SOLENNITÀ TAL-QADDISIN KOLLHA
IL-PAPA FRANĠISKU
ANGELUS
Pjazza
San Pietru
It-Tlieta, 1
ta’ Novembru,
2022
Għeżież ħuti, il-festa t-tajba, il-jum it-tajjeb!
Illum qed niċċelebraw lill-Qaddisin kollha u nistgħu nieħdu impressjoni li tqarraq bina: għandna mnejn naħsbu li qed niċċelebraw lil ħutna nisa u rġiel li tul ħajjithom kienu dejjem perfetti, lineari, preċiżi, anzi “illamtati”. Iżda l-Evanġelju tal-lum igiddeb dil-viżjoni stereotipata, din “il-qdusija tas-santi”. Infatti l-Beatitudnijiet ta’ Ġesù (cfr Mt 5, 1-12), li huma l-karta tal-identità tal-qaddisin, pjuttost juruna l-oppost: ikellmuna dwar ħajja kontra l-kurrent, ħajja rivoluzzjonarja! Il-qaddisin huma l-veri rivoluzzjonarji.
Nieħdu per eżempju beatitudni attwali ħafna: “Henjin dawk li jġibu l-paċi” (v. 9), u naraw kif il-paċi ta’ Ġesù hi differenti ħafna minn dak li nimmaġinaw aħna. Ilkoll nixtiequ l-paċi, imma spiss dak li nixtiequ aħna ma jkunx il-vera paċi, ikun ifisser li noqgħodu bi kwietna, iħalluna fil-paċi, li ma jkollniex problemi imma kwiet u kalma. Iżda Ġesù ma jsejjaħx beati lil dawk li jħossuhom relaxed, iżda lil dawk li jġibu l-paċi u jitqabdu biex iġibu l-paċi, il-bennejja, l-operaturi tal-paċi. Infatti l-paċi trid tinbena u bħal kull kostruzzjoni oħra titlob impenn, kollaborazzjoni, paċenzja. Aħna kieku nixtiequ li l-paċi tinżel mill-għoli, imma l-Bibbja tkellimna dwar “iż-żerriegħa tal-paċi” (Żk 8, 12) għax tinbet mill-ħamrija tal-ħajja, miż-żerriegħa ta’ qlubna; tikber fis-silenzju, jum wara ieħor, permezz ta’ opri ta’ ġustizzja u ta’ ħniena, kif juruna x-xhieda mdawwla li qed nagħmlu l-festa tagħhom illum. U aktar, aħna għandna l-idea li l-paċi tinkiseb bil-forza u s-setgħa: għal Ġesù hu l-maqlub. Ħajtu u ħajjet il-qaddisin jgħidulna li ż-żerriegħa tal-paċi, biex tikber u tagħti l-frott, l-ewwel trid tmut. Il-paċi ma tinkisibx billi ngħelbu jew nirbħu fuq xi ħadd, qatt mhi vjolenti, qatt mhi armata. Kont qed nara l-programm “A Sua Immagine”, tant qaddisin nisa u rġiel li tqabdu, ġabu l-paċi imma bil-ħidma, billi taw ħajjithom, offrew ħajjithom.
Allura kif nistgħu nagħmlu biex insiru operaturi tal-paċi? Qabel kollox hemm bżonn inneħħu l-armi minn qlubna. Iva, għax ilkoll kemm aħna armati bi ħsibijiet aggressivi, wieħed kontra l-ieħor, bi kliem li jaqta’, u naħsbu li nistgħu niddefendu ruħna bil-barbed wire” tal-ilmenti u bil-ħitan tas-siment tal-indifferenza; u niddefendu ruħna bl-ilmenti u bl-indifferenza. Iżda din mhix paċi, din hi gwerra. Iż-żerriegħa tal-paċi titlob minna li l-għalqa ta’ qalbna nżarmawha mill-armi. Kif inhi sejra qalbek? Imneżża’ mill-armi jew hi mimlija b’dawn is-sentimenti, bl-ilmenti u l-indifferenza, bl-aggressjoni? U kif nistgħu nneħħu l-armi minn qlubna? Billi ninfetħu għal Ġesù, li hu “l-paċi tagħna” (Ef 2, 14). Minn hawn irridu nibdew, għax mhux b’ħilitna nkunu operaturi tal-paċi, qaddisin, hu don tiegħu, hija grazzja.
