjali.
Iżda Ġwanni hu mdawwal għax jixhed għad dawl. Imma liema hu d-dawl tiegħu? Iweġibna hu stess meta lill-folol li jmorru bi ħġarhom jisimgħuh, jgħidilhom ċar u tond li hu mhux id-dawl, lil hu mhux il-Messija (cfr vv. 19-20). Id-dawl hu Ġesù, il-Ħaruf t’Alla, ‘Alla li jsalva”. Hu biss jifdi, jeħles, ifejjaq u jdawwal. Għalhekk, Ġwanni hu biss “leħen” li jmexxi lill-aħwa lejn il-Kelma; jaqdi, bla ma jfittex unuri jew li jkun protagonista: hu bozza, filwaqt li d-dawl huwa Kristu ħaj (cfr vv. 26-27’ Ġw 5,35).
Ħuti, l-eżempju ta’ Ġwanni l-Battista jgħallimna tal-anqas żewġ affarijiet. L-ewwel li ma nistgħux insalvaw bil-ħila tagħna waħedna: f’Alla biss insibu d-dawl tal-ħajja. U t-tieni, li kull wieħed u waħda minna, bil-qadi, bil-koerenza, bl-umiltà, bix-xhieda tal-ħajja – u dejjem bil-grazzja t’Alla – nistgħu nkunu bozza li tixgħel u tgħin lill-oħrajn isibu t-triq biex jiltaqgħu ma’ Ġesù.
Allura nistaqsu: kif nista’ jien, fl-ambjenti fejn ngħix, mhux f’xi jum ‘il bogħod, imma minn issa, f’dal-Milied, inkun xhud tad-dawl, xhud ta’ Kristu?
Marija, mera tal-qdusija, tgħinna nkunu rġiel u nisa li nirriflettu lil Ġesù, id-dawl li ġej fid-dinja.
Wara l-Angelus
Għeżież ħuti!
Ilbieraħ, fis-Santwarju ta’ Nostra Signora di Luján, fl-Arġentina, kien beatifikat il-Kardinal Eduardo Pironio, ragħaj umli u ħabrieki, xhud tat-tama, difensur tal-foqra. Kien ikkollabora ma’ San Ġwanni Pawlu II fil-promozzjoni tal-lajċi u fil-Jiem Dinji taż-Żgħażagħ. Jalla l-eżempju tiegħu jgħinna nkunu Knisja li toħroġ, li takkumpanja lil kulħadad mat-triq, speċjalment lilll-aktar dgħajfa. Applaws lill-Beatu l-ġdid!
Nixtieq infakkar l-eluf ta’ migrnati li qed jippruvaw jaqsmu l-foresta ta’ Darién bejn il-Kolombja u l-Panama. Spiss huma familji bit-tfal li jaffrontaw l-avventura ta’ mogħdijiet perikulużi, għax ingannati b’mod falz minn min iwegħedhom triq imqassra u żgura, imbagħad jisfaw ittrattati ħażin u misruqin. Mhux ftit jitilfu ħajjithom f’dik il-ġungla. Hemm bżonn ta’ sforz flimkien bejn il-pajjiżi milqutin direttament u tal-Komunità internazzjonali, biex nevitaw li dir-realtà traġika tgħaddi minn taħt ir-riħ u biex flimkien jagħtu tweġiba umanitarja.
U ma ninsewx lil ħutna li qed isofru minħabba l-gwerra, fl-Ukrajna, fil-Palestina u f’Iżrael u fl-inħawi l-oħra fejn hemm il-kunflitti. Jalla l-Milied li qed joqrob isaħħaħ l-impenn biex tinfetaħ it-triq tal-paċi. Għadhom qed jasluli aħbarijiet koroħ ħafna u ta’ niket kbir minn Gaża. Qed isiru bumbardamenti u qed isir sparar fuq nies li ma jistgħu jagħmlu xejn, ma jistgħux jiddefendu ruħhom. U dan seħħ ukoll saħansitra fil-kumpless parrokkjali tal-Familj Mqaddsa, fejn mhemmx terroristi imma familji, tfal, persuni morda u diżabbli, sorijiet. Omm u bintha, is-sinjura Nahida Khalil Anton u l-familja Samar Kamal Anton inqatlu, filwaqt li suldati speċjalizzati fil-mira ferew xi persuni li kienu sejrin lejn it-toilet. Saret ħsara lid-dar tas-Sorijiet ta’ Madre Tereża u laqtulhom il-ġeneratur. Xi ħadd jgħid: “Dan terroriżmu, din hi l-gwerra”. Iva, hi l-gwerra, huwa t-terroriżmu. Għalhekk l-Iskrittura tafferma li Alla jsikket il-gwerer...l-ark jaqsam u l-lanza jkisser” (Salm 46,9). Nitolbu lill-Mulej għall-paċi.
Insellem lilkom ilkoll, gruppi parrokkjali u assoċjazzjonijiet li ġejtu Ruma mill-Italja u minn tant inħawi tad-dinja. Insellem partikolarment lill-pellegrini mill-Istati Uniti tal-Amerika u mill-Polonja; lill-fidili minn Mormanno, Acilia u Viterbo.
U issa nsellem lilkom, għeżież tfal u żgħażagħ mill-oratorji u mill-iskejjel ta’ Ruma, li ġibtu magħkom l-istatwi ta’ Ġesù Bambin biex tberkuhom. Inberikom (jagħmel is-sinjal tas-salib). U jien u nbierek il-“Bambini” tagħkom nistedinkom titolbu quddiem il-presepju għat-tfal li se jgħaddu Milied diffiċli, fil-postijiet fejn hemm il-gwerra, fil-kampijiet tat-turufnati, f’sitwazzjonijiet ta’ miżerja kbira. Grazzi ta’ dan u l-Milied it-tajjeb lilkom u lill-familji tagħkom! Applaws lit-tfal!
Nawgura lil kulħadd il-Ħadd it-tajjeb. Jekk jogħġobkom, tinsewx titolbu għalija. L-ikla t-tajba u arrivederci!
Miġjub għall-Malti mit-Taljan minn Joe Huber