IL-PAPA FRANĠISKU
ANGELUS
Pjazza San Pietru
3 ta’ Lulju, 2022
Għeżież ħuti, il-jum it-tajjeb!
Fl-Evanġelju tal-Liturġija ta’ dal-Ħadd naqraw li “l-Mulej għażel tnejn u sebgħin dixxipli oħra u bagħathom tnejn tnejn qablu f’kull belt u raħal fejn kien se jmur” (Lq 10,1). Id-dixxipli ntbagħtu tnejn tnejn, mhux wieħed waħdu. F’ċertu aspett, li tmur għall-missjoni tnejn tnejn tidher ħaġa mhix prattika, tidher li fiha aktar żvantaġġi milli vantaġġi. Hemm ir-riskju li tnejn ma jiftehemux, li l-pass ta’ wieħed ikun eħfef minn tal-ieħor, li wieħed minnhom jgħejja jew jimrad mat-triq, u minħabba f’hekk l-ieħor ikollu jieqaf. Iżda meta xi ħadd ikun waħdu, donnu li l-pass ikun eħfef u bla xkiel. Iżda Ġesù mhux hekk jaħsibha: qablu ma jibgħat lil ħadd waħdu imma dixxipli li jmorru tnejn tnejn. Nagħmlu mistoqsija: għal liema raġuni il-Mulej għamel din l-għażla?
Xogħol id-dixxipli hu li jmorru qablu fil-villaġġi biex iħejju n-nies ħalli jilqgħu lil Ġesù; u l-istruzzjonijiet li Hu tahom mhumiex tant dwar dak li għandhom jgħidu, jiġifieri mhux dwar ‘il-handbook’ ta’ diskorshom, le; fuq ix-xhieda tal-ħajja, ix-xhieda li kellhom jagħtu aktar milli fuq dak li kellhom jgħidu. Infatti Hu jsejħilhom ħaddiema: jiġifieri huma għandhom sejħa biex jaħdmu, biex jevanġelizzaw bl-imġieba tagħhom. U l-ewwel azzjoni konkreta li biha huma jwettqu l-missjoni tagħhom hi propju li jmorru tnejn tnejn. Id-dixxipli mhumiex nies b’ras iebsa li jriduha tgħaddi tagħhom, li ma jafux iħallu lill-ieħor jitkellem. Qabel kollox hi l-istess ħajja tad-dixxipli li tħabbar l-Evanġelju: il-fatt li jafu jgħixu flimkien, jirrispettaw lil xulxin, li mhux moħħhom biex juru li huma aħjar mill-ieħor, ir-riferiment maqbul bejniethom hu l-Imgħallem waħdu.
Jistgħu jinħmew pjanijiet pastorali perfetti, jitwettqu proġetti magħmulin tajjeb, nistgħu norganizzaw ruħna sal-anqas dettall; nistgħu niġbru folol u jkollna ħafna mezzi; imma jekk m’hemmx id-disponibbiltà għall-fraternità, il-missjoni evanġelika ma timxix ‘il quddiem. Darba waħda, missjunarju rrakkonta li kien mar l-Afrika flimkien ma’ sieħbu tal-komunità reliġjuża. Iżda ftit wara nfired minnu u waqaf f’villaġġ fejn b’suċċess wettaq serje ta’ attivitajiet ta’ bini għall-ġid tal-komunità. Kollox kien miexi ħarir. Imma ġurnata waħda kellu xokk: induna li ħajtu kienet saret dik ta’ imprenditur tal-affari tiegħu, dejjem idur mas-siti tal-bini u l-karti tal-kontijiet! Iżda.... u “l-iżda” baqa’ fejn kien. Għalhekk ħalla t-tmexxija f’idejn ħaddieħor, f’idejn il-lajċi, u mar jitlaqa’ ma sieħbu. Fehem dan għax il-Mulej kien bagħat lid-dixxipli “tnejn tnejn”: il-missjoni evanġelizzatriċi ma tinbeniex fuq l-attiviżmu personali, jiġifieri fuq “x’tagħmel” imma fuq ix-xhieda tal-imħabba fraterna, anki fid-diffikultajiet li jinqalgħu bl-għajxien f’komunità.
