Strument meħtieġ li bih id-divin jidħol fl-uman, u l-bniedem
jieħu sehem iżjed bis-sħiħ fil-ħajja ta’ Alla.
... |
IS-SALIB
Kitba ta’ Chiara Lubich
(Ħajr
lil Fr Roy Galdes)
Strument meħtieġ li bih id-divin jidħol fl-uman, u l-bniedem
jieħu sehem iżjed bis-sħiħ fil-ħajja ta’ Alla...
“Erfa’ salibek...”
Kliem strambi u uniċi. U anke dawn, bħall-kliem l-oħra ta’
Ġesù, għandhom xi ftit minn dak id-dawl li d-dinja ma tafx
bih. Huma kelmiet tant imdawla li bihom l-għajnejn
tal-bnedmin, u anke dawk ta’ l-insara bla ħeġġa, jibqgħu
mogħmija. Forsi mhemm xejn misterjuż iżjed mis-salib. Huwa
diffiċli ħafna biex il-bniedem jifhem is-salib. Ma jistax
jidħol fil-moħħ u fil-qalb tal-bniedem! Ma jidħolx għaliex
ma nifhmuhx, għaliex ħafna drabi aħna sirna insara ta’ l-isem,
insara għax mgħammdin, forsi insara li nipprattikaw xi ftit,
imma tant ‘il bogħod minn dak li jrid Ġesù.
Nisimgħu dwar is-salib fir-Randan, inbusuh fil-Ġimgħa l-Kbira,
indendluh fil-klassijiet ta’ l-iskola. Bih nibdew u ntemmu
xi wħud mill-azzjonijiet tagħna, iżda mhuwiex mifhum. U
forsi l-iżball huwa dan: li fid-dinja ma nifhmux x’inhi l-imħabba.
IMĦABBA. L-isbaħ kelma, imma l-iżjed kelma deformata u
sfigurata li teżisti. L-imħabba Hija l-essenza ta’ Alla,
hija l-ħajja ta’ wlied Alla, in-nifs tan-nisrani u saret
wirt, monopolju tad-dinja; tinsab fuq ix-xufftejn ta’ dawk
li m’għandhomx dritt isemmuha.
Ċertament fid-dinja, mhux l-imħabba kollha hija hekk: hemm
l-imħabba ta’ l-omm, per eżempju, li jagħti valur kbir
lill-imħabba – għax hemm it-tbatija! Hemm l-imħabba ta’ l-aħwa,
l-imħabba bejn il-miżżewġin, l-imħabba lejn l-ulied: imħabba
tajba u sabiħa li hi xbieha tal-imħabba tal-Missier. Imma
dak li ma nistgħux nifhmu llum hija l-imħabba perfetta: li
Alla li ħalaqna, niżel fostna bħala bniedem fost il-bnedmin,
għex magħna u baqa’ magħna u ħalla ’l min isallbu ma’ salib
għalina biex isalvana.
Din hija ħaġa tant kbira, għolja, tant divina, wisq
imdemmija u mimlija tbatija biex nifhmuha. Forsi nistgħu
nifhmu xi ħaġa minnha meta naraw l-imħabba ta’ omm. Għax l-imħabba
ta’ l-omm mhix karezzi u bews biss, imma fuq kollox hi
sagrifiċċju. L-istess Ġesù. L-imħabba wasslitu sas-salib, li
għal ħafna jfisser ġenn. Imma kien biss dak il-ġenn li salva
l-bnedmin u kien dak il-ġenn li fassal tant qaddisin.
Infatti l-qaddisin huma bnedmin li kapaċi jifhmu s-salib.
Bnedmin li, mexjin wara Ġesù, il-Bniedem-Alla, refgħu
salibhom kuljum bħala l-iżjed ħaġa prezzjuża li għandhom,
ħabbewh ħajjithom kollha, u skoprew li s-salib hu ċ-ċavetta
, l-unika ċavetta li tiftaħ teżor, anżi it-teżor. Is-salib
jiftaħ bil-mod il-mod ir-ruħ biex tidħol f’komunjoni ma’
Alla. U hekk permezz tal-bniedem, Alla jerġa’ jittawwal fuq
id-dinja tagħna, u jerġa’ jagħmel mill-ġdid dak li kien
jagħmel meta kien fostna, bniedem fost il-bnedmin: ibierek
lil min jisħtu, jaħfer lil min jinsultah, isalva, ifejjaq,
jippriedka l-kliem tas-sema, jitma’ lil min hu bil-ġuħ, u
jwaqqaf soċjeta’ ġdida.
Insomma, is-salib hu dak l-istrument meħtieġ li bih id-divin
jidħol fl-uman u l-bniedem jieħu sehem sħiħ fil-ħajja ta’
Alla, u jogħla ’l fuq mis-saltna ta’ din id-dinja
għas-Saltna tas-Sema.
Imma jeħtieġ “li terfa’ salibek”. Kif tqum filgħodu stennieh
(is-salib). Għax inti taf li bih biss jaslulna dawk id-doni
li d-dinja ma tafx bihom: dik il-paċi, dak il-ferħ, u l-għarfien
tal-ħwejjeġ ta-sema, li ħafna ma jafux bihom.
Is-salib…. ħaġa tant komuni. Tant fidil, fis-sens li ma
jonqsilna qatt fil-ħajja ta’ kuljum. Biżżejjed għalina li
nilqgħuh biex insiru qaddisin.
Is-Salib... is-sinjal tan-nisrani... li d-dinja ma tridx.
Għax id-dinja temmen li jekk taħrab is-salib, taħrab it-tbatija.
Imma d-dinja ma tafx ħaġa: li s-salib jiftaħ beraħ ir-ruħ ta’
min jifhmu u jimlieha bid-dawl u bl-imħabba.
Is-Salib… sinjal ta’ l-ikbar imħabba. Imħabba vera. U għax
hi imħabba vera tweġġagħna u tniggiżna. Għalhekk irridu
nneħħuh u naħirbuh! Għax hi l-imħabba li d-dinja tant
tfittex, imma ma tistax issib.
|