Ħuti, inħarsu fina nfusna u nistaqsu: aħna bennejja tal-paċi? Hemm, fejn ngħixu, nistudjaw, naħdmu, inġibu t-tensjoni, kliem li jweġġa’ tqassis velenuz, polemiki li jifirdu? Jew inkella niftħu t-triq tal-paċi: naħfru li min offendiena, nieħdu ħsieb lil min jinsab imwarrab fil-ġenb, infejqu xi inġustizzja billi ngħinu li min għandu anqas? Dan jissejjaħ “bini tal-paċi”.
Tista’ tqum mistoqsija tal-aħħar, li tgħodd għall-beatitudnijjiet kollha: sewwa lil ngħixu hekk? Mhux ħajja ta’ tellief? Ġesù nnifsu jtina t-tweġiba: dawk li jġibu l-paċi “jissejħu ulied Alla” (Mt 5,9): fid-dinja jidhru qieshom barra minn posthom, għax ma jċedux għal-loġika tas-setgħa u li jkunu minn fuq, fis-Sema jkunu eqreb lejn Alla, l-aktar li jkunu jixbħuh. Imma, fir-realtà, anki min jipprevarika jibqa’ b’idejh vojta, filwaqt li min iħobb lil kulħadd u ma jweġġa’ lil ħadd, jirbaħ: kif jgħid is-Salm: ”Ulied iħalli min iħobb is-sliem” (cfr Salm 237, 37).
Il-Verġni Marija, Reġina tal-Qaddisin kollha, tgħinna nkunu bennejja tal-paċi fil-ħajja ta’ kuljum.
Wara l-Angelus
Pitgħada se nibda Vjaġġ Appostoliku fir-Renju tal-Bahrein, fejn se nibqa’ sal-Ħadd li ġej. Minn issa nixtieq insellem u nirringrazzja minn qalbi lir-Re, lill-Awtoritajiet, lil ħuti fil-fidi u l-popolazzjoni kollha tal-pajjiż, speċjalment dawk li ilhom żmien jaħdmu biex titħejja diż-żjara. Se jkun vjaġġ f’isem id-djalogu: infatti se nieħu sehem f’Forum bit-tema dwar il-ħtieġa assoluta li l-Orjent u l-Oċċident joqorbu ferm aktar lejn xulxin għall-ġid tal-konvivenza umana; se jkolli opportunità niltaqa’ ma’ rappreżentanti reliġjużi, partikolarment iżlamiċi. Nitlob lil kulħadd jakkumpanjani bit-talb ħalli kull laqgħa u avveniment jiswew ta’ ġid biex, f’isem Alla, jsostnu l-kawża tal-fraternità u tal-paċi, li ż-żminijiet tal-lum għandhom bżonn estrem u urġenti tagħha.
Insellem b’għożża lilkom ilkoll, rumani u pellegrini li ġejtu mill-Italja u minn pajjiżi oħra. Insellem b’mod partikolari lill-fidili minn Setúbal, fil-Portugall, u l-adoloxxenti tal-professjoni tal-fidi minn Cassina de’ Pecchi, djoċesi ta’ Milan.
Jien kuntent nilqa’ lill-parteċipanti tal-Ġirja tal-Qaddisin imnedija mill-Fundazzjoni “Missjonijiet Don Bosco” biex il-festa tal-Qaddisin Kollha jgħixuha f’dimensjoni popolari. Grazzi tal-inizjattiva sabiħa tagħkom u tal-preżenza tagħkom!
Għeżież ħuti, jekk jogħġobkom, ma ninsewx lill-Ukrajna li għaddejja minn martirju: nitolbu għall-paċi, nitolbu sabiex fl-Ukrajna jkun hemm il-paċi.
Il-ġurnata ta’ għada hi dedikata għat-tifkira tal-fidili mejtin kollha. Minbarra li nagħmlu ż-żjara tradizzjonali lill-oqbra tal-għeżież tagħna, nistedinkom tiftakru fihom ukoll peremzz ta’ talb ta’ suffraġju, speċjlament waqt il-quddiesa.
Nawgura lil kulħadd il-festa t-tajba. U, jekk jogħġobkom, tinsewx titolbu għalija. L-ikla t-tajba u arrivederci!
Miġjub għall-Malti mit-Taljan minn Joe Huber