Allura nistgħu nistaqsu lilna nfusna: kif qed inwassluha aħna l-aħbar it-tajba tal-Evanġelju? Qed nagħmlu dan bi stil ta’ fraternità, jew bil-mod tad-dinja, bil-protagoniżmu, bil-kompetizzjoni u l-effiċjenza? Nistaqsu lilna nfusna jekk għandniex ħila nikkollaboraw, jekk nafux nieħdu deċiżjonijiet flimkien, b’rispett sinċier lejn min jinsab ħdejna, filwaqt li nagħtu importanza lill-opinjoni tiegħu, jekk aħniex nagħmlu dan f’komunità, mhux għal rasna. Infatti hu fuq kollox b’dal-mod li l-ħajja tad-dixxiplu turi li tixbaħ lil dik tal-Imgħallem, billi tħabbru lill-oħrajn realment.
Il-Verġni Marija, Omm il-Knisja, tgħallimna nħejju t-triq għall-Mulej bix-xhieda tal-fraternità.
Wara l-Angelus
Għeżie ħuti!
Ilbieraħ f’San Ramon de la Nueva Oran, fl-Arġentina kienu beatifikati Pedro Ortiz de Zárate, saċerdot djoċesan u Giovanni Antonio Solinas, presbiteru tal-Kumpanijja ta’ Ġesù. Dawn iż-żewġ missjunarji, li ddedikaw ħajjithom għat-tixrid tal-fidi u biex jiddefendu l-popolazzjonijiet indiġeni, inqatlu fl-1683 għax kienu qed iwasslu l-messaġġ tal-paċi tal-Evanġelju. Jalla l-eżempju ta’ dawn iż-żewġ martri jgħinna nkunu xhieda tal-Bxara t-Tajba mingħajr kompromessi billi niddedikaw ruħna bil-ġenerożità għas-servizz tal-aktar dgħajfa. Applaws lill-Beati l-ġodda!
Inkomplu nitolbu għall-paċi fl-Ukrajna u fid-dinja kollha kemm hi. Nappella lill-Kapijiet tan-nazzjonijiet u tal-Organizzazzjonijiet internazzjonali biex jirreaġixxu għat-tendenza li l-konflittwalità u l-kontrapożizzjoni jkomplu jissaħħnu. Id-dinja għandha bżonn il-paċi. Mhux paċi mibnija fuq l-ekwilibriju tal-armamenti, fuq il-biża’ reċiproku. Le, dan mhux sew. Dan ifisser li rreġġgħu lura l-istorja sebgħin sena. Il-kriżi fl-Ukrajna kellha tkun, - iżda jekk hemm ir-rieda għad tista’ ssir -, sfida għall-istatisti għorrief, li għandhom ħila li bid-djalogu jibnu dinja aħjar għall-ġenerazzjonijiet il-ġodda. Bl-għajnuna t’Alla, dan dejjem hu possibbli! Imma hemm bżonn li mill-istrateġija tal-poter politiku, ekonomiku u militari ngħaddu għal-proġett ta’ paċi globali: le għal dinja mifruda bejn qawwiet jiġġieldu; iva għal dinja magħquda bejn il-popli u ċ-ċiviltajiet li jirrispettaw lil xulxin.
Insellem lilkom illkoll, għeżież rumani u pellegrini! Insellem partikolarment lill-letturi u l-ministranti minn Dobra, fil-Polonja; lill-istudenti minn Slavonski Brod, fil-Korazja; lill-fidili albaniżi flimkien mal-kappillani tagħhom u l-ġemgħa itineranti tal-Mixja Neokatekumenali tal-Albanija. Insellem lill-fidili minn Napli, Aascoli Piceno, Perugia u Catania u lill-adoloxxenti tal-Griżma minn Tremignon u Vaccarino, fid-djoċesi ta’ Vicenza.
Nawguralkom il-Ħadd it-tajjeb. Jekk jogħġobkom tinsewx titolbu għalija. L-ikla t-tajba u arrivederci!
Miġjub għall-Malti mit-Taljan minn Joe Huber