DISKORS MILL-EĊĊELLENZA
TIEGĦU
DOTT. GEORGE ABELA PRESIDENT TA’ MALTA, FL-OKKAŻJONI
TAŻ-ŻJARA FIS- SEMINARJU TAL-ARĊISQOF, TAL-VIRTU’
RABAT. L-ERBGĦA 13 TA’ JANNAR, 2010
Kif
nifhmu l-missjoni tal-qassis fil-kuntest
soċjo-kulturali ta’ Malta llum.
Reverendu Rettur,
Staff
akkademiku,
Għeżież Seminaristi,
Nirringrazzjakom ta’ din l-istedina sabiħa. Hu
ta’ pjaċir kbir għalija li nkun fostkom, is-Seminaristi
u Saċerdoti futuri għas-servizz tas-soċjeta’.
Jiena ġejt mistieden ngħid xi ħaġa dwar “Kif
nifhmu l-missjoni tal-qassis fil-kuntest
soċjo-kulturali ta’ Malta llum”. Jiena ma ġejtx
hawn biex ngħid jien x’inhuma l-kompiti
tal-qassis –
ċert
lis-Seminarju kapaċi jagħmel dan aħjar minni.
Imma għandi xi ftit riflessjonijiet x’naqsam
magħkom dwar kif nifhem il-missjoni saċerdotali.
L-ewwel
ħaġa li ġiet f’moħħi meta qrajt it-tema ta’ dan
l-intervent kienet li nistaqsi lili nnifsi kemm
hemm differenzi sinifikanti, jekk hemm, bejn
il-kuntest soċjo-kulturali Malti u dak tal-bqija
tal-Ewropa. Jiena aktarx tal-fehma, li fid-dinja
tal-lum, jekk għad fadal xi differenzi, dawn id-differenzi
m’ humiex kbar u m’ humiex se jibqgħu jeżistu
għal żmien twil wisq. Malta llum m’għadhiex
iżolata bħal dari u l-ambjent soċjali u
kulturali tal-kontinent tal-Ewropa mhux daqshekk
differenti minn tagħna. Dan jidher li joħroġ
ċar ukoll mir-riflessjonijiet fid-dokument li
ngħatajt intitolat “Qassis, agħraf lilek
innifsek!” Il-mezzi istantanji
tal-komunikazzjoni tal-massa, l-ivvjaġġar
frekwenti, it-turiżmu f’pajjiżna, il-bidu ta’
multikulturaliżmu li qed jibda’ jinħass f’Malta
wkoll, in-numru wisq akbar ta’ żgħażagħ li qed
jirċievu edukazzjoni għolja, anki l-fatt li llum
Malta hija membru fl-Unjoni Ewropea – dan kollu,
fil-fehma tiegħi, huwa indikazzjoni ċara li
Malta qegħda kull ma tmur issir aktar konformi
mat-tendenzi Ewropej. Jiena ċert illi s-seminaristi
tagħna huma diġa’ konxji ta’ dan u huma
ippreparati sabiex jaqdu l-missjoni fis-soċjeta’
li se jaħdmu fiha b’dan l-għarfien f’moħħhom.
Il-Papa Benedettu XVI inawgura s-sena tal-qassis
fid-19 ta’ Ġunju li għadda bl-iskop li l-qassisin
ikattru l-impenn tagħhom għal tiġdid intern li
jnissel xhieda aktar inċiżiva tal-Vanġelu fid-dinja.
Il-missjoni tal-qassis fil-kuntest
soċjo-kulturali tal-lum mhix waħda faċli u s-saċerdot
jaf li kultant se jiffaċċja inkomprensjoni u
anki, f’xi każi, ostilita’. Iżda hu jkompli
bil-ħidma pastorali tiegħu u ġenerożament
jiddedika ħajtu għal dawk li ġie mgħajjat biex
jaqdi.
