Għeżież ħuti,
Insellem lill-pellegrini kollha preżenti fis-Santwarju tad-Divino Amore u lil dawk li qegħdin magħqudin magħna mis-Santwarji Marjani ta’ Lourdes, Nazareth, Lujan, Vailankanni, Guadalupe, Akita, Nairobi, Benneux, Częstochowa u Marian Valley.
Il-lejla qed inħossni magħqud magħkom ilkoll fit-talba tar-Rużarju Mqaddes u ta’ l-Adorazzjoni Ewkaristika taħt il-ħarsa tal-Verġni Marija.
Il-ħarsa! Kemm hi importanti! Ħwejjeġ bħal dawn tista’ tgħidhom b’ħarsa! Affett, inkuraġġament, kompassjoni, imħabba, imma anki ċanfir, għira, suppervja, saħansitra mibegħda. Spiss il-ħarsa tgħid ħafna iżjed mill-kliem, jew tgħid dak li l-kliem ma jirnexxilux jew ma jissograx jgħid.
Lejn min qed tħares il-Verġni Marija? Tħares lejna lkoll, lejn kull wieħed u waħda minna. U kif tħares lejna? Tħares lejna bħala Omm, bi ħlewwa, bi ħniena, bi mħabba. Hekk ħarset lejn binha Ġesù, fil-mumenti kollha ta’ ħajjitha, f’dawk ta’ ferħ, ta’ dawl, ta’ tbatija, ta’ glorja, kif nikkontemplaw fil-Misteru tar-Rużarju Mqaddes, sempliċement bi mħabba.
Meta nħossuna għajjiena, qalbna maqtugħa, magħfusin mill-problemi, inħarsu lejn Marija, inħossu l-ħarsa tagħha li tgħid lil qalbna: “Kuraġġ, ibni, hawn jien biex inwieżnek!”. Il-Madonna tafna tajjeb, hi ommna, taf tajjeb liema huma l-ferħ u d-diffikultajiet tagħna, it-tamiet u d-delużjonijiet tagħna. Meta nħossu fuqna t-toqol tad-dgħufijiet tagħna, ta’ dnubietna, inħarsu lejn Marija, li tgħid lil qalbna: “Qum, mur għand Ibni Ġesù, Fih issib lil min jilqgħek, iħenn għalik u jagħtik qawwa ġdida biex tkompli bil-mixja tiegħek”.
Il-ħarsa ta’ Marija ma ddurx biss lejna. F’riġlejn is-salib, meta Ġesù jafdalha lill-Appostlu Ġwanni, u miegħu lilna lkoll, billi jgħidilha: “Mara, hawn hu ibnek” (Ġw 19:26), il-ħarsa ta’ Marija hi mwaħħla fuq Ġesù. U Marija tgħidilna, kif qalet fit-tieġ ta’ Kana: “Agħmlu kull ma jgħidilkom hu” (Ġw 2:5). Marija turina lil Ġesù, tgħinna nagħtu xhieda ta’ Ġesù, tmexxina dejjem lejn Binha Ġesù, għax Fih biss hemm salvazzjoni, Hu biss jista’ jibdel l-ilma tas-solitudni, tad-diffikultà, tad-dnub, fl-inbid tal-laqgħa, tal-ferħ, tal-maħfra. Hu biss.
“Hienja dik li emmnet!”. Marija hi hienja minħabba fil-fidi tagħha f’Alla, minħabba fil-fidi tagħha, għax il-ħarsa tal-qalb tagħha dejjem kienet iffissata fuq Alla, fuq l-Iben ta’ Alla li ġarret f’ġufha u kkontemplat fuq is-Salib. Fl-Adorazzjoni tas-Santissmu Sagrament, Marija tgħidilna: “Ħares lejn Ibni Ġesù, żomm ħarstek fissa fuqU, isimgħU, tkellem miegħU. Hu qed iħares lejk bi mħabba. La tibżax! Hu jgħallmek kif timxi warajh biex tagħti xhieda tiegħu fl-għemejjel kbar u żgħar ta’ ħajtek, fir-relazzjonijiet fil-familja, fuq ix-xogħol, fil-mumenti ta’ festa; jgħallmek kif toħroġ minnek innifsek, biex tħares lejn l-oħrajn bl-imħabba, kif Hu, mhux bil-kliem imma bil-fatti, ħabbek u jħobbok!”.
O Marija, agħtina li nħossu mwaħħla fuqna din il-ħarsa tiegħek ta’ Omm, mexxina lejn Ibnek, agħmel li ma nkunux Insara “tal-vetrina”, imma Nsara li nafu “inħammġu jdejna” biex flimkien ma’ Ibnek Ġesù nibnu s-Saltna tiegħu ta’ mħabba, ta’ hena u ta’ sliem.
miġjub mit-Taljan għall-Malti minn Francesco Pio Attard |