Jiena
ma naħsibx li nista’ nispjega x’inhi l-missjoni
tas-saċerdot aħjar milli poġġieha l-Papa
Bendettu XVI innifsu meta f’messaġġ
lill-parteċipanti f’irtir li sar f’Ars, fi
Franza, f’Settembru li għadda qalilhom: (nittraduċi)
–
“Il-qassis ma jeżistix għalih innifsu, jeżisti
għal kulħadd. Din hija preċiżament waħda mill-akbar
sfidi ta’ żminijietna. Tassew, illum aktar minn
qatt qabel, il-qassis, bniedem tal-kelma divina
u ta’ dak li hu sagru, irid ikun bniedem
tal-ferħ u tat-tama. Lin- nies li m’għadhomx
jifhmu li Alla hu mħabba safja, il-qassis jibqa’
dejjem itenni li l-ħajja hi ta’ min igħixha u li
Kristu jagħtiha tifsira sħiħa għax iħobb
lill-bnedmin u jħobbhom kollha.”
Waqt
udjenza ġenerali fil-5 ta’ Awissu li għadda, il-Papa
ġab bħala eżempju ta’ dak li ried ifisser,
il-Kurat ta’ Ars, San Ġwann Battista Maria
Vianney, li għalkemm għex f’kuntest
soċjo-kulturali differenti minn dak tal-lum,
għadu xorta waħda eżempju tajjeb ta’ kif is-saċerdot
jista’ jqanqal il-qlub tal-bnedmin billi jurihom
kif hu stess kien jgħix ħajja ta’ tifsira
profonda permezz tal-ħbiberija tiegħu ma’ Kristu.
Nistaqsi: “Is-soċjeta’ kif tħares lejn
il-missjoni tal-qassis u x’tistenna minnu?”
Domanda kumplessa. Probabbli kollox jista’
jidħol fil-“job description”: bniedem
t’Alla, konfessur, konfidant, altruwista,
organizzatur, social worker,
missjunarju, psikologu, psiko-terapewta, oratur,
filantropu, edukatur u, skond x’wħud, għandu
jkun ukoll konjugi u ġenitur. Naħseb li l-vera
risposta hi sempliċi: is-saċerdot irid ikun bħal
Kristu tal-Vanġelu. U llum aktar minn qabel
għax l-isfidi huma akbar.
Kristu
tal-Vanġelu għandu l-isbaħ kwalitajiet umani:
il-kompassjoni, il-kommiżerazzjoni ma’ l-oħrajn
u l-komprensjoni. Qalilna li trid tħobb lil
għajrek bħalek innifsek. Naħseb li xi drabi ma
jridx jimxi bil-moħħ biss imma bil-qalb ukoll.
L-istorja tan-nagħġa l-mitlufa naħseb li hija
sintomatika ta’ dan. Ir-ragħaj ma mexiex
b’moħħu għax kieku ma kienx jissogra d-disa’ u
disgħin li, milli jidher, ħalla waħedhom biex
imur ifittex lil waħda mitlufa. Imma mexa
b’qalbu u mar isib nagħġa waħda għax kienet
fil-periklu.
Fil-fehma tiegħi, il-missjoni saċerdotali llum
hija aktar diffiċli minn qabel. Diġa’ ilna għal
xi żmien ngħixu f’dinja globalizzata u
urbanizzata. Hawn min jaħseb li wasalna
f’Ġerusalem il-Ġdida. Imma, kif tant tajjeb
osserva l-Papa Benedittu XVI fl-Enċiklika
Caritas in Veritate, “as society becomes even
more globalized, it makes us neighbours but does
not make us brothers”. Naħseb li progress
sar imma, fil-fehma umli tiegħi, dan hu
“progress ambigwu”. Għaliex, kif tista’
tispjega kif, pereżempju, tifel imwieled fil-Hawaii
minn missier Kenjan irnexxielu jilħaq il-ħolma
tiegħu u jsir President tal-unika super-potenza
fid-dinja, filwaqt li tifel bħalu imwieled
fil-Palestina jemmen fil-ħolma tiegħu li jsir
martri billi jkun “suicide bomber”?
Allura nistaqsi: “X’jonqos li jsir biex minn
soċjeta’ ta’ ġirien insiru soċjeta’ fraternal?”
U hawn fejn tidħol il-missjoni tagħna ilkoll,
b’mod partikolari tal-qassis, li nevanġelizzaw,
li nuru bi kliemna u mġibitna, l-effikaċja
tal-Vanġelu fiż-żminijiet tal-lum, li nkunu
“xhieda aktar inċiżiva tal-Vanġelu fid-dinja”.
Jeħtieġ li npoġġu fil-prattika s-seba’ opri
tal-ħniena: itma’ lil min hu bil-ġuħ; isqi lil
min hu bil-għatx; ilqa’ lill-frustier; libbes
lil min hu għeri; żur lill-marid; żur lil min hu
fil-ħabs; idfen lill-mejtin.
F’dinja fejn kollox għandu prezz, il-missjoni
tal-qassis hija imprezzabbli. F’dinja
sekolarizzata, relattivista u xettika fejn dak
li darba kien sagrosant mhux dejjem għadu
jitqies bħala tali minn kulħadd, il-qassis
mistenni jogħla ‘l fuq minn atteġġjament bħal
dan filwaqt li fl-istess ħin jidħol f’sintonija
mas-soċjeta’ biex ikun jista’ jaqdi l-missjoni
tiegħu fiha. Naħseb li waħda mill-akbar sfidi
li għandu l-qassis illum hija l-konfrontazzjoni
tal-fidi mas-sekulariżmu u r-relattiviżmu. Qatt
daqs illum ma kien hemm affront lill-fidi
daqshekk qawwi bħal ma qed naraw fi żmienna.
Is-sekulariżmu llum sar tassew
istituzzjonalizzat f’ħafna pajjiżi tal-punent.
Mhux kwistjoni ta’ separazzjoni bejn Stat u
Knisja – dan ilu jeżisti mhux ħażin
fil-prinċipju u huwa aċċettat minn kulħadd fid-dinja
tal-punent. Is-sekulariżmu llum huwa fattur
imwieżen mill-qrati, dawk Amerikani u Ewropej,
b’mod rigoruż u kultant anki kwazi fanatiku.
Is-sentenza tal-Qorti ta’ Strasburgu dwar
il-Kurċifiss (li għadha ma saritx res
judicata) hija biss manifestazzjoni waħda ta’
dan u jista’ jkun hemm oħrajn simili fil-futur.
Il-prinċipji umani li jeżistu anki barra
mir-reliġjon imma huma wisq iżjed imsaħħa
mit-tagħlim Nisrani – bħall-valur inestimabbli
tal-ħajja umana mill-bidu sat-tmiem naturali
tagħha – ukoll m’għadhomx meqjusa ċertezzi
assoluti kif kienu darba. Għal xi wħud, kollox
sar relattiv, jinbidel skond iċ-ċirkostanzi,
skond il-persuni u skond is-soċjeta’ partikolari.
Dan hu r-riżultat tas-sostituzzjoni ta’ dak li
darba kien sagru bis-sekulariżmu kif inhu mifhum
illum mhux biss mill-istati imma anki mill-individwi.
Is-saċerdot
irid jimmilita fis-soċjeta’ sabiex din tifhem li
l-valuri assoluti jibqgħu tali anki jekk xi
liġijiet qishom juru bil-maqlub. Fl-Istati
Uniti, il-Qorti Suprema iddekretat li l-abort
huwa dritt, dritt tal-għażla li żgur mhux
eżerċitat mill-fetu, imma n-Nisrani jemmen li l-ħajja
jixirqilha kull rispett u protezzjoni sa mill-konċepiment.
Dan hu veru każ fejn tapplika l-massima non
omne quod licet honestum est.
Id-dinjita’
u ċ-ċentralita’ tal-persuna huma ċ-ċentru tat-tagħlim
Nisrani. F’dan il-kuntest, il-persuna umana
tibda teżisti mill-bidu nett tal-konċepiment u
tibqa’ teżisti sat-tmiem naturali tal-ħajja.
Dan hu importanti ħafna għax id-definizzjoni
ġuridika ta’ persuna mhux dejjem taqbel ma’ dan.
F’ċerti sistemi ġuridiċi barranin, il-persuna
tibda tiġi rikonoxxuta minn meta titwieled u
għalhekk huwa minn dan il-punt li ssir suġġett
tad-drittijiet. Iżda għalina t-tarbija li għadha
fetu għandha drittijiet u dawn għandhom jiġu
mħarsa.
Saħansitra fil-vokabolarju popolari u
ġurnalistiku, kultant jintuża kliem li jbaxxi d-dinjita’
tal-persuna. Pereżempju, persuni li jaqgħu
f’koma u jkollhom ħafna mill-fakultajiet
bioloġiċi jiddependu fuq il-magni, kultant
jissejħu “vegetable”. Din il-mentalita’
tista’ tiġi użata sabiex tattenwa l-orrur
tal-ewtanasija. Fil-fehma tiegħi, vokabolarju
bħal dan inaqqas id-dinjita’ tal-persuna –
il-persuna qatt ma ssir ħaxixa anki meta
tiddependi għall-ħajja fuq mezzi artifiċjali u
meta l-moħħ jieqaf jiffunzjona. Kulħadd jaqbel
li hi parti kruċjali mill-missjoni tal-qassis, u
mhux tiegħu biss, li jiddefendi l-ħajja u l-persuna
umana b’kull mezz leġittimu.
F’Malta, l-Istat ma jipprattikax verżjoni
stretta ta’ sekulariżmu iżda jipprattika
sekulariżmu korrett bażat fuq liberta’ reliġjuża,
sussidjarjeta’ u solidarjeta’ kemm fuq livell
nazzjonali u kemm fuq livell internazzjonali. Hemm
min jemmen f’relattiviżmu, kif kien iddeskriva
l-Papa attwali fl-omelija tal-quddiesa dwar l-elezzjoni
tal-Papa ġdid fit-18 ta’ April 2005, meta dak
in-nhar kien għadu fil-kulleġġ tal-Kardinali,
“which does not recognize anything as definitive
and whose ultimate goal consists solely of one’s
own ego and desires”.
F’sitwazzjoni bħal din, ix-xogħol tal-qassis
isir diffikultuż u wieħed jistaqsi: “b’liema
mod il-qassis jista’ jeżerċita l-missjoni
pastorali tiegħu f’sitwazzjonijiet bħal dawn?”.
Il-prattika
tradizzjonali tar-reliġjon mill-poplu jidher li
statistikament naqset u forsi għadha qed tonqos.
Numru ta’ żgħażagħ huma xettiċi u aktar
imxaqilbin lejn attitudni razzjonalista,
speċjalment dawk li ħadu edukazzjoni għolja,
bħallikieku r-raġuni u x-xjenza jinsabu
f’taqbida mall-fidi. Il-qassis tal-lum naħseb
li jrid ikun aktar konvinċenti fl-argumenti
tiegħu li l-fidi u r-raġuni mhux bil-fors
jeskludu lil xulxin. Ix-xjenza fondata biss fuq
ir-raġuni u l-metodu xjentifiku hija valur imma
hemm ukoll is-sapjenza li wkoll hija verita’
mibnija mhux fuq ir-raġuni biss imma wkoll fuq
ir-rivelazzjoni. Din mhix xi tezi ġdida u jidher
li tista’ tiġi estrapolata mill-ewwel ittra ta’
San Pawl lill-Korintin (12,8) imma xorta waħda
għandha bżonn tiġi ripetuta u spjegata fiż-żmien
tal-lum.
Illum
tirrenja kultura tal-gratifikazzjoni istantanja
nutrita mill-konsumizmu. Il-kunċett ta’ liberta’
hu spiss interpretat ħażin. Il-liberta’ mhux
valur assolut imma huwa vinkolat ma’ dak tad-drittijiet
umani tal-ieħor, ma’ teżistix ġo vakum imma trid
tiġi meqjusa f’kuntest tar-relazzjonijiet
interpersonali fis-soċjeta’. Naħseb li l-qassis
għandu missjoni li jinterpreta l-liberta’ b’dan
il-mod meta jiġi rinfaċċjat b’mistoqsijiet dwar
il-liberta’ u l-ħajja reliġjuża u morali
tal-fidili.
Illum
il-qassis irid jiffaċċa sitwazzjonijiet li qabel
ma kienx jiltaqa’ magħhom daqshekk spiss. Per
eżempju, jirriżulta minn statistika tal-Uffiċċju
Nazzjonali tal-Istatistika (NSO) li fl-2003 n-numru
ta’ households b’ġenitur wieħed li
għandhom wild jew aktar, kienu jammontaw għal
1720 jew 1.3% tal-households kollha. Dan
tela’ għal 3650, jew 2.6% tal-households
kollha fl-2007. Skont l-NSO, fl-2007, 3% ta’
dawk li kellhom 16-il sena u li kienu jagħmlu
parti minn dawn il-households, kienu ma’
ġenituri separati jew divorzjati. Fl-2008,
twieldu 4126 tarbija. Minnhom 1048 twieldu
barra ż-żwieg u 351 minn dawn ġew dikjarati tfal
b’missier mhux magħruf.
Insemmi bħala eżempju l-każ ta’ Nsara li
jixtiequ jkomplu jipprattikaw ir-religjon imma
s-sitwazzjoni personali tagħhom hija irregolari
f’għajnejn il-Knisja. Illum għandna bosta
koppji f’relazzjonijiet extra-konjugali stabbli
u xi wħud minnhom jixtiequ jkomplu jirċievu s-sagramenti.
Kif se jiffaċċja sitwazzjonijiet bħal dawn is-saċerdot?
Il-qassis
se jiffaċċja aktar u aktar sitwazzjonijiet ta’
natura bio-etika fil-futur. Għall-grazzja
t’Alla, ma jidhirx li kellna każijiet ta’
ewtanasija f’Malta imma diġa’ għandna numru kbir
ta’, per ezempju, prokreazzjoni assistita.
Koppji li jsibu diffikulta’ li jkollhom tfal
b’mod ordinarju qed jirrikorru għal dan it-tip
ta’ għajnuna xjentifika. Mhux ħaġa faċli tlum
lil dawn il-koppji li jagħmlu użu minn mezzi
xjentifici sabiex ikollhom it-tfal. Kif se
jittratta ma’ dawn il-koppji s-saċerdot tal-lum
f’Malta?
Naħseb
li wieħed mill-aspetti importanti tal-missjoni
tal-qassis huwa li jimmira lejn il-ġustizzja
soċjali u l-ġid komuni. Żgur li s-saċerdot u
kull Kattoliku jista’ jużufruwixxi minn rikkezza
abbundanti ta’ tagħlim tal-Knisja dwar dan is-suġġett
partikolarment għal dokumenti u enċikliki bħal:
Rerum Novarum, Quadragesimo Anno, Mater et
Magistra, Pacem in Terris, Gaudium et Spes,
Populorum Progressio, Justicia in Mundo,
Laborem Exercens, u oħrajn. Ħafna Kattoliċi
mhumiex informati biżżejjed fuq il-kontenut
fundamentali tat-tagħlim soċjali tal-Knisja u li
dan huwa parti essenzjali mill-fidi Kattolika u
huwa bbażat fuq il-Vanġelu. Dan it-tagħlim
igħin lill-qassis fit-tixrid u r-realizzazzjoni
tal-missjoni soċjali tal-Knisja u jista’ jgħin
sabiex isaħħaħ il-fidi fost l-Insara.
L-enċikliki
tal-Papa Benedettu XVI Deus Caritas Est u
l-aħħar waħda Caritas in Veritate, hemm
fihom “il-karita’/l-imħabba” fil-qalba tat-tagħlim
soċjali tal-Knisja u li din trid tkun marbuta
mal-verita’. Dwar il-ġustizzja u l-ġid komuni,
din l-enċiklika tgħid “Il-Knisja m’għandhiex
soluzzjonijiet tekniċi x’toffri” iżda għandha
“a mission of truth to accomplish for a society
that is attuned to man, to his dignity, to his
vocation…”
Naħseb
li l-poplu japprezza l-missjoni soċjali
tal-Knisja li, għall-grazzja t’Alla, għandha
tradizzjoni antika f’Malta u fid-dinja. Inħoss
li fost is-saċerdoti l-aktar ammirati
fis-soċjeta’ nsibu lil dawk li jaħdmu sabiex
jaġevolaw il-problemi soċjali. Hawnhekk in-nies
tara l-Kristu ħaj li ma jikkundannax imma jifhem
u jagħmel dak kollu li jista’ sabiex itaffi t-tbatija
tal-individwi u l-familji Maltin. Insibu
saċerdoti li fetħu jew qed imexxu djar għal nies
b’diżabilita’ jew għal tfal orfni u jirnexxilhom
iżommuhom għaddejjin bi sforzi enormi u jegħlbu
diffikultajiet finanzjarji ta’ kuljum. Insibu
saċerdoti li saħansitra fetħu darhom stess għal
min m’għandux saqaf fuq rasu. Naħseb li dawn
huma l-eżempji, u hemm oħrajn bhalhom, li jfehmu
lin-nies min hu u x’inhu verament Kristu.
Naħseb li dawn l-eżempji jitkellmu wisq aktar
elokwentement minn volumi sħaħ ta’ duttrina għax
imissu mhux biss il-moħħ imma aktar u aktar
il-qalb, is-sentiment uman. Il-kelma tiġbed
imma l-eżempju jkaxkar. Bosta qassisin kienu
pijunieri ta’ servizzi socjali sa minn qabel
dawn bdew jigu provduti mill-Istat.
Aktar
ma s-socjeta’ qed tiżvesti ruħha mill-umanita’,
aktar is-saċerdot irid jidher li hu uman. L-umanita’
hija ċentrali għall-Kristjaneżmu, Alla mhux biss
ħoloq il-bniedem fix-xbieha tiegħu imma sar
bniedem bħalu – imma hu biss kien bniedem
perfett, il-bqija tal-umanita mhix perfetta u
Kristu kien jafu tajjeb dan. Is-soċjeta’ naħseb
li għandha għatx għall-umanita’ f’kuntest fejn
l-uman qed jingħata l-ġenb.
Is-saċerdot huwa bniedem u jibqa’ suġġett
għad-debbolizzi umani imma l-awtorita’ morali
tiegħu tiddependi fuq l-eżempju li jagħti
permezz ta’ ħajja li togħla ‘l fuq mid-dgħjufija
umana. F’Malta, żgur li l-maġġoranza kbira
tas-saċerdoti dejjem kienu ta’ eżempju sabiħ u
ta’ servizz utli lill-komunita’ Nisranija. Dan
naħseb li hu vitali għall-missjoni saċerdotali
meta fl-aħbarijiet ġie li nstemgħu każijiet
pjuttost rari barra minn Malta fejn xi saċerdoti
setgħu żbaljaw. Naħseb li s-soċjeta’ tistenna
li l-elementi tal-qdusija u r-rettitudni jkunu
fondamentali fil-qassis u li dawk li jemmnu
jaraw fih lil Kristu jgħammar fostna. Il-qassis
għandu l-missjoni li jgħin lill-individwu
jiżviluppa l-personalita’ tiegħu u dan jista’
jagħmlu permezz tat-tagħlim Nisrani u
tal-eżempju li jagħti b’ħajtu stess. Il-vokazzjoni
tas-saċerdot hija waħda divina u s-soċjeta’
tħares lejn il-qassis bħala l-bniedem t’Alla li
jgħix fid-dinja, lest anki għas-sagrifiċċju,
imma bil-għan aħħari ta’ xi ħaġa wisq ogħla u
permanenti u ta’ valur akbar minn dak li tista’
qatt toffri d-dinja temporali.
Nirringrazzjakom. |